ᱥᱟᱱᱟᱢᱟᱜ ᱛᱟᱦᱮᱸᱱ ᱛᱩᱞᱩᱡ, ᱵᱟᱹᱱᱩᱜ ᱞᱮᱠᱟ ᱜᱮ
ᱪᱤᱠᱤ ᱯᱟᱹᱨᱥᱤ ᱛᱟᱦᱮᱸᱱ ᱛᱩᱞᱩᱡ, ᱵᱟᱹᱱᱩᱜ ᱞᱮᱠᱟ ᱜᱮ
ᱡᱟᱹᱛᱤ ᱫᱷᱚᱨᱚᱢ ᱛᱟᱦᱮᱸᱱ ᱛᱩᱞᱩᱡ, ᱵᱟᱹᱱᱩᱜ ᱞᱮᱠᱟ ᱜᱮ
ᱯᱟᱪᱷᱮ ᱟᱹᱫᱤᱢ ᱟᱢ ᱫᱚ ᱟᱫᱚᱜ ᱦᱚᱨ ᱨᱮ ᱾
ᱚᱞ ᱪᱤᱠᱤ ᱟᱢᱟᱜ ᱛᱟᱦᱮᱸᱱ ᱛᱩᱞᱩᱡ ᱪᱷᱟᱨᱟᱣ ᱵᱟᱹᱱᱩᱜ ᱛᱟᱢ
ᱫᱷᱚᱨᱚᱢ ᱟᱢᱟᱜ ᱛᱟᱦᱮᱸᱱ ᱛᱩᱞᱩᱡ ᱢᱟᱱᱚᱛ ᱵᱟᱹᱱᱩᱜ ᱛᱟᱢ
ᱡᱟᱱᱟᱢ ᱚᱛ ᱦᱟᱥᱟ ᱛᱟᱦᱮᱸᱱ ᱛᱩᱞᱩᱡ ᱨᱟᱡᱽ ᱵᱟᱹᱱᱩᱜ ᱛᱟᱢ
ᱯᱟᱪᱷᱮ ᱟᱹᱫᱤᱢ ᱟᱢ ᱫᱚ ᱟᱫᱚᱜ ᱦᱚᱨ ᱨᱮ ᱾
ᱞᱟᱜᱟ ᱞᱮᱫ ᱢᱮᱠᱚ ᱟᱢ ᱫᱚ ᱱᱟᱜᱟᱢ ᱛᱟᱢᱮ ᱨᱟᱜᱽ
ᱵᱟᱹᱜᱤᱭᱟᱫ ᱟᱢ ᱜᱟᱲ ᱪᱟᱹᱭ ᱪᱟᱢᱯᱟ ᱵᱟᱫᱚᱞᱤ ᱠᱚᱸᱭᱰᱟ
ᱱᱤᱛ ᱱᱟᱝ ᱟᱢ ᱫᱚ ᱡᱟᱦᱟᱸ ᱨᱮ ᱞᱟᱜᱟ ᱚᱪᱚᱜ ᱠᱟᱱᱟᱢ ᱟᱢ
ᱯᱟᱪᱷᱮ ᱟᱹᱫᱤᱢ ᱟᱢ ᱫᱚ ᱟᱫᱚᱜ ᱦᱚᱨ ᱨᱮ ᱾
ᱛᱤᱥᱮᱢ ᱩᱭᱦᱟᱹᱨ ᱱᱟᱜᱟᱢ, ᱡᱤᱭᱟᱹᱛ ᱵᱤᱨ ᱠᱚᱣᱟᱜ
ᱦᱩᱞ ᱚᱠᱛᱚ ᱵᱟᱹᱱᱩᱜ ᱟᱢ ᱨᱮ, ᱢᱟᱨᱟᱝ ᱜᱮ ᱛᱟᱢ ᱢᱩᱦᱤᱢ
ᱫᱩᱸᱫᱩ ᱠᱚᱠᱚᱨ ᱞᱮᱠᱟ ᱛᱤᱱᱟᱹᱜ ᱟᱢ ᱫᱚᱢ ᱛᱟᱦᱮᱸᱱ ᱛᱷᱤᱨ
ᱯᱟᱪᱷᱮ ᱟᱹᱫᱤᱢ ᱟᱢ ᱫᱚ ᱟᱫᱚᱜ ᱦᱚᱨ ᱨᱮ ᱾
ᱥᱟᱡᱟᱣ ᱢᱮ ᱥᱚᱨᱮᱥ ᱢᱮ ᱦᱟᱛᱟᱝ ᱟᱹᱠᱤᱞ ᱵᱟᱹᱛᱤ
ᱵᱟᱹᱜᱤ ᱢᱮ ᱦᱤᱸᱥᱟᱹ ᱥᱟᱶ ᱦᱟᱺᱰᱤ ᱯᱟᱹᱨᱩᱣᱟᱹ ᱱᱤᱥᱟᱹ
ᱟᱹᱠᱤᱞ ᱞᱮᱱ ᱠᱷᱟᱱᱮᱢ ᱜᱮᱭᱟᱱ ᱞᱮᱱ ᱠᱷᱟᱱᱮᱢ
ᱯᱟᱪᱷᱮ ᱟᱹᱫᱤᱢ ᱟᱢ ᱜᱮᱢ ᱚᱣᱟᱨ ᱛᱟᱢᱟ ᱡᱟᱹᱛᱤ ᱥᱟᱶᱛᱟ
ᱯᱟᱪᱷᱮ ᱟᱹᱫᱤᱢ ᱟᱢ ᱜᱮᱢ ᱚᱣᱟᱨ ᱛᱟᱢᱟ ᱟᱢᱟᱜ ᱡᱟᱹᱛᱤ ᱥᱟᱶᱛᱟ
ᱯᱟᱪᱷᱮ ᱟᱹᱫᱤᱢ ᱟᱢ ᱫᱚ ᱟᱫᱚᱜ ᱦᱚᱨ ᱨᱮ ᱾
***
