ᱚᱞ ᱜᱩᱨᱩ ᱜᱚᱢᱠᱮ
ᱯᱚᱸᱰᱮᱛ ᱨᱟ.ᱜᱷᱩᱱᱟᱛᱷ ᱢᱩᱨᱢᱩ
ᱟᱵᱚ ᱠᱷᱮᱨᱣᱟᱞ ᱡᱟᱹᱛᱤ ᱞᱟᱹᱜᱤᱫ
ᱯᱟᱹᱨᱥᱤ ᱵᱟᱦᱟᱭ ᱨᱚᱦᱚᱭ ᱞᱮᱫᱟ ᱡᱮᱸᱜᱮᱫ-ᱡᱮᱸᱜᱮᱫ ᱾
ᱥᱮᱨᱢᱟ ᱛᱟᱭᱚᱢ ᱥᱮᱨᱢᱟ ᱪᱟᱞᱟᱣ ᱯᱟᱨᱚᱢ ᱮᱱᱟ
ᱚᱞ ᱪᱤᱠᱤ ᱨᱮᱱᱟᱜ ᱥᱟᱭ ᱥᱮᱨᱢᱟ ᱯᱩᱨᱟᱹᱣ ᱮᱱᱟ
ᱩᱠᱩᱨ ᱟᱱ ᱚᱱᱟ ᱜᱚᱨᱚᱡᱽ ᱫᱩᱞᱟᱹᱲ ᱪᱤᱠᱤ ᱪᱮᱛᱟᱱ
ᱱᱤᱛ ᱦᱚᱸ ᱟᱛᱨᱟ-ᱟᱛᱨᱟ ᱵᱟᱝ ᱵᱚᱱ ᱥᱮᱪᱮᱫ ᱯᱩᱨᱟᱹᱣ ᱟᱠᱟᱱ ᱾
ᱵᱟᱡᱟᱨ ᱛᱟᱞᱟ ᱨᱮ ᱨᱮᱭᱟᱲ ᱜᱮᱢ ᱨᱚᱲ ᱫᱤᱠᱩ ᱟᱲᱟᱝ ᱛᱮ
ᱠᱩᱞᱤ ᱢᱮᱛᱮ ᱞᱟᱡᱟᱣᱚᱜ ᱠᱟᱱᱟᱢ ᱡᱟᱱᱟᱢ ᱨᱚᱲ ᱛᱮ
ᱦᱚᱲ ᱥᱟᱢᱟᱝ ᱨᱮᱢ ᱛᱮᱛᱷᱟᱜᱼᱟ ᱵᱟᱰᱟᱭ ᱠᱟᱛᱮ ᱦᱚᱸ
ᱵᱟᱢ ᱟᱯᱱᱟᱨ ᱟᱠᱟᱫ ᱚᱱᱟᱛᱮ ᱡᱟᱱᱟᱢ ᱨᱚᱲ ᱚᱞ ᱱᱤᱛ ᱦᱚᱸ ᱾
ᱦᱚᱲᱟᱜ ᱪᱤᱠᱤ ᱫᱚ ᱟᱹᱰᱤ ᱞᱚᱜᱚᱱ ᱮᱢ ᱟᱯᱱᱟᱨ ᱠᱮᱫ
ᱱᱤᱡᱮᱨᱟᱜ ᱪᱤᱠᱤ ᱛᱮ ᱚᱞᱚᱜ ᱫᱚᱢ ᱛᱟᱭᱚᱢ ᱟᱠᱟᱱ
ᱟᱵᱚᱣᱟᱜ ᱞᱟᱦᱟᱱᱛᱤ ᱥᱚᱱᱚᱛ ᱴᱷᱟᱶ ᱞᱟᱹᱜᱤᱫ
ᱟᱫᱚ ᱛᱤᱥ ᱵᱚᱱ ᱞᱟᱦᱟᱜ ᱢᱟᱥᱮ ᱵᱚᱭᱦᱟ ᱠᱚ ᱾
ᱪᱮᱠᱟ ᱛᱮᱫᱚᱢ ᱦᱟᱨᱟᱵᱩᱨᱩᱭ ᱚᱞ ᱪᱤᱠᱤ
ᱪᱮᱠᱟᱛᱮ ᱫᱚᱢ ᱢᱚᱦᱮ ᱵᱟᱦᱟᱭ ᱡᱟᱱᱟᱢ ᱯᱟᱹᱨᱥᱤ
ᱟᱵᱚ-ᱟᱵᱚ ᱜᱮᱵᱚᱱ ᱨᱟᱯᱟᱪᱟᱜ ᱠᱟᱱ
ᱛᱟᱲᱟᱢ ᱦᱚᱨ ᱨᱮ ᱡᱟᱹᱱᱩᱢ ᱜᱟᱸᱰᱮ ᱮᱥᱮᱫᱚᱜ ᱠᱟᱱ ᱾
ᱱᱟᱦᱟᱜ ᱡᱩᱜᱽ ᱨᱮ ᱥᱟᱱᱛᱟᱲ ᱵᱚᱭᱦᱟᱼᱵᱩᱦᱤᱱ ᱠᱚ
ᱞᱤᱪᱟ.ᱲ ᱮᱱ ᱠᱚ ᱛᱩᱢᱫᱟᱜ-ᱴᱟᱢᱟᱠ ᱪᱚᱲᱪᱩᱲᱤ ᱨᱩ ᱨᱟᱦᱟ ᱛᱮ
ᱚᱞᱚᱜ ᱯᱟᱲᱦᱟᱣ ᱪᱤᱠᱤ ᱫᱩᱞᱟᱹᱲ ᱦᱚᱸᱛᱚ ᱠᱚ ᱦᱤᱲᱤᱧ ᱮᱫ
ᱰᱤᱡᱮ ᱞᱟᱸᱜᱽᱬᱮ ᱮᱱᱮᱡ ᱛᱮᱠᱚ ᱠᱚᱞᱥᱟ ᱞᱚᱴᱚᱢ ᱮᱫ ᱾
ᱮᱴᱟᱜ ᱦᱚᱲ ᱢᱟ ᱠᱚ ᱠᱩᱥᱤᱭᱟᱜ ᱜᱮ ᱨᱟᱹᱥᱠᱟᱹ ᱜᱮ
ᱟᱵᱚ ᱧᱮᱞᱛᱮ ᱦᱤᱴᱤ-ᱦᱤᱴᱤ ᱠᱚ ᱞᱟᱸᱫᱟ ᱡᱚᱝ ᱠᱟᱱ ᱜᱮ
ᱮᱱᱦᱚᱸ ᱠᱷᱮᱨᱣᱟᱞ ᱵᱟᱵᱚᱱ ᱴᱷᱤᱠᱟ. ᱡᱚᱝ ᱠᱟᱱ
ᱟᱵᱚ ᱟᱵᱚ ᱜᱮᱵᱚᱱ ᱛᱩᱯᱩᱫ-ᱛᱟᱯᱟᱢ ᱠᱟᱱ ᱾
ᱟᱹᱛᱩ-ᱟᱹᱛᱩ ᱦᱟᱹᱴᱤᱧᱚᱜ ᱠᱟᱱ
ᱢᱟᱺᱡᱷᱤ-ᱱᱟᱭᱠᱮ ᱠᱤᱱ ᱵᱷᱮᱜᱟᱨᱚᱜ ᱠᱟᱱ
ᱟᱵᱚ ᱛᱟᱞᱟ ᱨᱮᱜᱮ ᱦᱤᱸᱥᱟᱹ ᱥᱩᱭᱟᱹ ᱥᱚᱜᱮ ᱵᱚᱞᱚᱱ ᱠᱟᱱ
ᱟᱨ ᱦᱚᱸ ᱛᱤᱱ ᱫᱤᱱ ᱟᱴᱚᱜ-ᱴᱟᱸᱵᱚᱜᱚᱜ ᱟᱵᱚᱱ ᱾
ᱮᱲᱮ ᱪᱟᱵᱟ ᱠᱮᱫ ᱵᱚᱱᱟ ᱠᱚ ᱚᱛ-ᱦᱟᱥᱟ
ᱵᱚᱸᱜᱟ ᱵᱳᱨᱳ ᱡᱟᱦᱮᱨ ᱜᱟᱲ ᱴᱷᱮᱱ ᱠᱷᱚᱱ
ᱪᱮᱫᱟᱜ ᱱᱤᱛ ᱦᱚᱸ ᱡᱩᱢᱤᱫ ᱵᱟᱹᱱᱩᱜ ᱵᱚᱱ
ᱥᱮᱪᱮᱫ ᱟᱨ ᱞᱟᱦᱟᱱᱛᱤ ᱵᱮᱜᱚᱨ ᱟᱜᱟᱢ ᱧᱩᱛᱟᱹᱛ ᱜᱮ ᱛᱟᱵᱚᱱ ᱾
ᱟᱢᱟᱜ ᱥᱤᱵᱤᱞ ᱦᱮᱲᱮᱢ ᱫᱩᱞᱟᱹᱲ ᱛᱮ
ᱱᱚᱣᱟ ᱫᱷᱩᱲᱤ-ᱫᱷᱟᱹᱨᱛᱤ ᱨᱟᱪᱟ ᱨᱮ
ᱥᱟᱶᱛᱟ ᱥᱟᱶᱦᱮᱫ ᱞᱟᱠᱪᱟᱨ ᱪᱤᱠᱤ ᱵᱟᱧᱪᱟᱣ ᱛᱮ ᱦᱩᱭᱩᱜ ᱛᱟᱢ
ᱵᱟᱝᱠᱷᱟᱱ ᱫᱷᱩᱲᱤ ᱫᱷᱟᱹᱨᱛᱤ ᱠᱷᱚᱱ ᱟᱢᱮᱢ ᱢᱮᱴᱟᱣᱚᱜᱼᱟ ᱾
ᱡᱟᱱᱟᱢ ᱯᱟᱹᱨᱥᱤ ᱚᱞ ᱪᱤᱠᱤ ᱟᱯᱱᱟᱨ ᱢᱮ
ᱠᱟᱥᱟ ᱠᱚᱨᱛᱟᱞ ᱨᱟᱲᱟᱝᱚᱜ ᱞᱮᱠᱟ
ᱡᱟᱱᱟᱢ ᱟᱲᱟᱝ ᱛᱮ ᱴᱷᱟᱢ-ᱴᱷᱟᱢ ᱨᱚᱲ ᱢᱮ
ᱟᱢᱟᱜ ᱚᱞ ᱨᱚᱲ ᱡᱚᱛᱚᱱ ᱠᱟᱛᱮ ᱦᱟᱨᱟ ᱵᱩᱨᱩᱭ ᱢᱮ ᱾
ᱪᱤᱠᱤ ᱨᱮᱭᱟᱜ ᱥᱟᱭ ᱥᱮᱨᱢᱟ ᱨᱮ
ᱠᱤᱨᱟᱹ ᱵᱚᱱ ᱦᱟᱛᱟᱣᱟ ᱚᱱᱛᱚᱨ ᱡᱤᱣᱤ ᱨᱮ
ᱞᱟᱥᱮᱨ ᱟᱵᱚᱱ ᱦᱟᱛᱟᱝ ᱫᱟᱲᱮ
ᱞᱟᱦᱟᱜ ᱟᱵᱚᱱ ᱡᱩᱢᱤᱫ ᱫᱟᱲᱮ ᱛᱮ ᱾
***
