ᱤᱧ ᱫᱚ ᱢᱤᱱᱟᱹᱧ ᱟᱹᱰᱤ ᱡᱟᱞᱟ ᱨᱮ
ᱚᱱᱟ ᱜᱤᱧ ᱞᱟᱹᱭᱟ ᱚᱱᱚᱬᱦᱮ ᱛᱟᱞᱟ ᱨᱮ
ᱡᱟᱞᱟ ᱡᱟᱞᱟ ᱟᱹᱰᱤ ᱡᱟᱞᱟ
ᱛᱤᱱᱟᱹᱜ ᱮᱢ ᱥᱟᱢᱲᱟᱣ ᱱᱚᱣᱟ ᱡᱟᱞᱟ
ᱚᱠᱚᱭ ᱴᱷᱮᱱᱤᱧ ᱞᱟᱹᱭᱟ ᱤᱧᱟᱜ ᱡᱟᱞᱟ
ᱱᱟᱥᱮᱧ ᱨᱟᱣᱟᱞ ᱠᱮᱭᱟ ᱢᱚᱱᱮ ᱚᱱᱛᱚᱨ ᱡᱟᱞᱟ
ᱡᱟᱞᱟ ᱛᱮᱜᱮ ᱤᱧ ᱢᱟ ᱵᱟᱨᱚ ᱡᱟᱞᱟ
ᱟᱨᱦᱚᱸ ᱛᱤᱱᱟᱹᱝ ᱪᱚ ᱢᱮᱱᱟᱜ ᱡᱟᱞᱟ
ᱪᱤᱠᱟᱹᱧ ᱥᱟᱦᱟᱭᱟ ᱱᱚᱣᱟ ᱡᱟᱞᱟ
ᱥᱮᱛᱟᱜ ᱥᱤᱸᱜᱟᱹᱲ ᱠᱷᱟᱹᱞᱤ ᱡᱟᱞᱟ ᱟᱨ ᱡᱟᱞᱟ
ᱚᱲᱟᱜ ᱥᱚᱝᱥᱟᱨ ᱨᱮᱱᱟᱜ ᱥᱟᱱᱟᱢ ᱡᱟᱞᱟ
ᱧᱮᱧᱮᱞ ᱞᱟᱹᱜᱤᱫ ᱛᱮᱢᱟ ᱤᱧ ᱜᱮ ᱮᱠᱞᱟ
ᱚᱲᱟᱜ ᱨᱮ ᱦᱮᱱᱟᱜ ᱵᱟᱹᱱᱩᱜ ᱨᱮᱫᱚ ᱛᱤᱱᱟᱜ ᱡᱟᱞᱟ
ᱪᱮᱫ ᱦᱚᱸ ᱡᱩᱫᱤ ᱵᱟᱹᱱᱩᱜ ᱛᱟᱢᱟ ᱟᱨᱦᱚᱸ ᱟᱹᱰᱤ ᱡᱟᱞᱟ
ᱫᱤᱱᱟᱹᱢ ᱫᱤᱱ ᱜᱮ ᱡᱟᱞᱟ ᱟᱨ ᱡᱟᱞᱟ
ᱵᱟᱢ ᱡᱟᱞᱟᱜ ᱛᱮᱦᱚᱸ ᱟᱢ ᱛᱮᱜᱮᱢ ᱡᱟᱞᱟᱜ
ᱱᱚᱛᱮ ᱟᱨᱦᱚᱸ ᱜᱤᱫᱟᱹᱨ ᱯᱤᱫᱟᱹᱨ ᱥᱟᱢᱲᱟᱣ ᱡᱟᱞᱟ
ᱟᱸᱜᱟ ᱛᱚᱨᱟ ᱠᱷᱚᱱ ᱤᱧ ᱫᱚ ᱡᱷᱟᱞᱟ ᱯᱟᱞᱟ
ᱩᱫᱩᱲ ᱫᱷᱩᱯᱩᱲ ᱢᱤᱱᱟᱹᱧᱟ ᱠᱟᱹᱢᱤ ᱵᱷᱮᱫᱽ ᱨᱮ
ᱫᱩᱲᱩᱵ ᱡᱤᱨᱟᱹᱣ ᱞᱟᱹᱜᱤᱫ ᱚᱠᱛᱚ ᱚᱠᱟ ᱨᱮ
ᱦᱟᱹᱱᱤ ᱱᱟᱹᱭ ᱠᱚ ᱦᱚᱦᱚᱭ ᱫᱩᱠᱷᱢᱟᱹ ᱡᱚᱝ ᱫᱮᱞᱟ
ᱥᱟᱦᱟᱱ ᱥᱟᱠᱟᱢ ᱵᱟᱝ ᱛᱮ ᱱᱚᱛᱮ ᱟᱹᱰᱤ ᱡᱟᱞᱟ
ᱥᱮᱱᱚᱜ ᱟᱹᱧ ᱥᱮ ᱵᱟᱝ ᱠᱟᱹᱢᱤ ᱚᱠᱚᱭ ᱧᱮᱞᱟ
ᱥᱮᱱᱚᱜ ᱛᱮᱦᱚᱸ ᱡᱟᱞᱟ ᱵᱟᱝ ᱛᱮᱦᱚᱸ ᱡᱟᱞᱟ
ᱛᱤᱱᱟᱹᱜ ᱫᱩᱧ ᱥᱟᱢᱲᱟᱣᱟ ᱱᱚᱣᱟ ᱡᱟᱞᱟ
ᱡᱟᱞᱟ ᱨᱮᱜᱮ ᱢᱤᱱᱟᱹᱧ ᱤᱧ ᱫᱚ ᱟᱞᱟ ᱡᱷᱟᱞᱟ
ᱦᱟᱭᱨᱮ ᱱᱚᱣᱟ ᱢᱚᱞᱚᱝ ᱤᱧᱟᱜ ᱞᱤᱠᱷᱚᱱ ᱡᱟᱞᱟ
ᱯᱟᱨᱚᱢ ᱦᱩᱭᱟᱹᱧ ᱟᱨᱦᱚᱸ ᱛᱤᱱᱟᱝ ᱡᱟᱞᱟ
ᱥᱟᱦᱟᱭᱟᱹᱧ ᱪᱤᱠᱟᱹᱛᱮ ᱤᱧ ᱫᱚ ᱱᱚᱣᱟ ᱡᱟᱞᱟ
ᱵᱤᱥ ᱵᱤᱛᱟᱹ ᱜᱚᱫᱚᱜ ᱤᱧᱟᱜ ᱢᱚᱱᱮ ᱡᱟᱞᱟ
ᱡᱤᱣᱤ ᱫᱚᱜᱚᱫᱷᱚᱱ ᱜᱮ ᱟᱹᱭᱠᱟᱹᱣᱜ ᱱᱚᱣᱟ ᱡᱟᱞᱟ
ᱢᱚᱱᱮᱧ ᱠᱮᱴᱮᱡᱟ ᱥᱟᱦᱟᱭ ᱜᱤᱭᱟᱹᱧ ᱡᱟᱞᱟ
ᱥᱚᱝᱥᱟᱨ ᱵᱟᱵᱮᱨ ᱛᱤᱧ ᱛᱚᱞ ᱟᱠᱟᱱ ᱜᱷᱟᱨᱚᱸᱡᱽ ᱛᱟᱞᱟ
ᱢᱟᱭᱟ ᱱᱟᱹᱲᱤ ᱛᱤᱧ ᱵᱮᱫᱷᱟᱣ ᱟᱠᱟᱱ ᱟᱹᱰᱤ ᱛᱤᱧ ᱡᱟᱞᱟ
ᱦᱮᱡ ᱦᱚᱪᱚᱣᱟᱱ ᱡᱟᱦᱟᱸ ᱛᱤᱱᱟᱹᱜ ᱡᱟᱞᱟ ᱜᱮ
ᱱᱟᱯᱟᱭ ᱵᱮᱜᱚᱨ ᱵᱟᱹᱲᱤᱡ ᱞᱟᱹᱜᱤᱫ ᱫᱚ ᱵᱟᱝ ᱜᱮ
ᱠᱩᱲᱤ ᱦᱚᱯᱚᱱ ᱡᱚᱱᱚᱢ ᱨᱮᱫᱚ ᱢᱮᱱᱟᱜ ᱟᱹᱰᱤ ᱡᱟᱞᱟ
ᱥᱤᱨᱡᱚᱱᱤᱭᱟᱹ ᱥᱤᱥᱤᱨᱡᱟᱹᱣᱤᱡ ᱟᱢ ᱜᱮᱢ ᱧᱮᱞᱟ
ᱢᱟᱥᱮ ᱟᱫᱚ ᱪᱮᱫ ᱤᱧ ᱞᱟᱹᱭᱟ ᱱᱚᱜᱼᱚᱭ ᱱᱚᱝᱠᱟᱱ ᱡᱟᱞᱟ
ᱯᱟᱨᱚᱢ ᱤᱫᱤ ᱜᱮ ᱦᱩᱭᱩᱜᱼᱟ ᱟᱨᱦᱚᱸ ᱛᱤᱱᱟᱹᱝ ᱪᱚ ᱡᱟᱞᱟ ᱾᱾
***
