ᱱᱟᱜᱟᱢ ᱠᱟᱛᱷᱟᱹᱧ ᱜᱟᱞᱚᱪ ᱟᱵᱚᱱᱟ,
ᱦᱟᱱᱮ, ᱑᱘᱕᱕, ᱓᱐ ᱡᱩᱱ ᱥᱟᱞᱮ ᱨᱮᱱᱟᱝ ᱠᱟᱛᱷᱟ,
ᱵᱷᱚᱜᱽᱱᱟᱰᱤ ᱰᱟᱹᱦᱤ ᱨᱮ “ᱦᱩᱞ”ᱥᱮᱸᱜᱮᱞ ᱡᱩᱞ ᱞᱮᱱᱟ,
ᱱᱤᱛᱚᱜ ᱜᱮ ᱦᱩᱭᱩᱜ ᱠᱟᱱ ᱞᱮᱠᱟ ᱩᱭᱦᱟᱹᱨᱚᱜ ᱠᱟᱱᱟ᱾
ᱢᱤᱫ ᱚᱠᱛᱚ………
ᱫᱷᱤᱨᱤᱼᱫᱟᱨᱦᱟ ᱥᱚᱢᱟᱱ ᱠᱟᱛᱮᱫ,
ᱵᱮᱱᱟᱣ ᱞᱮᱫ ᱠᱚ ᱚᱲᱟᱜᱼᱫᱩᱣᱟᱹᱨ…
ᱵᱩᱨᱩᱼᱰᱩᱸᱜᱽᱨᱤ ᱫᱷᱟᱥᱟᱣ ᱠᱟᱛᱮᱫ,
ᱟᱨᱡᱚᱱ ᱞᱮᱫ ᱠᱚ ᱫᱷᱚᱱ ᱫᱩᱨᱤᱵᱽ ᱾
ᱱᱤᱨᱟᱹᱭ ᱢᱩᱞᱩᱠ ᱨᱮ ᱛᱚᱞ ᱠᱮᱫ ᱠᱚ,
ᱥᱩᱠᱷ ᱥᱟᱶᱛᱟ ᱟᱹᱛᱩ ᱫᱤᱥᱚᱢ,
ᱦᱟᱥᱟ ᱪᱮᱛᱟᱱ ᱡᱚᱢᱼᱧᱩ ᱛᱟᱠᱚ,
ᱨᱟᱹᱥᱠᱟᱹ ᱛᱮ ᱪᱮᱦᱮᱞᱼᱪᱮᱯᱮᱞ ᱟᱹᱛᱩ ᱫᱤᱥᱚᱢ ᱾
ᱫᱤᱠᱩᱼᱯᱩᱥᱤ, ᱡᱟᱹᱱᱩᱢ ᱡᱷᱟᱹᱱᱴᱤ,
ᱡᱚᱢᱤᱫᱟᱨ, ᱢᱚᱦᱟᱡᱚᱱ, ᱮᱸᱜᱽᱨᱮᱡᱽ ᱨᱟᱡᱽ-ᱟᱹᱨᱤ,
ᱡᱤ ᱧᱟᱢ ᱠᱮᱫ ᱠᱚ ᱦᱚᱲᱼᱦᱚᱯᱚᱱ ᱠᱩᱥᱤ,
ᱵᱟᱝ ᱠᱚ ᱥᱟᱦᱟᱣ ᱞᱮᱫ-ᱟ ᱱᱩᱠᱩᱣᱟᱜ ᱠᱩᱥᱤ ᱾
ᱨᱮᱡ ᱥᱟᱱᱟ ᱠᱮᱫ ᱠᱚ ᱫᱷᱚᱱ ᱥᱚᱢᱯᱚᱛᱤ,
ᱮᱛᱚᱦᱚᱵ ᱠᱮᱫ ᱠᱚ ᱱᱟᱦᱟᱪᱟᱨ ᱠᱟᱹᱢᱤ,
ᱠᱷᱟᱡᱽᱱᱟ ᱠᱚ ᱵᱟᱹᱲᱛᱤ ᱠᱮᱫ ᱟᱹᱰᱤ ᱵᱟᱹᱲᱛᱤ,
ᱦᱟᱞᱮᱼᱰᱟᱞᱮ ᱨᱮ ᱱᱤᱨᱚᱲ ᱥᱟᱱᱛᱟᱲ ᱡᱤᱣᱤ ᱾
ᱠᱚᱢ ᱜᱚᱱᱚᱝ ᱛᱮ ᱵᱮᱯᱟᱨ ᱠᱟᱹᱢᱤ,
ᱠᱷᱟᱡᱽᱱᱟ ᱟᱹᱫᱟᱹᱭ ᱟᱹᱰᱤ ᱵᱟᱹᱲᱛᱤᱼᱵᱟᱹᱲᱛᱤ,
ᱛᱤᱨᱞᱟᱹ ᱦᱚᱯᱚᱱ ᱪᱮᱛᱟᱱ ᱵᱮᱼᱵᱟᱹᱲᱤᱡ ᱠᱟᱹᱢᱤ,
ᱨᱤᱰᱚᱡᱼᱨᱚᱰᱚᱡ ᱠᱚᱪᱞᱚᱱ ᱟᱹᱰᱤ ᱡᱟᱹᱥᱛᱤ ᱾
ᱛᱤᱱᱟᱹᱜ ᱠᱚ ᱥᱟᱦᱟᱣ ᱠᱷᱮᱨᱣᱟᱲ ᱡᱟᱹᱛᱤ,
ᱚᱱᱛᱚᱨ ᱠᱚᱲᱟᱢ ᱫᱟᱱᱟᱝ ᱨᱮ ᱦᱟᱹᱥᱩ ᱵᱟᱹᱲᱛᱤᱜ,
ᱜᱟᱨᱡᱟᱣ ᱮᱱ ᱠᱚ ᱥᱟᱹᱨᱤ ᱦᱚᱠ ᱞᱟᱹᱜᱤᱫ ᱟᱹᱰᱤ,
ᱜᱟᱨᱡᱟᱣ ᱮᱱ ᱠᱚ ᱱᱤᱨᱟᱹᱭ ᱡᱟᱹᱛᱤ ᱵᱤᱨᱟᱹᱫᱟᱹᱞᱤ ᱾
“ᱦᱩᱞᱼᱦᱩᱞ” ᱨᱮᱱᱟᱝ ᱜᱟᱨᱡᱟᱣ ᱛᱟᱨᱠᱚ ᱮᱱ,
ᱵᱷᱚᱜᱽᱱᱟᱰᱤ ᱟᱹᱛᱩ ᱫᱤᱥᱚᱢ ᱜᱩᱨᱞᱟᱹᱣ ᱟᱹᱪᱩᱨ ᱮᱱ,
ᱵᱮᱼᱵᱟᱹᱲᱤᱡ ᱵᱤᱨᱩᱫᱽ ᱨᱮ ᱧᱮᱯᱮᱫ ᱮᱦᱚᱵ ᱮᱱ,
ᱵᱟᱝ ᱵᱚᱛᱚᱨ ᱠᱟᱛᱮᱫ ᱦᱩᱞᱥᱟᱹᱭ ᱫᱷᱩᱨᱟᱹᱣ ᱮᱱ ᱾
ᱱᱤᱨᱚᱲ ᱠᱷᱮᱨᱣᱟᱲ ᱡᱟᱹᱛᱤ ᱟᱜ ᱨᱟᱹᱜᱤ,
ᱵᱟᱝ ᱠᱚ ᱴᱟᱨᱦᱟᱣ ᱫᱟᱲᱮᱭᱟᱫ ᱫᱤᱠᱩᱼᱯᱩᱥᱤ,
ᱢᱮᱫ ᱡᱟᱹᱯᱤᱫ ᱦᱚᱸ ᱦᱟᱹᱯᱤᱫ ᱩᱛᱟᱹᱨ ᱮᱱ ᱥᱟᱹᱨᱤ,
ᱛᱤᱸᱜᱩ ᱮᱱ ᱠᱚ ᱥᱤᱠᱤᱼᱥᱤᱠᱤ ᱡᱚᱛᱚ ᱟᱹᱫᱤᱵᱟᱹᱥᱤ ᱾
ᱦᱩᱞᱥᱟᱹᱭ ᱨᱮᱱᱟᱝ ᱰᱷᱟᱠᱼᱰᱷᱚᱞ ᱥᱟᱰᱮ,
ᱥᱟᱠᱣᱟ ᱨᱮᱱᱟᱝ ᱚᱨᱚᱝ ᱥᱟᱰᱮ,
ᱨᱟᱱᱼᱨᱟᱱᱟᱣ ᱨᱟᱠᱟᱵ ᱮᱱᱟ ᱞᱩᱛᱩᱨ ᱵᱷᱤᱛᱟᱹᱨ ᱨᱮ,
ᱫᱩᱞᱼᱫᱩᱞᱟᱹᱣ ᱟᱹᱪᱩᱨ ᱮᱱᱟ ᱵᱷᱚᱜᱽᱱᱟᱰᱤ ᱰᱟᱹᱦᱤ ᱨᱮ ᱾
ᱡᱷᱟᱸᱡᱽᱨᱟ ᱵᱷᱩᱜᱟᱹᱜ ᱮᱱ ᱯᱟᱸᱡᱽᱨᱟ,ᱜᱩᱞᱤ ᱛᱮ,
ᱜᱷᱟᱨᱲᱟ ᱵᱚᱞᱚ ᱮᱱ, ᱦᱚᱲᱢᱚᱼᱦᱟᱨᱛᱟ, ᱥᱟᱨᱼᱩᱜᱽᱞᱤ ᱛᱮ,
ᱵᱷᱤᱸᱫᱟᱹᱲ ᱮᱱ ᱠᱚ ᱢᱟᱱᱣᱟ ᱫᱟᱢᱯᱟᱼᱫᱤᱲᱟᱹᱝ ᱜᱮ,
ᱞᱚᱦᱚᱫ ᱮᱱ ᱰᱟᱹᱦᱤ ᱡᱚᱨᱚᱵᱚᱨᱚ ᱢᱟᱭᱟᱝ ᱛᱮ,
ᱫᱷᱟᱢᱥᱟᱼᱥᱟᱠᱣᱟ ᱨᱮᱱᱟᱝ ᱥᱟᱰᱮ ᱛᱮ,
ᱮᱸᱜᱽᱨᱮᱡᱽ ᱡᱟᱹᱛᱤ ᱪᱚᱢᱠᱟᱣ ᱞᱮᱱ ᱟᱹᱰᱤ ᱛᱮᱫ ᱜᱮ,
ᱵᱟᱱᱟᱨ ᱯᱟᱦᱴᱟ ᱜᱩᱢᱨᱟᱹᱣ ᱮᱱ ᱜᱩᱡᱩᱜ ᱟᱲᱟᱝ ᱛᱮ!!!
ᱫᱩᱜ ᱞᱟᱹᱜᱤᱫ ᱵᱟᱹᱱᱩᱜ ᱠᱚ ᱚᱠᱚᱭ ᱡᱟᱹᱛᱤ ᱜᱮ ᱾
ᱦᱚᱭᱼᱵᱟᱺᱨᱰᱩ ᱥᱟᱶ ᱜᱩᱨᱞᱟᱹᱣ ᱮᱱᱟ,
ᱢᱟᱭᱟᱝ ᱡᱮᱦᱮᱼᱡᱚᱵᱮ ᱞᱤᱸᱡᱤ ᱮᱱᱟ,
ᱵᱟᱥᱟᱝ ᱫᱟᱜ ᱞᱮᱠᱟ ᱦᱮᱰᱮᱡ ᱮᱱᱟ,
ᱚᱱᱛᱚᱨ ᱢᱚᱱᱮᱼᱡᱤᱣᱤ ᱞᱚ ᱮᱱᱟ ᱾
ᱦᱟᱡᱟᱨᱼᱦᱟᱡᱟᱨ ᱡᱤᱣᱤ ᱤᱬᱤᱡ ᱮᱱᱟ,
ᱵᱷᱚᱜᱽᱱᱟᱰᱤ ᱰᱟᱹᱦᱤ, ᱦᱩᱞ ᱥᱮᱸᱜᱮᱞ ᱡᱩᱞ ᱮᱱᱟ,
ᱠᱟᱞᱠᱟᱞᱟᱣ ᱨᱟᱹᱲ ᱟᱲᱟᱝ ᱡᱤᱣᱤ ᱨᱮᱱᱟᱝ,
ᱱᱤᱛ ᱦᱚᱸ ᱯᱟᱞᱮᱱ ᱟᱸᱡᱚᱢ ᱛᱟᱨᱠᱚᱜ ᱜᱮᱭᱟ ᱾
***
