ᱥᱟᱱᱫᱮᱥ

ᱵᱮᱣᱨᱟ

 ‘ᱟᱭᱳ ᱟᱲᱟᱝ’ ᱧᱩᱛᱩᱢ ᱛᱮ ᱢᱤᱫ ᱤᱼᱯᱟᱛᱷᱟᱢ ᱠᱩᱲᱤ ᱚᱱᱚᱞᱤᱭᱟᱹ ᱠᱚ ᱦᱚᱛᱮᱛᱮ ᱢᱟᱭᱱᱚ ᱴᱩᱰᱩ ᱟᱜ ᱥᱟᱥᱟᱯᱲᱟᱣ ᱛᱮ ᱵᱤᱥᱟᱠᱷᱟᱯᱟᱴᱱᱟᱢ ᱠᱷᱚᱱ ᱥᱟᱯᱲᱟᱣᱜ ᱠᱟᱱ ᱵᱟᱰᱟᱭ ᱠᱟᱛᱮ ᱟᱹᱰᱤ ᱛᱮᱫ ᱨᱟᱹᱥᱠᱟᱹᱧ ᱟᱴᱠᱟᱨ ᱠᱮᱫᱼᱟ᱾ ᱱᱚᱶᱟ ᱞᱟᱦᱟᱛᱮ ‘ᱵᱤᱨᱢᱟᱹᱞᱤ’ ᱧᱩᱛᱩᱢ ᱛᱮ ᱢᱤᱫᱴᱟᱹᱝ ᱜᱮ ᱤᱼᱯᱟᱛᱷᱟᱢ ᱥᱟᱥᱟᱯᱲᱟᱣ ᱮᱛᱚᱦᱚᱵ ᱟᱠᱟᱱᱟ᱾ ᱢᱤᱫ ᱚᱠᱛᱮ ᱰᱨᱹ ᱫᱚᱢᱚᱭᱚᱱᱛᱤ ᱵᱮᱥᱨᱟ ᱦᱚᱸ ‘ᱠᱟᱨᱟᱢ ᱰᱟᱹᱨ’ ᱧᱩᱛᱩᱢ ᱛᱮ ᱢᱤᱫᱴᱟᱹᱝ ᱥᱟᱶᱦᱮᱫ ᱯᱟᱛᱷᱟᱢ ᱠᱩᱲᱤ ᱚᱱᱚᱞᱤᱭᱟᱹ ᱠᱚ ᱟᱛᱮ ᱥᱟᱯᱲᱟᱣ ᱮᱫ ᱛᱟᱦᱮᱸᱫ᱾ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱦᱚᱸ ᱠᱩᱲᱤ ᱚᱱᱚᱞᱤᱭᱟᱹ ᱠᱚᱣᱟᱜ ᱞᱮᱠᱷᱟ ᱵᱟᱹᱲᱛᱤ ᱤᱫᱤᱜ ᱠᱟᱱᱟ – ᱱᱚᱶᱟ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱡᱮᱜᱮᱛ ᱞᱟᱹᱜᱤᱫ ᱛᱮᱫᱚ ᱟᱸᱥ ᱟᱨ ᱠᱩᱠᱢᱩ ᱨᱮᱭᱟᱜ ᱟᱦᱞᱟ ᱜᱮ ᱥᱤᱨᱡᱟᱹᱣ ᱮᱫᱟ᱾ ᱱᱚᱶᱟ ᱦᱚᱛᱮᱛᱮ ᱠᱩᱲᱤ ᱠᱚᱣᱟᱜ ᱢᱚᱱᱮᱨᱮ ᱥᱟᱶᱦᱮᱫ ᱥᱤᱨᱡᱚᱱ ᱞᱟᱹᱜᱤᱫ ᱛᱮ ᱟᱨ ᱦᱚᱸ ᱥᱟᱱᱟᱝ ᱚᱢᱚᱱᱚᱜᱼᱟ ᱟᱨ ᱩᱥᱠᱩᱨ ᱦᱚᱸᱠᱚ ᱧᱟᱢᱟ᱾ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱠᱩᱲᱤ ᱠᱚ ᱞᱟᱹᱜᱤᱫ ᱛᱮᱦᱚᱸ ᱢᱤᱫᱴᱟᱹᱝ ᱥᱟᱶᱦᱮᱫ ᱦᱚᱭ ᱦᱤᱥᱤᱫ ᱥᱤᱨᱡᱟᱹᱣᱜᱼᱟ᱾ ᱮᱱᱠᱷᱟᱱ ᱫᱚ ᱠᱩᱲᱤ ᱚᱱᱚᱞᱤᱭᱟᱹ ᱯᱟᱦᱴᱟ ᱠᱷᱚᱱ ᱦᱚᱸ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱭᱟᱜ ᱞᱟᱲᱟᱣᱱᱟ ᱟᱨ ᱩᱛᱷᱱᱟᱹᱣ ᱞᱟᱹᱜᱤᱫ ᱛᱮᱦᱚᱸ ᱟᱹᱰᱤ ᱢᱟᱨᱟᱝ ᱮᱱᱮᱢ ᱧᱟᱢᱚᱜᱚᱜᱼᱟ᱾

 ᱱᱚᱝᱠᱟᱱ ᱛᱟᱠᱨᱮ ᱱᱚᱶᱟ ᱯᱟᱛᱷᱟᱢ ᱨᱤᱱ ᱥᱟᱯᱲᱟᱣ ᱠᱩᱢᱩᱴ ᱨᱤᱱ ᱥᱟᱱᱟᱢ ᱥᱚᱦᱮᱫ ᱠᱚ ᱟᱨ ᱯᱟᱯᱟᱲᱦᱟᱣ ᱠᱚ ᱤᱧᱟᱜ ᱱᱟᱯᱟᱭ ᱟᱸᱥ ᱤᱧ ᱵᱟᱰᱟᱭ ᱚᱪᱚᱭᱮᱫ ᱠᱚᱣᱟ ᱟᱨ ᱤᱧ ᱥᱟᱨᱦᱟᱣ ᱮᱫ ᱠᱚᱣᱟ᱾ ᱯᱟᱛᱷᱟᱢ ᱥᱟᱯᱲᱟᱣ ᱥᱟᱨ ᱠᱚᱜ ᱥᱟᱹᱜᱩᱱ ᱠᱚᱜ ᱢᱟ ᱟᱨ ᱱᱚᱶᱟ ᱯᱟᱛᱷᱟᱢ ᱡᱟᱣ ᱜᱮ ᱡᱤᱭᱟᱹᱲ ᱠᱚᱜ ᱢᱟ᱾

 ᱢᱚᱫᱚᱱ ᱢᱳᱦᱚᱱ ᱥᱚᱨᱮᱱ

ᱥᱟᱹᱜᱟᱹᱭ ᱡᱚᱱᱚᱲᱟᱣᱤᱡ

ᱥᱟᱱᱛᱟᱲᱤ ᱫᱤᱥᱟᱹ ᱩᱫᱩᱜ ᱵᱟᱹᱭᱥᱤ,

ᱥᱟᱦᱤᱛᱭᱚ ᱟᱠᱟᱫᱮᱢᱤ, ᱱᱟᱶᱟ ᱫᱤᱞᱞᱤ

ᱥᱟᱨᱦᱟᱣ ᱥᱟᱠᱟᱢ

“ ᱡᱚᱦᱟᱨ ᱜᱚᱸᱥᱟᱭ ᱢᱟᱨᱟᱝ ᱵᱩᱨᱩ ᱦᱤᱨᱞᱟᱹ ”

ᱚᱱᱚᱞᱤᱭᱟᱹ ᱢᱟᱹᱱᱤ ᱢᱟᱭᱱᱚ ᱴᱩᱰᱩ ᱥᱟᱸᱳ ᱢᱤᱫ ᱫᱤᱱ ᱜᱟᱞᱢᱟᱨᱟᱣ ᱦᱳᱭᱳᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱠᱟᱛᱷᱟ ᱠᱟᱛᱷᱟ ᱛᱮᱭ ᱞᱟᱹᱭ ᱠᱮᱫᱟ, ‘ᱜᱚᱢᱠᱮ ᱵᱷᱟᱨᱚᱛ ᱫᱤᱥᱚᱢ ᱨᱤᱱ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱟᱛᱮ ᱯᱮ ᱪᱟᱸᱫᱳᱠᱤᱭᱟᱹ “ ᱟᱭᱳ ᱟᱲᱟᱝ ”, ᱧᱩᱛᱩᱢᱟᱱ ᱥᱟᱸᱳᱦᱮᱫ ᱯᱟᱛᱷᱟᱢ ᱞᱮ ᱥᱟᱯᱲᱟᱣ ᱞᱟᱹᱜᱤᱫ’᱾

 ᱢᱟᱹᱱᱤ ᱢᱟᱭᱱᱚ ᱴᱩᱰᱩ ᱟᱜ ᱢᱚᱪᱟᱛᱮ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱹᱰᱤ ᱟᱸᱴ ᱤᱧ ᱨᱟᱹᱥᱠᱟᱹ ᱮᱱᱟ, ᱟᱹᱰᱤ ᱟᱸᱴ ᱤᱧ ᱠᱩᱥᱤ ᱮᱱᱟ᱾ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱢᱚᱛᱚᱛᱮ ᱥᱟᱸᱳᱦᱮᱫ ᱯᱟᱛᱷᱟᱢ ᱠᱚ ᱳᱸᱰᱳᱠᱟ ᱱᱚᱶᱟ ᱢᱟ ᱟᱹᱰᱤ ᱨᱟᱹᱥᱠᱟᱹ ᱟᱨ ᱜᱚᱨᱚᱵᱽ ᱨᱮᱱᱟᱜ ᱠᱟᱛᱷᱟ᱾ ᱵᱷᱟᱨᱚᱛ ᱫᱤᱥᱚᱢ ᱨᱮ ᱱᱤᱛ ᱦᱟᱹᱵᱤᱡᱛᱮ ᱟᱵᱚ ᱥᱟᱱᱛᱟᱲ ᱥᱟᱸᱳᱛᱟ ᱨᱮᱱ ᱚᱱᱚᱞᱤᱭᱟᱹ ᱠᱚᱢᱟ ᱦᱮᱸᱜᱮ, ᱮᱢᱚᱱ ᱪᱮᱫ ᱮᱴᱟᱜ ᱜᱟᱸᱛᱟᱠ ᱨᱮᱱ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱢᱚᱛᱚᱛᱮ ᱥᱟᱸᱳᱦᱮᱫ ᱯᱟᱛᱷᱟᱢ ᱳᱸᱰᱳᱠ ᱫᱚ ᱢᱤᱫ ᱢᱟᱨᱟᱝ ᱱᱟᱜᱟᱢ ᱠᱟᱱ ᱜᱮᱭᱟ᱾

 ᱛᱤᱦᱤᱧ ᱜᱟᱯᱟ ᱫᱚ ᱥᱟᱸᱳᱦᱮᱫ ᱯᱟᱛᱷᱟᱱ ᱨᱮᱱᱟᱜ ᱟᱹᱰᱤ ᱟᱸᱴ ᱟᱱᱟᱴ ᱧᱮᱞᱚᱜ ᱠᱟᱱᱟ᱾ ᱱᱟᱶᱟ ᱚᱱᱚᱞᱤᱭᱟᱹ ᱠᱚ ᱵᱟᱝ ᱠᱚ ᱵᱮᱱᱟᱣ ᱨᱟᱠᱟᱵᱚᱜ ᱠᱟᱱᱟ᱾ ᱥᱟᱸᱳᱦᱮᱫ ᱯᱟᱛᱷᱟᱢ ᱫᱚ ᱮᱸᱜᱟᱛ ᱠᱩᱠᱷᱤ ᱥᱟᱞᱟᱜ ᱛᱤᱞᱤᱡ ᱜᱟᱱᱚᱜᱼᱟ᱾

 ᱟᱸᱥᱚᱜ ᱟᱹᱧ “ ᱟᱭᱳ ᱟᱲᱟᱝ ” ᱥᱟᱸᱳᱦᱮᱫ ᱯᱟᱛᱷᱟᱢ ᱫᱚ ᱱᱟᱶᱟ ᱚᱱᱚᱞᱤᱭᱟᱹ ᱠᱚ ᱡᱨᱞᱮᱠᱟᱭᱮ ᱵᱮᱱᱟᱣ ᱨᱟᱠᱟᱵ ᱠᱚᱣᱟ᱾ ᱴᱷᱤᱠ ᱚᱱᱠᱟ ᱞᱮᱠᱟᱜᱮ ᱥᱟᱸᱳᱦᱮᱫ ᱜᱷᱟᱨᱚᱸᱡᱽ ᱨᱮ ᱢᱤᱫ ᱱᱟᱶᱟ ᱟᱨ ᱢᱟᱨᱟᱝ ᱱᱟᱜᱟᱢᱮ ᱛᱮᱭᱟᱨᱟ᱾

 ᱟᱸᱥᱚᱜ ᱟᱹᱧ ᱚᱱᱚᱞᱤᱭᱟᱹ ᱠᱚ, ᱯᱟᱲᱦᱟᱣ ᱛᱮᱱᱠᱚ, ᱥᱟᱱᱟᱢ ᱠᱚᱜᱮ ᱥᱟᱱᱟᱢ ᱯᱟᱦᱴᱟ ᱥᱮᱡ ᱠᱷᱚᱱ ᱜᱚᱲᱚ ᱥᱚᱯᱚᱦᱚᱫ ᱵᱚᱱ ᱮᱢᱚᱜᱼᱟ᱾

 “ ᱟᱭᱳ ᱟᱲᱟᱝ ” ᱥᱟᱸᱶᱦᱮᱫ ᱯᱟᱛᱷᱟᱢ ᱨᱮᱱ ᱥᱟᱱᱟᱢ ᱜᱟᱛᱮ ᱠᱚ ᱨᱟᱹᱥᱭᱟᱹ ᱠᱚᱢᱟ ᱦᱮᱸᱜᱮ, ᱥᱟᱸᱳ ᱥᱟᱸᱳᱛᱮ ᱥᱟᱱᱟᱢ ᱛᱤᱨᱞᱟᱹ ᱳᱱᱚᱞᱤᱭᱟᱹ ᱠᱚ ᱞᱟᱹᱴᱩ ᱠᱚᱫᱚ ᱤᱧᱟᱜ ᱚᱛ ᱡᱟᱯᱟᱜ ᱡᱚᱦᱟᱨ ᱟᱨᱠ ᱟᱹᱴᱤᱡ ᱠᱚᱫᱚ ᱵᱟᱝ ᱪᱟᱵᱟᱜ ᱫᱩᱞᱟᱹᱲ ᱛᱷᱩᱢ ᱛᱟᱦᱮᱸᱭᱮᱱᱟ᱾

ᱡᱚᱦᱟᱨ

ᱪᱚᱱᱰᱤ ᱪᱚᱨᱚᱱ ᱠᱤᱥᱠᱩ

ᱯᱟᱨᱥᱮᱛ

ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱸᱳᱛᱟ

ᱥᱟᱸᱫᱮᱥ

ᱵᱟᱰᱟᱭ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹᱧ ᱟᱴᱠᱟᱨ ᱠᱮᱫᱟ ᱡᱮ ᱵᱤᱥᱟᱠᱷᱟᱯᱟᱴᱱᱟᱢ ᱨᱮ ᱟᱵᱚᱨᱮᱱ ᱵᱷᱟᱨᱚᱛ ᱡᱟᱠᱟᱛ ᱨᱤᱱ ᱛᱤᱨᱞᱟᱹ ᱥᱮ ᱠᱩᱲᱤ ᱦᱚᱯᱚᱱ ᱚᱱᱚᱞᱤᱭᱟᱹ ᱠᱚ, ᱢᱮᱱᱮᱛ ᱟᱭᱳ ᱠᱚ, ᱫᱟᱹᱭ ᱠᱚ, ᱢᱟᱹᱭ ᱠᱚ, ᱟᱨ ᱵᱤᱴᱤ ᱛᱮᱠᱚ ᱠᱚ ᱥᱩᱛᱩᱜ ᱠᱟᱛᱮ ᱢᱤᱫ ᱤ-ᱯᱟᱛᱷᱟᱢ ᱥᱮ E-Magazine ᱥᱟᱯᱲᱟᱣ ᱞᱟᱹᱜᱤᱫ ᱠᱚ ᱠᱩᱨᱩᱢᱩᱴᱩ ᱟᱠᱟᱫᱼᱟ ᱱᱚᱣᱟ ᱵᱟᱠᱷᱨᱟ ᱟᱭᱢᱟ ᱥᱟᱨᱦᱟᱣ ᱤᱧ ᱪᱟᱞ ᱟᱯᱮ ᱠᱟᱱᱟ᱾ ᱠᱩᱲᱤ ᱦᱚᱯᱚᱱᱟᱜ ᱫᱚ ᱟᱭᱢᱟ ᱨᱩᱯ ᱼ ᱟᱭᱳ ᱞᱮᱠᱟᱛᱮ, ᱢᱤᱥᱮᱨᱟ ᱞᱮᱠᱟᱛᱮ, ᱮᱨᱟ ᱞᱮᱠᱟᱛᱮ ᱟᱨ ᱦᱚᱯᱚᱱᱮᱨᱟ ᱞᱮᱠᱟᱛᱮ ᱢᱮᱱᱟᱜ ᱟᱠᱟᱫᱟ ᱟᱨ ᱚᱱᱠᱟ ᱜᱮ ᱟᱞᱟᱭ ᱫᱟᱲᱮ, ᱥᱟᱦᱟᱣ ᱫᱟᱲᱮ ᱟᱨ ᱫᱩᱞᱟᱹᱲ ᱫᱟᱲᱮ ᱦᱚᱸ ᱢᱮᱱᱟᱜ ᱟᱠᱟᱫᱟ᱾ ᱡᱚᱛᱚ ᱞᱮᱠᱟᱱ ᱦᱚᱨᱼᱰᱟᱦᱟᱨ ᱛᱮ ᱛᱟᱲᱟᱢ ᱨᱮᱱᱟᱜ ᱫᱟᱲᱮ ᱦᱚᱸ ᱢᱮᱱᱟᱜ ᱟᱠᱟᱫᱟ ᱾ ᱤᱧᱟᱜ ᱟᱥᱟ ᱢᱮᱱᱟᱜᱼᱟ ᱱᱚᱣᱟ ᱥᱟᱶᱦᱮᱫ ᱦᱟᱨᱟᱼᱵᱩᱨᱩᱭ ᱞᱟᱹᱜᱤᱫ ᱯᱮ ᱛᱟᱲᱟᱢ ᱟᱠᱟᱫ ᱰᱟᱦᱟᱨ ᱨᱮᱦᱚᱸ ᱞᱤᱸᱜᱤᱱ ᱜᱟᱰᱟ ᱫᱟᱜ ᱞᱮᱠᱟ ᱞᱟᱦᱟ ᱥᱮᱱ ᱯᱮ ᱞᱟᱦᱟ ᱥᱮᱱᱚᱜᱼᱟ᱾ ᱟᱯᱮ ᱪᱮᱛᱟᱱ ᱨᱮ ᱤᱧᱟᱜ ᱫᱩᱞᱟᱹᱲ ᱟᱨ ᱛᱷᱩᱢ ᱛᱟᱦᱮᱸᱭᱮᱱᱟ᱾ ᱢᱩᱪᱟᱹᱫ ᱨᱮ ᱵᱟᱨ ᱛᱷᱟᱨ ᱼᱼᱼ

ᱛᱤᱨᱞᱟᱹ

ᱚᱱᱛᱚᱨ ᱢᱚᱱᱮ ᱦᱚᱦᱚ ᱟᱢᱟᱜ

ᱥᱟᱡᱟᱣ ᱢᱮᱛᱟᱢ ᱠᱟᱛᱷᱟ ᱛᱮ

ᱚᱱᱟ ᱠᱟᱛᱷᱟ ᱥᱚᱫᱚᱨ ᱢᱮᱛᱟᱢ

ᱚᱱᱚᱞ ᱛᱟᱞᱟ ᱛᱮ᱾

ᱛᱤᱨᱞᱟᱹ

ᱟᱢᱟᱜ ᱛᱤᱨᱮ ᱫᱟᱲᱮ ᱢᱮᱱᱟᱜ

ᱥᱟᱱᱟᱢ ᱠᱟᱹᱢᱤ ᱨᱮᱱᱟᱜ᱾

ᱡᱚᱦᱟᱨ,

ᱭᱚᱥᱳᱫᱟ ᱢᱩᱨᱢᱩ

ᱱᱟᱣᱟ ᱫᱤᱞᱞᱤ

ᱵᱮᱣᱨᱟ

‘ᱟᱭᱳ ᱟᱲᱟᱝ’ ᱥᱟᱶᱦᱮᱫ ᱯᱟᱛᱷᱟᱢ ᱵᱤᱥᱟᱠᱷᱟᱯᱟᱴᱱᱟᱢ ᱠᱷᱚᱱ ᱩᱪᱷᱟᱹᱱᱚᱜ ᱠᱟᱱ ᱵᱟᱰᱟᱭ ᱠᱟᱛᱮᱧ ᱨᱟᱹᱥᱠᱟᱹ ᱮᱱᱟ᱾ ᱱᱚᱶᱟ ᱯᱟᱛᱷᱟᱢ ᱨᱮᱱᱟᱜ ᱠᱷᱟᱥ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ – ᱱᱚᱶᱟ ᱫᱚ ᱛᱤᱨᱞᱟᱹ ᱠᱚᱣᱟᱜ ᱯᱟᱛᱷᱟᱢ ᱠᱟᱱᱟ, ᱟᱠᱚ ᱜᱮᱠᱚ ᱥᱟᱡᱟᱣ ᱥᱟᱯᱲᱟᱣᱟ, ᱟᱠᱚᱣᱟᱜ ᱚᱞ ᱜᱮ ᱴᱷᱟᱶ ᱮ ᱧᱟᱢᱟ ᱟᱨ ᱱᱚᱶᱟ ᱫᱚ ᱤᱼᱯᱟᱛᱷᱟᱢ ᱠᱟᱱᱟ᱾ ᱛᱟᱭᱚᱢ ᱫᱟᱨᱟᱢ ᱪᱷᱟᱯᱟ ᱠᱟᱛᱮ ᱧᱟᱢᱚᱜᱼᱟ ᱢᱮᱱᱛᱮ ᱟᱸᱥ ᱠᱚ ᱫᱚᱦᱚ ᱟᱠᱟᱫᱼᱟ᱾

 ᱥᱟᱱᱛᱟᱲᱤ ᱥᱟᱶᱦᱮᱫ ᱪᱟᱨᱪᱟᱭᱮᱫ ᱛᱤᱨᱞᱟᱹ ᱠᱚᱣᱟᱜ ᱞᱮᱠᱷᱟ ᱫᱚ ᱟᱹᱰᱤ ᱠᱚᱢ ᱜᱮᱭᱟ᱾ ᱩᱱᱠᱩ ᱩᱫᱽᱜᱟᱹᱣ ᱥᱮ ᱩᱥᱠᱩᱨ ᱮᱢᱟ ᱠᱚ ᱱᱚᱶᱟ ᱯᱟᱛᱷᱟᱢ ᱨᱮᱱᱟᱜ ᱫᱤᱥ ᱦᱩᱫᱤᱥ ᱦᱚᱸ ᱠᱟᱱᱟ᱾

 ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ‘ᱟᱭᱳ ᱟᱲᱟᱝ’ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱥᱟᱨ ᱠᱚᱜ ᱥᱟᱹᱜᱩᱱ ᱠᱚᱜ ᱢᱟ᱾

 ᱡᱚᱦᱟᱨ

ᱡᱚᱫᱩᱢᱚᱬᱤ ᱵᱮᱥᱨᱟ

ᱢᱟᱹ ᱗/᱙/᱒᱐᱒᱐ ᱦᱤᱛ

ᱠᱷᱚᱲᱚᱜᱽᱯᱩᱨ

ᱯᱩᱪᱷᱤᱢ ᱵᱮᱝᱜᱚᱞ

MESSAGE OF APPRECIATION

With immense pleasure I appreciate the Team of Santali Women Writers for their diligent effort for sustainable development of Santali literature, through education by the way of creative writing in the form of Stories, Poems and other valuable articles. Living far distance across India they came unitedly, to raise their voices cumulatively in the form of E-Magazine, named nicely as “AYO ARANG”, that means ‘Mothers Voices’. By accessing and reading articles posted in this E-Magazine, one can feel the heart touching sense of creativity, writing ability and reality of women position in our society. With a vehemence to show their ability to both taking care of Santali literature as well as family members, the Ayo Arang team has shown their mind strength beyond expectations.

I wish and hope this ‘AYO ARANG’ Santali E-Magazine will definitely sail through the heart of readers among Santali community throughout the world enriching the purposes as planned.

All The Best to Team AYO ARANG.

RAM CHANDRA TUDU

Member, Technical Support (Ayo Arang)

Executive Member-Central Committee

(All India Santali Writer’s Association)