ᱮᱠᱞᱟ ᱡᱤᱭᱚᱱ

ᱟᱵᱚ ᱥᱟᱶᱛᱟ ᱛᱟᱞᱟ ᱨᱮ ᱧᱮᱞᱚᱜ ᱠᱟᱱ, ᱟᱹᱰᱤ ᱜᱮ ᱢᱟᱨᱟᱝ ᱮᱴᱠᱮᱴᱚᱬᱮ ᱤᱫᱤ ᱠᱟᱛᱮ ᱵᱟᱨ ᱠᱟᱛᱷᱟᱹᱧ ᱨᱚᱲᱟ ᱾ ᱡᱟᱦᱟᱸᱭ ᱴᱷᱮᱱ ᱱᱚᱝᱠᱟᱱ ᱠᱟᱛᱷᱟ ᱩᱭᱦᱟᱹᱨ ᱥᱮ ᱨᱚᱲ ᱵᱟᱹᱲᱤᱡ ᱡᱚᱝ ᱨᱮᱭᱟᱜ ᱫᱟᱲᱮ ᱟᱨ ᱥᱟᱦᱟᱥ ᱦᱚᱸ ᱛᱟᱦᱮᱸ ᱞᱟᱹᱠᱛᱤ ᱾

Social Media ᱠᱚ ᱦᱚᱛᱮᱛᱮ ᱱᱟᱦᱟᱜ ᱵᱟᱹᱲᱛᱤ ᱜᱮ ᱧᱮᱞᱚᱜ ᱠᱟᱱᱟ, ᱥᱟᱶᱛᱟ ᱨᱮ ᱵᱟᱹᱦᱩ ᱠᱩᱲᱤ ᱠᱚᱣᱟᱜ ᱮᱴᱟᱜ ᱠᱚᱲᱟ ᱦᱚᱯᱚᱱ ᱥᱟᱶ ᱫᱩᱞᱟᱹᱲ ᱥᱟᱹᱜᱟᱹᱭ ᱾ ᱥᱟᱹᱨᱤ ᱠᱟᱛᱷᱟ ᱡᱩᱫᱤ ᱵᱚ ᱢᱮᱱᱟ, ᱱᱚᱣᱟ ᱠᱟᱛᱷᱟ ᱥᱮ ᱱᱚᱣᱟ ᱮᱴᱠᱮᱴᱚᱬᱮ ᱱᱤᱛᱚᱜ ᱥᱩᱢᱩᱝ ᱨᱮᱭᱟᱜ ᱫᱚ ᱵᱟᱝ ᱠᱟᱱᱟ ᱾ ᱱᱚᱣᱟ ᱫᱚ ᱯᱟᱹᱦᱤᱞ ᱠᱷᱚᱱ ᱦᱮᱡ ᱟᱹᱜᱩ ᱟᱠᱟᱱ ᱢᱤᱫ ᱢᱟᱨᱮ ᱜᱷᱚᱴᱚᱱ ᱜᱮ ᱠᱟᱱᱟ ᱾ ᱱᱚᱣᱟ ᱨᱮᱭᱟᱜ ᱚᱡᱮ ᱵᱟᱰᱟᱭ ᱞᱟᱦᱟ ᱨᱮ ᱟᱨ ᱢᱤᱫ ᱜᱷᱚᱴᱚᱱ ᱥᱮᱫ ᱦᱚᱸ ᱱᱟᱥᱮ ᱵᱚ ᱩᱭᱩᱝ ᱧᱚᱜᱟ ᱾

ᱥᱟᱶᱛᱟ ᱨᱮᱱᱟᱜ ᱨᱟᱭᱨᱤᱛ ᱞᱮᱠᱟᱛᱮ ᱢᱤᱫ ᱦᱚᱯᱚᱱ ᱮᱨᱟ ᱡᱟᱱᱟᱢ ᱚᱲᱟᱜ ᱨᱮ ᱛᱟᱦᱮᱸᱱ ᱨᱮᱭᱟᱜ ᱚᱫᱷᱤᱠᱟᱨ ᱵᱟᱹᱱᱩᱜ ᱟᱱ ᱛᱟᱭᱟ ᱾ ᱡᱟᱶᱟᱭ ᱚᱲᱟᱜ ᱵᱟᱭ ᱞᱮᱵᱮᱫ ᱟᱠᱟᱫ ᱠᱩᱲᱤ ᱦᱚᱯᱚᱱ ᱫᱚ ᱥᱟᱶᱛᱟ ᱨᱮᱭᱟᱜ ᱟᱹᱰᱤ ᱜᱟᱱ ᱨᱚᱲ, ᱥᱤᱬᱤᱡ, ᱵᱟᱨᱚᱱ, ᱵᱚᱭᱟᱱ ᱥᱟᱦᱟᱣ ᱦᱩᱭ ᱟᱭᱟ ᱢᱤᱫ ᱵᱮᱲᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱩᱱᱤ ᱡᱟᱶᱟᱭ ᱚᱲᱟᱜ ᱮ ᱢᱚᱦᱰᱟᱜ-ᱟ ᱾ ᱤᱠᱷᱟᱹᱱ ᱡᱟᱶᱟᱭ ᱚᱲᱟᱜ ᱨᱮ ᱫᱚ ᱪᱮᱫ ᱥᱚᱱᱟ ᱛᱷᱟᱹᱨᱤ ᱨᱮᱭ ᱥᱮᱯᱮᱧ ᱠᱚᱜ ᱛᱮ ᱾ ᱚᱱᱮ ᱠᱚ ᱢᱮᱱᱟ, ᱡᱟᱶᱟᱭ ᱚᱲᱟᱜ ᱵᱤᱫᱟᱹᱭᱚᱜ ᱫᱚ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱠᱩᱲᱤ ᱦᱚᱯᱚᱱᱟᱜ ᱫᱚᱥᱟᱨ ᱡᱟᱱᱟᱢ ᱠᱟᱱᱟ ᱾ ᱩᱱᱤ ᱩᱱᱟᱹᱜ ᱜᱮ ᱥᱟᱦᱟᱣ ᱠᱟᱛᱮ ᱛᱟᱦᱮᱸ ᱦᱩᱭ ᱟᱭᱟ ᱾ ᱡᱮᱞᱮᱠᱟ – ᱢᱮᱫ-ᱫᱟᱜ ᱛᱮ ᱦᱟᱥᱟ ᱥᱤᱯᱤ ᱠᱟᱛᱮ ᱜᱷᱟᱨᱚᱸᱡᱽ ᱜᱚᱲᱦᱚᱱ ᱦᱩᱭ ᱟᱭᱟ ᱾ ᱚᱱᱟ ᱡᱤᱭᱚᱱ ᱨᱮ ᱩᱱᱤ ᱵᱟᱝ ᱫᱚ ᱫᱩᱞᱟᱹᱲ ᱮ ᱧᱟᱢ, ᱵᱟᱝ ᱫᱚ ᱚᱠᱚᱭ ᱴᱷᱮᱱ ᱠᱷᱚᱱ ᱜᱚᱨᱚᱡᱽ ᱜᱮ, ᱵᱟᱝ ᱫᱚ ᱚᱠᱟ ᱥᱮᱫ ᱠᱷᱚᱱ ᱱᱟᱥᱮ ᱢᱟᱹᱱ ᱟᱨᱵᱟᱝ ᱫᱚ ᱥᱩᱠ, ᱥᱩᱞᱩᱠ ᱥᱮ ᱥᱟᱹᱱᱛᱤ ᱜᱮ ᱢᱚᱱᱮ ᱡᱤᱣᱤ ᱥᱮ ᱦᱚᱲᱢᱚ ᱨᱮ ᱛᱟᱦᱮᱸᱱ ᱾ ᱡᱟᱱᱟᱢ ᱚᱲᱟᱜ ᱠᱷᱚᱱ ᱮ ᱪᱩᱰᱟᱹᱨ ᱟᱠᱟᱱ, ᱡᱟᱶᱟᱭ ᱚᱲᱟᱜ ᱨᱮ ᱵᱟᱭ ᱟᱯᱱᱟᱨ ᱟᱠᱟᱱ ᱢᱮᱫ-ᱫᱟᱜ ᱡᱚᱨᱚ ᱠᱟᱛᱮ ᱡᱤᱭᱚᱱ ᱮ ᱠᱷᱟᱸᱰᱟᱣᱟ ᱟᱡᱟᱜ ᱠᱚᱯᱟᱲ ᱞᱤᱠᱷᱚᱱ ᱢᱚᱱᱮ ᱠᱟᱛᱮ᱾

ᱥᱟᱭ ᱥᱟᱭᱠᱚᱨᱟ ᱠᱷᱚᱱ ᱟᱜᱮ ᱜᱷᱚᱴᱚᱱ ᱫᱚ ᱱᱚᱝᱠᱟ ᱦᱚᱸ ᱧᱮᱞ ᱟᱠᱟᱱᱟ, ᱡᱟᱦᱟᱸᱭ ᱠᱚᱲᱟ ᱦᱚᱯᱚᱱ ᱫᱚ ᱵᱟᱯᱞᱟ ᱠᱟᱛᱮ ᱨᱮᱦᱚᱸ ᱵᱟᱦᱨᱮ ᱫᱟᱬᱟᱱ ᱠᱷᱚᱱ ᱚᱲᱟᱜ ᱛᱮ ᱩᱱᱟᱹᱜ ᱞᱚᱜᱚᱱ ᱵᱟᱝ ᱠᱚ ᱨᱩᱣᱟᱹᱲ ᱫᱟᱲᱮᱭᱟᱜ-ᱟ ᱾ ᱚᱱᱟ ᱵᱮᱲᱟ ᱨᱮ ᱵᱟᱹᱦᱩ, ᱮᱨᱟ ᱟᱨ ᱮᱸᱜᱟᱛ ᱜᱮ ᱜᱷᱟᱨᱚᱸᱡᱽ ᱨᱮᱱᱟᱜ ᱡᱚᱛᱚᱣᱟᱜ ᱮ ᱦᱟᱹᱨ ᱥᱟᱢᱴᱟᱣ ᱡᱚᱛᱚᱱ ᱦᱟᱱᱛᱟᱲᱟ ᱾ ᱦᱚᱯᱚᱱ ᱟᱹᱰᱤ ᱵᱮᱲᱟ ᱨᱮ ᱟᱹᱰᱤ ᱞᱮᱠᱟᱱ ᱵᱟᱦᱨᱮ ᱠᱩᱲᱤ ᱦᱚᱸ ᱚᱲᱟᱜ ᱛᱮᱭ ᱟᱹᱜᱩ ᱥᱮᱴᱮᱨ ᱠᱚᱣᱟ ᱾ ᱢᱤᱫ ᱮᱨᱟ ᱠᱷᱚᱱ ᱵᱟᱨ ᱮᱨᱟ, ᱯᱮ ᱮᱨᱟᱜ ᱟᱭ ᱾ ᱜᱷᱟᱨᱚᱸᱡᱽ ᱟᱨ ᱥᱟᱶᱛᱟ ᱨᱮᱭᱟᱜ ᱟᱯᱱᱟᱨ ᱵᱮᱵᱷᱟᱨ ᱛᱟᱞᱟ ᱛᱮ ᱾

ᱱᱚᱣᱟ ᱵᱮᱲᱟ ᱨᱮ ᱵᱟᱹᱦᱩ ᱠᱩᱲᱤ ᱦᱚᱸ ᱟᱹᱰᱤ ᱜᱟᱱ ᱮᱠᱞᱟ, ᱱᱤᱪᱚᱞ, ᱱᱤᱥᱚᱱ ᱚᱠᱛᱚᱭ ᱥᱟᱢᱟᱝ ᱟᱠᱟᱫ ᱜᱮᱭᱟ ᱾ ᱩᱱᱤ ᱦᱚᱸᱭ ᱢᱟᱹᱱᱢᱤ ᱠᱟᱱ ᱜᱮᱭᱟ ᱾ ᱩᱱᱤ ᱦᱚᱸᱭ ᱮᱠᱞᱟᱜ ᱜᱮᱭᱟ ᱾ ᱩᱱᱤ ᱦᱚᱸ ᱢᱚᱱᱮ ᱵᱷᱩᱞᱟᱹᱣ ᱫᱩᱞᱟᱹᱲ ᱵᱮᱵᱷᱟᱨ ᱧᱟᱢ ᱨᱮᱭᱟᱜ ᱦᱚᱠ ᱢᱮᱱᱟᱜ ᱜᱮ ᱛᱟᱭᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱟᱡᱟᱜ ᱢᱚᱱᱮ ᱦᱚᱸ ᱟᱺᱰᱤᱡ ᱜᱚᱫᱚᱜ ᱜᱮᱭᱟ ᱵᱟᱦᱨᱮ ᱥᱮᱫ ᱾ ᱤᱠᱷᱟᱹᱱ ᱱᱚᱣᱟ ᱵᱮᱲᱟ ᱨᱮ ᱩᱱᱤ ᱫᱚᱭ ᱥᱟᱢᱟᱝ-ᱟ ᱵᱚᱫᱽ ᱪᱩᱨᱤᱛ ᱾ ᱚᱲᱟᱜ ᱠᱷᱚᱱ ᱜᱚᱦᱚᱲ ᱛᱩᱫ ᱠᱟᱛᱮ ᱫᱚᱨᱵᱟᱨ ᱟᱠᱷᱲᱟ ᱨᱮ ᱠᱷᱩᱱᱴᱤ ᱨᱮ, ᱫᱟᱨᱮ ᱨᱮ ᱞᱟᱹᱴᱤᱡ ᱛᱮ ᱛᱚᱞ ᱠᱟᱛᱮ ᱫᱤᱥᱚᱢ ᱦᱚᱲ ᱠᱚ ᱵᱤᱪᱟᱹᱨ ᱟᱭᱟ ᱾ ᱡᱮᱢᱚᱱ ᱩᱱᱤᱭᱟᱜ ᱡᱤᱭᱚᱱ ᱫᱚ ᱚᱸᱰᱮ ᱜᱮ ᱱᱟᱥᱟᱣ ᱪᱟᱵᱟ ᱟᱠᱟᱱᱟ ᱾ ᱜᱚᱴᱟᱯᱟᱲᱟ ᱠᱷᱚᱱ ᱟᱯᱟᱱ ᱟᱹᱯᱤᱱ ᱢᱳᱵᱟᱭᱤᱞ ᱠᱮᱢᱨᱟ ᱛᱮ ᱵᱷᱤᱰᱭᱳ ᱛᱩᱞᱟᱹᱣ ᱠᱟᱛᱮ ᱥᱟᱶᱛᱟ ᱨᱤᱱ ᱡᱩᱣᱟᱹᱱ ᱠᱚ ᱥᱳᱥᱤᱭᱟᱞ ᱢᱮᱰᱤᱭᱟ ᱠᱟᱹᱣᱰᱤ ᱟᱨᱡᱟᱣ ᱠᱚ ᱠᱟᱨᱵᱟᱨ ᱠᱟᱱᱟ ᱾ ᱱᱚᱣᱟ ᱨᱮ ᱢᱚᱬᱮ ᱢᱟᱯᱟᱧᱡᱤ ᱠᱚᱣᱟᱜ ᱪᱮᱫ ᱦᱚᱸ ᱵᱟᱪᱚᱠ, ᱵᱟᱨᱚᱱ ᱜᱮ ᱵᱟᱹᱱᱩᱜ-ᱟ ᱾

ᱥᱟᱶᱛᱟ ᱨᱮ ᱟᱹᱰᱤ ᱠᱚᱢ ᱠᱩᱲᱤ ᱦᱚᱯᱚᱱ ᱜᱮ ᱱᱚᱝᱠᱟᱱ ᱦᱚᱭ ᱵᱟᱹᱨᱰᱩ ᱴᱷᱮᱱ ᱠᱚ ᱜᱟᱥᱮᱨ ᱚᱪᱚ ᱟᱠᱟᱱᱟ ᱾ ᱚᱱᱟ ᱫᱚ ᱠᱩᱥᱤ ᱛᱮᱫᱚ ᱵᱟᱝ ᱜᱮ ᱾ ᱡᱤᱭᱚᱱ ᱞᱟᱹᱣᱲᱤᱭᱟᱹ ᱛᱟᱦᱮᱸᱱ ᱛᱩᱞᱩᱡ ᱮᱠᱞᱟ ᱡᱤᱭᱚᱱ ᱠᱷᱮᱢᱟᱣ ᱠᱷᱟᱹᱛᱤᱨ ᱾ ᱠᱩᱲᱤ ᱦᱚᱯᱚᱱ ᱫᱚ ᱡᱟᱦᱮᱨ ᱟᱭᱳ, ᱡᱟᱡᱽᱱᱟᱢᱤᱭᱟᱹ, ᱟᱹᱭᱩᱨ ᱦᱟᱜᱨᱟᱭᱤᱡ, ᱥᱮᱪᱪᱮᱫᱤᱭᱟᱹ, ᱥᱚᱝᱥᱟᱨ ᱪᱟᱪᱞᱟᱣᱤᱭᱟᱹ, ᱱᱤᱭᱟᱹᱢ ᱛᱩᱞᱟᱹᱣᱤᱭᱟᱹ ᱾ ᱚᱠᱚᱭ ᱠᱩᱲᱤ ᱦᱚᱯᱚᱱ ᱦᱚᱸ ᱱᱩᱱᱟᱹᱝ ᱱᱤᱨᱢᱟᱭᱟ ᱫᱚ ᱚᱦᱚ ᱜᱮᱭ ᱦᱩᱭ ᱠᱚᱜ-ᱟ, ᱡᱟᱦᱟᱸᱭ ᱫᱚ ᱜᱷᱟᱨᱚᱸᱡᱽ ᱨᱮ, ᱥᱚᱝᱥᱟᱨ ᱨᱮ ᱥᱚᱝ ᱥᱟᱨᱮᱲ ᱜᱚᱨᱚᱡᱽ ᱟᱨ ᱫᱩᱞᱟᱹᱲ ᱧᱟᱢᱟ, ᱥᱟᱶ ᱟᱨ ᱱᱟᱥᱮ ᱢᱟᱹᱱ ᱮ ᱧᱟᱢᱟ ᱾ ᱟᱡ ᱵᱟᱭ ᱧᱟᱢ ᱨᱮᱦᱚᱸ, ᱟᱡ ᱮ ᱮᱢᱚᱜ ᱠᱟᱱᱟᱜ ᱱᱟᱥᱮ ᱟᱛᱟᱝ ᱫᱟᱨᱟᱢ ᱮ ᱧᱟᱢᱟ, ᱩᱱᱤ ᱠᱩᱲᱤ ᱦᱚᱯᱚᱱ ᱫᱚ ᱜᱷᱟᱨᱚᱸᱡᱽ ᱛᱟᱞᱟ ᱨᱮ ᱛᱤᱥ ᱦᱚᱸ ᱵᱟᱭ ᱟᱹᱠᱩᱞ ᱵᱟᱹᱠᱩᱞᱚᱜ-ᱟ ᱾ ᱛᱤᱥ ᱦᱚᱸ ᱵᱟᱭ ᱟᱺᱰᱤᱡᱚᱜ-ᱟ, ᱵᱟᱦᱨᱮ ᱨᱤᱱ ᱚᱠᱚᱭᱟᱜ ᱱᱟᱥᱮ ᱫᱩᱞᱟᱹᱲ ᱟᱨ ᱟᱯᱱᱟᱨ ᱵᱮᱵᱷᱟᱨ ᱛᱮ ᱾ ᱮᱠᱞᱟ ᱛᱮᱭ ᱟᱹᱠᱩᱞ ᱵᱟᱹᱠᱩᱞ ᱟᱠᱟᱱ ᱦᱚᱭ ᱦᱤᱥᱤᱫ ᱨᱮᱜᱮ ᱢᱤᱫ ᱠᱩᱲᱤ ᱦᱚᱯᱚᱱ ᱫᱚ ᱵᱟᱦᱨᱮ ᱨᱮᱭᱟᱜ ᱵᱟᱹᱲᱤᱡ ᱦᱚᱭ ᱦᱤᱥᱤᱫ ᱴᱷᱮᱱ ᱮ ᱜᱟᱥᱮᱨ ᱞᱚᱴᱚᱱ ᱚᱪᱚᱜ ᱠᱟᱱᱟ ᱾ ᱚᱠᱚᱭ ᱮ ᱵᱩᱡᱷᱟᱹᱣᱟ ᱱᱚᱣᱟ ᱠᱟᱛᱷᱟ ᱾

ᱩᱱᱤᱭᱟᱜ ᱫᱩᱠ ᱫᱚ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱦᱚᱲ ᱜᱮ ᱩᱠᱩᱨ ᱾ ᱫᱩᱠᱷᱟᱹᱞᱤ ᱫᱩᱞᱠᱤ ᱨᱮ ᱛᱷᱟᱹᱞᱤ ᱠᱟᱛᱮ ᱥᱮᱸᱜᱮᱞ ᱵᱤᱱᱤᱰ ᱛᱟᱞᱟ ᱛᱮ ᱡᱤᱭᱚᱱ ᱥᱟᱸᱜᱷᱟᱨ ᱦᱩᱭ ᱟᱭᱟ ᱢᱤᱫ ᱠᱩᱲᱤ ᱦᱚᱯᱚᱱ ᱱᱚᱣᱟ ᱥᱚᱝᱥᱟᱨ ᱛᱟᱞᱟ ᱨᱮ ᱾ ᱵᱟᱭ ᱥᱟᱦᱟᱣ ᱵᱟᱦᱟᱣ ᱫᱟᱲᱮᱭᱟᱜ ᱨᱮ, ᱥᱟᱶᱛᱟ ᱨᱮᱭᱟᱜ ᱥᱩᱭᱟᱹ ᱥᱮᱸᱜᱮᱞ ᱥᱟᱞᱜᱟᱣ ᱟᱦᱞᱟ ᱛᱮ ᱞᱚ~ ᱛᱚᱨᱚᱡᱚᱜ ᱜᱮ ᱟᱡᱟᱜ ᱢᱩᱪᱟᱹᱫ ᱦᱚᱨ ᱰᱟᱦᱟᱨ ᱫᱚ ᱾

***