ᱨᱤᱞᱥ ᱵᱷᱤᱰᱤᱭᱚ

ᱦᱮᱞᱳ ᱜᱟᱭᱤᱥ! ᱪᱮᱫ ᱞᱮᱠᱟ ᱢᱮᱱᱟᱜ ᱯᱮᱭᱟ ᱜᱟᱛᱮ ᱠᱚ? ᱡᱟ.ᱱᱤᱡ ᱢᱚᱡᱽ ᱜᱮᱭᱟᱯᱮ ᱾ ᱟᱨ ᱤᱧ ᱦᱚᱸ ᱟ.ᱰᱤ ᱠᱩᱥᱤ ᱟᱨ ᱨᱟ.ᱥᱠᱟ. ᱨᱮ ᱢᱤᱱᱟ.ᱧᱟ ᱾ ᱟᱯᱮ ᱠᱚᱣᱟᱜ ᱫᱩᱞᱟ.ᱲ ᱟᱨ ᱜᱚᱲᱚ ᱥᱚᱯᱚᱦᱚᱫ ᱛᱮ ᱤᱧ ᱨᱮᱱ ᱥᱟᱵᱽᱥᱠᱨᱟᱭᱵᱟᱨ ᱟ.ᱛᱷᱟ.ᱱ ᱠᱚ ᱦᱳᱭ ᱟᱠᱟᱱ ᱛᱤᱧᱟ ᱾ ᱟᱯᱮ ᱤᱧᱟᱜ ᱵᱞᱚᱜᱽ ᱟᱨ ᱤᱧᱟᱜ ᱵᱷᱤᱰᱤᱭᱳ ᱠᱚ ᱩᱱᱟ.ᱜ ᱯᱮ ᱠᱩᱥᱤ ᱟ.ᱛᱤᱧ ᱠᱟᱱᱟ ᱚᱱᱟ ᱠᱷᱟ.ᱛᱤᱨ, ᱟᱯᱮ ᱥᱟᱱᱟᱢ ᱠᱚ ᱴᱷᱮᱱ ᱟ.ᱰᱤ ᱟ.ᱰᱤ ᱥᱟᱨᱦᱟᱣ ᱤᱧ ᱪᱟᱞ ᱟᱯᱮ ᱠᱟᱱᱟ ᱾ ᱱᱚᱝᱠᱟ ᱜᱮ ᱜᱟᱛᱮ ᱠᱚ ᱟᱯᱮᱭᱟᱜ ᱫᱩᱞᱟ.ᱲ ᱤᱢᱟ.ᱧ ᱯᱮ ᱟᱨ ᱵᱷᱤᱰᱤᱭᱚ ᱠᱚ ᱧᱮᱞ ᱤᱫᱤ ᱛᱤᱧ ᱯᱮ ᱾ ᱚᱱᱟ ᱥᱟᱶᱛᱮ ᱞᱟᱭᱤᱠ ᱮᱢ ᱫᱚ ᱮᱠᱟᱞ ᱟᱞᱚ ᱯᱮ ᱦᱤᱲᱤᱧᱟ ᱾ ᱦᱳᱭ ᱥᱮ ᱢᱟ ᱮᱱᱠᱷᱟᱱ ᱡᱷᱚᱛᱚ ᱠᱚᱜᱮ ᱥᱟ.ᱜᱩᱱ ᱥᱮᱛᱟᱜ ᱡᱚᱦᱟᱨ ᱾ ᱟᱨ ᱛᱮᱦᱮᱧ ᱛᱟᱨᱟᱥᱤᱧ ᱜᱟᱛᱮ ᱠᱚ ᱞᱟᱭᱤᱵᱷ ᱨᱮᱧ ᱦᱤᱡᱩᱜᱼᱟ ᱾ ᱟ.ᱰᱤ ᱡᱷᱟᱠᱟᱥ ᱢᱤᱫᱴᱟᱝ ᱮᱱᱮᱡ ᱟ.ᱜᱩ ᱠᱟᱛᱮ ᱾ ᱟᱨ ᱟᱯᱮ ᱥᱟᱱᱟᱢ ᱠᱚ ᱧᱮᱞ ᱨᱮᱱᱟᱜ ᱤᱧ ᱱᱮᱦᱚᱨ ᱟᱯᱮ ᱠᱟᱱᱟ ᱾ ᱵᱷᱤᱰᱤᱭᱚ ᱨᱮᱠᱳᱰᱤᱝ ᱠᱟᱛᱮ ᱜᱮ ᱥᱳᱥᱟᱞ ᱢᱤᱰᱤᱭᱟ ᱨᱮᱭ ᱟᱲᱟᱜ ᱠᱮᱫᱟ ᱾ ᱢᱚᱱᱮ ᱡᱤᱣᱤ ᱪᱮᱫ ᱞᱮᱠᱟᱪᱚᱝ ᱢᱤᱫᱴᱟᱝ ᱨᱟ.ᱥᱠᱟ. ᱛᱮ ᱜᱷᱟᱢᱟᱜᱷᱩᱲ ᱪᱟᱵᱟᱜ ᱠᱟᱱ ᱞᱮᱠᱟ ᱜᱮ ᱟ.ᱭᱠᱟ.ᱣ ᱮᱫᱟ ᱾ ᱠᱩᱥᱤ ᱨᱟ.ᱥᱠᱟ. ᱛᱮ ᱞᱟ.ᱵᱤᱫ ᱛᱩᱞᱟ.ᱢ ᱦᱚᱲᱢᱚ ᱨᱤᱢᱤᱞ ᱫᱚᱨᱭᱟ ᱨᱮ ᱰᱚᱭᱞᱟᱝ ᱵᱟᱲᱟᱭ ᱞᱮᱠᱟᱭ ᱟ.ᱭᱠᱟ.ᱣ ᱮᱫᱟ!

ᱡᱷᱩᱢᱨᱤ ᱢᱟ.ᱭ ᱴᱮᱵᱤᱞ ᱯᱮᱨᱮᱡ ᱯᱩᱛᱷᱤ ᱯᱚᱛᱚᱵ ᱯᱟᱥᱱᱟᱣ ᱠᱟᱛᱮᱭ ᱫᱩᱲᱩᱵ ᱟᱠᱟᱱᱟ ᱾ ᱢᱮᱱᱠᱷᱟᱱ ᱯᱩᱛᱷᱤ ᱯᱚᱛᱚᱵ ᱨᱮ ᱢᱚᱱᱮ ᱵᱟᱝ ᱞᱟᱜᱟᱣᱜ ᱠᱟᱱ ᱛᱟᱭᱟ ᱾ ᱥᱟᱨᱟ ᱫᱤᱱ ᱥᱳᱥᱟᱞᱢᱤᱰᱤᱭᱟ ᱨᱮ ᱞᱟᱵᱟᱫᱷᱤᱭᱟ.ᱣ ᱨᱮᱜᱮᱭ ᱛᱟᱸᱦᱮᱱᱟ ᱾ ᱦᱟᱱᱟ-ᱱᱟᱣᱟ ᱵᱷᱤᱰᱤᱭᱚ ᱵᱮᱱᱟᱣ ᱨᱮᱜᱮᱭ ᱵᱟ.ᱭ ᱠᱚᱜ-ᱟ ᱾ ᱥᱮᱛᱟᱜ ᱵᱮᱲᱟ ᱦᱚᱸ ᱱᱚᱜ-ᱚᱭ ᱯᱟᱲᱦᱟᱣ-ᱮ ᱫᱩᱲᱩᱵ ᱟᱠᱟᱱᱟ, ᱢᱮᱱᱠᱷᱟᱱ ᱢᱳᱵᱟᱭᱤᱞ ᱨᱮᱜᱮᱭ ᱵᱟ.ᱭ ᱟᱠᱟᱱᱟ ᱾ ᱯᱟᱲᱦᱟᱣ ᱨᱮ ᱢᱚᱱᱮ ᱜᱮ ᱵᱟᱝ ᱞᱟᱜᱟᱣᱜ ᱠᱟᱱᱟ ᱾ ᱜᱷᱟᱱᱮ ᱢᱳᱵᱟᱭᱤᱞ ᱜᱮᱭ ᱩᱭᱩᱝ-ᱟ ᱛᱤᱱᱟ.ᱜ ᱦᱚᱲ ᱠᱚ ᱞᱟᱭᱤᱠ ᱟᱫᱟ? ᱛᱤᱱᱟ.ᱜ ᱦᱚᱲ ᱠᱚ ᱠᱚᱢᱮᱱᱴ ᱟᱫᱟ? ᱢᱳᱵᱟᱭᱤᱞ ᱨᱮ ᱫᱷᱩᱨᱟ.ᱣ ᱞᱮᱱᱠᱷᱟᱱ ᱥᱤᱧ ᱚᱠᱟ ᱧᱤᱫᱟ. ᱚᱠᱟ ᱫᱤᱥᱟ. ᱜᱮ ᱵᱟᱝ ᱛᱟᱦᱮᱸᱱ ᱛᱟᱭᱟ ᱾

ᱥᱤᱢᱚᱛᱤ ᱚᱲᱟᱜ ᱡᱚᱡᱚᱜ ᱛᱩᱞᱩᱡ ᱵᱮᱡᱟᱨ ᱟᱲᱟᱝ ᱛᱮᱭ ᱢᱮᱱ ᱠᱮᱫᱟ, ᱦᱮᱸᱫᱟ ᱵᱤᱴᱤ ᱟᱢ-ᱢᱟ ᱯᱟᱲᱦᱟᱣ ᱜᱮ ᱵᱟ.ᱧ ᱧᱮᱞ ᱞᱮᱫ ᱢᱮ ᱾ᱥᱟᱨᱟ ᱫᱤᱱ ᱯᱷᱳᱱ ᱟᱨ ᱯᱷᱳᱱ ᱾ ᱟᱨ ᱵᱟᱪᱷᱟ ᱥᱚᱨᱠᱟᱨ ᱦᱚᱸ ᱦᱮᱞᱮ ᱯᱚᱭᱥᱟ ᱥᱟᱥᱛᱟ ᱟᱠᱟᱱ ᱛᱟᱭᱟ, ᱯᱷᱳᱱ ᱠᱤᱨᱤᱧ ᱞᱟ.ᱜᱤᱫ ᱯᱩᱭᱥᱟ.ᱭ ᱮᱢᱚᱜ ᱠᱟᱱᱟ ᱾ ᱟᱨ ᱦᱚᱸ ᱠᱤᱨᱤᱧ ᱜᱮ ᱦᱳᱭᱳᱜ-ᱟ ᱾ ᱦᱮᱞᱮ ᱵᱟᱵᱟ ᱥᱚᱨᱠᱟᱨ ᱦᱚᱸ ᱾ ᱟᱨ ᱱᱩᱠᱩ ᱜᱤᱫᱽᱨᱟ. ᱦᱚᱸ ᱜᱚᱰ ᱟᱭ ᱢᱮ, ᱯᱷᱳᱱ ᱟᱨ ᱯᱷᱳᱱ ᱾ ᱯᱚᱛᱚᱵ ᱠᱚᱢᱟ ᱯᱚᱴᱚᱢ ᱨᱮᱜᱮ ᱥᱮᱭᱟᱜ ᱠᱟᱱᱟ ᱾ ᱯᱩᱭᱥᱟ. ᱠᱷᱚᱨᱪᱟ ᱠᱟᱛᱮ ᱵᱳᱭ ᱮᱢ ᱠᱤᱨᱤᱧᱟ ᱯᱟᱲᱦᱟᱣ ᱨᱮᱱᱟᱜ ᱧᱩᱛᱩᱢ ᱜᱮ ᱵᱟ.ᱱᱩᱜ-ᱟ ᱾

ᱡᱷᱩᱢᱨᱤ ᱢᱟ.ᱭ-ᱮ ᱢᱮᱱ ᱜᱚᱫ ᱠᱮᱫᱟ, ᱛᱷᱤᱨᱚᱜ ᱢᱮᱥᱮ ᱭᱳ ᱾ ᱟᱢ ᱫᱚ ᱵᱟᱢ ᱵᱟᱰᱟᱭᱟ ᱪᱮᱫ ᱦᱚᱸ, ᱟᱨ ᱦᱤᱱᱟ. ᱱᱤᱭᱟ.ᱢ ᱞᱟ.ᱭ-ᱟ᱾ ᱱᱮᱛᱟᱨ ᱥᱳᱥᱟᱞᱢᱤᱰᱤᱭᱟ ᱨᱮᱱᱟᱜ ᱡᱩᱜᱽ ᱾ ᱯᱟ.ᱦᱤᱞ ᱞᱮᱠᱟ ᱢᱟᱨᱮ ᱩᱭᱦᱟ.ᱨ ᱵᱷᱟᱵᱽᱱᱟ ᱛᱟᱸᱦᱮ ᱞᱮᱱᱠᱷᱟᱱ ᱵᱟᱝ ᱜᱟᱱᱚᱜ-ᱟ ᱾ ᱥᱤᱢᱚᱛᱤᱭ ᱢᱮᱱ ᱠᱮᱫᱟ ᱦᱳᱭ ᱟᱫᱚ ᱯᱟᱲᱦᱟᱣ ᱠᱚᱫᱚ ᱵᱟ.ᱜᱤ ᱠᱟᱜ ᱢᱮ ᱾ ᱩᱱᱟ.ᱜ ᱩᱱᱟ.ᱜ ᱯᱩᱭᱥᱟ. ᱠᱷᱚᱨᱪᱟ ᱠᱟᱛᱮ ᱯᱩᱛᱷᱤ ᱯᱚᱛᱚᱵ ᱠᱤᱨᱤᱧ ᱛᱮ ᱪᱟᱸᱲᱟ ᱟᱠᱟᱱᱟ ᱾ ᱟᱫᱚ ᱪᱮᱫ ᱫᱚᱦᱚ ᱨᱮᱜᱮ ᱱᱤᱫᱤᱨ ᱠᱚ ᱡᱚᱢ ᱚᱪᱚᱱ? ᱚᱴᱟᱜ ᱜᱮ ᱡᱩᱫᱤ ᱵᱟᱢ ᱚᱴᱟᱜᱟ ᱟᱫᱚ ᱩᱱᱟ.ᱜ ᱯᱩᱭᱥᱟ. ᱠᱷᱚᱨᱪᱟ ᱠᱟᱛᱮ ᱪᱮᱫ ᱟᱫᱚ ?

ᱟᱭᱳ-ᱟᱜ ᱠᱮᱴᱮᱡ ᱟᱲᱟᱝ ᱛᱮ ᱡᱷᱩᱢᱨᱤ ᱱᱟᱥᱮᱱᱟᱜ-ᱮ ᱱᱮᱢᱚᱥ ᱮᱱᱛᱮ ᱢᱮᱱ ᱠᱮᱫᱟ ᱳᱦᱳ~ ᱛᱷᱤᱨᱚᱜ ᱢᱮᱥᱮ ᱭᱳ, ᱵᱟᱢ ᱧᱮᱞ ᱮᱫᱟ ᱯᱟᱲᱦᱟᱣ ᱢᱟᱹᱧ ᱫᱩᱲᱩᱵ ᱟᱠᱟᱱ ᱜᱮ ᱾ ᱵᱟᱢ ᱧᱮᱞ ᱮᱫᱟ ᱵᱳᱭ ᱠᱚᱢᱟ ᱚᱴᱟᱜ ᱨᱮᱜᱮ ᱢᱮᱱᱟᱜ-ᱟ ! ᱟᱨ ᱟᱢ ᱫᱚ ᱵᱟᱢ ᱵᱟᱰᱟᱭᱟ ᱱᱤᱛᱚᱜ ᱥᱳᱥᱟᱞᱢᱤᱰᱤᱭᱟ ᱛᱟᱞᱟ ᱛᱮ ᱦᱚᱸ ᱵᱷᱤᱰᱤᱭᱚ ᱵᱮᱱᱟᱣ ᱠᱟᱛᱮ ᱟᱯᱞᱳᱰ ᱞᱮᱠᱷᱟᱱ ᱯᱩᱭᱥᱟ. ᱧᱟᱢᱚᱜ-ᱟ ᱾ ᱟᱨ ᱯᱩᱭᱥᱟ.ᱧ ᱧᱟᱢ ᱞᱮᱠᱷᱟᱱ ᱤᱧᱟᱜ ᱦᱟᱛ ᱠᱷᱚᱨᱪᱟ ᱦᱚᱸᱛᱚ ᱦᱳᱭᱳᱜ-ᱟ ᱾ ᱦᱳᱭ ᱦᱳᱭ ᱟᱫᱚ ᱪᱮᱫ ᱵᱷᱤᱰᱤᱭᱚ ᱠᱚᱜᱮ ᱵᱮᱱᱟᱣ ᱵᱟᱲᱟᱭ ᱢᱮ, ᱚᱞᱚᱜ ᱠᱚᱫᱚ ᱟᱞᱚ ᱟᱛᱟᱢᱟ ! ᱱᱮᱛᱟᱨ ᱜᱤᱫᱽᱨᱟ. ᱞᱟᱹᱭ ᱟᱠᱟᱫ, ᱟᱯᱱᱟᱨᱟᱜ ᱠᱟᱛᱷᱟ ᱜᱮ ᱵᱟᱭ ᱦᱮᱛᱟᱣ ᱟᱛᱟᱢᱟ ᱾ ᱱᱚᱣᱟ ᱯᱷᱳᱱ ᱦᱳᱭᱳᱜ ᱠᱟᱱᱟ ᱡᱷᱚᱛᱚ ᱠᱷᱚᱱᱟᱜ ᱵᱟ.ᱲᱤᱡᱟᱜ ! ᱡᱷᱚᱛᱚ ᱜᱤᱫᱽᱨᱟ. ᱠᱚ ᱪᱤᱠᱟ. ᱪᱟᱵᱟᱭᱮᱱᱟ! ᱯᱟᱲᱦᱟᱣ ᱟᱱ ᱜᱤᱫᱽᱨᱟ. ᱯᱟᱲᱦᱟᱣ ᱵᱟ.ᱜᱤ ᱠᱟᱛᱮ, ᱦᱟᱱᱟ ᱵᱷᱤᱰᱤᱭᱚ ᱱᱟᱣᱟ ᱵᱷᱤᱰᱤᱭᱚ ᱨᱮᱠᱚ ᱵᱟ.ᱭ ᱟᱠᱟᱱᱟ ᱾

ᱥᱤᱢᱚᱛᱤ ᱚᱲᱟᱜ ᱡᱚᱜ ᱯᱩᱨᱟ.ᱣ ᱠᱟᱛᱮ ᱥᱤᱞᱯᱤᱧ ᱠᱚᱪᱟᱨᱮ ᱡᱚᱱᱚᱜ ᱴᱮᱸᱰᱟᱨ ᱚᱴᱚ ᱠᱟᱛᱮ ᱟᱨ ᱦᱚᱸ ᱡᱷᱩᱢᱨᱤ ᱢᱟ.ᱭ ᱴᱷᱮᱱ ᱦᱮᱡ ᱠᱟᱛᱮᱭ ᱢᱮᱱ ᱠᱮᱫᱟ, ᱟᱞᱮ ᱵᱤᱫᱟ.ᱞ ᱨᱮᱢᱟ ᱯᱷᱳᱱ ᱜᱮ ᱵᱟᱝ ᱛᱟᱸᱦᱮ ᱠᱟᱱᱟ ᱟᱫᱚ ᱟᱞᱮ ᱫᱚᱞᱮ ᱜᱚᱡ ᱪᱟᱵᱟᱭᱮᱱᱟ ᱥᱮ ᱪᱮᱛᱟ ? ᱯᱟᱲᱦᱟᱣ ᱜᱤᱫᱽᱨᱟ. ᱱᱤᱛᱚᱜ ᱯᱟᱲᱦᱟᱣ ᱨᱮᱱᱟᱜ ᱚᱠᱛᱚ, ᱤᱱᱟ. ᱫᱚ ᱵᱟᱝ ᱠᱟᱛᱮ ᱯᱷᱳᱱ ᱟᱨ ᱯᱷᱳᱱ ᱾ ᱨᱟ.ᱜᱤ ᱧᱚᱜ ᱠᱟᱛᱮ ᱥᱤᱢᱚᱛᱤᱭ ᱢᱮᱱ ᱠᱮᱫᱟ ᱯᱷᱳᱱ ᱫᱚ ᱫᱚᱦᱚᱭ ᱢᱮᱥᱮ ᱵᱷᱟᱞᱟ ᱾ ᱵᱟᱝᱠᱷᱟᱱ ᱯᱷᱳᱱ ᱜᱮᱧ ᱪᱟᱯᱟᱫ ᱜᱤᱰᱤ ᱠᱟᱜ-ᱟ ᱾ ᱵᱷᱤᱰᱤᱭᱚ ᱮᱢ ᱵᱮᱱᱟᱣ ᱟᱨ ᱡᱟᱦᱟᱱᱟᱜ ᱜᱮᱢ ᱵᱮᱱᱟᱣ ᱱᱤᱛᱚᱜ ᱫᱚ ᱯᱟᱲᱦᱟᱣ ᱚᱠᱛᱚ ᱯᱟᱲᱦᱟᱣᱜ ᱢᱮ ᱾ ᱟᱨ ᱵᱟᱝᱠᱷᱟᱱ ᱯᱷᱳᱱ ᱜᱮᱧ ᱪᱟᱯᱟᱫ ᱜᱤᱰᱤ ᱠᱟᱛᱟᱢ ᱠᱟᱱᱟ ᱾

ᱡᱷᱩᱢᱨᱤ ᱢᱟ.ᱭ ᱱᱟᱥᱮᱭ ᱞᱟ.ᱵᱤᱫ ᱮᱱᱟ ᱾ ᱟᱪᱪᱷᱟ ᱴᱷᱤᱠ ᱜᱮᱭᱟ ᱵᱟᱵᱟ ᱫᱚᱦᱚᱭ ᱤᱫᱟ.ᱧ ᱾ ᱧᱮᱞ ᱮᱫᱟᱢ ᱛᱚ ᱯᱚᱛᱚᱵ ᱚᱴᱟᱜ ᱨᱮᱜᱮ ᱢᱮᱱᱟᱜ-ᱟ, ᱯᱟᱲᱦᱟᱣᱜ ᱠᱟ.ᱱᱟ.ᱧ ᱾ ᱟᱢᱟᱜ ᱠᱟᱛᱷᱟ ᱜᱮ ᱦᱳᱭ ᱮᱱᱟ ᱱᱚᱜ-ᱚᱭ ᱯᱷᱳᱱᱤᱧ ᱫᱚᱦᱚ ᱠᱮᱫᱟ ᱾ ᱛᱚᱵᱮ ᱦᱮᱸ ᱛᱮᱦᱮᱧ ᱛᱟᱨᱟᱥᱤᱧ ᱢᱤᱫᱴᱟᱹᱝ ᱵᱷᱤᱰᱤᱭᱚ ᱫᱚᱧ ᱵᱮᱱᱟᱣ ᱜᱮᱭᱟ ᱾ ᱵᱮᱲᱟ ᱛᱟᱨᱟᱥᱤᱧ ᱵᱩᱨᱩ ᱫᱷᱟᱥᱱᱟᱨᱮ ᱛᱤᱱᱟ.ᱜ ᱢᱚᱡᱽ ᱵᱩᱡᱷᱟ.ᱣᱜ-ᱟ ᱾ ᱵᱮᱲᱟ ᱛᱟᱨᱟᱥ ᱨᱮᱱᱟᱜ ᱞᱟ.ᱵᱤᱫ ᱮᱞᱟᱝ ᱛᱮ ᱜᱚᱴᱟ ᱵᱩᱨᱩ ᱟᱲᱮᱨᱮ ᱟ.ᱰᱤ ᱨᱳᱢᱟᱱᱴᱤᱠ ᱵᱩᱡᱷᱟ.ᱣᱜ-ᱟ ᱾ ᱡᱷᱤᱱᱤᱠ ᱞᱤᱯᱷᱤᱨ ᱥᱟᱠᱟᱢᱟᱜ ᱠᱩᱪᱤ ᱯᱚᱦᱟᱞ ᱦᱚᱲᱢᱚ ᱞᱟ.ᱵᱤᱫ ᱥᱤᱛᱩᱝ ᱟᱦᱞᱟ ᱛᱮ ᱛᱳᱯᱳ ᱟᱲᱜᱳᱱᱟ ᱾ ᱦᱮᱢᱟᱞ ᱦᱤᱥᱤᱫ ᱦᱚᱭ-ᱟᱜ ᱜᱟᱭᱜᱚᱢ ᱡᱚᱴᱮᱫ ᱛᱮ ᱡᱩᱣᱟ.ᱱᱤ ᱦᱚᱲᱢᱚ ᱨᱮᱱᱟᱜ ᱨᱟ.ᱥᱠᱟ. ᱪᱷᱤᱞᱠᱟ.ᱣ ᱨᱟᱠᱟᱵ ᱜᱚᱫᱚᱜ-ᱟ ᱾ ᱡᱤᱣᱤ ᱦᱚᱲᱢᱚᱨᱮ ᱨᱩᱢᱩᱭ ᱟ.ᱱᱟ.ᱭᱠᱟ.ᱣ ᱛᱮ ᱥᱮᱵᱮᱡ ᱥᱮᱵᱮᱡ ᱟᱫᱟᱜ-ᱟ ᱾ ᱢᱤᱫᱴᱟᱝ ᱢᱩᱦᱱᱤ-ᱢᱟᱭᱟ ᱨᱮᱱᱟᱜ ᱵᱩᱵᱩᱞ ᱨᱟᱥᱟ ᱡᱚᱵᱮ ᱞᱟ.ᱰᱩ ᱞᱮᱠᱟ ᱥᱚᱨᱚᱵᱚᱨᱚ ᱪᱟᱯᱮ ᱠᱚᱜ-ᱟ ᱾ ᱢᱤᱫᱴᱟᱝ ᱵᱷᱤᱱᱟ. ᱧᱚᱜ ᱨᱟ.ᱥᱠᱟ. ᱛᱮ ᱢᱚᱱᱮ ᱡᱤᱣᱤ ᱵᱩᱞ ᱛᱳᱦᱮᱞᱚᱜ-ᱟ ᱾ ᱟᱨ ᱛᱮᱦᱮᱧᱟᱜ ᱢᱤᱥᱚᱱ ᱫᱚ ᱚᱱᱟ ᱜᱮ ᱞᱟᱭᱤᱵᱷ ᱨᱤᱞᱥ ᱵᱷᱤᱰᱤᱭᱚ ᱾

ᱥᱤᱸᱜᱤ ᱢᱟᱦᱟ ᱛᱤᱠᱤᱱ ᱫᱟᱠᱟ ᱡᱚᱢ ᱠᱟᱛᱮ ᱥᱟᱯᱲᱟᱣᱜ-ᱮ ᱫᱷᱩᱨᱟ.ᱣ ᱮᱱᱟ ᱾ ᱮᱛᱟᱝ ᱥᱟᱥᱟᱝ ᱞᱩᱢᱟ.ᱝ ᱥᱟ.ᱲᱤ ᱛᱮ ᱢᱚᱡᱽ ᱥᱟ.ᱦᱤᱸᱡ ᱯᱟᱴᱷᱮ ᱵᱟᱸᱫᱮ, ᱰᱟᱸᱰᱟ ᱯᱮᱨᱮᱡ ᱪᱟᱸᱫᱤ ᱨᱮᱭᱟᱜ ᱡᱷᱤᱸᱡᱤᱨ ᱾ ᱦᱚᱴᱚᱜ ᱯᱮᱨᱮᱡ ᱦᱚᱴᱚᱜ ᱢᱟᱞᱟ, ᱞᱩᱛᱩᱨ ᱯᱮᱨᱮᱡ ᱯᱟᱜᱽᱨᱟ, ᱡᱟᱸᱜᱟ ᱯᱮᱨᱮᱡ ᱯᱟᱸᱡᱚᱱ ᱛᱚᱲᱟ ᱾ ᱵᱟᱸᱫᱩ-ᱠᱩᱫᱟ. ᱥᱩᱫ ᱨᱮ ᱰᱚᱜᱚᱨ ᱵᱟᱦᱟ ᱾ ᱵᱮᱞᱮ ᱠᱩᱸᱫᱽᱨᱤ ᱞᱮᱠᱟ ᱞᱩᱴᱤ ᱯᱮᱨᱮᱡ ᱡᱚᱨᱚᱝ ᱡᱚᱨᱚᱝ ᱟᱨᱟᱜ ᱨᱟᱝᱛᱟ ᱾ ᱥᱟ.ᱨᱤ ᱜᱮ ᱢᱚᱡᱽ ᱢᱩᱴᱷᱟ.ᱱ ᱪᱤᱠᱟ.ᱬ ᱡᱚᱦᱟᱨᱮ ᱢᱩᱞᱩᱡ ᱞᱟᱸᱫᱟ ᱨᱮᱭᱟᱜ ᱡᱷᱟᱞᱟᱠ ᱵᱤᱡᱽᱞᱤ ᱛᱟᱨ ᱠᱟᱨᱮᱱ ᱞᱮᱠᱟ ᱦᱚᱲᱢᱚ ᱨᱤᱢᱡᱷᱟ.ᱣ ᱜᱚᱫᱚᱜ-ᱟ ᱾

ᱵᱩᱨᱩ ᱥᱚᱸᱜᱷᱟᱨᱮ ᱵᱚᱸᱜᱟᱠᱩᱲᱤ ᱳᱯᱷᱮᱞᱮᱱ ᱞᱮᱠᱟᱜᱮ ! ᱛᱟᱨᱟᱥᱤᱧ ᱵᱮᱲᱟ ᱟᱜ ᱦᱮᱲᱮᱢ ᱞᱟ.ᱵᱤᱫ ᱮᱞᱟᱝ ᱛᱟᱨᱟᱥ ᱦᱚᱲᱢᱚ ᱯᱮᱨᱮᱡ ᱡᱷᱤᱸᱜᱟ. ᱵᱟᱦᱟ ᱟᱜ ᱛᱟᱨᱟᱥ-ᱮ ᱛᱟᱨᱥᱮ ᱮᱫᱟ ᱾ ᱜᱚᱴᱟ ᱵᱩᱨᱩ ᱥᱚᱸᱜᱷᱟ ᱢᱤᱫ ᱢᱟᱭᱟ ᱢᱚᱦᱚᱨ ᱛᱮ ᱡᱷᱟᱵᱽᱨᱟᱣ ᱜᱚᱫᱚᱜ ᱠᱟᱱᱟ ᱾ ᱦᱤᱥᱤᱫ ᱦᱚᱭ-ᱟᱜ ᱦᱮᱞᱠᱟᱣ ᱜᱟᱭᱜᱚᱢ ᱡᱚᱴᱮᱫ ᱛᱮ ᱢᱚᱱᱮ ᱵᱷᱩᱞᱟ.ᱣ ᱢᱩᱦᱱᱤ ᱢᱟᱭᱟ ᱨᱮᱱᱟᱜ ᱡᱟ.ᱫᱩ ᱡᱷᱟᱞᱟᱠ ᱛᱮ ᱟᱸᱜᱮᱱ ᱟᱫᱚᱜ ᱥᱟᱱᱟᱭᱮ ᱦᱚᱲᱢᱚ ᱡᱤᱣᱤ, ᱯᱨᱚᱠᱤᱛᱤ ᱟᱭᱳ-ᱟᱜ ᱠᱚᱲᱟᱢ ᱠᱷᱟᱸᱫᱽᱨᱤ ᱨᱮ ᱾ ᱡᱟ-ᱡᱩᱜᱽ ᱞᱟ.ᱜᱤᱫ ᱢᱤᱞᱟ.ᱣ ᱠᱟᱛᱮ ᱟᱸᱜᱮᱱ ᱟᱫᱚᱜ ᱥᱟᱱᱟᱦᱟ ᱾ ᱥᱟᱠᱟᱢ ᱫᱟᱱᱟᱝ ᱪᱮᱬᱮ ᱠᱚ ᱪᱮᱯᱨᱮᱡᱚᱜ ᱨᱟ.ᱥᱠᱟ. ᱨᱮᱱᱟᱜ ᱰᱷᱟᱹᱣ ᱵᱟᱱ ᱜᱟᱰᱟ ᱪᱷᱟ.ᱯᱞᱟ.ᱣ ᱜᱚᱫᱚᱜ-ᱟ ᱜᱚᱴᱟ ᱵᱩᱨᱩ ᱥᱚᱸᱜᱷᱟ ᱾

ᱡᱷᱩᱢᱨᱤ ᱢᱟ.ᱭ ᱵᱩᱨᱩᱨᱮᱭ ᱫᱮᱡ ᱮᱱᱟ ᱾ ᱥᱟ.ᱨᱤ ᱜᱮ ᱪᱮᱬᱮ ᱞᱮᱠᱟ ᱯᱷᱟ.ᱠᱬᱟ.ᱜ ᱯᱟᱥᱱᱟᱣ ᱠᱟᱛᱮ ᱞᱤᱞ ᱥᱮᱨᱢᱟᱨᱮ ᱩᱰᱟ.ᱣ ᱥᱟᱱᱟᱭᱮ ᱠᱟᱱᱟ ! ᱥᱚᱢᱟᱱ ᱧᱚᱜ ᱚᱛᱨᱮ ᱥᱴᱮᱱᱰ ᱫᱚᱦᱚ ᱠᱟᱛᱮ ᱢᱳᱵᱟᱭᱤᱞ-ᱮ ᱥᱮᱴ ᱠᱮᱫᱟ ᱾ ᱟᱡ-ᱮ ᱪᱟᱞᱟᱣ ᱮᱱᱟ ᱩᱥᱩᱞ ᱪᱩᱲᱟ.ᱨᱮ ᱾ ᱥᱟᱢᱟᱝ ᱥᱮᱫ-ᱫᱚ ᱥᱚᱢᱟᱱ ᱜᱮᱭᱟ, ᱢᱮᱱᱠᱷᱟᱱ ᱮᱛᱚᱢ ᱠᱚᱸᱭᱮ ᱟᱨ ᱯᱟ.ᱪᱷᱞᱟ. ᱨᱮᱫᱚ ᱟ.ᱰᱤ ᱫᱟᱲᱟᱝ ᱜᱮᱭᱟ ᱾ ᱫᱷᱤᱨᱤ ᱜᱷᱚᱸᱜᱷᱚᱨ ᱜᱟ.ᱣᱤᱡ ᱟᱛᱮ ᱦᱚᱦᱚᱭ-ᱮᱫᱟ ᱾ ᱱᱟᱥᱮᱢ ᱞᱮᱸᱡᱮᱫ ᱞᱮᱱᱠᱷᱟᱱ ᱜᱮ ᱟᱭᱟᱜ ᱦᱚᱵᱚᱨ ᱨᱮ ᱡᱟ-ᱡᱩᱜᱽ ᱞᱮᱠᱟᱢ ᱟᱸᱜᱮᱱ ᱟᱫᱚᱜ-ᱟ ᱾ ᱮᱱᱛᱮ ᱨᱮᱦᱚᱸ ᱡᱷᱩᱢᱨᱤ ᱢᱟ.ᱭ ᱫᱚᱭ ᱵᱩᱞ ᱟᱠᱟᱱᱟ! ᱵᱷᱤᱰᱤᱭᱚ ᱵᱮᱱᱟᱣ ᱨᱮᱱᱟᱜ ᱱᱤᱥᱟ. ᱛᱮ ᱾ ᱵᱳᱜᱮ ᱵᱟ.ᱲᱤᱡ ᱨᱮᱱᱟᱜ ᱵᱷᱮᱯᱮᱜᱮᱫ ᱵᱟᱭ ᱦᱩᱫᱤᱥ ᱫᱟᱲᱮᱭᱟᱜ ᱠᱟᱱᱟ ᱾ ᱵᱷᱤᱰᱤᱭᱚ ᱵᱮᱱᱟᱣ ᱞᱟ.ᱜᱤᱫ ᱯᱳᱡᱽ-ᱮ ᱦᱟᱛᱟᱣ ᱠᱮᱫᱟ, ᱥᱟᱶᱨᱮ ᱥᱚᱸᱜᱮ ᱞᱮᱱ ᱦᱩᱰᱤᱧ ᱵᱚᱭᱦᱟ ᱫᱟᱥᱚᱭ ᱢᱮᱛᱟ ᱫᱮᱭᱟ ᱦᱚᱯᱚᱱ ᱵᱟ.ᱵᱩ ᱤᱧ ᱥᱤᱜᱽᱱᱟᱞ ᱤᱧ ᱮᱢᱟᱢ ᱠᱷᱟᱱ ᱜᱮ ᱥᱮᱨᱮᱧ ᱪᱟ.ᱞᱩᱭ ᱛᱟᱞᱟᱝ ᱢᱮ ᱾ ᱠᱟ.ᱴᱩᱵ-ᱮ ᱩᱫᱩᱜ ᱠᱮᱫᱟ ᱢᱤᱫ, ᱵᱟᱨ, ᱯᱮ ᱥᱟᱶ ᱥᱟᱶ ᱜᱮ ᱫᱟᱥᱚ ᱥᱮᱨᱮᱧ-ᱮ ᱪᱟ.ᱞᱩ ᱠᱮᱫᱟ ᱾ ᱟᱨ ᱱᱚᱛᱮ ᱞᱟᱭᱤᱵᱷ ᱵᱷᱤᱰᱤᱭᱚ ᱦᱚᱸ ᱪᱟ.ᱞᱩ ᱟᱠᱟᱱᱟ ᱾ ᱡᱷᱩᱢᱨᱤ ᱢᱟ.ᱭ ᱰᱟᱸᱰᱟ ᱦᱮᱞᱠᱟᱣ ᱟᱛᱮ ᱞᱤᱵᱚᱭ ᱞᱚᱵᱚᱭ ᱢᱟᱨᱟᱜ ᱞᱮᱠᱟ ᱯᱷᱟᱨᱠᱟᱣ ᱟᱛᱮᱭ ᱮᱱᱮᱡ ᱠᱟᱱᱟ ᱾ ᱜᱚᱴᱟ ᱵᱩᱨᱩ ᱥᱚᱸᱜᱷᱟ ᱛᱟᱣᱟᱜ ᱛᱟᱨᱠᱳ ᱠᱟᱛᱮ ᱛᱟ.ᱯᱤᱧᱚᱜ ᱠᱟᱱᱟ – “ᱵᱩᱨᱩ ᱫᱷᱟᱨᱮ ᱵᱟᱦᱟ ᱵᱟᱜᱟᱱ ᱨᱮ ᱤᱧᱫᱚ ᱢᱤᱱᱟ.ᱧ ᱜᱟᱛᱮ ᱟᱢ ᱛᱟ.ᱜᱤᱨᱮ ᱾ ᱦᱤᱥᱤᱫ ᱦᱤᱥᱤᱫ ᱦᱚᱭ ᱦᱚᱲᱢᱚᱭ ᱡᱚᱴᱮᱫᱟ, ᱛᱤᱨᱮᱢ ᱥᱮᱴᱮᱨᱚᱜ ᱟᱢ ᱩᱭᱦᱟ.ᱨ ᱨᱮ ……….. ᱾”

ᱞᱟᱭᱤᱵᱷ ᱵᱷᱤᱰᱤᱭᱚ ᱫᱤᱥᱚᱢ ᱯᱟᱨᱚᱢ ᱫᱤᱥᱚᱢ ᱯᱟᱥᱱᱟᱣᱜ ᱠᱟᱱᱟ ᱾ ᱯᱟᱜᱷᱟᱨ ᱟ.ᱜᱩ ᱫᱟᱜ ᱛᱮ ᱡᱷᱟᱲ ᱡᱷᱟᱲ ᱠᱚ ᱟᱲᱜᱳᱱ ᱯᱩᱴᱷᱤ ᱰᱟᱸᱲᱠᱟ. ᱛᱮ ᱜᱷᱩᱱᱤ ᱯᱟᱴᱟ ᱯᱮᱨᱮᱡ ᱩᱪᱷᱞᱟ.ᱣ ᱜᱚᱫᱚᱜ ᱞᱮᱠᱟ, ᱡᱷᱟᱞᱟᱠ ᱜᱚᱴᱟ ᱪᱷᱟᱨᱟᱣ ᱯᱟᱥᱱᱟᱣᱜ ᱠᱟᱱᱟ ᱫᱤᱥᱚᱢ ᱨᱮᱭᱟᱜ ᱪᱟ.ᱨᱭᱟ. ᱠᱚᱸᱲ ᱨᱮ ᱾ ᱟᱸᱪᱠᱟ ᱜᱮ ᱪᱳᱸᱰᱳᱜ ᱡᱩᱛᱟ. ᱨᱮᱱᱟᱜ ᱦᱤᱞ ᱛᱮ ᱨᱳᱰᱜᱳ ᱫᱷᱤᱨᱤ ᱛᱟᱞᱟᱨᱮ ᱛᱮᱱ ᱯᱚᱴᱚᱢ ᱜᱩᱴᱤ ᱯᱷᱟ.ᱱᱴᱤᱞ ᱳᱰᱳᱠ ᱮᱱᱟ ᱾ ᱟᱨ ᱚᱱᱟ ᱜᱮᱭ ᱞᱮᱵᱮᱫ ᱨᱳᱠᱳᱲ ᱟᱱᱟ, ᱩᱥᱩᱞ ᱪᱚᱸᱰᱳᱜ ᱡᱩᱛᱟ. ᱴᱟᱞ ᱵᱟᱭ ᱥᱟᱸᱵᱽᱲᱟᱣ ᱫᱟᱲᱮᱭᱟᱫ ᱠᱷᱟᱱ ᱞᱮᱸᱡᱮᱫ ᱠᱟᱛᱮ ᱯᱷᱟ.ᱱᱴᱤᱞ ᱩᱛᱟ.ᱨ ᱮᱱᱟᱭ ᱫᱟᱲᱟᱝ ᱫᱷᱤᱨᱤ ᱜᱚᱸᱜᱷᱚᱨ ᱨᱮ ᱚᱱᱟ ᱨᱮᱭᱟᱜ ᱪᱤᱛᱟ.ᱨ ᱦᱚᱸ ᱫᱤᱥᱚᱢ ᱯᱟᱨᱚᱢ ᱫᱤᱥᱚᱢ ᱡᱷᱟᱞᱠᱟᱣᱜ ᱠᱟᱱᱟ ᱾ ᱫᱟ.ᱥᱩ ᱟᱜ ᱵᱚᱛᱚᱨ ᱥᱟᱛᱞᱟᱜ ᱠᱤᱠᱤᱭᱟ.ᱣ ᱜᱚᱴᱟ ᱛᱟ.ᱯᱤᱧ ᱯᱷᱚᱨᱚᱜ ᱠᱟᱱᱟ “ᱡᱷᱩᱢᱨᱤ ᱫᱤᱫᱤ …….., ᱡᱷᱩᱢᱨᱤ ᱫᱤᱫᱤ …………᱾ ” ᱞᱟᱭᱤᱵᱷ ᱵᱷᱤᱰᱤᱭᱚ ᱨᱮ ᱩᱱ ᱦᱚᱸ ᱥᱮᱨᱮᱧ ᱫᱚ ᱟᱸᱡᱚᱢᱚᱜ ᱠᱟᱱ ᱜᱮᱭᱟ “ᱵᱩᱨᱩ ᱫᱷᱟᱨᱮ ᱵᱟᱦᱟ ᱵᱟᱜᱟᱱ ᱨᱮ ……..” ᱟᱨ ᱚᱱᱟ ᱥᱟᱶᱛᱮ ᱜᱟᱛᱮ ᱠᱟᱛᱮ ᱡᱷᱩᱢᱨᱤ ᱫᱤᱫᱤ ……. ᱡᱷᱩᱢᱨᱤ ᱫᱤᱫᱤ ………. ᱡᱷᱩᱢᱨᱤ ᱫᱤᱫᱤ ………….᱾

***