ᱵᱤᱨᱼᱵᱩᱨᱩ ᱨᱮ ᱥᱮᱸᱜᱮᱞ ᱥᱟᱞᱜᱟᱣ ᱞᱮᱱ ᱠᱷᱟᱱ
ᱦᱤᱥᱤᱫ ᱦᱚᱭ ᱛᱮ ᱜᱚᱴᱟ ᱵᱩᱨᱩ ᱟᱛᱟᱨ ᱜᱚᱫᱚᱜᱼᱟ
ᱵᱤᱨ ᱡᱟᱱᱣᱟ ᱦᱚᱸ ᱞᱩᱠᱩᱫᱻᱞᱩᱠᱩᱫ
ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ ᱠᱚ ᱫᱟᱹᱲ ᱡᱚᱝᱟ ᱿
ᱥᱮᱨᱢᱟ ᱨᱤᱢᱤᱞ ᱨᱟᱠᱟᱵ ᱞᱮᱱ ᱠᱷᱟᱱ
ᱡᱷᱤᱯᱤᱨ ᱡᱟᱹᱲᱤ, ᱡᱟᱹᱲᱤ ᱞᱮᱠᱷᱟᱱᱮ
ᱦᱩᱨᱩᱢ ᱥᱮᱸᱜᱮᱞ ᱦᱚᱸ ᱦᱟᱹᱨᱥᱩᱲ ᱜᱚᱫᱚᱜᱼᱟ
ᱡᱷᱤᱯᱤᱨ ᱡᱟᱹᱲᱤ ᱛᱮ ᱿
ᱥᱟᱱᱛᱟᱲ ᱥᱟᱶᱛᱟ ᱨᱮ ᱥᱮᱸᱜᱮᱞ ᱥᱟᱞᱜᱟᱣ ᱟᱠᱟᱱ
ᱰᱤᱜᱤᱨᱻᱰᱤᱜᱤᱨ ᱜᱚᱴᱟ ᱫᱤᱥᱚᱢ ᱟᱛᱟᱨᱚᱜ ᱠᱟᱱ
ᱚᱱᱟ ᱥᱩᱭᱟᱹ ᱥᱮᱸᱜᱮᱞ ᱛᱮ
ᱢᱟᱹᱱᱢᱤ ᱢᱚᱱᱮ ᱟᱛᱟᱨᱚᱜ ᱠᱟᱱ
ᱠᱷᱟᱹᱯᱟᱹᱨᱤᱭᱟᱹᱣ ᱜᱮ ᱥᱟᱜᱮᱱᱚᱜ ᱠᱟᱱ ᱿
ᱢᱤᱫᱴᱟᱹᱝ ᱟᱹᱛᱩ ᱨᱮ ᱢᱤᱫᱴᱟᱹᱝ ᱡᱟᱦᱮᱨ
ᱟᱨ ᱢᱤᱫᱴᱟᱹᱝ ᱜᱮ ᱢᱟᱬᱜᱷᱟᱹᱴᱤ
ᱛᱮᱸᱜᱮᱱ ᱛᱟᱞᱟᱠ ᱠᱟᱛᱮ ᱠᱚ ᱵᱮᱨᱮᱫ ᱞᱮᱫ
ᱟᱵᱚ ᱨᱤᱱ ᱟᱹᱜᱤᱞ ᱦᱟᱯᱲᱟᱢ ᱿
ᱞᱩᱜᱩ ᱵᱩᱨᱩ ᱫᱚᱨᱵᱟᱨ ᱪᱟᱹᱴᱟᱹᱱᱤ ᱨᱮ
ᱜᱮᱞᱵᱟᱨ ᱥᱮᱨᱢᱟ ᱟᱪᱟᱨᱻᱵᱤᱪᱟᱹᱨ ᱢᱤᱫ ᱞᱮᱫ ᱠᱚ
ᱟᱵᱚ ᱨᱤᱱ ᱯᱩᱨᱩᱫᱷᱩᱞ ᱦᱟᱯᱲᱟᱢ ᱠᱚ
ᱢᱤᱫ ᱟᱹᱨᱤᱼᱪᱟᱹᱞᱤ ᱢᱤᱫ ᱥᱩᱛᱟᱹᱢ ᱛᱮ ᱛᱚᱞᱚᱜ
ᱞᱟᱹᱜᱤᱫ ᱿
ᱮᱱ ᱠᱷᱟᱱ ᱪᱮᱫᱟᱜ ?
ᱦᱟᱯᱲᱟᱢ ᱠᱚᱣᱟᱜ ᱨᱤᱛᱤᱻᱱᱤᱛᱤ
ᱛᱟᱞᱚᱢ ᱞᱚᱴᱚᱢ ᱠᱟᱛᱮ
ᱥᱟᱶᱛᱟᱭ ᱰᱟᱦᱨᱟᱣ ᱟᱠᱟᱱ
ᱟᱫᱚᱜ ᱟᱸᱜᱮᱱᱚᱜ ᱥᱮᱫ ᱾
ᱚᱠᱚᱭ ᱠᱟᱱᱟᱭ ᱞᱟᱹᱣᱲᱤᱭᱟᱹ
ᱩᱭᱦᱟᱹᱨ ᱢᱟᱵᱚᱱ ᱱᱟᱥᱮ ?
ᱢᱤᱫ ᱟᱹᱛᱩ ᱨᱮ ᱵᱟᱨᱭᱟ ᱢᱟᱹᱡᱷᱤ
ᱢᱚᱬᱮ ᱦᱚᱲ ᱠᱚᱦᱚᱸ ᱦᱟᱸᱛᱮ ᱱᱟᱛᱮ
ᱟᱹᱛᱩ ᱦᱚᱲ ᱠᱚᱦᱚᱸ ᱦᱤᱨᱤᱡᱼᱯᱟᱹᱥᱤᱨ
ᱡᱟᱦᱮᱨ ᱵᱚᱸᱜᱟ ᱦᱚᱸ ᱦᱤᱴᱟᱹᱝᱼᱡᱟᱲᱟᱝ ᱿
ᱚᱠᱚᱭ ᱠᱟᱱᱟᱭ ᱩᱱᱤ ᱥᱮᱪᱮᱫᱤᱡ ᱥᱮ ᱢᱩᱨᱩᱠᱤᱡ
ᱥᱟᱶᱛᱟ ᱥᱚᱸᱜᱷᱟ ᱨᱮ ᱥᱮᱸᱜᱮᱞᱮ ᱥᱟᱞᱜᱟᱣ ᱟᱠᱟᱫ
ᱚᱱᱟ ᱥᱩᱭᱟᱹ ᱥᱮᱸᱜᱮᱞ ᱛᱮ ᱟᱛᱟᱨᱚᱜ ᱠᱟᱱ
ᱟᱵᱚᱣᱟᱜ ᱫᱷᱚᱨᱚᱢ ᱠᱚᱨᱚᱢ ᱠᱟᱛᱷᱟ ᱿
***
