ᱟᱹᱛᱩ ᱴᱚᱞᱟ ᱨᱮᱱᱟᱜ ᱠᱩᱞᱦᱤ ᱱᱮᱛᱟᱨ
ᱵᱟᱝ ᱞᱚᱥᱚᱫ ᱠᱷᱟᱫᱽᱵᱟᱫᱚᱜ ᱠᱟᱱ
ᱰᱷᱟᱹᱞᱟᱹᱭ ᱯᱟᱠᱟ ᱪᱤᱠᱟᱺᱬ ᱦᱚᱨ ᱛᱮ
ᱛᱟᱲᱟᱢ ᱟᱹᱰᱤ ᱱᱟᱯᱟᱭ ᱵᱩᱡᱷᱟᱹᱣᱜ ᱠᱟᱱ ᱾
ᱴᱟᱹᱭᱞᱤ, ᱠᱷᱟᱯᱟᱨ, ᱥᱟᱹᱣᱲᱤ, ᱵᱩᱥᱩᱵ ᱚᱲᱟᱜ
ᱫᱤᱱ ᱫᱤᱱ ᱛᱮ ᱢᱟᱞᱳᱴ ᱢᱩᱪᱟᱹᱫᱚᱜ ᱠᱟᱱ
ᱟᱡᱽᱵᱮᱥᱴ ᱟᱨ ᱯᱟᱠᱟ ᱫᱚᱞᱟᱱ
ᱚᱱᱟ ᱴᱷᱟᱶᱨᱮ ᱵᱮᱨᱮᱫ ᱛᱤᱸᱜᱩᱱ ᱠᱟᱱ ᱾
ᱢᱟᱰᱟ ᱞᱟᱹᱜᱤᱫ ᱥᱤᱢᱨᱟᱜ ᱛᱮ ᱠᱷᱟᱹᱨᱟᱹᱭ ᱨᱮ
ᱦᱳᱲᱳ ᱵᱤᱸᱰᱟᱹ ᱵᱟᱝ ᱪᱷᱤᱴᱟᱹᱣᱜ ᱠᱟᱱ
ᱠᱷᱮᱛ ᱨᱮᱜᱮ ᱦᱩᱲᱩ ᱢᱤᱥᱤᱱ ᱛᱮ
ᱯᱮᱴᱮᱡ ᱫᱷᱩᱠᱟᱹᱣ ᱯᱷᱩᱨᱪᱟᱹᱜ ᱠᱟᱱ ᱾
ᱥᱟᱜᱟᱲ ᱨᱮᱱᱟᱜ ᱠᱤᱸᱬᱚᱡ ᱠᱚᱸᱬᱚᱡ ᱥᱟᱰᱮ
ᱵᱟᱝ ᱩᱛᱟᱹᱨ ᱵᱟᱝ ᱟᱸᱡᱚᱢᱚᱜ ᱠᱟᱱ
ᱱᱟᱦᱮᱞ, ᱟᱸᱬᱜᱚᱢ, ᱟᱨᱟᱬ, ᱢᱟᱨᱟᱸᱬ ᱴᱷᱟᱶ ᱫᱚ
ᱴᱨᱟᱠᱴᱚᱨ ᱜᱟᱹᱰᱤ ᱟᱢᱮᱴ ᱟᱠᱟᱣᱟᱱ ᱾
ᱰᱷᱩᱞᱟᱹ ᱨᱮ ᱰᱤᱞᱤ, ᱢᱩᱨᱩᱭ ᱟᱨ ᱵᱟᱺᱫᱤ
ᱱᱟᱦᱟᱸᱜ ᱫᱚ ᱵᱟᱝ ᱥᱟᱡᱟᱣ ᱠᱚᱜ ᱠᱟᱱ
ᱵᱩᱥᱩᱵ ᱵᱟᱫᱷᱟ, ᱠᱟᱨᱦᱟᱲ ᱠᱷᱩᱱᱴᱤ ᱵᱟᱹᱱᱩᱜ
ᱵᱟᱡᱟᱨ ᱚᱲᱟᱜ ᱞᱮᱠᱟ ᱜᱮ ᱵᱩᱡᱷᱟᱹᱣᱜ ᱠᱟᱱ ᱾
ᱡᱟᱹᱯᱩᱫ ᱨᱤᱛᱩ ᱨᱮ ᱜᱟᱰᱟ ᱟᱦᱟᱨ ᱯᱩᱠᱷᱨᱤ
ᱵᱟᱭ ᱵᱟᱱ ᱵᱷᱟᱸᱜᱟᱴ ᱯᱷᱩᱲᱩᱜ ᱠᱟᱱ
ᱵᱟᱹᱫᱽ ᱵᱟᱹᱭᱦᱟᱹᱲ ᱠᱚᱨᱮ ᱡᱟᱣ ᱞᱮᱠᱟ
ᱵᱟᱠᱚ ᱦᱟᱹᱠᱩ ᱨᱚᱠᱚᱡ ᱠᱟᱴᱠᱚᱢᱚᱜ ᱠᱟᱱ ᱾
ᱟᱹᱛᱩ ᱵᱟᱦᱮᱨ ᱠᱩᱞᱦᱤ ᱢᱩᱪᱟᱹᱫ ᱯᱩᱲᱭᱟᱹ ᱨᱮ
ᱱᱮᱛᱟᱨ ᱫᱚ ᱜᱚᱴᱷᱟᱬ ᱵᱟᱹᱱᱩᱜ ᱟᱱ
ᱚᱱᱟ ᱡᱟᱭᱜᱟᱨᱮ ᱟᱹᱛᱩ ᱠᱞᱚᱵᱽ ᱚᱲᱟᱜ
ᱫᱚᱸᱫᱚᱨᱚᱪᱚ ᱛᱤᱸᱜᱩ ᱵᱮᱨᱮᱫ ᱟᱠᱟᱱ ᱾
ᱵᱟᱲᱜᱮ ᱠᱚᱬ ᱨᱮᱱᱟᱜ ᱜᱩᱨᱤᱡ ᱢᱟᱸᱫᱮ
ᱵᱷᱟᱛᱟᱣ ᱛᱮᱯᱮᱫ ᱢᱩᱫᱟᱹᱣ ᱥᱟᱭ ᱮᱱ
ᱠᱤᱨᱤᱧ ᱥᱟᱨ ᱪᱟᱥ ᱨᱮ ᱞᱟᱜᱟᱣᱜ ᱠᱟᱱᱛᱮ
ᱟᱹᱛᱷᱟᱹᱣᱲᱤᱭᱟᱹ ᱨᱚᱜᱽ ᱧᱟᱧᱟᱢ ᱠᱟᱱ ᱾
ᱫᱷᱟᱨᱯᱟᱲ ᱥᱟᱰᱮ ᱚᱠᱟ ᱠᱷᱚᱱ ᱟᱸᱡᱚᱢᱚᱜ
ᱚᱲᱟᱜ ᱨᱮ ᱰᱷᱤᱝᱠᱤ ᱢᱮᱞᱟ ᱵᱟᱹᱱᱩᱜ ᱟᱱ
ᱥᱟᱥᱟᱝ, ᱢᱚᱥᱞᱟ ᱥᱟᱶᱛᱮ ᱡᱚᱛᱚᱣᱟᱜ
ᱜᱨᱟᱸᱭᱰᱚᱨ ᱛᱮ ᱨᱤᱫ ᱞᱟᱹᱦᱩᱫᱚᱜ ᱠᱟᱱ ᱾
ᱴᱩᱠᱩᱡ, ᱴᱷᱤᱞᱤ, ᱥᱩᱯᱟᱹᱲᱤ, ᱪᱮᱞᱟᱝ ᱥᱟᱶᱛᱮ
ᱦᱚᱛᱚᱫ ᱵᱚᱠᱟᱜ ᱟᱫ ᱪᱟᱵᱟᱭᱮᱱ
ᱵᱟᱹᱭ ᱵᱟᱹᱭ ᱛᱮ ᱠᱩᱝᱠᱟᱹᱞ ᱦᱟᱥᱟ ᱠᱟᱹᱢᱤ ᱠᱚ
ᱵᱟᱹᱜᱤ ᱵᱚᱸᱫᱽ ᱜᱤᱰᱤᱭᱟᱜ ᱠᱟᱱ ᱾
ᱮᱱᱮᱡ ᱟᱠᱷᱲᱟ ᱨᱮ ᱛᱩᱢᱫᱟᱜᱼᱴᱟᱢᱟᱠ ᱛᱨᱤᱭᱚᱼᱵᱟᱱᱟᱢ
ᱨᱩ ᱚᱨᱚᱝ ᱨᱮᱜᱼᱛᱟ ᱠᱚ ᱟᱹᱲᱤᱥᱚᱜ ᱠᱟᱱ
ᱰᱤᱡᱮ ᱥᱮᱨᱮᱧ ᱵᱟᱡᱟᱣ ᱠᱟᱛᱮ ᱡᱩᱨᱛᱮ
ᱡᱚᱛᱚ ᱦᱚᱲ ᱛᱮᱠᱚ ᱮᱱᱮᱡ ᱡᱚᱝ ᱠᱟᱱ ᱾
ᱱᱚᱜ ᱱᱚᱝᱠᱟ ᱱᱟᱦᱟᱸᱜ ᱡᱩᱜᱽ ᱫᱚ ᱵᱚᱭᱦᱟ
ᱰᱷᱟᱸᱪᱟ ᱟᱹᱨᱩ ᱯᱷᱮᱨᱟᱣ ᱥᱟᱭᱮᱱ
ᱪᱚᱨᱚᱠ ᱪᱮᱦᱨᱟ ᱥᱟᱶᱛᱟ ᱨᱮᱱᱟᱜ
ᱨᱩᱯ ᱪᱤᱛᱟᱹᱨ ᱵᱚᱫᱚᱞ ᱪᱟᱵᱟ ᱮᱱ ᱾
***
