ᱱᱚᱣᱟ ᱥᱚᱝᱥᱟᱨ ᱥᱚᱱᱮᱨ ᱥᱚᱝᱥᱟᱨ
ᱥᱩᱞᱩᱠ ᱜᱷᱟᱨᱚᱸᱡᱽ ᱥᱚᱝᱥᱟᱨ
ᱥᱚᱝᱥᱟᱨ ᱨᱤᱱ ᱠᱤᱱ ᱢᱩᱛᱩᱞ ᱠᱷᱩᱱᱴᱤ
ᱟᱵᱚ ᱨᱤᱱ ᱟᱭᱳ ᱵᱟᱵᱟ ᱾
ᱡᱟᱦᱮᱨ ᱜᱟᱲ ᱨᱤᱱ ᱢᱟᱨᱟᱝ ᱵᱚᱸᱜᱟ
ᱢᱟᱨᱟᱝ ᱵᱳᱨᱳ ᱡᱟᱦᱮᱨ ᱟᱭᱳ
ᱥᱟᱶᱨᱮ ᱢᱮᱱᱟᱜ ᱠᱚ ᱵᱚᱸᱜᱟ ᱵᱳᱨᱳ
ᱢᱚᱬᱮ ᱛᱩᱨᱩᱭ ᱠᱚ ᱾
ᱥᱚᱝᱥᱟᱨ ᱛᱟᱵᱚ ᱡᱟᱦᱮᱨ ᱞᱮᱠᱟ
ᱟᱨ ᱟᱭᱳ ᱛᱟᱵᱚ ᱢᱟᱨᱟᱝ ᱵᱳᱨᱳ ᱡᱟᱦᱮᱨ ᱟᱭᱳ ᱞᱮᱠᱟ
ᱤᱱᱟᱹ ᱛᱟᱭᱚᱢ ᱨᱮ ᱢᱮᱱᱟᱜ ᱵᱚᱱᱟ
ᱟᱹᱠᱤᱱ ᱨᱤᱱ ᱜᱤᱫᱟᱹᱨ ᱯᱤᱫᱟᱹᱨ
ᱟᱭᱳ ᱵᱟᱵᱟ ᱠᱤᱱ ᱵᱮᱱᱟᱣ ᱟᱠᱟᱫ
ᱥᱩᱞᱩᱠ ᱜᱷᱟᱨᱚᱸᱡᱽ ᱥᱚᱝᱥᱟᱨ
ᱫᱮᱵᱚᱱ ᱡᱚᱜᱟᱣ ᱡᱚᱛᱚᱱ ᱫᱚᱦᱚᱭ
ᱡᱟᱦᱮᱨ ᱜᱟᱲ ᱞᱮᱠᱟ ᱾
ᱡᱚᱛᱚᱱ ᱟᱵᱚᱱ ᱚᱲᱟᱜ ᱫᱩᱣᱟᱹᱨ
ᱡᱚᱜᱟᱣ ᱠᱤᱱ ᱟᱵᱚᱱ ᱟᱭᱳ ᱵᱟᱵᱟ
ᱥᱮᱵᱟ ᱠᱚᱣᱟ ᱵᱚᱱ ᱵᱚᱸᱜᱟ ᱵᱳᱨᱳ
ᱟᱵᱚᱣᱟᱜ ᱜᱷᱟᱨᱚᱸᱡᱽ ᱨᱮ ᱾
ᱵᱮᱱᱟᱣᱜ ᱟᱵᱚᱱ ᱟᱭᱳ ᱵᱟᱵᱟ
ᱦᱟᱨᱟᱭᱟᱵᱚᱱ ᱥᱚᱱᱮᱨ ᱥᱚᱝᱥᱟᱨ
ᱵᱮᱱᱟᱣ ᱟᱵᱚᱱ ᱥᱩᱞᱩᱠ ᱥᱚᱝᱥᱟᱨ
ᱦᱩᱰᱤᱧ ᱜᱷᱟᱨᱚᱸᱡᱽ ᱨᱮ ᱾
ᱟᱭᱳ ᱵᱟᱵᱟ ᱥᱟᱶ ᱥᱩᱞᱩᱠ ᱛᱟᱦᱮᱸᱱ
ᱵᱚᱭᱦᱟ ᱢᱤᱥᱨᱟ ᱥᱟᱶ ᱯᱚᱴᱟᱣ ᱛᱟᱦᱮᱸᱱ
ᱥᱟᱱᱟᱢ ᱠᱚ ᱥᱟᱶ ᱡᱩᱢᱤᱫᱽ ᱛᱟᱦᱮᱸᱱ ᱜᱮ
ᱱᱟᱯᱟᱭ ᱥᱩᱞᱩᱠ ᱰᱟᱦᱟᱨ ᱫᱚ ᱾
ᱛᱚᱵᱮ ᱮᱱᱟᱝ ᱜᱮ ᱵᱮᱱᱟᱣᱜ ᱛᱟᱵᱚᱱ
ᱱᱟᱯᱟᱭ ᱥᱩᱞᱩᱠ ᱥᱚᱝᱥᱟᱨ
ᱟᱵᱚᱣᱟᱜ ᱥᱚᱝᱥᱟᱨ ᱥᱩᱞᱩᱠ ᱥᱚᱝᱥᱟᱨ
ᱫᱮᱞᱟ ᱵᱚ ᱡᱚᱜᱟᱣ ᱡᱚᱛᱚᱱ ᱾
***
