ᱯᱟᱱᱛᱮ ᱮᱫ ᱟᱹᱧ ᱚᱲᱟᱜ ᱨᱮ ᱨᱟᱪᱟᱨᱮ
ᱩᱠᱩᱨᱤᱡ ᱵᱟᱝ ᱠᱷᱚᱱ ᱵᱟᱝ ᱜᱮ ᱧᱮᱞᱚᱜ ᱠᱟᱱ
ᱯᱟᱞᱮᱱ ᱜᱮᱡ ᱜᱩᱨᱤᱡ ᱛᱮ ᱤᱧᱟᱜ ᱱᱚᱡᱚᱨ ᱴᱤᱠᱞᱤ
ᱛᱤᱥ ᱨᱮᱪᱚ ᱜᱩᱨᱤᱡ ᱢᱟᱞᱚᱴᱮᱱ ᱾
ᱯᱟᱪᱮᱫ ᱚᱠᱟᱨᱮ ᱛᱷᱟᱹᱨᱤ, ᱵᱟᱹᱴᱤ, ᱜᱤᱱᱟᱹᱛᱮ
ᱦᱟᱹᱨᱩᱵ ᱮᱥᱮᱫ ᱟᱠᱟᱱ ᱯᱟᱞᱮᱱᱚᱜ
ᱛᱷᱟᱹᱨᱤᱼᱵᱟᱹᱴᱤᱼᱜᱤᱱᱟᱹᱼᱞᱚᱴᱟ ᱡᱚᱛᱚᱹᱧ ᱚᱴᱟᱜ ᱚᱪᱚᱜ ᱠᱮᱫ
ᱮᱱ ᱦᱚᱸ ᱛᱚ ᱵᱟᱝ ᱜᱮ ᱧᱟᱢ ᱞᱮᱱ ᱾
ᱯᱟᱱᱛᱮ ᱮᱫᱼᱟᱹᱧ ᱠᱩᱞᱦᱤᱼᱪᱷᱟᱴᱠᱟᱼᱰᱟᱦᱟᱨ ᱨᱮ
ᱵᱟᱪᱚ ᱵᱟᱝ ᱜᱮ ᱧᱮᱞ ᱧᱟᱢᱚᱜ ᱠᱟᱱ
ᱯᱟᱞᱮᱱ ᱜᱩᱨᱞᱟᱹ ᱜᱩᱨᱞᱤ ᱦᱚᱭ ᱵᱟᱹᱨᱰᱩ ᱛᱮ
ᱚᱠᱟ ᱥᱮᱫ ᱪᱚ ᱜᱩᱨᱞᱟᱹᱣ ᱚᱴᱟᱝ ᱮᱱ ᱾
ᱯᱟᱪᱮ ᱪᱚ ᱚᱠᱟᱨᱮ ᱠᱩᱞᱦᱤ ᱰᱟᱦᱟᱨ ᱫᱷᱩᱲᱤ ᱨᱮ
ᱛᱚᱯᱟ ᱩᱱᱩᱢ ᱟᱠᱟᱱ ᱯᱟᱞᱮᱱᱚᱜ
ᱜᱚᱴᱟ ᱰᱟᱦᱟᱨ ᱫᱷᱩᱲᱤᱧ ᱩᱨᱞᱟᱹᱣ ᱟᱹᱪᱩᱨ ᱠᱮᱫᱼᱟ
ᱮᱱ ᱦᱚᱸ ᱵᱟᱝ ᱜᱮᱹᱧ ᱧᱟᱢ ᱞᱮᱫᱼᱟ ᱾
ᱯᱟᱱᱛᱮ ᱮᱫ ᱟᱹᱧ ᱵᱩᱨᱩ ᱫᱷᱤᱨᱤ ᱦᱩᱴᱩᱵ ᱨᱮ
ᱱᱚᱰᱮ ᱦᱚᱸ ᱵᱟᱝ ᱜᱮ ᱧᱮᱞ ᱧᱟᱢᱚᱜ ᱠᱟᱱ
ᱚᱠᱟ ᱨᱤᱢᱤᱞ ᱡᱷᱚᱢᱚᱨ ᱡᱟᱹᱲᱤ ᱫᱟᱜ ᱛᱮ ᱯᱟᱞᱮᱱ
ᱛᱤᱥ ᱨᱮᱪᱚ ᱞᱚᱦᱚᱫ ᱞᱚᱴᱚᱢᱮᱱ ᱾
ᱯᱟᱪᱮ ᱪᱚ ᱫᱷᱤᱨᱤᱼᱫᱟᱨᱮᱼᱨᱮᱦᱮᱫ ᱪᱤᱨᱤᱫ ᱥᱟᱠᱟᱢ ᱞᱟᱛᱟᱨ ᱨᱮ
ᱥᱚᱲᱚ ᱥᱚᱜᱮ ᱟᱠᱟᱱᱟ ᱯᱟᱞᱮᱱᱚᱜ
ᱩᱭᱩᱝ ᱟᱹᱪᱩᱨ ᱠᱮᱫ ᱟᱹᱧ ᱚᱴᱟᱜ ᱟᱹᱪᱩᱨ ᱠᱮᱫ ᱟᱹᱧ
ᱮᱱ ᱦᱚᱸ ᱵᱟᱝ ᱜᱮᱹᱧ ᱧᱟᱢ ᱞᱮᱫ ᱾
ᱯᱟᱱᱛᱮ ᱮᱫᱼᱟᱹᱧ ᱱᱟᱹᱭ ᱱᱟᱞᱟ ᱜᱟᱰᱟ ᱵᱟᱹᱞᱤ ᱨᱮ
ᱵᱟᱝ ᱠᱷᱚᱱ ᱵᱟᱭ ᱧᱮᱞ ᱧᱟᱢᱚᱜ ᱠᱟᱱ
ᱟᱥᱟᱲ ᱡᱟᱹᱲᱤ ᱵᱚᱰᱮ ᱵᱟᱱ ᱫᱟᱜ ᱛᱮ ᱯᱟᱞᱮᱱ
ᱚᱠᱟ ᱥᱮᱫ ᱪᱚᱭ ᱵᱚᱦᱮᱞ ᱤᱫᱤ ᱠᱮᱫ ᱾
ᱯᱟᱪᱮ ᱪᱚ ᱚᱠᱟᱨᱮ ᱜᱟᱰᱟ ᱟᱲᱮᱨᱮ ᱨᱟᱲ ᱞᱟᱛᱟᱨ ᱨᱮ
ᱡᱷᱟᱹᱞᱤ ᱛᱟᱹᱯᱩᱜ ᱟᱠᱟᱱ ᱯᱟᱞᱮᱱᱚᱜ
ᱦᱟᱛᱣᱟ ᱟᱹᱪᱩᱨ ᱠᱮᱫ ᱟᱹᱧ ᱫᱷᱤᱨᱤ ᱨᱟᱲ ᱥᱟᱦᱟ ᱠᱟᱛᱮ
ᱮᱱ ᱦᱚᱸ ᱵᱟᱝ ᱜᱮᱹᱧ ᱧᱟᱢ ᱞᱮᱫ ᱾
ᱚᱲᱟᱜ ᱨᱮ, ᱨᱟᱪᱟ ᱪᱷᱟᱴᱠᱟ ᱨᱮ ᱠᱩᱞᱦᱤ ᱰᱟᱦᱟᱨ ᱫᱷᱩᱲᱤ ᱨᱮ
ᱟᱨ ᱦᱚᱸ ᱵᱩᱨᱩ ᱦᱟᱨᱟ ᱨᱮ ᱱᱟᱹᱭ ᱱᱟᱞᱟ ᱨᱮ
ᱫᱷᱟᱹᱶᱲᱟ ᱫᱷᱟᱹᱶᱲᱤ ᱜᱚᱴᱟᱧ ᱯᱟᱱᱛᱮ ᱟᱹᱪᱩᱨ ᱠᱮᱫᱼᱟ
ᱮᱱ ᱦᱚᱸ ᱵᱟᱝ ᱜᱮᱹᱧ ᱧᱟᱢ ᱞᱮᱫ ᱾
ᱢᱟᱢᱚ ᱚᱲᱟᱜ ᱥᱮᱱᱚᱜ ᱟᱸᱡᱚᱢ ᱛᱤᱭᱩᱜ ᱞᱮᱠᱷᱟᱱ
ᱜᱤᱫᱽᱨᱟᱹ ᱢᱚᱱᱮ ᱟᱹᱰᱤ ᱦᱚᱨᱚᱵᱚᱨᱚ ᱨᱮ
ᱢᱤᱫ ᱫᱤᱱ ᱢᱟᱬᱟᱝ ᱠᱷᱚᱱᱟᱜ ᱫᱤᱱ ᱟᱹᱣᱨᱤ ᱠᱷᱚᱱ ᱜᱮ
ᱦᱟᱱᱟ ᱱᱚᱣᱟ ᱢᱚᱱᱮ ᱫᱚᱭ ᱵᱟᱠᱷᱮᱬᱟ ᱾
ᱢᱤᱫ ᱯᱟᱛᱟ ᱦᱮᱡ ᱛᱮ ᱟᱭᱳᱭ ᱴᱤᱠᱞᱤ ᱞᱤᱫᱤᱧ
ᱟᱞᱮ ᱚᱲᱟᱜ ᱛᱟᱞᱟ ᱨᱟᱪᱟᱨᱮ
ᱟᱹᱛᱩ ᱵᱟᱦᱮᱨ ᱨᱮ ᱵᱟᱵᱟ ᱛᱤᱸᱜᱩ ᱫᱚᱦᱚ ᱠᱟᱛᱮ
ᱛᱷᱩᱢ ᱮ ᱛᱷᱟᱯᱚ ᱟᱹᱫᱤᱧ ᱵᱚᱦᱚᱜ ᱨᱮ ᱾
ᱵᱟᱵᱟ ᱡᱟᱸᱜᱟ ᱫᱷᱩᱲᱤ ᱟᱭᱳᱣᱟᱜ ᱦᱮᱸᱫᱮ ᱴᱤᱠᱞᱤ (ᱪᱮᱞᱟᱝ ᱦᱮᱸᱫᱮ)
ᱛᱟᱦᱮᱸᱱ ᱤᱧᱟᱜ ᱱᱚᱡᱚᱨ ᱴᱤᱠᱞᱤ
ᱛᱤᱱᱟᱹᱝ ᱜᱚᱨᱚᱡᱽ ᱛᱮ ᱠᱤᱱ ᱞᱟᱜᱟᱣ ᱟᱹᱫᱤᱧ ᱪᱚᱝ ᱛᱟᱦᱮᱸᱫ
ᱟᱹᱠᱤᱱᱟᱜ ᱥᱟᱡᱟᱣ ᱥᱟᱯᱲᱟᱣ ᱵᱟᱹᱜᱤ ᱠᱟᱛᱮ ᱾
ᱚᱠᱚᱭ ᱤᱧ ᱢᱮᱛᱟ ᱟᱭᱟ ᱚᱠᱚᱭ ᱯᱟᱱᱛᱮ ᱟᱹᱜᱩ ᱟᱹᱧᱟᱭ
ᱱᱚᱣᱟ ᱩᱭᱦᱟᱹᱨ ᱛᱮ ᱤᱧ ᱢᱟᱹᱧ ᱢᱩᱞᱤᱱ ᱮᱱ
ᱴᱟᱴᱠᱟ ᱜᱮ ᱜᱚᱴᱟ ᱦᱚᱲᱢᱚ ᱥᱤᱢᱡᱤᱞ ᱮᱱᱟ
ᱦᱚᱭᱟᱜ ᱦᱤᱥᱤᱫ ᱨᱮᱭᱟᱲ ᱡᱚᱴᱮᱫ ᱛᱮ ᱾
ᱥᱩᱸᱼᱥᱩᱸ ᱥᱟᱰᱮ ᱟᱛᱮ ᱜᱷᱚᱭᱞᱮ ᱟᱹᱪᱩᱨ ᱮᱱᱟᱭ
ᱡᱮᱢᱚᱱ ᱩᱱᱤ ᱞᱟᱹᱭᱟᱹᱧ ᱠᱟᱱᱟᱭ
ᱦᱟᱸᱰᱮ ᱱᱷᱟᱰᱮ ᱟᱞᱚᱢ ᱯᱟᱱᱛᱮ ᱟᱹᱪᱩᱨ ᱞᱤᱧᱟ
ᱢᱮᱱᱟᱜ ᱞᱤᱧᱟ ᱟᱢ ᱠᱷᱚᱱ ᱫᱟᱱᱟᱝ ᱨᱮ ᱮᱱ ᱦᱚᱸ ᱥᱟᱶᱨᱮ ᱾
***
