ᱠᱚᱨᱳᱱᱟ ᱠᱟᱲ ᱨᱮ ᱟᱭᱳ ᱟᱲᱟᱝ ᱤᱼᱯᱟᱛᱷᱟᱢ ᱵᱮᱨᱮᱫ ᱮᱱ ᱛᱟᱭᱚᱢ ᱟᱹᱰᱤ ᱜᱟᱱ ᱥᱟᱱᱛᱟᱲ ᱠᱩᱲᱤ ᱚᱱᱚᱞᱤᱭᱟᱹ ᱠᱚᱜᱮ ᱡᱚᱯᱚᱲᱟᱣ ᱨᱮᱠᱚ ᱦᱮᱡ ᱮᱱᱟ ᱾ ᱠᱚᱨᱳᱱᱟ ᱞᱮᱠᱟᱱ ᱢᱟᱨᱟᱝ ᱟᱡᱟᱨ ᱠᱷᱟᱹᱛᱤᱨ ᱡᱮᱜᱮᱛ ᱨᱮᱱᱟᱜ ᱥᱟᱱᱟᱢ ᱞᱮᱠᱟᱱ ᱠᱟᱹᱢᱤᱦᱚᱨᱟ ᱠᱚᱜᱮ ᱚᱲᱟᱜ ᱨᱮ ᱛᱟᱦᱮᱸ ᱠᱟᱛᱮ ᱳᱱᱞᱤᱱᱮ ᱠᱚᱛᱮ ᱛᱚᱨᱟᱣ ᱮᱛᱚᱦᱚᱵ ᱮᱱᱟ ᱾ ᱥᱟᱶᱛᱟ ᱨᱮᱱᱟᱜ ᱜᱟᱞᱚᱪ, ᱥᱟᱶᱦᱮᱫ ᱪᱟᱨᱪᱟ ᱮᱢᱟᱱ ᱠᱚᱦᱚᱸ ᱳᱱᱞᱤᱱᱮ ᱛᱮ ᱟᱹᱰᱤ ᱜᱮ ᱡᱩᱨᱥᱩᱨ ᱪᱟᱞᱟᱣ ᱮᱱᱟ ᱾
ᱱᱚᱝᱠᱟᱱ ᱵᱮᱲᱟᱨᱮ ᱟᱭᱳ ᱟᱲᱟᱝ ᱤᱼᱯᱟᱛᱷᱟᱢ ᱦᱚᱛᱮᱛᱮ ᱡᱩᱦᱩᱲᱟᱹᱣ ᱨᱮᱠᱚ ᱦᱮᱡ ᱟᱠᱟᱱ ᱠᱩᱲᱤ ᱚᱱᱚᱞᱤᱭᱟᱹ ᱠᱚᱦᱚᱸ ᱳᱱᱞᱤᱱᱮ ᱛᱮ ᱥᱟᱶᱦᱮᱫ ᱪᱟᱨᱪᱟ ᱨᱮᱱᱟᱜ ᱠᱚ ᱴᱷᱟᱹᱣᱠᱟᱹ ᱜᱚᱴᱟ ᱠᱮᱫᱼᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱒᱖ᱼ᱑᱒ᱼ᱒᱐᱒᱐ ᱦᱤᱞᱚᱜ ᱯᱩᱭᱞᱩ ᱟᱭᱳ ᱟᱲᱟᱝ ᱣᱮᱵᱽᱞᱟᱹᱭᱤᱱ ᱥᱟᱶᱦᱮᱫ ᱟᱠᱷᱲᱟ ᱠᱚ ᱥᱟᱯᱲᱟᱣ ᱞᱮᱫᱼᱟ ᱾ ᱡᱟᱦᱟᱸᱨᱮ ᱜᱟᱹᱠᱷᱩᱲ ᱠᱩᱲᱤ ᱚᱱᱚᱞᱤᱭᱟᱹ ᱥᱟᱶ ᱥᱟᱶᱛᱮ ᱱᱟᱶᱟ ᱜᱮᱠᱚ ᱮᱛᱚᱦᱚᱵ ᱟᱠᱟᱫ ᱚᱱᱚᱞᱤᱭᱟᱹ ᱠᱩᱲᱤ ᱠᱚᱦᱚᱸ ᱡᱚᱛᱚ ᱛᱮ ᱑᱙ ᱦᱚᱲ ᱠᱩᱲᱤ ᱚᱱᱚᱞᱤᱭᱟᱹ ᱠᱚ ᱥᱟᱶᱦᱮᱫ ᱜᱟᱞᱚᱪ ᱨᱮᱠᱚ ᱥᱮᱞᱮᱫ ᱞᱮᱱᱟ ᱾ ᱱᱚᱝᱠᱟ ᱜᱮ ᱤᱱᱟᱹ ᱛᱟᱭᱚᱢ ᱦᱚᱸ ᱡᱚᱛᱚ ᱪᱟᱸᱫᱚ ᱨᱮᱱᱟᱜ ᱯᱩᱱᱟᱜ ᱧᱩᱦᱩᱢ ᱢᱟᱦᱟᱸᱨᱮ ᱣᱮᱵᱽᱞᱟᱹᱭᱤᱱ ᱥᱟᱶᱦᱮᱫ ᱟᱠᱷᱲᱟ ᱠᱚ ᱛᱚᱨᱟᱣ ᱤᱫᱤ ᱠᱮᱫᱼᱟ ᱾
ᱟᱵᱚ ᱥᱟᱶᱛᱟ ᱨᱮ ᱧᱮᱞ ᱟᱠᱟᱱᱟ, ᱥᱟᱶᱦᱮᱫ ᱜᱟᱞᱚᱪ ᱞᱟᱹᱜᱤᱫ ᱠᱩᱲᱤ ᱚᱱᱚᱞᱤᱭᱟᱹ ᱠᱚ ᱟᱠᱚ ᱛᱮᱠᱚ ᱵᱮᱨᱮᱫ ᱨᱟᱠᱟᱵ ᱦᱮᱡ ᱟᱠᱟᱱ ᱨᱮᱦᱚᱸ ᱥᱟᱶᱦᱮᱫ ᱟᱠᱷᱲᱟ ᱨᱮᱫᱚ ᱥᱟᱶᱦᱮᱫ ᱜᱟᱞᱚᱪ ᱞᱟᱹᱜᱤᱫ ᱵᱟᱹᱲᱛᱤ ᱫᱟᱣ ᱵᱟᱠᱚ ᱧᱟᱢ ᱟᱠᱟᱫᱼᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱠᱩᱲᱤ ᱠᱚᱣᱟᱜ ᱥᱟᱶᱦᱮᱫ ᱦᱩᱱᱟᱹᱨ ᱫᱚ ᱫᱟᱱᱟᱝ ᱨᱮᱜᱮ ᱛᱟᱦᱮᱸ ᱫᱚᱦᱚᱜᱼᱟ ᱾ ᱤᱠᱷᱟᱹᱱ ᱟᱭᱳ ᱟᱲᱟᱝ ᱫᱚ ᱢᱤᱫᱴᱟᱹᱝ ᱱᱚᱝᱠᱟᱱ ᱥᱟᱶᱦᱮᱫ ᱟᱠᱷᱲᱟ ᱥᱟᱯᱲᱟᱣ ᱮᱱᱟ, ᱡᱟᱦᱟᱸ ᱨᱮᱫᱚ ᱟᱹᱰᱤᱜᱟᱱ ᱠᱩᱲᱤ ᱚᱱᱚᱞᱤᱭᱟᱹ ᱠᱚᱜᱮ ᱟᱠᱚᱣᱟᱜ ᱥᱟᱶᱦᱮᱫ ᱦᱩᱱᱟᱹᱨ ᱡᱷᱤᱡ ᱢᱮᱞᱟᱝᱠᱤ ᱨᱮ ᱥᱚᱫᱚᱨ ᱥᱟᱢᱟᱝ ᱨᱮᱱᱟᱜ ᱫᱟᱣ ᱠᱚ ᱧᱟᱢ ᱠᱮᱫᱼᱟ ᱾ ᱒᱐ ᱦᱚᱲ ᱠᱩᱲᱤ ᱚᱱᱚᱞᱤᱭᱟᱹ ᱛᱮ ᱮᱛᱚᱦᱚᱵ ᱞᱮᱱ ᱣᱮᱵᱽᱞᱟᱹᱭᱤᱱ ᱥᱟᱶᱦᱮᱫ ᱟᱠᱷᱲᱟ, ᱛᱮᱦᱮᱧ ᱫᱚ ᱱᱚᱶᱟ ᱨᱮ ᱥᱟᱭ ᱠᱷᱚᱱ ᱦᱚᱸ ᱵᱟᱹᱲᱛᱤ ᱠᱩᱲᱤ ᱚᱱᱚᱞᱤᱭᱟᱹ ᱵᱚᱱ ᱧᱟᱢ ᱫᱟᱲᱮᱭᱟ ᱠᱚᱣᱟ ᱾
ᱚᱱᱟ ᱠᱚ ᱨᱮᱱᱟᱜ ᱡᱷᱚᱞᱚᱠ ᱜᱮ ᱞᱟᱛᱟᱨ ᱥᱟᱦᱴᱟ ᱨᱮ ᱱᱟᱥᱮ ᱵᱚᱱ ᱧᱮᱞᱟ ᱺᱼ
