ᱦᱟᱴᱼᱵᱟᱡᱟᱨ ᱨᱮ ᱥᱟᱭᱟ ᱥᱟᱹᱲᱤ
ᱦᱤᱨᱤᱡ ᱯᱟᱹᱥᱤᱨ ᱵᱚᱱ ᱵᱟᱪᱷᱟᱣ,
ᱥᱩᱱᱩᱢᱼ ᱥᱟᱹᱵᱩᱱ, ᱠᱨᱤᱢᱼᱯᱟᱣᱰᱟᱨ
ᱦᱟᱛᱟᱣ ᱞᱟᱹᱜᱤᱫ ᱫᱚᱠᱟᱱ ᱦᱚᱸ ᱵᱚᱱ ᱵᱟᱪᱷᱟᱣ ᱿
ᱚᱠᱟ ᱚᱡᱚᱜ ᱛᱮ ᱮᱥᱮᱞ ᱜᱮ ᱧᱮᱞᱚᱜ
ᱚᱠᱟᱴᱟᱜ ᱵᱟᱸᱫᱮ ᱛᱮᱫᱚ ᱪᱚᱨᱚᱠ ᱧᱮᱞᱚᱜ,
ᱵᱟᱪᱷᱟᱣ ᱵᱟᱪᱷᱟᱣ ᱛᱮ ᱵᱚᱦᱚᱜ ᱩᱵ
ᱯᱟᱞᱳ ᱪᱟᱵᱟᱜ, ᱠᱟᱞᱟᱨ ᱠᱟᱛᱮᱫ ᱫᱟᱯᱟᱞ ᱟᱵᱚ
ᱡᱮᱢᱚᱱ ᱟᱞᱚ ᱧᱮᱞᱚᱜ ᱾
ᱦᱚᱨᱚᱜ ᱼ ᱵᱟᱸᱫᱮ ᱵᱟᱪᱷᱟᱣ ᱞᱮᱠᱟ
ᱢᱟᱹᱱᱢᱤ ᱦᱚᱸ ᱵᱚᱱ ᱵᱟᱪᱷᱟᱣ ᱠᱚᱣᱟ,
ᱮᱥᱮᱞᱼᱩᱥᱩᱞ, ᱦᱮᱸᱫᱮᱼᱠᱷᱟᱴᱚ, ᱦᱚᱲᱢᱚ ᱨᱮᱭᱟᱜ
ᱜᱚᱲᱦᱚᱱ ᱦᱚᱸ ᱩᱭᱩᱝᱼᱪᱩᱸᱰᱩᱜ ᱵᱚᱱ ᱧᱮᱞ ᱛᱟᱠᱚᱣᱟ ᱾
ᱢᱮᱫᱦᱟ ᱧᱮᱞ ᱛᱮᱜᱮ ᱠᱚ ᱩᱨᱩᱢᱚᱜᱼᱟ,
ᱚᱠᱚᱭᱟᱜ ᱢᱚᱱᱮᱨᱮ ᱪᱮᱫ ᱢᱮᱱᱟᱜᱼᱟ ?
ᱠᱟᱛᱷᱟ ᱟᱹᱣᱨᱤ ᱟᱸᱡᱚᱢ ᱯᱩᱨᱟᱹᱣ ᱛᱮᱜᱮ
ᱟᱹᱛᱷᱟᱹᱣᱲᱤ ᱜᱮᱵᱚᱱ ᱨᱟᱯᱟᱪᱟᱜᱚᱜᱼᱟ ᱿
ᱡᱟᱦᱟᱸᱭᱟᱜ ᱡᱟᱹᱥᱛᱤ ᱠᱟᱹᱣᱰᱤ ᱢᱮᱱᱟᱜ ᱛᱟᱭ
ᱩᱱᱤ ᱜᱮ ᱢᱚᱡᱮ ᱦᱚᱨᱚᱜᱼᱵᱟᱸᱫᱮᱜ,
ᱩᱱᱤ ᱜᱮ ᱪᱚ ᱱᱟᱯᱟᱭ ᱦᱚᱲ ᱫᱚ,
ᱜᱚᱨᱚᱵᱽ ᱜᱚᱨᱚᱵᱽ ᱠᱟᱛᱷᱟ ᱦᱚᱸ ᱛᱟᱭ
ᱪᱤᱱᱤ ᱞᱟᱹᱰᱩ ᱞᱮᱠᱟ ᱦᱮᱲᱮᱢ ᱫᱚ,
ᱚᱱᱠᱟᱱ ᱦᱚᱲᱟᱜ ᱵᱮᱵᱷᱟᱨ ᱦᱚᱸ ᱟᱹᱰᱤ ᱜᱚᱱᱚᱝ ᱫᱚ ᱿
ᱟᱨ ᱡᱟᱦᱟᱸᱭ ᱦᱚᱲᱟᱜ ᱵᱟᱹᱱᱩᱜ ᱛᱟᱭᱟ
ᱵᱟᱺᱫᱤ ᱯᱮᱨᱮᱡ ᱦᱩᱲᱩ ᱼᱪᱟᱣᱞᱮ,
ᱵᱟᱹᱱᱩᱜ ᱛᱟᱭᱟ ᱡᱟᱹᱥᱛᱤ ᱠᱟᱹᱣᱰᱤ ᱟᱨ
ᱵᱟᱹᱱᱩᱜ ᱛᱟᱭ ᱯᱟᱠᱟ ᱫᱚᱞᱟᱱ,
ᱢᱮᱱᱟᱜ ᱛᱟᱭᱟ ᱱᱟᱯᱟᱭ ᱵᱮᱵᱷᱟᱨ,
ᱥᱩᱞᱩᱠᱼᱱᱤᱨᱟᱹᱭ ᱛᱮ ᱛᱟᱸᱦᱮᱱᱟᱭ,
ᱥᱤᱵᱤᱞ ᱥᱤᱵᱤᱞ ᱨᱚᱲ ᱞᱟᱸᱫᱟᱛᱟᱭ
ᱢᱚᱱᱮᱨᱮ ᱵᱟᱝ ᱠᱩᱥᱤ ᱜᱮ ᱵᱩᱡᱷᱟᱹᱣᱚᱜ ᱿
ᱱᱟᱣᱟ ᱯᱮᱲᱟ ᱧᱮᱞᱼᱧᱮᱯᱮᱞ ᱨᱮ
ᱛᱤᱱᱟᱹᱜ ᱜᱮ ᱫᱚ ᱠᱚ ᱠᱩᱠᱞᱤᱭᱟ ?
ᱢᱚᱱᱮ ᱦᱩᱭᱩᱜᱼᱟ ᱠᱚᱞᱮᱡᱽ ᱨᱮᱭᱟᱜ ᱵᱤᱱᱤᱰ
ᱚᱱᱟ ᱠᱷᱚᱱ ᱦᱚᱸ ᱟᱹᱰᱤ ᱥᱚᱞᱦᱮ ᱜᱮᱭᱟ,
ᱵᱟᱯᱞᱟ ᱢᱟᱲᱟᱝ ᱨᱩᱯ ᱠᱚ ᱯᱟᱸᱡᱟᱭ
ᱵᱟᱯᱞᱟ ᱛᱟᱭᱚᱢ ᱫᱚ ᱜᱩᱱ ᱠᱚ ᱯᱟᱸᱡᱟᱭ
ᱡᱟᱶᱟᱭ ᱦᱚᱸ ᱠᱚ ᱯᱟᱱᱛᱮ ᱠᱚᱣᱟ
ᱚᱠᱚᱭ ᱚᱠᱟᱴᱟᱜ ᱪᱟᱹᱠᱨᱤ ᱨᱮ ᱢᱮᱱᱟᱭ ?
ᱟᱵᱚ ᱢᱟᱹᱱᱢᱤ ᱚᱠᱚᱭᱮ ᱵᱩᱡᱷᱟᱹᱣ ᱟᱵᱚᱱ
ᱥᱟᱱᱟᱢ ᱢᱟᱹᱱᱢᱤ ᱫᱚ ᱵᱟᱝ ᱵᱚᱱ ᱢᱤᱫ ᱜᱮᱭᱟ,
ᱢᱤᱫ ᱞᱮᱠᱟ ᱢᱚᱱᱮᱼᱡᱤᱣᱤ ᱫᱚ
ᱛᱤᱥ ᱦᱚᱸ ᱵᱟᱝ ᱵᱚᱱ ᱦᱩᱭᱩᱜᱼᱟ ᱿
***
