ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱨᱤᱱ ᱟᱭᱳ ᱵᱟᱵᱟ, ᱯᱮᱭᱟ ᱛᱟᱹᱠᱤᱱ ᱦᱚᱯᱚᱱ᱾ ᱟᱹᱠᱤᱱ ᱵᱟᱱᱟ ᱦᱚᱲ ᱜᱮ ᱦᱟᱺᱰᱤ ᱯᱟᱹᱣᱨᱟᱹ ᱫᱚ ᱟᱹᱰᱤ ᱜᱮ ᱠᱤᱱ ᱵᱮᱯᱟᱨᱟ᱾ ᱫᱤᱱᱟᱹᱢ ᱜᱮ ᱥᱮᱛᱟᱜ ᱠᱷᱚᱱᱟᱜ ᱟᱹᱭᱩᱵ ᱫᱷᱟᱹᱵᱤᱡ ᱫᱟᱜ ᱫᱟᱠᱟ ᱞᱮᱠᱟ ᱜᱮ ᱦᱟᱺᱰᱤ ᱯᱟᱹᱣᱨᱟᱹ ᱱᱤᱥᱟᱹ ᱦᱚᱸ ᱥᱟᱨᱟ ᱫᱤᱱ ᱜᱮ ᱠᱤᱱ ᱵᱮᱵᱷᱟᱨᱟ᱾
ᱟᱹᱠᱤᱱ ᱨᱤᱱ ᱩᱱᱠᱩ ᱠᱚᱲᱟ ᱜᱤᱫᱽᱨᱟᱹ ᱦᱚᱸ ᱢᱤᱫ ᱪᱟᱞᱟᱠ ᱛᱟᱨᱟ ᱠᱷᱚᱱ ᱜᱮ ᱟᱠᱚ ᱚᱲᱟᱜ ᱨᱮᱫᱚ ᱵᱩᱛᱩᱞ ᱵᱩᱛᱩᱞ ᱯᱟᱹᱣᱨᱟᱹ ᱟᱨ ᱦᱟᱺᱰᱤ ᱫᱚ ᱠᱚ ᱧᱮᱞ ᱟᱹᱜᱩ ᱟᱠᱟᱫᱼᱟ᱾ ᱟᱨ ᱟᱠᱚ ᱦᱚᱸ ᱟᱭᱳ ᱵᱟᱵᱟ ᱧᱮᱞ ᱛᱮ ᱵᱟᱹᱭ ᱵᱟᱹᱭ ᱛᱮ ᱧᱩ ᱦᱚᱸ ᱠᱚ ᱪᱮᱫ ᱤᱫᱤ ᱠᱮᱫᱼᱟ ᱟᱨ ᱠᱚ ᱧᱩ ᱠᱮᱫᱼᱟ᱾ ᱟᱭᱳ ᱵᱟᱵᱟ ᱛᱤᱠᱤᱱ ᱦᱚᱸ ᱵᱟᱹᱠᱤᱱ ᱢᱟᱱᱟ ᱵᱟᱨᱚᱱ ᱞᱮᱫ ᱠᱚᱣᱟ᱾ᱪᱮᱫ ᱞᱮᱠᱟ ᱠᱚ ᱞᱟᱹᱴᱩ ᱤᱫᱤ ᱮᱱᱟ ᱚᱱᱠᱟ ᱜᱮ ᱠᱚ ᱧᱩ ᱤᱫᱤ ᱠᱮᱫᱼᱟ᱾ ᱚᱱᱠᱟ ᱢᱟ ᱪᱟᱥ ᱵᱟᱥ ᱠᱚ ᱦᱚᱸ ᱵᱟᱹᱱᱩᱜ ᱛᱟᱠᱚᱣᱟ᱾ᱱᱟᱞᱦᱟ ᱛᱩᱢᱟᱹᱞ ᱠᱟᱛᱮ ᱜᱮ ᱠᱚ ᱡᱚᱢᱟ᱾ᱟᱨ ᱩᱱᱠᱩ ᱜᱤᱫᱽᱨᱟᱹ ᱠᱚ ᱦᱟᱨᱟ ᱪᱟᱵᱟ ᱠᱟᱲᱟ ᱠᱟᱛᱮ ᱫᱚ ᱡᱚᱛᱚ ᱠᱚᱛᱮ ᱚᱲᱟᱜ ᱫᱩᱣᱟᱹᱨ ᱠᱚᱫᱚ ᱠᱚ ᱵᱮᱱᱟᱣ ᱟᱱᱟ ᱟᱹᱪᱩᱨ ᱵᱤᱦᱩᱨ ᱟᱨ ᱡᱚᱛᱚ ᱠᱚᱲᱟ ᱜᱤᱫᱽᱨᱟᱹ ᱜᱮ ᱠᱚ ᱵᱟᱯᱞᱟ ᱵᱟᱲᱟ ᱮᱱᱟ᱾
ᱤᱱᱟᱹ ᱠᱤᱪᱷᱤ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱩᱱᱠᱤᱱ ᱟᱭᱳ ᱵᱟᱵᱟ ᱫᱚ ᱠᱤᱱ ᱜᱚᱡ ᱢᱟᱬᱟᱝ ᱮᱱᱟ᱾ ᱤᱱᱟᱹ ᱛᱟᱭᱚᱢ ᱛᱟᱭᱚᱢ ᱛᱮᱜᱮ ᱩᱱᱠᱩ ᱯᱮ ᱵᱚᱭᱦᱟ ᱠᱚᱲᱟ ᱜᱤᱫᱽᱨᱟᱹ ᱦᱚᱸ ᱛᱟᱭᱚᱢ ᱫᱚ ᱢᱤᱫ ᱴᱷᱮᱱ ᱵᱟᱝ ᱛᱟᱦᱮᱸ ᱠᱟᱛᱮ ᱩᱱᱠᱤᱱ ᱢᱟᱨᱟᱝ ᱤᱡ ᱟᱨ ᱛᱟᱞᱟᱭᱤᱡ ᱫᱚ ᱟᱨ ᱢᱤᱫ ᱥᱮᱱ ᱨᱮ ᱠᱤᱱ ᱚᱲᱟᱜ ᱟᱱᱟ᱾ᱟᱨ ᱚᱱᱟ ᱟᱭᱳ ᱵᱟᱵᱟ ᱛᱟᱦᱮᱸᱱ ᱨᱮ ᱡᱟᱦᱟᱸ ᱠᱚ ᱚᱲᱟᱜ ᱞᱮᱫᱼᱟ ᱚᱱᱟ ᱫᱚ ᱟᱹᱠᱤᱱᱤᱡ ᱦᱩᱰᱤᱧ ᱵᱚᱭᱦᱟ ᱠᱤᱱ ᱟᱲᱟᱜ ᱵᱟᱹᱜᱤ ᱟᱫᱮᱭᱟ᱾
ᱩᱱᱤ ᱦᱩᱰᱤᱧ ᱠᱚᱲᱟ ᱦᱚᱸ ᱛᱚ ᱦᱩᱰᱤᱧ ᱵᱚᱭᱚᱥ ᱠᱷᱚᱱ ᱜᱮ ᱱᱤᱥᱟᱹ ᱡᱚᱢ ᱧᱩ ᱢᱟᱭ ᱪᱮᱫ ᱟᱠᱟᱫ ᱥᱟᱶᱛᱮ ᱟᱡ ᱵᱟᱹᱦᱩ ᱦᱚᱸ ᱟᱠᱚ ᱧᱮᱞ ᱛᱮ ᱦᱟᱺᱰᱤ ᱯᱟᱹᱣᱨᱟᱹ ᱧᱩ ᱜᱮᱭ ᱪᱮᱫ ᱢᱟᱬᱟᱝ ᱠᱮᱫᱼᱟ᱾ ᱟᱨ ᱥᱚᱝᱥᱟᱨ ᱨᱮᱱᱟᱜ ᱠᱟᱹᱢᱤ ᱠᱚ ᱫᱚ ᱪᱮᱫ ᱩᱛᱟᱹᱨ ᱪᱮᱫ ᱦᱚᱸ ᱵᱟᱭ ᱵᱟᱰᱟᱭᱟ᱾ ᱟᱫᱚ ᱯᱟᱨᱟᱵᱽ ᱯᱩᱱᱟᱹᱭ ᱠᱚᱨᱮ ᱦᱚᱸ ᱡᱟᱦᱟᱸᱭ ᱚᱲᱟᱜ ᱠᱚᱨᱮ ᱜᱮ ᱠᱤᱱ ᱢᱟᱹᱰᱭᱟᱹᱣ ᱠᱚᱜᱼᱟ᱾ ᱤᱱᱠᱟᱹ ᱤᱱᱠᱟᱹ ᱛᱮᱜᱮ ᱚᱱᱟ ᱫᱟᱨᱟᱦᱟᱨᱟ ᱵᱟᱹᱠᱷᱩᱞ ᱚᱲᱟᱜ ᱦᱚᱸ ᱵᱟᱹᱭ ᱵᱟᱹᱭ ᱛᱮ ᱫᱷᱟᱥᱟᱣ ᱨᱟᱹᱯᱩᱫ ᱪᱟᱵᱟ ᱮᱱᱟ᱾ ᱮᱱᱛᱮ ᱨᱮ ᱦᱚᱸ ᱟᱹᱠᱤᱱᱟᱜ ᱢᱚᱱᱮ ᱡᱤᱣᱤ ᱫᱚ ᱱᱟᱥᱮ ᱦᱚᱸ ᱵᱟᱝ ᱵᱚᱫᱚᱞᱚᱜ ᱠᱟᱱᱟ ᱡᱮ ᱱᱩᱱᱟᱹᱜ ᱢᱟᱨᱟᱝ ᱚᱲᱟᱜ ᱞᱟᱝ ᱨᱟᱹᱯᱩᱫ ᱚᱪᱚ ᱞᱮᱠᱷᱟᱱ ᱛᱟᱦᱮᱸᱱ ᱟᱞᱟᱝ ᱚᱠᱟᱨᱮ? ᱠᱟᱹᱴᱤᱡ ᱦᱚᱸ ᱵᱷᱟᱵᱽᱱᱟ ᱪᱤᱱᱛᱟᱹ ᱵᱟᱹᱠᱤᱱ ᱵᱩᱡᱷᱟᱹᱣ ᱡᱚᱝ ᱠᱟᱱ ᱛᱟᱦᱮᱸᱫ᱾ ᱚᱲᱟᱜ ᱫᱩᱣᱟᱹᱨ ᱢᱟ ᱨᱟᱹᱯᱩᱫ ᱮᱱ ᱜᱮ ᱛᱚᱵᱮ ᱯᱷᱟᱫᱟ ᱨᱮ ᱛᱟᱦᱮᱸ ᱠᱟᱛᱮ ᱨᱮᱦᱚᱸ ᱦᱟᱺᱰᱤ ᱯᱟᱹᱣᱨᱟᱹ ᱧᱩ ᱫᱚ ᱵᱟᱹᱠᱤᱱ ᱠᱚᱢ ᱞᱮᱫᱼᱟ᱾ ᱦᱚᱲᱟᱜ ᱨᱚᱲ ᱥᱟᱦᱟᱣ ᱠᱟᱛᱮ ᱨᱮᱦᱚᱸ ᱦᱟᱺᱰᱤ ᱯᱟᱹᱣᱨᱟᱹ ᱫᱚ ᱫᱷᱟᱨ ᱩᱫᱷᱟᱹᱨ ᱠᱟᱛᱮ ᱨᱮᱦᱚᱸ ᱠᱤᱱ ᱧᱩᱭ ᱜᱮᱭᱟ᱾
ᱜᱤᱫᱟᱹᱨ ᱯᱤᱫᱟᱹᱨ ᱠᱚᱫᱚ ᱢᱚᱬᱮ ᱜᱚᱴᱟᱝ ᱚᱱᱟ ᱯᱷᱟᱫᱟ ᱠᱚᱨᱮ ᱜᱮ ᱠᱤᱱ ᱦᱟᱨᱟ ᱠᱮᱫ ᱠᱚᱣᱟ᱾ ᱟᱨ ᱱᱚᱛᱮ ᱜᱤᱫᱽᱨᱟᱹ ᱠᱚᱣᱟᱜ ᱟᱫᱷᱟᱨ ᱠᱚ ᱦᱚᱸ ᱵᱟᱹᱱᱩᱜ ᱛᱮ ᱩᱱᱠᱩ ᱦᱚᱸ ᱵᱟᱹᱠᱤᱱ ᱚᱞ ᱯᱟᱲᱦᱟᱣ ᱫᱟᱲᱮᱭᱟᱫ ᱠᱚᱣᱟ᱾ ᱢᱟᱬᱟᱝ ᱥᱮᱫ ᱫᱚ ᱮᱴᱟᱜ ᱦᱚᱲᱟᱜ ᱵᱟᱹᱨᱜᱤᱞ ᱞᱩᱜᱽᱲᱤ ᱦᱟᱨᱟᱲ ᱫᱚᱛᱚ ᱯᱮᱸᱴ ᱛᱮᱜᱮ ᱠᱚ ᱦᱟᱨᱟ ᱮᱱᱟ᱾ ᱮᱱᱛᱮ ᱨᱮᱦᱚᱸ ᱜᱮ ᱦᱟᱺᱰᱤ ᱯᱟᱹᱣᱨᱟᱹ ᱧᱩ ᱫᱚ ᱱᱟᱥᱮ ᱦᱚᱸ ᱵᱟᱹᱠᱤᱱ ᱠᱚᱢ ᱞᱮᱫᱼᱟ, ᱱᱟᱥᱮᱱᱟᱜ ᱦᱚᱸ ᱩᱭᱦᱟᱹᱨ ᱜᱮ ᱵᱟᱝ ᱵᱚᱫᱚᱞ ᱧᱚᱜ ᱞᱮᱱ ᱛᱟᱹᱠᱤᱱᱟ᱾ᱮᱱᱛᱮ ᱨᱮ ᱦᱚᱸ ᱟᱹᱠᱤᱱᱟᱜ ᱢᱚᱱᱮ ᱛᱮ ᱫᱚ ᱟᱹᱰᱤ ᱢᱟᱨᱟᱝ ᱜᱮ ᱟᱨ ᱟᱹᱰᱤ ᱪᱟᱞᱟᱠ ᱜᱮ ᱠᱤᱱ ᱢᱚᱱᱮᱜᱼᱟ᱾ᱟᱹᱛᱩ ᱴᱚᱞᱟ ᱦᱚᱲ ᱫᱟᱭᱟ ᱧᱮᱞ ᱛᱮ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱠᱷᱟᱹᱛᱤᱨ ᱡᱟᱦᱟᱸᱱᱟᱜ ᱠᱚ ᱵᱩᱫᱷᱤ ᱟᱹᱠᱤᱱᱟ ᱚᱱᱟ ᱦᱚᱸ ᱵᱟᱹᱠᱤᱱ ᱥᱮᱱᱟᱜᱼᱟ, ᱵᱟᱹᱠᱤᱱ ᱞᱩᱛᱩᱨᱟᱜᱼᱟ᱾ᱨᱟᱹᱜᱤ ᱜᱮ ᱠᱤᱱ ᱵᱩᱡᱷᱟᱹᱣᱟ᱾
ᱚᱱᱟᱛᱤᱧ ᱢᱮᱱᱟ, ᱦᱟᱺᱰᱤ ᱯᱟᱹᱣᱨᱟᱹ ᱱᱤᱥᱟᱹ ᱫᱚ ᱵᱮᱥ ᱦᱚᱲ ᱜᱮ ᱠᱚ ᱠᱷᱟᱨᱟᱯᱚᱜᱼᱟ᱾ ᱦᱟᱺᱰᱤ ᱯᱟᱹᱣᱨᱟᱹ ᱫᱚ ᱢᱮᱱ ᱞᱮᱠᱷᱟᱱ ᱟᱵᱚ ᱢᱟᱹᱱᱢᱤ ᱠᱚ ᱱᱚᱣᱟ ᱫᱷᱟᱹᱨᱛᱤ ᱨᱮ ᱯᱩᱭᱞᱩ ᱡᱟᱱᱟᱢ ᱵᱚ ᱧᱟᱢ ᱠᱮᱫ ᱠᱷᱚᱱ ᱜᱮ ᱪᱟᱸᱫᱚ ᱵᱚᱸᱜᱟ ᱩᱭᱦᱟᱹᱨ ᱞᱮᱠᱟ ᱛᱮ ᱩᱱ ᱠᱷᱚᱱ ᱜᱮ ᱮᱛᱚᱦᱚᱵ ᱟᱠᱟᱱ ᱛᱟᱵᱚᱱᱟ᱾ᱮᱱᱛᱮ ᱨᱮᱦᱚᱸ ᱵᱮᱵᱷᱟᱨ ᱵᱚᱱ ᱜᱟᱱ ᱞᱮᱠᱷᱟᱱ ᱱᱟᱯᱟᱭ ᱜᱮᱭᱟ ᱦᱩᱱᱟᱹᱝ᱾ ᱟᱫᱚ ᱵᱮᱵᱷᱟᱨ ᱵᱟᱝ ᱵᱚᱱ ᱜᱟᱱᱮᱫ ᱠᱷᱟᱹᱛᱤᱨ ᱛᱮᱜᱮ ᱵᱮᱥ ᱦᱚᱲ ᱦᱚᱸ ᱥᱚᱝᱥᱟᱨ ᱡᱩᱲᱟᱹᱣ ᱵᱟᱝ ᱜᱟᱱ ᱠᱟᱛᱮ ᱵᱚᱱ ᱠᱷᱟᱨᱟᱯᱚᱜ ᱠᱟᱱᱟ᱾ ᱟᱨ ᱥᱚᱝᱥᱟᱨ ᱡᱩᱲᱟᱹᱣ ᱵᱟᱝ ᱜᱟᱱ ᱠᱟᱛᱮ ᱥᱚᱝᱥᱟᱨ ᱵᱚᱱ ᱨᱟᱹᱯᱩᱫ ᱚᱪᱚᱭᱮᱫᱼᱟ᱾ ᱦᱟᱺᱰᱤ ᱯᱟᱹᱣᱨᱟᱹ ᱨᱮ ᱡᱚᱵᱮ ᱠᱷᱟᱹᱛᱤᱨ ᱵᱮᱥ ᱠᱟᱛᱷᱟ ᱵᱚᱱ ᱵᱟᱹᱲᱤᱡᱮᱜᱼᱟ᱾ᱟᱨ ᱵᱟᱹᱲᱤᱡ ᱡᱤᱱᱤᱥ ᱵᱚᱱ ᱟᱯᱱᱟᱨᱮᱫᱼᱟ᱾ᱦᱟᱺᱰᱤ ᱯᱟᱹᱣᱨᱟᱹ ᱠᱷᱟᱹᱛᱤᱨ ᱛᱮ ᱡᱩᱲᱟᱹᱣ ᱥᱚᱝᱥᱟᱨ ᱵᱚᱱ ᱰᱷᱤᱞᱟᱹᱣ ᱨᱟᱹᱯᱩᱫᱮᱜᱼᱟ ᱡᱮ ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱨᱮ ᱢᱤᱫ ᱦᱚᱲ ᱫᱤᱱᱟᱹᱢ ᱜᱮ ᱡᱩᱫᱤ ᱦᱟᱺᱰᱤ ᱯᱟᱹᱣᱨᱟᱹᱭ ᱵᱮᱵᱷᱟᱨᱟ ᱫᱤᱱ ᱜᱮ ᱵᱩᱞ ᱛᱚᱣᱮᱞ ᱠᱟᱛᱮ ᱠᱟᱛᱷᱟ ᱵᱟᱭ ᱵᱩᱡᱷᱟᱹᱣᱟ ᱛᱚᱵᱮ ᱚᱱᱟ ᱥᱚᱝᱥᱟᱨ ᱫᱚ ᱛᱤᱥ ᱨᱮᱦᱚᱸ ᱜᱮ ᱵᱟᱝ ᱠᱮᱴᱮᱡᱚᱜᱼᱟ᱾ ᱛᱟᱹᱦᱩᱸ ᱜᱮ ᱛᱟᱹᱦᱩᱸ ᱨᱟᱹᱯᱩᱫᱚᱜ ᱥᱮᱫ ᱥᱮᱱᱚᱜᱼᱟ᱾ ᱱᱚᱝᱠᱟᱱ ᱜᱷᱚᱴᱚᱱ ᱠᱚ ᱫᱚ ᱟᱵᱚ ᱥᱟᱶᱛᱟ ᱨᱮ ᱟᱹᱰᱤ ᱩᱛᱟᱹᱨ ᱜᱮ ᱧᱮᱞᱚᱜ ᱠᱟᱱᱟ᱾
ᱚᱱᱟᱛᱮ ᱦᱟᱺᱰᱤ ᱯᱟᱹᱣᱨᱟᱹ ᱨᱮ ᱡᱚᱵᱮᱜ ᱢᱟᱬᱟᱝ ᱨᱮ ᱥᱚᱝᱥᱟᱨ ᱠᱟᱛᱷᱟ ᱢᱟᱬᱟᱝ ᱵᱚᱱ ᱩᱭᱦᱟᱹᱭ ᱢᱟ ᱚᱱᱟ ᱜᱮ ᱱᱟᱯᱟᱭᱟ᱾
***
