ᱡᱟᱱᱟᱢ ᱟᱭᱳ ᱫᱚ ᱩᱭᱦᱟᱹᱨᱮᱢ
ᱡᱟᱱᱟᱢ ᱟᱭᱳ ᱫᱚ ᱫᱩᱞᱟᱹᱲᱮᱢ ᱾
ᱡᱟᱱᱟᱢ ᱟᱭᱳ ᱵᱮᱜᱚᱨ ᱚᱠᱚᱭᱮ ᱛᱚᱞᱟᱥ ᱢᱮ
ᱡᱟᱱᱟᱢ ᱟᱭᱳ ᱵᱮᱜᱚᱨ ᱚᱠᱚᱭᱮ ᱠᱷᱚᱡᱽ ᱢᱮ ᱾
ᱡᱟᱱᱟᱢ ᱟᱭᱳ ᱜᱮ ᱟᱹᱭᱩᱨ ᱢᱮ
ᱡᱟᱱᱟᱢ ᱟᱭᱳ ᱜᱮ ᱥᱩᱛᱩᱜ ᱢᱮ ᱾
ᱡᱟᱱᱟᱢ ᱟᱭᱳ ᱜᱮ ᱩᱫᱩᱜ ᱟᱢ
ᱵᱩᱜᱤ ᱵᱟᱹᱲᱤᱡ ᱫᱚᱭ ᱵᱟᱪᱷᱟᱣ ᱜᱚᱴᱟ ᱟᱢ ᱾
ᱡᱟᱱᱟᱢ ᱟᱭᱳ ᱜᱮ ᱯᱩᱭᱞᱩ ᱢᱟᱪᱮᱛ
ᱡᱟᱱᱟᱢ ᱟᱭᱳ ᱴᱷᱮᱱ ᱜᱮ ᱥᱮᱪᱮᱫ ᱾
ᱡᱟᱱᱟᱢ ᱟᱭᱳ ᱜᱮ ᱫᱟᱲᱮ ᱛᱟᱢ
ᱱᱚᱣᱟ ᱫᱚ ᱛᱤᱥ ᱦᱚᱸ ᱟᱞᱚ ᱦᱤᱲᱤᱧᱟᱢ ᱾
ᱡᱟᱱᱟᱢ ᱟᱭᱳ ᱜᱮ ᱡᱚᱛᱚᱱ ᱞᱮᱫ ᱢᱮ
ᱡᱟᱱᱟᱢ ᱟᱭᱳ ᱜᱮ ᱦᱟᱨᱟ ᱠᱮᱫ ᱢᱮ ᱾
ᱫᱷᱩᱲᱤ ᱞᱩᱥᱩ ᱯᱩᱸᱰᱩᱢ ᱛᱟᱦᱮᱱ ᱨᱮᱫᱚ
ᱟᱧᱪᱟᱨ ᱛᱮᱜᱮ ᱟᱭᱳᱭ ᱡᱚᱫ ᱥᱟᱯᱷᱟ ᱢᱮ ᱫᱚ ᱾
ᱛᱷᱤᱭᱟᱹ ᱛᱷᱟᱯᱮ ᱛᱟᱲᱟᱢ ᱢᱟᱛᱟᱢ
ᱵᱟᱨ ᱛᱤ ᱞᱟᱦᱟ ᱠᱟᱛᱮ ᱟᱭᱳ ᱦᱤᱡᱩᱜ ᱮ ᱢᱮᱛᱟᱢ ᱾
ᱡᱚᱛᱚᱱ ᱨᱮᱜᱮ ᱫᱚᱦᱚ ᱠᱟᱢᱟᱭ ᱟᱭᱳ
ᱨᱮᱸᱜᱮᱡ ᱨᱮ ᱫᱚᱢ ᱠᱚᱠᱚᱭ ᱠᱟᱱᱟ ᱫᱮᱭᱳ ᱾
ᱨᱮᱸᱜᱮᱡ ᱨᱮ ᱛᱮᱛᱟᱝ ᱨᱮ ᱟᱭᱳ ᱜᱮᱪᱚᱭ ᱮᱢᱟᱢ
ᱵᱟᱢ ᱧᱮᱞᱚᱜ ᱨᱮᱫᱚ ᱜᱚᱴᱟ ᱟᱫᱚᱭ ᱯᱟᱸᱡᱟᱢ ᱾
ᱟᱭᱳ ᱜᱮ ᱵᱟᱲᱟᱭᱟᱭ ᱟᱭᱳ ᱜᱮ ᱮᱢᱟᱢᱟᱭ
ᱟᱭᱳ ᱵᱮᱜᱚᱨ ᱨᱮᱸᱜᱮᱡ ᱛᱮᱛᱟᱝ ᱚᱠᱚᱭᱮ ᱵᱩᱡᱷᱟᱹᱣ ᱛᱟᱢᱟ ᱾
ᱟᱡ ᱵᱟᱝ ᱡᱚᱢ ᱠᱟᱛᱮ ᱟᱢᱮ ᱮᱢᱟᱢ
ᱟᱞᱟᱝ ᱠᱟᱱᱴᱟ ᱠᱷᱚᱱᱟᱜ ᱩᱰᱩᱠ ᱠᱟᱛᱮᱭ ᱮᱢᱟᱢ ᱾
ᱟᱢᱟᱜ ᱥᱩᱠ ᱨᱮᱜᱮ ᱟᱭᱳᱣᱟᱜ ᱥᱩᱠ ᱫᱚ ᱛᱟᱦᱮᱱ
ᱚᱱᱟᱛᱮ ᱟᱭᱳ ᱫᱚ ᱠᱩᱥᱤ ᱨᱮᱜᱮ ᱛᱟᱦᱮᱱ ᱾
ᱟᱭᱳ ᱫᱚ ᱨᱮᱸᱜᱮᱡ ᱛᱮᱛᱟᱝ ᱮ ᱦᱤᱲᱤᱧᱟᱭ
ᱫᱟᱠᱟ ᱩᱛᱩ ᱢᱟ ᱦᱟᱹᱴᱤᱧ ᱛᱮᱜᱮ ᱪᱟᱵᱟᱭ ᱾
ᱫᱚᱦᱚ ᱢᱮᱱᱟᱜ ᱪᱩᱞᱦᱟᱹ ᱠᱩᱰᱟᱹᱢ ᱨᱮ ᱮᱠᱷᱮᱱ ᱴᱩᱠᱩᱡ ᱪᱮᱞᱟᱝ
ᱟᱡᱟᱜ ᱨᱮᱸᱜᱮᱡ ᱫᱚ ᱪᱤᱠᱟᱹ ᱟᱫᱚᱭ ᱥᱟᱢᱟᱝ ᱾
ᱟᱭᱳᱣᱟᱜ ᱢᱚᱞᱚᱝ ᱜᱮ ᱱᱚᱝᱠᱟᱱᱟ
ᱫᱟᱜ ᱥᱤᱴᱷᱟᱹ ᱦᱚᱸ ᱥᱟᱨᱮᱡ ᱵᱟᱹᱱᱩᱜ ᱟᱱᱟ ᱾
ᱵᱮᱨᱮᱞ ᱫᱟᱜ ᱧᱩᱻᱠᱟᱛᱮ ᱨᱮᱸᱜᱮᱡ ᱢᱚᱱᱮ ᱛᱤᱨᱯᱤᱫ
ᱩᱭᱦᱟᱹᱨ ᱟᱹᱪᱩᱨ ᱢᱚᱱᱮ ᱵᱟᱹᱱᱩᱜ ᱧᱤᱫᱟᱹ ᱡᱟᱹᱯᱤᱫ ᱾
ᱵᱟᱨ ᱯᱟᱹᱭ ᱠᱩᱲᱟᱹᱭ ᱧᱟᱢᱚᱜ ᱟᱸᱥ ᱛᱮ
ᱟᱸᱜᱟ ᱨᱮ ᱩᱰᱩᱠᱚᱜ ᱠᱤᱥᱟᱹᱬ ᱠᱟᱹᱢᱤ ᱛᱮ ᱾
ᱥᱤᱛᱩᱝ ᱞᱚᱞᱚ ᱫᱟᱜ ᱡᱟᱹᱯᱩᱫ ᱮ ᱥᱟᱦᱟᱣᱟᱭ
ᱜᱟᱯᱟ ᱪᱮᱫ ᱠᱚ ᱡᱚᱢᱟ ᱚᱱᱟ ᱜᱮ ᱫᱤᱥᱟᱹᱭᱟᱭ ᱾
ᱟᱭᱳᱣᱟᱜ ᱢᱚᱱᱮ ᱫᱚ ᱟᱜᱟᱢ ᱮ ᱩᱭᱦᱟᱹᱨᱟ
ᱵᱟᱝ ᱠᱩᱲᱟᱹᱣ ᱟᱱᱴᱟᱣᱜ ᱨᱮᱫᱚᱭ ᱫᱷᱟᱨ ᱩᱫᱷᱟᱹᱨᱟ ᱾
ᱛᱟᱭᱚᱢ ᱛᱮ ᱚᱱᱟ ᱫᱚ ᱟᱫᱚᱭ ᱦᱟᱞᱟᱭᱟ
ᱮᱱ ᱦᱚᱸ ᱟᱭᱳᱣᱟᱜ ᱢᱚᱱᱮ ᱫᱚ ᱠᱩᱥᱤ ᱛᱮ ᱞᱟᱸᱫᱟᱭᱟ ᱾
ᱟᱭᱳ ᱵᱮᱜᱚᱨ ᱫᱷᱟᱹᱨᱛᱤ ᱪᱤᱠᱟᱹᱢ ᱞᱮᱵᱮᱫ ᱠᱮᱭᱟ
ᱟᱭᱳ ᱵᱮᱜᱚᱨ ᱫᱤᱥᱚᱢ ᱪᱤᱠᱟᱹᱢ ᱧᱮᱞ ᱠᱮᱭᱟ ᱾
ᱥᱤᱧ ᱧᱤᱫᱟᱹᱢ ᱡᱮᱸᱵᱮᱫ ᱞᱮᱱᱟ ᱠᱚᱲᱟᱢ ᱛᱳᱣᱟ ᱨᱮ
ᱦᱟᱨᱟ ᱵᱩᱨᱩ ᱮᱱᱟᱢ ᱟᱭᱳᱣᱟᱜ ᱫᱩᱞᱟᱹᱲ ᱨᱮ ᱾
ᱨᱮᱭᱟᱲ ᱨᱟᱵᱟᱝ ᱨᱮ ᱜᱩᱸᱜᱩᱫ ᱫᱚᱦᱚ ᱞᱮᱫ ᱢᱮᱭᱟᱭ
ᱨᱩᱣᱟᱹᱜ ᱦᱟᱹᱥᱩᱜ ᱨᱮ ᱦᱚᱵᱚᱨ ᱠᱟᱛᱮ ᱟᱸᱜᱟ ᱞᱮᱫᱟᱭ ᱾
ᱡᱟᱹᱯᱤᱫ ᱵᱟᱹᱱᱩᱜᱼᱟ ᱟᱡᱟᱜ ᱢᱮᱫ ᱨᱮ
ᱫᱩᱲᱩᱵ ᱨᱮᱜᱮ ᱛᱟᱦᱮᱱ ᱟᱭᱳ ᱫᱚ ᱧᱤᱫᱟᱹ ᱟᱸᱜᱟᱜ ᱛᱤᱨᱮ ᱾
ᱟᱭᱳᱣᱟᱜ ᱠᱟᱹᱢᱤ ᱫᱚ ᱟᱹᱰᱤ ᱜᱮ ᱦᱟᱦᱟᱲᱟ
ᱛᱤᱥ ᱦᱚᱸ ᱵᱟᱝ ᱪᱟᱵᱟᱜᱼᱟ ᱦᱟᱺᱥᱩᱨ ᱜᱚᱫᱚᱜ ᱟᱭ ᱵᱮᱲᱟ ᱾
ᱞᱟᱸᱜᱟ ᱡᱟᱞᱟ ᱛᱮ ᱟᱭᱳᱭ ᱜᱤᱛᱤᱡ ᱡᱤᱨᱟᱹᱣᱜ
ᱦᱟᱨᱮ ᱯᱷᱟᱨᱮ ᱟᱢ ᱫᱚ ᱦᱚᱦᱚᱢ ᱫᱷᱩᱨᱟᱹᱣᱜ ᱾
ᱟᱢᱟᱜ ᱦᱚᱦᱚ ᱛᱮ ᱟᱭᱳᱭ ᱵᱮᱨᱮᱫ ᱜᱚᱫᱚᱜᱼᱟᱭ
ᱥᱤᱵᱤᱞ ᱟᱲᱟᱝ ᱛᱮ ᱟᱭᱳ ᱜᱚᱝ ᱜᱚᱫᱟᱭ ᱾
ᱭᱳ ᱜᱚ ᱟᱢ ᱫᱚ ᱤᱧᱤᱡ ᱛᱳᱣᱟ ᱫᱟᱨᱮ ᱫᱚᱭᱚ
ᱟᱢ ᱜᱮ ᱤᱧᱤᱡ ᱡᱟᱱᱟᱢ ᱟᱭᱳ ᱾᱾
***
