ᱜᱮᱭᱟᱱ ᱨᱮᱭᱟᱜ ᱪᱮᱢᱮᱫ ᱮ ᱮᱢᱚᱜ,
ᱵᱚᱫᱚᱞᱟᱭ ᱡᱤᱭᱚᱱ ᱢᱟᱹᱱᱢᱤᱭᱟᱜ ᱾
ᱱᱟᱱᱟ ᱦᱩᱱᱟᱹᱨ ᱯᱚᱛᱚᱵ ᱢᱮᱱᱟᱜ,
ᱠᱟᱛᱷᱟ ᱚᱞ ᱟᱠᱟᱱ ᱡᱮᱜᱮᱛ ᱨᱮᱱᱟᱜ ᱾
ᱜᱚᱲᱚᱭ ᱮᱢᱚᱜ ᱞᱟᱦᱟᱜ ᱞᱟᱹᱜᱤᱱ,
ᱵᱮᱱᱟᱣᱟᱭ ᱯᱚᱛᱚᱵ ᱜᱮ ᱱᱚᱣᱟ ᱡᱤᱭᱚᱱ ᱾
ᱪᱮᱫᱚᱜᱼᱟ ᱠᱟᱛᱷᱟ ᱯᱟᱲᱦᱟᱣ ᱠᱟᱛᱮ ᱯᱚᱛᱚᱵ,
ᱵᱩᱡᱷᱟᱹᱣᱜᱼᱟ ᱡᱤᱭᱚᱱ ᱨᱮ ᱟᱭᱢᱟ ᱜᱚᱨᱚᱵᱽ ᱾
ᱢᱟᱹᱱᱢᱤᱭᱟᱜ ᱵᱟᱰᱟᱭᱚᱜ ᱱᱟᱜᱟᱢ ᱠᱟᱹᱦᱱᱤ,
ᱡᱤᱛᱠᱟᱹᱨ ᱦᱟᱨᱟᱣ ᱫᱩᱞᱟᱹᱲ ᱠᱟᱹᱦᱱᱤ ᱾
ᱜᱮᱭᱟᱱ ᱨᱮᱭᱟᱜ ᱪᱮᱢᱮᱫ ᱮ ᱮᱢᱚᱜ,
ᱵᱚᱫᱚᱞᱟᱭ ᱡᱤᱭᱚᱱ ᱢᱟᱹᱱᱢᱤᱭᱟᱜ ᱾
ᱩᱰᱟᱹᱣ ᱫᱟᱲᱮᱭᱟᱜ ᱵᱚᱱ ᱪᱮᱬᱮ ᱞᱮᱠᱟ,
ᱡᱤᱭᱚᱱ ᱵᱟᱹᱫᱽ ᱨᱮ ᱦᱳᱲᱳ ᱜᱟᱹᱪᱷᱤ ᱞᱮᱠᱟ ᱾
ᱞᱤᱸᱡᱤᱱ ᱜᱟᱰᱟ ᱫᱟᱜ ᱞᱮᱠᱟ ᱵᱚᱱ ᱞᱟᱦᱟᱜ,
ᱯᱚᱛᱚᱵ ᱜᱮ ᱞᱟᱹᱭᱟᱭ ᱢᱟᱬᱟᱝ ᱥᱮᱫ ᱞᱟᱦᱟᱜ ᱾
ᱯᱚᱛᱚᱵ ᱡᱩᱫᱤᱢ ᱟᱯᱱᱟᱨᱮ ᱡᱤᱭᱚᱱ ᱨᱮ,
ᱥᱚᱯᱷᱚᱞᱛᱟᱭ ᱮᱢᱚᱜ ᱞᱟᱦᱟᱜ ᱰᱟᱦᱟᱨ ᱨᱮ ᱾
ᱛᱤᱸᱜᱩ ᱠᱮᱴᱮᱡᱚᱜ ᱵᱚᱱ ᱜᱷᱟᱨᱚᱸᱡᱽ ᱨᱮ,
ᱵᱩᱫᱷᱤ ᱫᱤᱥᱟᱹᱭ ᱮᱢᱚᱜ ᱡᱤᱭᱚᱱ ᱨᱮ ᱾
ᱜᱮᱭᱟᱱ ᱨᱮᱭᱟᱜ ᱪᱮᱢᱮᱫ ᱮ ᱮᱢᱚᱜ,
ᱵᱚᱫᱚᱞᱟᱭ ᱡᱤᱭᱚᱱ ᱢᱟᱹᱱᱢᱤᱭᱟᱜ ᱾
ᱨᱮᱸᱜᱮᱡ ᱠᱤᱥᱟᱹᱬ ᱵᱟᱭ ᱵᱟᱪᱷᱟᱣ
ᱡᱩᱫᱤ ᱜᱟᱛᱮ ᱟᱢ ᱯᱚᱛᱚᱵ ᱥᱟᱶ ᱾
ᱢᱚᱱᱮ ᱞᱟᱜᱟᱣ ᱠᱟᱛᱮ ᱡᱩᱫᱤᱢ ᱯᱟᱲᱦᱟᱣᱜ
ᱯᱮᱨᱮᱡᱚᱜ ᱡᱤᱵᱚᱱ ᱨᱮ ᱜᱮᱭᱟᱱ ᱟᱢᱟᱜ ᱾
ᱨᱟᱠᱟᱵ ᱚᱪᱚ ᱢᱮ ᱥᱮᱬᱟ ᱯᱚᱫᱽ ᱨᱮ
ᱢᱟᱹᱱ ᱥᱚᱢᱢᱟᱱ ᱧᱟᱢᱟᱢ ᱫᱤᱥᱚᱢ ᱛᱟᱞᱟ ᱨᱮ ᱾
ᱛᱟᱦᱮᱸᱱᱟ ᱥᱚᱱᱟ ᱪᱟᱺᱫᱤ ᱫᱷᱚᱱ ᱛᱮᱢ ᱠᱤᱥᱟᱹᱬᱚᱜ,
ᱛᱟᱦᱮᱸᱱᱟ ᱟᱹᱲᱟ ᱩᱯᱩᱨᱩᱢ ᱜᱮᱭᱟᱱ ᱛᱮᱢ ᱠᱤᱥᱟᱹᱬᱚᱜ ᱾
ᱜᱮᱭᱟᱱ ᱨᱮᱭᱟᱜ ᱪᱮᱢᱮᱫ ᱮ ᱮᱢᱚᱜ,
ᱵᱚᱫᱚᱞᱟᱭ ᱡᱤᱭᱚᱱ ᱢᱟᱹᱱᱢᱤᱭᱟᱜ ᱾
ᱡᱩᱫᱤᱢ ᱛᱟᱦᱮᱱ ᱯᱚᱛᱚᱵ ᱥᱟᱶ ᱡᱩᱲᱟᱣ
ᱟᱭᱳ ᱵᱟᱵᱟ ᱦᱟᱜ ᱠᱩᱠᱢᱩᱢ ᱯᱩᱨᱟᱹᱣ ᱾
ᱡᱩᱫᱤᱢ ᱮᱵᱷᱮᱱᱚᱜ ᱚᱠᱛᱚ ᱨᱮ,
ᱧᱟᱢᱟᱢ ᱥᱩᱠ ᱡᱤᱭᱚᱱ ᱨᱮ ᱾
ᱪᱮᱢᱮᱫ ᱮ ᱮᱢᱚᱜ ᱟᱹᱠᱩᱛ ᱵᱮᱲᱟ,
ᱨᱚᱯᱚᱲ ᱛᱟᱦᱮᱱ ᱥᱤᱵᱤᱞ ᱟᱹᱲᱟᱹ ᱾
ᱫᱩᱠ ᱵᱮᱲᱟ ᱜᱚᱲᱚᱭ ᱮᱢᱚᱜ ᱡᱤᱭᱚᱱ ᱨᱮᱱᱟᱝ,
ᱵᱟᱦᱟ ᱢᱟᱞᱟ ᱜᱟᱞᱟᱝ ᱛᱮ ᱜᱮᱭᱟᱱ ᱨᱮᱱᱟᱝ ᱾
ᱜᱮᱭᱟᱱ ᱨᱮᱭᱟᱜ ᱪᱮᱢᱮᱫ ᱮ ᱮᱢᱚᱜ,
ᱵᱚᱫᱚᱞᱟᱭ ᱡᱤᱭᱚᱱ ᱢᱟᱹᱱᱢᱤᱭᱟᱜ ᱾
ᱨᱚᱝ ᱵᱤᱨᱚᱝ ᱵᱟᱦᱟ ᱢᱟᱞᱟ ᱞᱮᱠᱟ ᱜᱮᱭᱟᱱ ᱟᱛᱮ
ᱥᱤᱠᱷᱱᱟᱹᱛᱚᱜ ᱵᱚᱱ ᱯᱚᱛᱚᱵ ᱯᱟᱲᱦᱟᱣ ᱠᱟᱛᱮ ᱾
ᱥᱮᱴᱮᱨ ᱠᱟᱛᱮ ᱥᱚᱯᱷᱚᱞᱛᱟ ᱫᱚᱞᱟᱱ ᱛᱮ
ᱯᱟᱥᱱᱟᱣ ᱵᱚ ᱜᱚᱴᱟ ᱫᱩᱞᱟᱹᱲ ᱛᱟᱨᱟᱥ ᱛᱮ ᱾
ᱡᱩᱫᱤ ᱡᱤᱭᱚᱱ ᱫᱟᱢᱟᱱ ᱵᱮᱱᱟᱣᱟᱢ
ᱯᱚᱛᱚᱵ ᱨᱮᱱᱟᱝ ᱥᱟᱶ ᱵᱟᱪᱷᱚᱱᱟᱢ ᱾
ᱥᱚᱨᱮᱥ ᱵᱤᱪᱟᱹᱨ ᱵᱮᱱᱟᱜᱼᱟ
ᱟᱜᱟᱢ ᱡᱤᱭᱚᱱ ᱵᱚᱫᱚᱞᱚᱜᱼᱟ ᱾
ᱜᱮᱭᱟᱱ ᱨᱮᱭᱟᱜ ᱪᱮᱢᱮᱫ ᱮ ᱮᱢᱚᱜ,
ᱵᱚᱫᱚᱞᱟᱭ ᱡᱤᱭᱚᱱ ᱢᱟᱹᱱᱢᱤᱭᱟᱜ ᱾
***
