ᱢᱟᱥᱮ ᱞᱟᱹᱭ ᱢᱮ ᱟᱢ ᱞᱮᱠᱟ ᱚᱠᱚᱭ ᱢᱮᱱᱟᱭ
ᱥᱤᱢᱨᱟᱜ ᱠᱷᱚᱱ ᱧᱤᱫᱟᱹ ᱟᱹᱣᱨᱤ ᱡᱟᱹᱯᱤᱫᱽ ᱵᱷᱩᱨ
ᱞᱟᱲᱟᱣ ᱠᱚᱜ ᱟᱢ ᱢᱤᱫ ᱢᱚᱱ ᱛᱮ
ᱪᱤᱞᱤ ᱦᱚᱸ ᱵᱟᱠᱚ ᱜᱚᱲᱚ ᱟᱢ ᱥᱩᱨ ᱾
ᱟᱢᱟᱜ ᱢᱚᱱᱮ ᱡᱤᱣᱤ ᱦᱚᱲᱢᱚ ᱫᱚ ᱥᱟᱹᱨᱤ ᱜᱮ
ᱢᱮᱬᱦᱮᱫ, ᱪᱟᱴᱟᱱᱤ ᱫᱷᱤᱨᱤ ᱞᱮᱠᱟ ᱠᱮᱴᱮᱡ
ᱡᱟᱦᱟᱸ ᱛᱤᱱᱟᱹᱜ ᱫᱩᱠᱷ ᱠᱚᱥᱴᱚ ᱦᱟᱨᱠᱮᱛ ᱦᱤᱡᱩᱜ ᱨᱮᱦᱚᱸ
ᱢᱚᱱᱮ ᱜᱚᱴᱟ ᱛᱟᱦᱮᱸᱱᱟᱢ ᱮᱱᱦᱚᱸ ᱦᱮᱥᱮᱡ ᱥᱮᱠᱮᱡ ᱾
ᱦᱮᱢᱟᱞ ᱵᱩᱨᱩ ᱦᱚᱢ ᱫᱮᱡ ᱫᱟᱲᱮᱭᱟᱜ
ᱫᱟᱲᱮᱭᱟᱜ ᱮᱢ ᱨᱤᱢᱤᱞ ᱥᱟᱞᱟᱜ ᱦᱚᱸ ᱛᱟᱹᱠᱤᱡ
ᱵᱟᱱ ᱜᱟᱰᱟ ᱫᱟᱜ ᱨᱮᱦᱚᱢ ᱯᱟᱭᱨᱟ ᱯᱟᱨᱚᱢ ᱫᱟᱲᱮᱭᱟᱜ
ᱡᱤᱭᱚᱱ ᱰᱷᱚᱸᱜᱟ ᱦᱚᱢ ᱞᱟᱲᱟᱣ ᱟᱹᱣᱨᱤ ᱞᱟᱸᱜᱟ ᱫᱷᱟᱹᱵᱤᱡ ᱾
ᱡᱚᱛᱚ ᱦᱚᱲ ᱠᱚ ᱢᱮᱱᱟ ᱟᱢ ᱫᱚ ᱛᱤᱨᱞᱟᱹ
ᱞᱤᱵᱽᱲᱩᱡ, ᱱᱤᱫᱷᱟᱹᱱ, ᱱᱟᱪᱟᱨ ᱜᱮᱭᱟᱢ
ᱛᱚᱵᱮ ᱤᱧ ᱫᱩᱧ ᱢᱮᱱᱟ ᱵᱟᱢ ᱦᱟᱹᱨᱣᱟᱹᱜᱼᱟ
ᱟᱢ ᱫᱚ ᱡᱚᱛᱚᱣᱟᱜ ᱠᱟᱹᱢᱤ ᱫᱟᱲᱮᱭᱟᱜ ᱜᱮᱭᱟᱢ ᱾
ᱢᱮᱱᱟᱜ ᱟᱢᱟᱜ ᱛᱤ ᱨᱮ ᱡᱚᱛᱚ ᱥᱟᱯᱟᱵ
ᱪᱤᱞᱤ ᱴᱷᱮᱱ ᱦᱚᱸ ᱵᱟᱹᱱᱩᱜ ᱫᱟᱲᱮ ᱟᱢ ᱞᱮᱠᱟ
ᱞᱟᱹᱭ ᱢᱮ ᱢᱟᱥᱮ ᱟᱢ ᱞᱮᱠᱟ ᱚᱠᱚᱭ ᱢᱮᱱᱟᱭ
ᱟᱢ ᱜᱮᱠᱚ ᱢᱮᱛᱟᱢ ᱫᱷᱟᱹᱨᱛᱤ ᱟᱭᱳ ᱚᱱᱟ ᱪᱮᱠᱟ ᱾
***
