ᱫᱷᱟᱯ ᱫᱷᱩᱯ

ᱜᱤᱫᱽᱨᱟᱹ ᱚᱠᱛᱮ ᱠᱚᱢ ᱵᱮᱥᱤ ᱡᱚᱛᱚ ᱜᱤᱫᱽᱨᱟᱹ ᱜᱮ ᱤᱥᱠᱩᱞ ᱵᱟᱝ ᱪᱟᱞᱟᱜ
ᱞᱟᱹᱜᱤᱫ ᱠᱚ ᱟᱹᱲᱤᱭᱟ ᱾ ᱢᱮᱱᱠᱷᱟᱱ ᱚᱱᱚᱞ ᱤᱥᱠᱩᱞ ᱵᱟᱝ ᱪᱟᱞᱟᱜ ᱞᱟᱹᱜᱤᱫ ᱫᱚ ᱛᱤᱥ ᱦᱚᱸ ᱵᱟᱭ ᱟᱹᱲᱤᱭᱟᱠᱟᱫᱟ ᱾ ᱵᱚᱨᱚᱝ ᱤᱥᱠᱩᱞ ᱵᱟᱝ ᱠᱚ ᱤᱫᱤᱭᱮ ᱠᱷᱟᱱ ᱫᱚᱢᱮᱭ ᱨᱟᱜ ᱮᱫ ᱛᱟᱸᱦᱮ ᱠᱟᱱᱟ ᱾ ᱚᱱᱚᱞ ᱨᱮᱱ ᱫᱚ ᱢᱤᱫᱴᱟᱝ ᱟᱡ ᱫᱟᱹᱭ ᱮ ᱛᱟᱸᱦᱮ ᱠᱟᱱᱟ ᱾ ᱧᱩᱛᱩᱢ ᱛᱟᱭ ᱫᱚ ᱟᱦᱞᱟ ᱾ ᱟᱡ ᱠᱷᱚᱱ ᱫᱚ ᱵᱟᱨ ᱥᱮᱨᱢᱟ ᱜᱟᱱᱮ ᱢᱟᱨᱟᱝᱼᱟ ᱾ ᱩᱱᱤ ᱫᱚ ᱤᱥᱠᱩᱞ ᱨᱮᱠᱚ ᱵᱷᱩᱨᱛᱤ ᱟᱠᱟᱫᱮ ᱛᱮ ᱤᱥᱠᱩᱞ ᱪᱟᱞᱟᱜ ᱮ ᱮᱦᱚᱵ ᱟᱠᱟᱫᱟ ᱾ ᱚᱱᱚᱞ ᱦᱚᱸ ᱤᱥᱠᱩᱞ ᱪᱟᱞᱟᱜ ᱞᱟᱹᱜᱤᱫᱼᱮ ᱡᱳᱨᱟ, ᱢᱮᱱᱠᱷᱟᱱ ᱟᱡ ᱟᱭᱳ ᱴᱷᱮᱱ ᱢᱟᱢ ᱵᱟᱭ ᱵᱟᱹᱜᱤ ᱟᱠᱟᱫ ᱛᱮ ᱤᱥᱠᱩᱞ ᱫᱚ ᱵᱟᱝ ᱠᱚ ᱠᱩᱞᱮᱭᱟ ᱾ ᱵᱟᱨ ᱥᱮᱨᱢᱟ ᱜᱟᱱ ᱩᱢᱮᱨ ᱦᱩᱭᱮᱱ ᱛᱟᱭᱟ, ᱨᱚᱲ ᱦᱚᱸ ᱵᱷᱟᱜᱮ ᱜᱮᱭ ᱥᱮᱬᱟ ᱜᱚᱫ ᱟᱠᱟᱫᱟ ᱾ ᱟᱦᱞᱟ ᱫᱚ ᱫᱤᱱᱟᱹᱢ ᱜᱮ ᱤᱥᱠᱩᱞ ᱛᱮᱭ ᱪᱟᱞᱟᱜᱼᱟ, ᱚᱱᱚᱞ ᱦᱚᱸ ᱟᱡ ᱫᱟᱹᱭ ᱥᱟᱶ ᱪᱟᱞᱟᱜ ᱞᱟᱹᱜᱤᱫ ᱫᱚᱢᱮᱭ ᱟᱹᱲᱤᱭᱟ ᱾ ᱢᱮᱱᱠᱷᱟᱱ ᱚᱱᱚᱞ ᱫᱚ ᱵᱚᱫᱽᱢᱟᱥ ᱫᱚ ᱫᱚᱢᱮ ᱜᱮ ᱵᱚᱫᱽᱢᱟᱥ ᱮ ᱛᱟᱸᱦᱮ ᱠᱟᱱᱟ, ᱚᱱᱟᱛᱮ ᱟᱦᱞᱟ ᱟᱡ ᱥᱟᱶ ᱤᱥᱠᱩᱞ ᱤᱫᱤ ᱜᱮ ᱵᱟᱭ ᱨᱮᱵᱮᱱᱟ ᱾ ᱱᱚᱸᱛᱮ ᱟᱡ ᱟᱭᱳ ᱴᱷᱮᱱᱮ ᱢᱟᱢ ᱜᱮᱭᱟ ᱟᱨ ᱱᱚᱸᱛᱮᱭ ᱢᱮᱱᱟ ᱦᱟᱯᱮᱱᱟ ᱛᱟᱺᱜᱤᱧ ᱢᱮᱱᱟ ᱤᱧ ᱦᱚᱸᱧ ᱪᱟᱞᱟᱜᱼᱟ ᱾ ᱟᱨ ᱟᱦᱞᱟ ᱫᱚᱭ ᱢᱮᱱᱟ ᱤᱧ ᱫᱚ ᱵᱟᱝ ᱤᱧ ᱤᱫᱤᱭᱮᱭᱟ ᱵᱟᱹᱵᱩ ᱫᱚ, ᱦᱚᱲ ᱨᱮᱱ ᱜᱤᱫᱽᱨᱟᱹ ᱠᱚᱭ ᱫᱟᱞ ᱵᱟᱲᱟ ᱠᱚᱣᱟ ᱾ ᱚᱱᱟ ᱢᱮᱱ ᱢᱮᱱ ᱛᱮᱜᱮ ᱯᱚᱛᱚᱵ ᱠᱚ ᱥᱟᱵ ᱠᱟᱛᱮᱫ ᱮᱠᱞᱟ ᱜᱮᱭ ᱳᱰᱳᱠ ᱪᱟᱞᱟᱣᱮᱱ ᱜᱮ ᱟᱨ ᱚᱱᱚᱞ ᱫᱚ ᱛᱟᱭᱚᱢ ᱛᱮ ᱨᱟᱜ ᱨᱟᱜ ᱛᱮ ᱟᱡ ᱟᱭᱳ ᱤᱥᱠᱩᱞ ᱛᱮᱭ ᱤᱫᱤ ᱦᱚᱴᱚ ᱠᱚᱣᱟ ᱾

ᱟᱦᱞᱟ ᱛᱟᱠᱚᱣᱟᱜ ᱫᱚ ᱢᱤᱫ ᱪᱟᱱᱟᱪ ᱨᱮᱭᱟᱜ ᱢᱩᱪᱟᱹᱫ ᱵᱤᱱᱤᱰ ᱥᱮᱴᱮᱨ
ᱟᱠᱟᱱ ᱛᱟᱠᱚᱣᱟ ᱾ ᱟᱫᱚ ᱟᱡ ᱟᱭᱳ ᱜᱮ ᱯᱟᱲᱦᱟᱜᱼᱮ ᱞᱟᱹᱭ ᱟᱭ ᱠᱟᱱ ᱛᱟᱸᱦᱮ ᱠᱟᱱᱟ, ᱟᱨ ᱚᱱᱚᱞ ᱫᱚᱭ ᱢᱟᱢ ᱮᱫᱟ ᱾ ᱟᱦᱞᱟᱭ ᱢᱮᱛᱟᱭ ᱠᱟᱱᱟ – ᱮ ᱵᱤᱴᱤ ᱱᱚᱣᱟ ᱠᱚ ᱱᱚᱣᱟ ᱠᱚ ᱯᱟᱲᱦᱟᱣ ᱢᱮ ᱵᱤᱱᱤᱰ ᱨᱮ ᱧᱩᱨᱦᱟᱹᱜ ᱛᱟᱯᱮᱭᱟ ᱾ ᱚᱱᱚᱞ ᱫᱚ ᱟᱸᱡᱚᱢ ᱥᱟᱶ ᱛᱮᱜᱮ ᱟᱡ ᱟᱭᱳᱭ ᱢᱮᱛᱟᱭ ᱠᱟᱱᱟ ᱜᱚ! ᱪᱮᱫ ᱞᱮᱠᱟ ᱧᱩᱨᱦᱟᱹᱜᱼᱟ, ᱫᱷᱟᱯ ᱫᱷᱩᱯ ᱧᱩᱨᱦᱟᱹᱜᱼᱟ? ᱟᱡ ᱟᱭᱳ ᱫᱚ ᱱᱟᱥᱮ ᱢᱩᱞᱩᱡ ᱞᱟᱸᱫᱟ ᱠᱮᱫᱟᱭ ᱟᱨ ᱮ ᱢᱮᱛᱟ ᱫᱮᱭᱟ ᱟᱢᱟᱜ ᱡᱚᱠᱷᱚᱱ ᱵᱤᱱᱤᱰ ᱦᱩᱭᱩᱜ ᱛᱟᱢᱟ ᱩᱱ ᱦᱟᱜ ᱮᱢ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ ᱾

ᱟᱫᱚ ᱪᱮᱫ ᱠᱟᱛᱷᱟ ᱦᱚᱸ ᱵᱟᱝ ᱠᱤᱱ ᱢᱮᱱ ᱵᱟᱲᱟ ᱞᱮᱫᱟ ᱾

ᱚᱱᱚᱞ ᱦᱚᱸ ᱛᱩᱨᱩᱭ ᱥᱮᱨᱢᱟ ᱩᱢᱮᱨ ᱦᱳᱭ ᱮᱱ ᱛᱟᱭᱟ ᱾ ᱤᱥᱠᱩᱞ ᱨᱮ ᱠᱚ ᱵᱷᱩᱨᱛᱤ ᱠᱟᱫᱮᱭᱟ ᱾ ᱢᱤᱫ ᱪᱟᱱᱟᱪ ᱨᱮᱭᱟᱜ ᱡᱚᱠᱷᱚᱱ ᱯᱳᱭᱞᱳ ᱵᱤᱱᱤᱰ ᱥᱮᱴᱮᱨᱮᱱ ᱛᱟᱭᱟ ᱮᱱ ᱦᱤᱞᱳᱜ ᱫᱚ ᱥᱮᱛᱟᱜ ᱠᱷᱚᱱ ᱥᱟᱱᱟᱢᱟᱜ ᱴᱷᱤᱠ ᱜᱮ ᱛᱟᱦᱮᱸ ᱠᱟᱱᱟ ᱾ ᱯᱟᱲᱦᱟᱣ, ᱛᱩᱯᱩ, ᱡᱚᱢ, ᱡᱚᱛᱚᱣᱟᱜ ᱜᱮ ᱦᱳᱭ ᱟᱠᱟᱱ ᱛᱟᱭᱟ ᱾ ᱢᱮᱱᱠᱷᱟᱱ ᱤᱥᱠᱩᱞ ᱡᱟᱢᱟ ᱡᱚᱠᱷᱚᱱ ᱠᱚ ᱦᱚᱨᱚᱜ ᱟᱭ ᱠᱟᱱᱟ ᱩᱱ ᱫᱚᱭ ᱢᱮᱱ ᱮᱫᱟ ᱤᱧ ᱫᱚ ᱤᱥᱠᱩᱞ ᱫᱚ ᱵᱟᱝ ᱤᱧ ᱪᱟᱞᱟᱜᱼᱟ ᱾ ᱟᱦᱞᱟ ᱦᱚᱸᱭ ᱥᱟᱹᱛ ᱮᱱᱟ ᱾ ᱤᱥᱠᱩᱞ ᱪᱟᱞᱟᱜ ᱨᱮᱱᱟᱜ ᱚᱠᱛᱚ ᱦᱳᱭᱮᱱ ᱨᱮᱦᱚᱸ ᱚᱱᱚᱞ ᱫᱚ ᱤᱥᱠᱩᱞ ᱪᱟᱞᱟᱜ ᱫᱚ ᱵᱟᱭ ᱨᱮᱵᱮᱱ ᱠᱟᱱᱟ ᱾ ᱩᱱ ᱫᱚ ᱟᱡ ᱟᱭᱳ ᱨᱟᱹᱜᱤ ᱠᱟᱛᱮᱫ ᱚᱱᱚᱞ ᱫᱚ ᱵᱟᱛᱷᱨᱩᱢ ᱨᱮᱭ ᱥᱤᱧ ᱠᱟᱫᱮᱭᱟ ᱾ ᱟᱦᱞᱟ ᱫᱚ ᱤᱥᱠᱩᱞᱮ ᱤᱫᱤ ᱦᱚᱴᱚ ᱠᱟᱫᱮᱭᱟ ᱟᱨᱮ ᱨᱩᱣᱟᱹᱲ ᱦᱮᱡ ᱮᱱᱟ ᱾

ᱨᱩᱣᱟᱹᱲ ᱠᱟᱛᱮᱫ ᱟᱨ ᱦᱚᱸ ᱚᱱᱚᱞᱮ ᱠᱩᱞᱤᱭᱮ ᱠᱟᱱᱟ – ᱞᱟᱹᱭ ᱢᱮ ᱵᱤᱱᱤᱰ ᱮᱢᱮᱢ
ᱪᱟᱞᱟᱜᱼᱟ ᱥᱮ ᱵᱟᱝ ᱟᱨ ᱵᱟᱝᱠᱷᱟᱱ ᱫᱚ ᱛᱤᱦᱤᱧ ᱫᱚ ᱱᱚᱣᱟ ᱵᱟᱛᱷᱨᱩᱢ ᱨᱮᱜᱮ
ᱛᱟᱸᱦᱮᱱ ᱢᱮ ᱾ ᱚᱱᱚᱞ ᱫᱚ ᱫᱚᱢᱮᱭ ᱨᱟᱜ ᱮᱫᱟ ᱟᱨ ᱮ ᱢᱮᱱ ᱮᱫᱟ ᱤᱧ ᱫᱚ ᱵᱟᱝ ᱤᱧ ᱪᱟᱞᱟᱜᱼᱟ ᱾ ᱟᱹᱰᱤ ᱜᱷᱟᱹᱲᱤᱡ ᱛᱟᱭᱚᱢ ᱚᱱᱚᱞ ᱫᱚ ᱪᱮᱫ ᱠᱚᱪᱚᱭ ᱩᱭᱦᱟᱹᱨ ᱠᱮᱫᱟ ᱟᱨᱮ ᱢᱮᱱ ᱠᱮᱫᱟ ᱮ ᱜᱚ ᱡᱷᱤᱡ ᱠᱟᱹᱧ ᱢᱮ ᱤᱧ ᱫᱚ ᱤᱥᱠᱩᱞ ᱛᱮ ᱵᱤᱱᱤᱰ ᱮᱢᱤᱧ ᱪᱟᱞᱟᱜᱼᱟ ᱾ ᱟᱡ ᱟᱭᱳ ᱫᱚ ᱵᱟᱛᱷᱨᱩᱢ ᱠᱷᱚᱱᱮ ᱳᱰᱳᱠ ᱠᱮᱫᱮᱭᱟ ᱟᱨ ᱡᱟᱢᱟ ᱠᱚ ᱦᱚᱨᱚᱜ ᱡᱩᱛ ᱠᱟᱛᱮᱫ ᱪᱤᱨᱩᱱ ᱥᱟᱯᱷᱟ ᱠᱟᱫᱮ ᱛᱮ ᱤᱥᱠᱩᱞ ᱛᱮᱭ ᱤᱫᱤ ᱠᱮᱫᱮᱭᱟ ᱾

ᱤᱥᱠᱩᱞ ᱪᱟᱞᱟᱜ ᱛᱮ ᱠᱟᱹᱴᱤᱡ ᱵᱤᱞᱚᱢ ᱞᱮᱱ ᱛᱟᱭ ᱨᱮᱦᱚᱸ ᱡᱟᱦᱟᱸ ᱜᱮ ᱦᱮᱡ ᱞᱮᱱ ᱡᱚᱛᱚ ᱜᱮᱭ ᱚᱞ ᱫᱟᱲᱮᱭᱟᱫᱟ ᱾ ᱡᱤᱭᱚᱱ ᱨᱮᱱᱟᱜ ᱯᱳᱭᱞᱳ ᱵᱤᱱᱤᱰ ᱫᱚ ᱵᱷᱟᱜᱮ ᱜᱮᱭ ᱮᱢ ᱠᱮᱫᱟ ᱾

ᱵᱤᱱᱤᱰ ᱠᱚ ᱯᱟᱨᱚᱢᱮᱱ ᱠᱷᱟᱱ ᱢᱤᱫ ᱫᱤᱱ ᱧᱤᱫᱟᱹ ᱡᱚᱠᱷᱚᱱ ᱚᱱᱚᱞ ᱫᱚ ᱟᱡ
ᱟᱭᱳ ᱴᱷᱮᱱᱮ ᱦᱚᱵᱚᱨ ᱟᱠᱟᱱᱟ ᱾ ᱩᱱ ᱟᱡ ᱟᱭᱳ ᱚᱱᱚᱞᱮ ᱠᱩᱞᱤᱭᱮ ᱠᱟᱱᱟ ᱵᱮᱴᱟ ᱟᱢ ᱫᱚ ᱵᱤᱱᱤᱰ ᱮᱢ ᱪᱟᱞᱟᱜ ᱚᱠᱛᱚ ᱪᱮᱫᱟᱜ ᱮᱢ ᱵᱚᱛᱚᱨᱚᱜ ᱠᱟᱱ ᱛᱟᱸᱦᱮ ᱠᱟᱱᱟ ᱾

ᱵᱤᱱᱤᱰ ᱢᱟ ᱱᱟᱯᱟᱭ ᱜᱮ ᱦᱳᱭᱮᱱ ᱛᱟᱢ ᱾ ᱚᱱᱚᱞ ᱮ ᱢᱮᱱ ᱠᱮᱫᱟ – ᱵᱟᱰᱟᱭᱟᱢ ᱥᱮ ᱜᱚ ᱠᱟᱹᱴᱤᱡ ᱡᱚᱠᱷᱚᱱᱤᱧ ᱛᱟᱸᱦᱮ ᱠᱟᱱᱟ ᱩᱱ ᱫᱟᱹᱭ ᱮᱢ ᱞᱟᱹᱭ ᱟᱭ ᱠᱟᱱ ᱛᱟᱸᱦᱮ ᱠᱟᱱᱟ ᱵᱟᱝ ᱡᱮ ᱱᱚᱣᱟ ᱠᱚ ᱱᱚᱣᱟ ᱠᱚ ᱯᱟᱲᱦᱟᱣ ᱢᱮ, ᱱᱚᱣᱟ ᱠᱚ ᱫᱚ ᱵᱤᱱᱤᱰ ᱨᱮ ᱧᱩᱨᱦᱟᱹᱜᱼᱟ ᱾ ᱩᱱ ᱤᱧᱤᱧ ᱠᱩᱞᱤ ᱞᱮᱫ ᱢᱮᱫᱚ – ᱪᱮᱫ ᱞᱮᱠᱟ ᱧᱩᱨᱦᱟᱹᱜᱼᱟ, ᱫᱷᱟᱯ ᱫᱷᱩᱯ ᱧᱩᱨᱦᱟᱹᱜᱼᱟ? ᱩᱱ ᱟᱢ ᱚᱱᱟ ᱨᱮᱭᱟᱜ ᱛᱮᱞᱟ ᱢᱟ ᱵᱟᱢ ᱞᱟᱹᱭ ᱟᱹᱫᱤᱧ ᱛᱟᱸᱦᱮ ᱠᱟᱱᱟ ᱾ ᱟᱵᱳᱣᱟᱜ ᱥᱤᱬᱤ ᱢᱮᱱᱟᱜ ᱛᱟᱵᱚᱱ ᱚᱱᱟ ᱨᱮ ᱠᱟᱹᱴᱤᱡ ᱡᱚᱠᱷᱟᱱ ᱤᱧ ᱫᱚ ᱚᱱᱟᱨᱮ ᱫᱷᱟᱯ ᱫᱷᱩᱯ, ᱫᱷᱟᱯ ᱫᱷᱩᱯ ᱢᱮᱱ ᱠᱟᱛᱮᱫ ᱤᱧ ᱟᱬᱜᱳ ᱨᱟᱠᱟᱵ ᱠᱟᱱ ᱛᱟᱸᱦᱮ ᱠᱟᱱᱟ ᱾ ᱟᱫᱚ ᱤᱧ ᱫᱚᱧ ᱢᱚᱱᱮ ᱞᱮᱫᱟ ᱚᱱᱠᱟᱜᱮ ᱡᱟᱹᱱᱤᱡ ᱥᱤᱬᱤ ᱠᱚᱨᱮ ᱠᱷᱚᱱ ᱤᱧ ᱧᱩᱨᱦᱟᱹᱜᱼᱟ ᱾ ᱟᱫᱚ ᱟᱡ ᱟᱭᱳᱭ ᱢᱮᱱ ᱠᱮᱫᱟ ᱤᱧᱟᱜ ᱜᱮ ᱵᱷᱩᱞ ᱦᱳᱭ ᱟᱠᱟᱱ ᱛᱤᱧᱟ ᱾ ᱩᱱ ᱜᱮ ᱟᱢ ᱵᱩᱡᱷᱟᱹᱣ ᱠᱟᱢ ᱞᱟᱹᱠᱛᱤ ᱛᱟᱸᱦᱮ ᱠᱟᱱ ᱛᱤᱧᱟ ᱾ ᱮᱸᱰᱮᱠᱷᱟᱱ ᱟᱢᱟᱜ ᱢᱚᱱᱮ ᱨᱮ ᱱᱚᱣᱟ ᱵᱚᱛᱚᱨ ᱫᱚ ᱵᱟᱝ ᱛᱟᱦᱮᱸ ᱠᱚᱜᱼᱟ, ᱵᱩᱡᱷᱟᱹᱣ ᱫᱟᱲᱮ ᱠᱮᱭᱟᱢ ᱾ ᱮᱸᱰᱮᱠᱷᱟᱱᱮᱢ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟᱢ ᱛᱚ ᱜᱤᱫᱽᱨᱟᱹ ᱫᱚ ᱠᱟᱹᱴᱤᱡ ᱠᱷᱚᱱ ᱡᱟᱦᱟᱸ ᱜᱮᱢ ᱥᱮᱬᱟ ᱟᱠᱚᱣᱟ, ᱞᱟᱹᱭ ᱟᱠᱚᱣᱟ, ᱚᱱᱟ ᱜᱮᱠᱚ ᱵᱩᱡᱷᱟᱹᱣᱟ ᱟᱨ ᱠᱚ ᱫᱤᱥᱟᱹ ᱫᱚᱦᱚ ᱠᱟᱜᱼᱟ ᱾

***