ᱟᱹᱰᱤ ᱫᱤᱱ ᱨᱮᱱᱟᱜ ᱠᱟᱛᱷᱟ ᱾ ᱡᱚᱡᱚᱰᱤᱦᱤ ᱨᱮ ᱢᱤᱫ ᱢᱟᱛᱷᱚ ᱥᱚᱸᱰᱷᱚᱭ ᱛᱟᱦᱮᱸ ᱠᱟᱱᱟ ᱾ ᱡᱟᱦᱟᱸᱭᱟᱜ ᱵᱟᱲᱜᱮ ᱨᱮᱭ ᱵᱚᱞᱚᱱ ᱠᱷᱟᱱ ᱩᱱᱤ ᱥᱚᱸᱰᱷᱚ ᱞᱟᱜᱟ ᱚᱰᱚᱠ ᱵᱟᱢ ᱫᱟᱲᱮ ᱟᱭᱟ ᱾ ᱢᱤᱫ ᱫᱤᱱ ᱫᱚ ᱱᱚᱝᱠᱟ ᱜᱮ ᱨᱮᱱᱴᱟ ᱛᱮᱠᱚᱣᱟᱜ ᱵᱟᱲᱜᱮ ᱨᱮᱭ ᱵᱚᱞᱚ ᱟᱠᱟᱱ ᱛᱮ ᱵᱮᱸᱜᱟᱲ, ᱯᱩᱨᱟᱹᱭ ᱦᱟᱱᱟ ᱱᱷᱟᱣᱟ ᱟᱱᱟᱡᱽ ᱠᱚ ᱡᱚᱢ ᱠᱟᱛᱮ ᱟᱠᱚᱣᱟᱜ ᱠᱷᱟᱹᱨᱟᱹᱭ ᱨᱮᱭ ᱵᱩᱨᱩᱢ ᱟᱠᱟᱱᱟ ᱾
ᱨᱮᱱᱴᱟ ᱢᱟ ᱟᱹᱰᱤ ᱨᱟᱹᱜᱤᱭ ᱵᱩᱡᱷᱟᱹᱣᱮᱫᱼᱟ ᱾ ᱫᱟᱞ ᱵᱟᱲᱟ ᱠᱮᱫᱮᱭᱟᱭ ᱮᱱ ᱨᱮᱦᱚᱸ ᱵᱟᱭ ᱥᱟᱦᱟ ᱞᱮᱱᱟ ᱾ ᱨᱮᱱᱴᱟ ᱵᱚᱦᱚᱜ ᱨᱮ ᱢᱤᱫ ᱵᱩᱫᱷᱤ ᱦᱮᱡ ᱮᱱᱟ ᱾ ᱢᱤᱫᱴᱟᱹᱝ ᱵᱩᱛᱩᱞ ᱨᱮ ᱜᱩᱰᱤᱭ ᱥᱟᱸᱵᱟᱣ ᱠᱮᱫᱼᱟ ᱟᱨ ᱵᱩᱛᱩᱞ ᱨᱮᱭᱟᱜ ᱴᱷᱤᱯᱤᱭ ᱩᱨᱤᱡ ᱠᱮᱫ ᱛᱮ ᱥᱚᱸᱰᱷᱚᱣᱟᱜ ᱪᱟᱭᱞᱚᱢ ᱨᱮᱭ ᱛᱚᱞ ᱠᱮᱫᱼᱟ ᱾ ᱥᱚᱸᱰᱷᱚ ᱢᱟᱭ ᱵᱩᱨᱩᱢ ᱟᱠᱟᱱᱟ ᱟᱹᱰᱤ ᱟᱨᱟᱢ ᱜᱮ, ᱢᱤᱼᱢᱤᱫ ᱥᱚᱢᱚᱭ ᱪᱟᱭᱞᱚᱢ ᱮ ᱦᱤᱞᱟᱹᱣ ᱮᱫᱼᱟ ᱾ ᱪᱟᱭᱞᱚᱢ ᱦᱤᱞᱟᱹᱣ ᱚᱠᱛᱚ ᱵᱩᱛᱩᱞ ᱨᱮᱱᱟᱜ ᱜᱩᱰᱤ ᱢᱟ ᱨᱚᱜᱚᱲ ᱨᱚᱜᱚᱲ ᱥᱟᱰᱮ ᱮᱱᱟ ᱾ ᱩᱱᱤ ᱥᱚᱸᱰᱷᱚ ᱢᱟ ᱪᱮᱫ ᱞᱮᱠᱟ ᱪᱚᱭ ᱵᱩᱡᱷᱟᱹᱣ ᱠᱮᱫᱼᱟ ᱾ ᱪᱟᱭᱞᱚᱢ ᱛᱩᱞ ᱠᱟᱛᱮᱭ ᱫᱟᱹᱲ ᱵᱮᱨᱮᱫ ᱮᱱᱟ ᱾
ᱡᱚᱠᱷᱚᱱ ᱜᱮ ᱪᱟᱭᱞᱚᱢ ᱮ ᱦᱤᱞᱟᱹᱣ ᱮᱫᱼᱟ ᱟᱨ ᱦᱚᱸ ᱥᱟᱰᱮ ᱠᱟᱱᱟ ᱾ ᱮᱱᱠᱷᱟᱱ ᱢᱟ ᱫᱚᱢᱮᱭ ᱫᱟᱹᱲ ᱠᱮᱫᱼᱟ ᱟᱨ ᱪᱟᱭᱞᱚᱢ ᱢᱟ ᱛᱩᱞ ᱨᱮᱜᱮᱭ ᱫᱚᱦᱚ ᱠᱮᱫᱼᱟ ᱟᱨ ᱦᱚᱦᱚ ᱟᱫᱮ ᱨᱮᱦᱚᱸ ᱵᱟᱭ ᱛᱤᱸᱜᱩ ᱞᱮᱱᱟ ᱾ ᱤᱱ ᱦᱤᱞᱚᱜ ᱠᱷᱚᱱ ᱟᱨ ᱚᱱᱟ ᱡᱚᱡᱚᱰᱤᱦᱤ ᱟᱹᱛᱩ ᱨᱮ ᱟᱨ ᱚᱱᱟ ᱥᱩᱨ ᱥᱩᱯᱩᱨ ᱟᱹᱛᱩ ᱨᱮᱦᱚᱸ ᱩᱱᱤ ᱥᱚᱸᱰᱷᱚ ᱫᱚ ᱟᱫᱚ ᱵᱟᱭ ᱦᱤᱡᱩᱜ ᱠᱟᱱᱟ ᱾ ᱚᱠᱟ ᱥᱮᱫ ᱡᱮ ᱫᱟᱹᱲ ᱠᱮᱫ ᱟᱭ ᱩᱱᱤ ᱥᱚᱸᱰᱷᱚ ᱫᱚ, ᱧᱮᱞ ᱦᱚᱸ ᱵᱟᱭ ᱧᱮᱞ ᱧᱟᱢᱚᱜ ᱠᱟᱱᱟ ᱾
***
