ᱡᱟᱱᱟᱢ ᱟᱭᱳ ᱛᱳᱣᱟ ᱫᱟᱨᱮ
ᱤᱧᱮᱢ ᱡᱟᱱᱟᱢ ᱠᱮᱫᱤᱧ
ᱦᱮᱣ ᱦᱚᱵᱚᱨ ᱞᱚᱠᱟ ᱮᱱᱮᱡ
ᱠᱩᱸᱭᱰᱤ ᱢᱤᱨᱩ ᱪᱮᱨᱮᱡ ᱫᱩᱞᱟᱹᱲ ᱾
ᱨᱮᱸᱜᱮᱡ ᱵᱤᱫᱟᱹᱞ ᱨᱮ ᱡᱚᱢ ᱞᱟᱹᱜᱤᱫ
ᱪᱟᱸᱫᱚ ᱢᱟᱢᱚ ᱴᱷᱮᱱᱮᱢ ᱠᱷᱚᱡᱟ
ᱛᱳᱣᱟ ᱫᱟᱠᱟ ᱤᱧ ᱞᱟᱹᱜᱤᱫ
ᱮᱲᱮ ᱵᱷᱩᱞᱟᱹᱣ ᱠᱟᱛᱮᱢ ᱟᱡᱚ ᱜᱚᱫᱤᱧ ᱾
ᱟᱨ ᱦᱚᱸ ᱵᱟᱹᱣᱞᱤ ᱥᱮᱨᱮᱧ ᱛᱩᱞᱩᱡ
ᱛᱷᱟᱯᱳ ᱛᱷᱟᱯᱳ ᱛᱮᱢ ᱡᱟᱹᱯᱤᱫ ᱜᱚᱫᱤᱧ
ᱟᱢᱟᱜ ᱫᱩᱞᱟᱹᱲ ᱞᱩᱦᱩᱠ ᱦᱮᱣ ᱦᱚᱵᱚᱨ
ᱥᱚᱨᱚᱜᱽ ᱯᱩᱨᱤ ᱥᱩᱠ ᱠᱷᱚᱱ ᱦᱚᱸ ᱵᱟᱹᱲᱛᱤ ᱾
ᱡᱟᱱᱟᱢ ᱟᱭᱳ ᱛᱳᱣᱟ ᱫᱟᱨᱮ
ᱤᱧᱮᱢ ᱡᱟᱱᱚᱢ ᱠᱮᱫᱤᱧ
ᱱᱤᱛᱤᱧ ᱦᱟᱨᱟᱭᱮᱱ ᱱᱤᱛᱤᱧ ᱵᱩᱨᱩᱭᱮᱱ
ᱟᱫᱚᱢ ᱵᱤᱫᱟᱹᱭ ᱠᱮᱫᱤᱧ ᱡᱟᱶᱟᱭ ᱚᱲᱟᱜ ᱛᱮ ᱾
ᱡᱟᱶᱟᱭ ᱚᱲᱟᱜ ᱨᱮ ᱡᱚᱛᱚ ᱜᱮᱛᱚ
ᱥᱟᱞᱟᱥ ᱧᱮᱯᱮᱞ ᱱᱟᱶᱟ ᱱᱟᱶᱟ
ᱟᱫᱚᱢ ᱠᱚ ᱨᱚᱲᱟ ᱟᱫᱚᱢ ᱠᱚ ᱧᱮᱧᱮᱞ
ᱛᱤᱨᱮ ᱚᱠᱟ ᱞᱮᱠᱟ ᱪᱮᱫ ᱮᱢ ᱠᱟᱹᱢᱤ ᱾
ᱠᱟᱹᱢᱤᱢ ᱜᱟᱱ ᱠᱷᱟᱱ ᱫᱚ ᱱᱟᱯᱟᱭ ᱜᱮ
ᱵᱟᱝ ᱠᱷᱟᱱ ᱫᱚ ᱥᱟᱜᱚᱭ ᱥᱟᱜᱚᱭ
ᱠᱚᱸᱦᱰᱟ ᱟᱲᱟᱜ ᱩᱛᱩ ᱜᱮ
ᱥᱤᱧ ᱧᱤᱫᱟᱹ ᱡᱚᱨᱚᱜ ᱢᱮᱫ-ᱫᱟᱜ ᱜᱮ ᱾
ᱫᱤᱱᱤᱧ ᱩᱭᱦᱟᱹᱨ ᱢᱮᱭᱟ ᱭᱳ
ᱫᱤᱱᱤᱧ ᱵᱷᱟᱵᱽᱱᱟ ᱢᱮᱭᱟ
ᱵᱟᱪᱚᱢ ᱩᱭᱦᱟᱹᱨᱤᱧ ᱦᱟᱱᱟ ᱯᱩᱨᱤ ᱨᱮ
ᱤᱧ ᱢᱟ ᱮᱠᱞᱟ ᱡᱟᱞᱟ ᱯᱩᱨᱤ ᱨᱮ ᱾
ᱢᱚᱱᱮᱧ ᱠᱮᱴᱮᱡᱟ ᱡᱤᱣᱤᱧ ᱫᱚᱲᱦᱚᱭᱟ
ᱡᱟᱶᱟᱭ ᱚᱲᱟᱜ ᱤᱧᱟᱜ ᱤᱧ ᱵᱮᱱᱟᱣᱟ
ᱡᱚᱛᱚᱧ ᱥᱮᱵᱟ ᱠᱚᱣᱟ ᱢᱚᱱᱮ ᱞᱟᱜᱟᱣ ᱠᱟᱛᱮ
ᱟᱢᱟᱜ ᱡᱟᱸᱜᱟ ᱯᱟᱸᱡᱟ ᱨᱮᱭᱳ ᱤᱧᱤᱧ ᱛᱟᱲᱟᱲᱟ ᱾
***
