ᱥᱟᱨᱡᱚᱢ

ᱦᱟᱱᱮ ᱩᱱᱨᱮᱹᱧ ᱧᱮᱞ ᱞᱮᱫ ᱢᱮ,
ᱫᱤᱥᱚᱢ ᱫᱤᱥᱚᱢ ᱠᱟᱛᱷᱟ ᱯᱟᱥᱱᱟᱣ ᱞᱮᱱ ᱛᱮ ᱾
ᱠᱩᱪᱤ ᱵᱟᱞᱮ ᱥᱟᱠᱟᱢ ᱛᱟᱞᱟ;
ᱯᱩᱸᱰ ᱜᱮ ᱟᱹᱰᱤ ᱪᱮᱦᱨᱟᱢ ᱵᱟᱦᱟ ᱞᱮᱱᱟ ᱾
ᱥᱤᱫ ᱠᱟᱛᱮ ᱛᱤᱭᱩᱜ ᱠᱟᱛᱮ ᱼ
ᱥᱩᱫ ᱨᱮᱹᱧ ᱵᱟᱦᱟ ᱞᱮᱫ ᱢᱮ;
ᱥᱚᱸᱫᱷᱟᱬ ᱥᱚ ᱛᱮ ‘ᱵᱟᱦᱟ ᱵᱚᱸᱜᱟ’ ᱨᱮ;
ᱜᱚᱴᱟ ᱟᱹᱛᱩᱢ ᱢᱚᱦᱠᱟᱣ ᱟᱸᱫᱚᱲ ᱞᱮᱫ ᱾

ᱛᱮᱦᱮᱧ ᱟᱢ ᱯᱟᱱᱛᱮ ᱵᱤᱨ ᱤᱧ ᱪᱟᱞᱟᱣ ᱞᱮᱱ,
ᱦᱟᱦᱟᱲᱟ ᱠᱟᱛᱮᱹᱧ ᱠᱚᱭᱚᱜ ᱠᱮᱫ;
ᱠᱩᱪᱤ ᱥᱟᱠᱟᱢ ᱦᱟᱨᱟ ᱟᱠᱟᱱ,
ᱟᱢ ᱫᱚ ᱚᱠᱟ ᱨᱮᱦᱚᱸ ᱵᱟᱹᱱᱩᱜ ᱢᱮ ᱾
‘ᱡᱷᱮᱸᱴ ᱵᱚᱸᱜᱟ ᱜᱚᱥᱚ ᱢᱮᱫᱦᱟ;
ᱥᱤᱛᱩᱝ ᱛᱟᱲᱟᱢ ᱡᱟᱸᱜᱟ ᱯᱚᱥᱟᱜ ᱧᱮᱞ ᱛᱮ;
ᱜᱷᱩᱨ ᱜᱷᱩᱨ ᱠᱟᱛᱮ ᱜᱚᱪᱷᱟᱢ ᱯᱮᱨᱮᱡ ᱠᱮᱫ ᱛᱤᱧᱼ
ᱟᱦᱟ! ᱟᱢ ᱧᱮᱞ ᱛᱮ ᱡᱤᱣᱤ ᱨᱟᱲᱮᱡ ᱮᱱ ᱛᱤᱧ ᱾

ᱵᱟᱦᱟ ᱠᱷᱚᱱᱮᱢ ᱡᱚ ᱮᱱᱟ,
ᱜᱚᱪᱷᱟ ᱨᱮᱹᱧ ᱯᱮᱨᱮᱡ ᱟᱹᱜᱩ ᱢᱮᱭᱟ ᱾
ᱛᱟᱭᱚᱢ ᱵᱤᱫᱟᱹᱞ ‘ᱟᱜᱷᱟᱬ ᱵᱚᱸᱜᱟ’ ᱨᱟᱵᱟᱝ ᱨᱮᱭᱟᱲᱼ
ᱨᱚᱦᱚᱲ ᱥᱟᱠᱟᱢ ᱡᱩᱨᱩᱜ ᱩᱨᱜᱩᱢ ᱠᱟᱹᱧᱟ !
ᱪᱟᱸᱫᱚ ᱯᱟᱨᱚᱢᱚᱜ ᱥᱮᱨᱢᱟ ᱯᱟᱨᱚᱢᱚᱜ,
ᱟᱢᱟᱜ ᱨᱩᱯ ᱦᱚᱸ ᱯᱟᱞᱴᱟᱣᱜ;
ᱮᱱᱛᱮ ᱨᱮᱦᱚᱸ ᱥᱟᱨᱡᱚᱢ ᱟᱢ ᱫᱚᱼ
ᱢᱟᱹᱱᱢᱤ ᱡᱤᱣᱤᱢ ᱟᱞᱟᱭ ᱠᱟᱜ ᱾

ᱟᱢ ᱫᱚ ᱠᱟᱱᱟᱢ ᱥᱟᱹᱨᱤ ᱥᱟᱨᱡᱚᱢ,
ᱥᱟᱱᱛᱟᱲ ᱥᱟᱶᱛᱟ ᱨᱮᱹᱱ ᱥᱟᱹᱨᱤ ᱪᱤᱱᱦᱟᱹ,
ᱵᱟᱯᱞᱟ ᱪᱷᱟᱹᱴᱭᱟᱹᱨ ᱵᱷᱟᱸᱰᱟᱱ ᱨᱮᱼ
ᱡᱮᱛᱮ ᱨᱮᱜᱮ ᱟᱢᱟᱜ ᱞᱟᱹᱠᱛᱤ ᱾
ᱟᱢ ᱫᱚ ᱠᱟᱱᱟᱢ ᱥᱟᱹᱨᱤ ᱥᱟᱨᱡᱚᱢ,
ᱥᱟᱹᱨᱤ ᱜᱮ ᱛᱟᱢ ᱜᱩᱱ ᱢᱟᱹᱱ;
ᱤᱧ ᱦᱚᱸ ᱟᱢ ᱞᱮᱠᱟ ᱥᱟᱹᱨᱤ ᱠᱟᱹᱧ ᱢᱮᱼ
ᱱᱚᱣᱟ ᱛᱷᱩᱢ ᱜᱮ ᱟᱢ ᱴᱷᱮᱱ ᱤᱧ ᱠᱷᱚᱡᱚᱜ ᱠᱟᱱ ᱾

***