ᱥᱮᱨᱢᱟ ᱥᱮᱫ ᱤᱧ ᱠᱚᱭᱚᱜ ᱞᱮᱫᱼᱟ
ᱧᱮᱞᱟᱹᱧ ᱦᱮᱸᱫᱮ ᱨᱤᱢᱤᱞ
ᱛᱤᱢᱤᱱ ᱨᱮᱪᱚᱝ ᱨᱟᱠᱟᱵ ᱟᱠᱟᱱ
ᱢᱟᱥᱮ ᱦᱮᱸᱫᱮ ᱨᱤᱢᱤᱞ ᱾
ᱜᱩᱨᱞᱟᱹ ᱜᱩᱨᱞᱤ ᱥᱮᱴᱮᱨᱮᱱ
ᱦᱚᱭ ᱟᱛᱮ ᱫᱟᱜ ᱫᱚ
ᱵᱤᱡᱽᱞᱤ ᱵᱤᱞᱤᱫ ᱡᱷᱟᱞᱠᱟᱣ ᱟᱛᱮ
ᱦᱩᱰᱩᱨ ᱥᱟᱰᱮ ᱫᱚ ᱾
ᱦᱟᱴᱟᱜ ᱛᱮ ᱟᱨᱮᱡᱽ ᱞᱮᱠᱟ
ᱫᱟᱜ ᱮ ᱡᱚᱨᱚ ᱠᱮᱫ
ᱩᱞᱟᱹᱴ ᱠᱟᱪᱟᱲ ᱫᱟᱨᱮ ᱱᱟᱹᱲᱤ
ᱦᱚᱭ ᱛᱮ ᱞᱟᱣᱮᱨ ᱠᱮᱫ ᱾
ᱦᱮᱸᱫᱮ ᱨᱤᱢᱤᱞ ᱜᱩᱲ ᱜᱩᱲ
ᱥᱟᱰᱮ ᱫᱚ ᱛᱟᱠᱮᱨᱮᱱ
ᱟᱸᱡᱚᱢ ᱛᱚᱨᱟ ᱱᱚᱣᱟ ᱢᱚᱱᱮ
ᱟᱹᱰᱤ ᱜᱮ ᱵᱚᱛᱚᱨᱮᱱ ᱾
ᱦᱩᱰᱩᱨ ᱥᱟᱰᱮ ᱫᱚ ᱛᱟᱨᱠᱚ ᱛᱟᱹᱠᱤᱡᱚᱜ
ᱫᱷᱟᱹᱨᱛᱤ ᱜᱚᱴᱟᱢ ᱫᱩᱞ ᱫᱩᱞᱟᱹᱣ
ᱚᱛᱮ ᱥᱮᱨᱢᱟ ᱯᱚᱥᱟᱜᱚᱜ ᱞᱮᱠᱟ
ᱢᱚᱱᱮᱢ ᱵᱩᱡᱷᱟᱹᱣ ᱾
ᱵᱮᱲᱟ ᱛᱟᱨᱟᱥ ᱮᱥᱮᱫ ᱮᱱᱟ
ᱨᱟᱦᱟᱞᱟ ᱨᱤᱢᱤᱞ ᱛᱮ
ᱫᱷᱟᱹᱨᱛᱤ ᱜᱚᱴᱟ ᱧᱩᱛᱟᱹᱛ ᱮᱱᱟ
ᱦᱮᱸᱫᱮ ᱨᱤᱢᱤᱞ ᱛᱮ ᱾
ᱚᱲᱟᱜ ᱫᱩᱣᱟᱹᱨ ᱚᱡᱷᱚᱨ ᱡᱷᱚᱵᱚᱨ
ᱜᱚᱴᱟ ᱞᱚᱦᱚᱫ ᱮᱱ
ᱦᱟᱴᱟᱜ ᱰᱟᱹᱞᱤᱡ ᱴᱷᱮᱠᱟ ᱡᱚᱱᱚᱜ
ᱡᱷᱚᱛᱚ ᱚᱴᱟᱝ ᱮᱱ ᱾
ᱡᱚᱛᱚᱱ ᱞᱤᱫᱟᱹᱧ ᱚᱲᱟᱜ ᱫᱩᱣᱟᱹᱨ
ᱰᱤᱧ ᱰᱟᱹᱵᱩᱨᱮᱱ
ᱵᱷᱤᱛ ᱯᱤᱸᱰᱟᱹ ᱡᱮᱨᱮᱲ ᱯᱚᱛᱟᱣ
ᱞᱮᱻᱞᱤᱰᱩᱨᱮᱱ ᱾
ᱠᱩᱞᱦᱤ ᱫᱷᱟᱨᱮ ᱩᱥᱩᱞ ᱯᱤᱸᱰᱟᱹ
ᱞᱟᱸᱫᱩᱲ ᱪᱟᱵᱟᱭᱮᱱ
ᱪᱷᱟᱴᱠᱟ ᱨᱟᱪᱟ ᱜᱚᱴᱟ ᱞᱚᱥᱚᱫ ᱛᱮ
ᱜᱟᱰᱮ ᱵᱟᱰᱮᱭᱮᱱ ᱾
ᱦᱟᱭᱨᱮ ᱱᱚᱣᱟ ᱦᱮᱸᱫᱮ ᱨᱤᱢᱤᱞ
ᱟᱹᱰᱤᱢ ᱱᱤᱨᱢᱟᱭᱟ
ᱛᱤᱨᱮᱢ ᱦᱚᱭ ᱛᱤᱨᱮᱢ ᱫᱟᱜᱽ
ᱟᱢ ᱜᱮᱢ ᱵᱟᱰᱟᱭᱟ ᱾
ᱜᱩᱨᱞᱟᱹᱣ ᱟᱛᱮᱢ ᱥᱮᱴᱮᱨᱚᱜ
ᱵᱟᱹᱱᱩᱜ ᱛᱟᱢᱟ ᱫᱟᱭᱟ ᱢᱟᱭᱟ
ᱢᱚᱦᱰᱟ ᱨᱮ ᱡᱟᱜᱮᱢ ᱧᱟᱢ
ᱡᱷᱚᱛᱚᱢ ᱡᱷᱤᱛᱤ ᱵᱤᱛᱤᱭᱟ ᱾
ᱢᱟᱥᱮ ᱟᱢ ᱫᱚ ᱦᱮᱸᱫᱮ ᱨᱤᱢᱤᱞ
ᱪᱮᱫ ᱤᱧ ᱢᱮᱛᱟᱢᱟ
ᱢᱟᱱᱟ ᱵᱟᱫᱷᱟ ᱵᱟᱪᱚᱠ ᱵᱟᱨᱚᱱ
ᱮᱠᱟᱞ ᱵᱟᱪᱚᱢ ᱟᱸᱡᱚᱢᱟ ᱾
ᱥᱟᱹᱨᱤ ᱜᱮ ᱟᱢ ᱫᱚ ᱥᱮᱨᱢᱟ ᱪᱮᱛᱟᱱ
ᱩᱰᱟᱹᱣ ᱨᱤᱢᱤᱞ
ᱛᱤᱢᱤᱱ ᱠᱚᱨᱮ ᱪᱚ ᱨᱩᱯᱮᱢ ᱵᱚᱫᱚᱞ
ᱟᱢ ᱜᱮ ᱦᱮᱸᱫᱮ ᱨᱤᱢᱤᱞ ᱾᱾
***
