ᱥᱟᱯᱲᱮᱛ ᱟᱲᱟᱝ
ᱱᱤᱛᱚᱜ ᱚᱠᱛᱚ ᱛᱤᱱᱟᱹᱜ ᱥᱟᱥᱛᱟ ᱟᱠᱟᱱᱟ ᱾ ᱠᱟᱨᱵᱟᱨ ᱥᱮ ᱠᱟᱹᱣᱰᱤ ᱟᱨᱡᱟᱣ ᱨᱮᱱᱟᱜ ᱦᱚᱨ ᱰᱟᱦᱟᱨ ᱦᱚᱸ ᱩᱱᱟᱹᱜ ᱜᱮ ᱟᱞᱜᱟ ᱟᱠᱟᱱᱟ ᱾ ᱪᱮᱫᱟᱜ ᱥᱮ ᱯᱷᱮᱥᱵᱩᱠ ᱞᱮᱠᱟᱱ ᱢᱮᱞᱟᱝᱠᱤ ᱠᱷᱚᱱ ᱦᱚᱸ ᱠᱟᱹᱣᱰᱤ ᱟᱨᱡᱟᱣ ᱜᱟᱱᱚᱜ ᱠᱟᱱᱟ ᱾
ᱪᱮᱫ, ᱱᱚᱣᱟ ᱠᱟᱛᱷᱟ ᱥᱟᱹᱨᱤᱭᱟ ? ᱠᱟᱹᱣᱰᱤ ᱟᱨᱡᱟᱣ ᱩᱱᱟᱹᱜ ᱜᱮ ᱟᱞᱜᱟ ᱛᱮ !!!
ᱠᱟᱹᱣᱰᱤ ᱟᱨᱡᱟᱣ ᱨᱮᱭᱟᱜ ᱫᱚ ᱵᱟᱨᱭᱟ ᱦᱚᱨ ᱢᱮᱱᱟᱜ-ᱟ ᱾ ᱢᱤᱫ ᱫᱚ ᱠᱷᱟᱹᱴᱚ ᱦᱚᱨ ᱟᱨ ᱵᱟᱹᱲᱤᱡ ᱠᱟᱹᱢᱤ ᱛᱮ ᱩᱥᱟᱹᱨᱟ ᱟᱨᱡᱟᱣᱜ-ᱟ ᱾ ᱡᱟᱦᱟᱸ ᱨᱮᱫᱚ ᱧᱩᱛᱩᱢ ᱵᱟᱝ ᱟᱨᱡᱟᱣᱜ-ᱟ ᱟᱨ ᱡᱟᱦᱟᱸ ᱛᱤᱥ ᱜᱮ ᱠᱟᱨᱵᱟᱨ ᱢᱩᱪᱟᱹᱫ ᱫᱟᱲᱮᱭᱟᱜ ᱨᱮᱱᱟᱜ ᱵᱚᱛᱚᱨ ᱛᱟᱦᱮᱸᱱᱟ ᱾
ᱫᱚᱥᱟᱨ ᱨᱮ ᱦᱩᱭᱩᱜ ᱠᱟᱱᱟ, ᱠᱷᱟᱹᱴᱟᱹᱲᱤ ᱦᱚᱨ ᱨᱮᱫᱚ ᱵᱤᱞᱚᱢ ᱛᱮ ᱠᱟᱹᱣᱰᱤ ᱟᱨᱡᱟᱣᱜ-ᱟ ᱾ ᱡᱟᱦᱟᱸ ᱫᱚ ᱵᱤᱞᱚᱢ ᱛᱮ ᱟᱨᱡᱟᱣᱜ ᱨᱮᱦᱚᱸ, ᱵᱟᱹᱲᱛᱤ ᱚᱠᱛᱚ ᱫᱷᱟᱹᱵᱤᱡ ᱠᱟᱹᱣᱰᱤ ᱱᱟᱯᱟᱭ ᱛᱮ ᱟᱨᱡᱟᱣᱜ ᱨᱮᱭᱟᱜ ᱜᱚᱲᱚ ᱛᱟᱦᱮᱸᱱᱟ ᱾
ᱯᱷᱮᱥᱵᱩᱠ ᱠᱷᱚᱱ ᱟᱹᱰᱤ ᱦᱚᱲ ᱜᱮ ᱠᱟᱹᱣᱰᱤ ᱠᱚ ᱟᱨᱡᱟᱣ ᱮᱫ ᱜᱮᱭᱟ ᱾ ᱡᱟᱦᱟᱸᱭ ᱠᱚᱫᱚ ᱯᱷᱚᱞᱚᱣᱚᱨᱥ ᱟᱨ ᱵᱷᱤᱣᱚᱨᱥ ᱠᱚ ᱱᱟᱯᱟᱭ ᱛᱮᱠᱚ ᱧᱟᱢ ᱫᱟᱲᱮ ᱟᱠᱟᱣᱟᱫ ᱠᱚᱣᱟ ᱾ ᱟᱨ ᱦᱚᱸ ᱟᱹᱰᱤ ᱦᱚᱲ ᱜᱮ ᱯᱷᱮᱥᱵᱩᱠ ᱠᱷᱚᱱ ᱠᱟᱹᱣᱰᱤ ᱟᱨᱡᱟᱣ ᱨᱮᱭᱟᱜ ᱟᱸᱥ ᱠᱷᱟᱹᱛᱤᱨ ᱥᱤᱧ ᱧᱤᱫᱟᱹ ᱯᱷᱳᱴᱳ, ᱵᱷᱤᱰᱭᱳ ᱟᱯᱞᱳᱰ ᱠᱚ ᱪᱷᱩᱴᱟᱹᱣ ᱠᱚᱜ ᱠᱟᱱᱟ ᱾ ᱚᱱᱟᱨᱮ ᱯᱷᱮᱥᱵᱩᱠ ᱟᱜ ᱞᱮᱠᱟᱱ ᱞᱮᱠᱟᱱ ᱟᱹᱰᱤ ᱞᱮᱠᱟᱱ ᱯᱳᱞᱤᱥᱤ, ᱪᱟᱞᱮᱸᱡᱽ ᱛᱟᱦᱮᱸᱱᱟ ᱾ ᱚᱱᱟ ᱠᱚ ᱯᱩᱨᱩᱱ ᱤᱫᱤ ᱞᱮ ᱮᱱᱟᱝ ᱢᱟᱬᱟᱝ ᱛᱮᱢ ᱞᱟᱦᱟ ᱠᱮᱭᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱟᱵᱚ ᱨᱤᱱ ᱦᱚᱲ ᱠᱚ ᱱᱤᱦᱟᱹᱛᱤ ᱜᱮ ᱟᱠᱚᱣᱟᱜ ᱥᱚᱨᱮᱥ ᱠᱟᱹᱢᱤ ᱰᱷᱤᱞᱟᱹᱣ ᱠᱟᱛᱮ, ᱟᱨ ᱦᱚᱸ ᱱᱚᱣᱟ ᱠᱷᱚᱱ ᱱᱟᱯᱟᱭ ᱱᱟᱯᱟᱭ ᱠᱟᱹᱢᱤ ᱠᱚ ᱠᱟᱹᱢᱤ ᱫᱟᱲᱮᱭᱟᱜ ᱞᱮᱠᱟᱱ ᱠᱟᱹᱢᱤ ᱠᱷᱚᱱ ᱥᱟᱦᱟ ᱠᱟᱛᱮ, ᱪᱷᱩᱴᱟᱹᱣ ᱠᱚᱜ ᱠᱟᱱᱟ ᱠᱚ ᱯᱷᱳᱥᱵᱩᱠ ᱪᱟᱞᱮᱸᱡᱽ ᱯᱩᱨᱩᱱ ᱾ ᱚᱱᱟᱨᱮ ᱠᱚᱢᱮᱴ ᱛᱟᱭᱚᱢ ᱠᱚᱢᱮᱴ ᱛᱮᱞᱟ ᱨᱩᱣᱟᱹᱲ ᱨᱮᱠᱚ ᱞᱟᱵᱟᱫᱷᱤᱭᱟᱹᱣ ᱠᱚᱜ ᱠᱟᱱᱟ ᱾ 500 ᱠᱚᱢᱮᱴ, 1000 ᱠᱚᱢᱮᱴ ᱾ ᱤᱠᱷᱟᱹᱱ ᱵᱟᱝ ᱫᱚ ᱯᱟᱸᱡᱟ ᱠᱚᱠᱚ ᱵᱟᱹᱲᱛᱤᱜ ᱠᱟᱱ, ᱟᱨ ᱵᱟᱝ ᱫᱚ ᱧᱮᱧᱮᱞᱤᱭᱟᱹ ᱜᱮ ᱾
ᱱᱚᱰᱮ ᱫᱚ ᱤᱧ ᱱᱚᱣᱟ ᱢᱮᱱ ᱥᱟᱱᱟᱹᱧ ᱠᱟᱱᱟ, ᱟᱹᱰᱤ ᱩᱥᱟᱹᱨᱟ ᱩᱭᱦᱟᱹᱨ ᱟᱨ ᱠᱷᱟᱴᱚ ᱦᱚᱨ ᱛᱮ ᱢᱟᱬᱟᱝ ᱞᱟᱦᱟᱜ ᱦᱚᱸ ᱢᱤᱫ ᱦᱚᱲᱟᱜ ᱡᱤᱭᱚᱱ ᱵᱚᱨᱵᱟᱫᱽ ᱠᱟᱛᱮ ᱛᱟᱦᱮᱸ ᱫᱚᱦᱚᱜ-ᱟ ᱾ ᱡᱟᱦᱟᱸᱭ ᱦᱚᱲ ᱠᱚ ᱦᱟᱺᱰᱤ, ᱯᱟᱹᱣᱨᱟᱹ ᱧᱩ ᱠᱟᱛᱮ, ᱯᱟᱛᱟ, ᱡᱟᱛᱨᱟ ᱠᱩᱫᱟᱹᱣ ᱟᱛᱮ ᱚᱠᱛᱚ ᱟᱨ ᱡᱤᱭᱚᱱ ᱠᱚ ᱵᱮᱠᱟᱨ ᱜᱤᱰᱤ ᱠᱟᱜ ᱠᱟᱱ ᱛᱟᱠᱚᱣᱟ ᱾ ᱴᱷᱤᱠ ᱚᱱᱠᱟ ᱜᱮ ᱯᱷᱮᱥᱵᱩᱠ ᱠᱚᱨᱮ ᱦᱚᱸ ᱟᱯᱱᱟᱨᱟᱜ ᱯᱷᱳᱴᱳ ᱮᱢ ᱜᱮ ᱥᱮ ᱚᱠᱚᱭ ᱞᱟᱹᱜᱤᱫ ᱦᱚᱸ ᱪᱮᱫ ᱠᱟᱹᱢᱤ ᱨᱮ ᱵᱟᱝ ᱦᱤᱡᱩᱜ ᱞᱮᱠᱟᱱ ᱵᱷᱤᱰᱤᱭᱳ ᱠᱚ ᱮᱢ ᱠᱟᱛᱮ, ᱚᱱᱟ ᱨᱮᱭᱟᱜ ᱞᱟᱭᱤᱠ ᱦᱤᱥᱟᱹᱵᱽ ᱟᱨ ᱠᱚᱢᱮᱴᱥ ᱨᱤᱯᱞᱟᱭ ᱫᱚ ᱢᱤᱫ ᱦᱚᱲᱟᱜ ᱚᱠᱛᱚ ᱟᱨ ᱡᱤᱭᱚᱱ ᱵᱷᱟᱨᱟᱵᱷᱟᱴ ᱜᱤᱰᱤ ᱜᱮ ᱾
ᱱᱤᱭᱟᱹ ᱠᱚ ᱱᱤᱝᱠᱟᱹ ᱵᱟᱲᱟᱭ ᱛᱮᱜᱮ ᱢᱤᱫ ᱦᱚᱲᱟᱜ ᱥᱟᱱᱟᱢ ᱞᱮᱠᱟᱱ ᱚᱠᱛᱚ ᱟᱨ ᱩᱢᱮᱨ ᱯᱟᱨᱚᱢ ᱪᱟᱵᱟ ᱜᱤᱰᱤᱜ-ᱟ ᱾ ᱩᱱᱠᱩ ᱦᱚᱲ ᱫᱚ ᱱᱚᱣᱟ ᱩᱭᱦᱟᱹᱨ ᱛᱤᱭᱩᱜ ᱞᱟᱹᱜᱤᱫ ᱛᱟᱠ ᱦᱚᱸ ᱵᱟᱝ ᱠᱚ ᱧᱟᱢᱟ, ᱪᱤ ᱢᱟᱹᱱᱢᱤ ᱡᱤᱭᱚᱱ ᱫᱚ ᱛᱤᱱᱟᱹᱜ ᱢᱟᱨᱟᱝ ᱟᱨ ᱞᱟᱹᱠᱛᱤ ᱟᱱᱟᱜ ᱡᱤᱭᱚᱱ ᱠᱟᱱᱟ ᱾
***
E-Magazine Signup form
Signup to get latest updates on Ayoarang e-magazine website directly to your email.