ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ
ᱚᱱᱟ ᱫᱤᱱ ᱥᱮᱨᱢᱟ
ᱯᱟᱨᱚᱢ ᱪᱟᱞᱟᱣ ᱟᱠᱟᱱ ᱱᱟᱜᱟᱢ
30 ᱡᱩᱱ 1855 ᱥᱟᱞᱮ ᱨᱮ ᱮᱛᱚᱦᱚᱵ ᱞᱮᱱ ᱚᱱᱟ
ᱦᱩᱞ…ᱦᱩᱞᱹᱹᱹᱦᱩᱞ
ᱠᱩᱦᱲᱟᱹ ᱧᱩᱛᱟᱹᱛ ᱦᱮᱸᱫᱮ ᱨᱤᱢᱤᱞ
ᱜᱩᱨᱞᱟ.ᱣ ᱨᱟᱠᱟᱵ ᱞᱮᱱ
ᱥᱤᱧᱚᱛ ᱫᱤᱥᱚᱢ ᱨᱮᱭᱟᱜ ᱵᱷᱚᱜᱽᱱᱟᱰᱤ ᱟᱹᱛᱩ ᱨᱮ
ᱟᱹᱫᱤᱢ ᱦᱚᱲᱟᱜ ᱠᱚᱲᱟᱢ ᱪᱮᱛᱟᱱ ᱢᱮᱫᱫᱟᱜ ᱡᱚᱨᱚ ᱞᱮᱱ ᱾
ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ ᱥᱟᱨᱡᱚᱢ ᱰᱟᱨᱣᱟᱹᱜ ᱦᱩᱞ ᱜᱤᱨᱟᱹ
ᱦᱩᱞ ᱰᱟᱠ ᱦᱚᱦᱚ ᱫᱚ ᱜᱚᱴᱟ ᱛᱟᱠᱮᱨ ᱛᱟᱨᱠᱚ ᱟᱸᱡᱚᱢ ᱞᱮᱱ
ᱟᱹᱛᱩ ᱴᱚᱞᱟ ᱥᱟᱭ ᱯᱩᱲᱥᱤ ᱫᱤᱥᱚᱢ ᱜᱚᱴᱟ ᱦᱩᱞᱟᱹ ᱪᱚᱢᱠᱟᱣ ᱞᱮᱱ
ᱦᱚᱲ ᱦᱚᱯᱚᱱ ᱥᱟᱶᱛᱮ ᱵᱤᱨ ᱵᱩᱨᱩ ᱪᱮᱬᱮ ᱪᱤᱯᱨᱩᱜ
ᱦᱚᱭ ᱦᱤᱥᱤᱫ ᱦᱚᱸ ᱥᱟᱱᱟᱢ ᱵᱚᱫᱚᱞ ᱩᱛᱟ.ᱨ ᱞᱮᱱ ᱾
ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ ᱤᱜᱽᱨᱮᱡᱽ ᱠᱚᱣᱟᱜ ᱜᱚᱵᱚᱞ ᱨᱮ
ᱵᱟᱝ ᱥᱟᱦᱟᱜ ᱚᱱᱟ ᱢᱟᱦᱟᱡᱚᱱ ᱠᱚᱣᱟᱜ ᱥᱟᱥᱚᱱ
ᱱᱤᱞᱟᱹᱢ ᱮᱫ ᱠᱚ ᱚᱛ ᱦᱟᱥᱟ ᱫᱷᱩᱲᱤ
ᱞᱟᱺᱫᱩᱲ ᱮᱫ ᱠᱚ ᱡᱟᱹᱛᱤ ᱥᱟᱶᱛᱟ ᱟᱹᱱ-ᱟᱹᱨᱤ
ᱨᱟᱜ ᱨᱚᱫᱚᱱ ᱡᱚᱞᱚᱱ ᱡᱤᱶᱤ ᱟᱹᱰᱤ ᱡᱟᱞᱟ ᱨᱮ
ᱟᱴᱚᱜ ᱴᱟᱸᱵᱚᱜ ᱴᱚᱦᱚᱞ ᱵᱤᱠᱚᱞ ᱢᱩᱦᱤᱢ ᱚᱠᱛᱚ ᱨᱮ
ᱛᱤᱨᱞᱟᱹ ᱦᱚᱯᱚᱱᱟᱜ ᱢᱟᱹᱱ ᱢᱚᱦᱚᱛ ᱫᱚ ᱛᱟᱞᱟ ᱴᱟᱺᱰᱤ ᱞᱮᱱ ᱾
ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ
ᱵᱤᱨ ᱥᱤᱫᱚᱼᱠᱟᱱᱦᱩ ᱪᱟᱸᱫᱽᱼᱵᱷᱟᱭᱨᱚ ᱯᱷᱩᱞᱚᱼᱡᱷᱟᱱᱚ
ᱟᱹᱭᱩᱨ ᱥᱩᱛᱩᱜ ᱛᱮ
ᱫᱤᱥᱚᱢ ᱦᱚᱲ ᱠᱚ ᱥᱮᱴᱮᱨ ᱞᱮᱱ
ᱟᱸᱫᱚᱲ ᱞᱮᱱ ᱦᱩᱞᱹᱹᱹᱦᱩᱞᱹᱹᱹᱦᱩᱞ
ᱥᱟᱱᱛᱟᱲ ᱯᱟᱨᱜᱟᱱᱟ ᱨᱮ
ᱟᱜ ᱥᱟᱨ ᱠᱟᱹᱯᱤ ᱛᱟᱨᱣᱟᱲᱮ ᱥᱟᱡᱟᱣ ᱞᱮᱱ ᱡᱷᱟᱠᱼᱡᱷᱟᱠ
ᱛᱩᱢᱫᱟᱜ, ᱴᱟᱢᱟᱠ, ᱥᱟᱠᱣᱟ ᱥᱟᱰᱮ ᱜᱩᱨᱞᱟᱹᱣ ᱢᱮᱥᱟ ᱞᱮᱱ
ᱚᱛ ᱥᱮᱨᱢᱟ ᱥᱟᱰᱮ ᱫᱚ ᱛᱟᱨᱠᱚ ᱚᱴᱟᱝ ᱞᱮᱱ ᱾
ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ
ᱵᱟᱹᱭᱨᱤ ᱥᱟᱞᱟᱜ ᱛᱩᱯᱩᱫ ᱛᱟᱯᱟᱢ
ᱥᱤᱢ ᱥᱩᱠᱨᱤ ᱞᱮᱠᱟ ᱥᱮᱢᱫᱽᱨᱟ ᱠᱟᱛᱮ
ᱞᱤᱸᱜᱤ ᱢᱮᱥᱟ ᱞᱮᱱ ᱵᱟᱹᱭᱨᱤ ᱢᱟᱭᱟᱢ
ᱵᱚᱦᱮᱞ ᱢᱮᱥᱟ ᱞᱮᱱ ᱦᱟᱥᱟ ᱫᱷᱩᱲᱤ ᱨᱮ
ᱵᱟᱧᱪᱟᱶ ᱰᱟᱦᱟᱨ ᱫᱚ ᱢᱤᱫᱴᱟᱹᱝ ᱜᱮ ᱛᱟᱦᱮᱸ ᱞᱮᱱ ᱾
ᱩᱭᱦᱟᱹᱨ ᱦᱤᱡᱩᱜ ᱠᱟᱱᱟ
ᱦᱟᱡᱟᱨᱼ ᱦᱟᱡᱟᱨ ᱦᱚᱲᱟᱜ ᱡᱤᱶᱤ ᱪᱟᱞᱟᱣ ᱞᱮᱱ
ᱱᱚᱣᱟ ᱫᱤᱥᱚᱢ ᱥᱟᱹᱫᱷᱤᱱ ᱨᱮ
ᱵᱤᱨ ᱦᱩᱞᱜᱟᱹᱨᱤᱭᱟᱹ ᱠᱚᱣᱟᱜ ᱢᱟᱭᱟᱢ ᱪᱮᱛᱟᱱ ᱨᱮ
ᱱᱟᱜᱟᱢ ᱠᱷᱚᱫᱟ ᱞᱮᱱ ᱾
ᱟᱢ ᱦᱚᱸ ᱠᱟᱱᱟᱢ ᱵᱤᱨ ᱢᱟᱭᱟᱢ ᱤᱛᱟᱹ
ᱩᱭᱦᱟᱹᱨ ᱢᱮᱥᱮ ᱱᱟᱜᱟᱢ ᱵᱮᱱᱟᱶ ᱢᱮᱥᱮ ᱟᱜᱟᱢ
ᱥᱮᱪᱮᱫ ᱥᱤᱠᱱᱟᱹᱛ ᱢᱩᱨᱟᱹᱭ ᱵᱟ:ᱫᱤ ᱠᱮᱴᱮᱡᱽ ᱢᱮᱥᱮ
ᱥᱟᱹᱨᱤᱭᱟᱜ ᱢᱚᱱ ᱛᱮ ᱯᱟᱸᱡᱟᱭ ᱢᱮᱥᱮ ᱥᱟᱹᱜᱩᱱ ᱦᱚᱨ ᱰᱟᱦᱟᱨ ᱾
***
