ᱟᱹᱰᱤ ᱫᱤᱱ ᱛᱟᱭᱚᱢ ᱨᱮᱱᱟᱜ ᱠᱟᱛᱷᱟ ᱾ ᱢᱤᱫ ᱫᱤᱱ ᱜᱚᱲᱚᱢ ᱦᱟᱲᱟᱢ ᱛᱤᱨᱤᱞ ᱵᱤᱞᱤ ᱛᱤᱭᱩᱜ ᱮ ᱥᱮᱱ ᱞᱮᱱᱟ ᱵᱤᱨ ᱛᱮ ᱾ ᱢᱤᱫ ᱛᱤᱨᱤᱞ ᱫᱟᱨᱮ ᱨᱮ ᱟᱹᱰᱤᱜᱟᱱ ᱛᱤᱨᱤᱞ ᱡᱚ ᱵᱤᱞᱤ ᱟᱠᱟᱱᱟ ᱾ ᱜᱚᱲᱚᱢ ᱦᱟᱲᱟᱢ ᱛᱤᱨᱤᱞ ᱫᱟᱨᱮ ᱨᱮᱭ ᱫᱮᱡ ᱮᱱᱛᱮ, ᱰᱟᱹᱨ ᱮ ᱦᱤᱞᱟᱹᱣ ᱠᱮᱫᱼᱟ ᱾
ᱵᱤᱞᱤ ᱛᱤᱨᱤᱞ ᱟᱹᱰᱤᱜᱟᱱ ᱧᱩᱨ ᱮᱱᱟ ᱾ ᱜᱚᱲᱚᱢ ᱦᱟᱲᱟᱢ ᱛᱤᱨᱤᱞ ᱫᱟᱨᱮ ᱠᱷᱚᱱ ᱮ ᱟᱬᱜᱚ ᱮᱱᱛᱮ ᱛᱤᱨᱤᱞ ᱮ ᱦᱟᱞᱟᱝ ᱮᱫ ᱛᱟᱦᱮᱸᱫ ᱾ ᱤᱱᱟᱹ ᱚᱠᱛᱚ ᱨᱮ ᱢᱤᱫᱴᱟᱹᱝ ᱵᱟᱱᱟ, ᱜᱚᱲᱚᱢ ᱦᱟᱲᱟᱢ ᱥᱮᱫ ᱜᱮ ᱫᱟᱹᱲ ᱠᱟᱛᱮᱭ ᱦᱤᱡᱩᱜ ᱠᱟᱱᱟ ᱾
ᱜᱚᱲᱚᱢ ᱦᱟᱲᱟᱢ ᱵᱟᱱᱟ ᱧᱮᱞ ᱠᱟᱛᱮ ᱟᱹᱰᱤ ᱡᱩᱨ ᱵᱚᱛᱚᱨ ᱮ ᱵᱩᱡᱷᱟᱹᱣ ᱠᱮᱫᱼᱟ ᱾ ᱢᱮᱱᱠᱷᱟᱱ ᱥᱟᱦᱟᱥ ᱠᱟᱛᱮ ᱵᱟᱱᱟ ᱥᱟᱞᱟᱜ ᱮ ᱞᱟᱹᱰᱷᱟᱹᱭ ᱠᱮᱫᱼᱟ ᱾ ᱵᱟᱱᱟ ᱫᱟᱹᱲ ᱦᱮᱡ ᱠᱟᱛᱮ ᱜᱚᱲᱚᱢ ᱦᱟᱲᱟᱢ ᱟᱜ ᱦᱚᱴᱚᱜ ᱨᱮᱭ ᱡᱮᱸᱵᱮᱫ ᱜᱚᱫᱚᱜᱼᱟ ᱢᱮᱱᱛᱮ ᱜᱚᱲᱚᱢ ᱦᱟᱲᱟᱢ ᱵᱟᱱᱟ ᱟᱜ ᱠᱟᱴᱟ ᱥᱟᱵ ᱠᱟᱛᱮᱭ ᱴᱷᱮᱞᱟᱣ ᱫᱟᱨᱟᱢ ᱠᱮᱫᱮᱭᱟ ᱾ ᱵᱟᱱᱟ ᱥᱟᱞᱟᱜ ᱟᱹᱰᱤ ᱜᱷᱟᱹᱲᱤᱠ ᱮ ᱛᱟᱯᱟᱢ ᱮᱱᱟ ᱾ ᱵᱟᱱᱟ ᱛᱤᱨᱤᱞ ᱫᱟᱨᱮ ᱥᱮᱫ ᱮ ᱜᱚᱦᱚᱲ ᱟᱹᱜᱩ ᱠᱮᱫᱮ ᱛᱮ ᱛᱤᱨᱤᱞ ᱫᱟᱨᱮ ᱨᱮ ᱵᱟᱱᱟ ᱟᱜ ᱵᱟᱨᱭᱟ ᱠᱟᱴᱟ ᱦᱟᱱᱛᱮ ᱱᱷᱟᱛᱮ ᱯᱟᱨᱚᱢ ᱠᱟᱛᱮ ᱠᱷᱩᱵ ᱮ ᱨᱟᱸᱡᱟᱣ ᱠᱮᱫᱮᱭᱟ ᱾
ᱨᱟᱸᱡᱟᱣ ᱨᱟᱸᱡᱟᱣ ᱛᱮ ᱵᱟᱱᱟ ᱫᱚᱭ ᱜᱚᱡ ᱠᱮᱫᱮᱭᱟ ᱾
ᱜᱚᱲᱚᱢ ᱦᱟᱲᱟᱢ ᱦᱚᱸ ᱦᱚᱲᱢᱚ ᱨᱮ ᱱᱟᱥᱮᱭ ᱠᱷᱩᱵᱽᱨᱟᱹᱣ ᱮᱱᱟ ᱾ ᱛᱤᱨᱤᱞ ᱵᱤᱞᱤ ᱦᱟᱞᱟᱝ ᱠᱟᱛᱮ ᱜᱚᱲᱚᱢ ᱦᱟᱲᱟᱢ ᱫᱚ ᱚᱲᱟᱜ ᱛᱮᱭ ᱦᱮᱡ ᱮᱱᱟ ᱾
***
