ᱵᱟᱹᱨᱩ ᱜᱷᱩᱴᱩ ᱟᱹᱛᱩ ᱨᱮᱱᱟᱜ ᱢᱤᱫᱴᱟᱹᱝ ᱜᱷᱚᱴᱚᱱ ᱾ ᱢᱤᱫ ᱵᱤᱨ ᱦᱟᱹᱛᱤ ᱟᱨ ᱩᱫᱽᱢᱟᱹᱥᱟᱸᱰ ᱟᱜ ᱜᱷᱚᱴᱚᱱ ᱠᱟᱱᱟ ᱾
ᱵᱟᱹᱭᱥᱟᱹᱠ ᱵᱚᱸᱜᱟ ᱥᱤᱛᱩᱝ ᱞᱚᱞᱚ ᱧᱩᱛᱟᱹᱛ ᱧᱤᱫᱟᱹ ᱾ ᱜᱟᱰᱟ ᱫᱷᱟᱨᱮ ᱥᱤᱛᱩᱝ ᱞᱚᱞᱚ ᱪᱟᱥ ᱟᱠᱟᱫ ᱛᱟᱦᱮᱸᱱ ᱠᱚ ᱪᱟᱹᱥᱤ ᱾ ᱚᱱᱟ ᱜᱟᱰᱟ ᱫᱷᱟᱨᱮ ᱪᱟᱥ ᱟᱠᱟᱫ ᱦᱳᱲᱳ ᱡᱚᱢ (ᱟᱹᱛᱤᱧ) ᱫᱤᱱᱟᱹᱢ ᱦᱤᱞᱚᱜ ᱜᱮ ᱩᱱᱤ ᱥᱟᱸᱰ ᱫᱚ ᱧᱤᱫᱟᱹ ᱚᱠᱛᱚᱭ ᱪᱟᱞᱟᱜ ᱛᱟᱦᱮᱸᱫ ᱾ ᱩᱱ ᱫᱚ ᱵᱟᱹᱫᱽ ᱠᱚᱨᱮ ᱠᱷᱚᱱ ᱥᱟᱱᱟᱢ ᱪᱟᱹᱥᱤ ᱟᱹᱛᱩ ᱚᱲᱟᱜ ᱥᱮᱫ ᱠᱚ ᱪᱟᱞᱟᱣ ᱪᱟᱵᱟᱜᱼᱟ ᱾ ᱚᱱᱠᱟ ᱜᱮ ᱡᱟᱣ ᱫᱤᱱ ᱞᱮᱠᱟ ᱵᱟᱹᱫᱽᱨᱮ ᱦᱳᱲᱳ ᱟᱹᱛᱤᱧ ᱨᱮᱭ ᱵᱟᱹᱭ ᱟᱠᱟᱱᱟ ᱾ ᱜᱟᱰᱟ ᱯᱟᱨᱚᱢ ᱵᱤᱨ ᱥᱮᱱ ᱠᱷᱚᱱ ᱢᱤᱫᱴᱟᱹᱝ ᱦᱟᱹᱛᱤ ᱫᱚᱭ ᱦᱤᱡᱩᱜ ᱠᱟᱱ ᱛᱟᱦᱮᱸᱫ ᱾ ᱜᱟᱰᱟ ᱫᱟᱜᱨᱮ ᱪᱷᱟᱯᱚᱞ ᱪᱷᱟᱯᱚᱞ, ᱪᱩᱵᱷᱩᱨ ᱪᱩᱵᱷᱩᱨ ᱥᱟᱰᱮ ᱥᱟᱸᱰ ᱫᱚᱭ ᱟᱸᱡᱚᱢ ᱧᱟᱢ ᱠᱮᱫᱼᱟ ᱾ ᱮᱱᱠᱷᱟᱱ ᱟᱹᱰᱤ ᱟᱸᱴ ᱨᱟᱹᱜᱤ ᱛᱮᱭ ᱦᱚᱸᱠᱟ ᱮᱫ ᱛᱟᱦᱮᱸᱱ ᱾ ᱥᱟᱸᱰ ᱫᱚ ᱵᱟᱭ ᱫᱤᱥᱟᱹ ᱞᱮᱫᱼᱟ ᱪᱤᱞᱤ ᱠᱟᱱᱟᱭ ᱢᱮᱱᱛᱮ ᱾ ᱦᱳᱲᱳ ᱟᱹᱛᱤᱧ ᱨᱮᱜᱮᱭ ᱵᱟᱹᱭ ᱪᱟᱵᱟ ᱟᱠᱟᱱᱟ ᱾ ᱦᱟᱹᱛᱤ ᱫᱚ ᱥᱟᱸᱰ ᱥᱩᱨ ᱥᱮᱫ ᱜᱮᱭ ᱦᱮᱡ ᱥᱮᱴᱮᱨ ᱮᱱᱟ ᱾ ᱥᱟᱢᱟᱝ ᱥᱟᱢᱟᱝ ᱡᱚᱠᱷᱚᱱ ᱥᱟᱸᱰ ᱮ ᱠᱚᱭᱚᱜ ᱧᱮᱞ ᱧᱟᱢ ᱠᱮᱫᱮ ᱠᱷᱟᱱ ᱥᱟᱸᱰ ᱫᱚ ᱵᱚᱛᱚᱨ ᱥᱟᱛᱞᱟᱜ ᱪᱩᱯᱤ ᱛᱩᱞ ᱠᱟᱛᱮᱭ ᱫᱟᱹᱲ ᱠᱮᱫᱼᱟ ᱾
ᱦᱟᱹᱛᱤ ᱦᱚᱸ ᱥᱟᱸᱰ ᱛᱟᱭᱚᱢ ᱛᱟᱭᱚᱢ ᱛᱮᱭ ᱠᱩᱫᱟᱹᱣ ᱤᱫᱤ ᱠᱮᱫᱮᱭᱟ ᱾ ᱵᱟᱹᱨᱩ ᱜᱷᱩᱴᱩ ᱟᱹᱛᱩ ᱛᱟᱞᱟ ᱠᱤᱱ ᱵᱚᱞᱚ ᱪᱟᱞᱟᱣ ᱮᱱᱟ ᱥᱟᱸᱰ ᱟᱨ ᱦᱟᱹᱛᱤ ᱾ ᱥᱟᱸᱰ ᱫᱚ ᱵᱚᱛᱚᱨ ᱥᱟᱛᱞᱟᱜ ᱦᱟᱸᱰᱮ ᱱᱷᱟᱰᱮ ᱩᱠᱩ ᱡᱚᱝ ᱞᱟᱹᱜᱤᱫ ᱫᱤᱥᱟᱹ ᱡᱚᱝ ᱠᱟᱱᱟᱭ ᱟᱨ ᱦᱟᱹᱛᱤ ᱦᱚᱸ ᱵᱟᱭ ᱵᱟᱹᱜᱤ ᱟᱭ ᱠᱟᱱᱟ ᱾
ᱥᱩᱨᱟᱹᱭ ᱠᱤᱥᱠᱩ ᱚᱲᱟᱜ ᱢᱮᱞᱟ ᱠᱷᱩᱸᱫᱽᱲᱤ ᱨᱮ ᱥᱟᱸᱰ ᱫᱚᱭ ᱥᱚᱜᱮ ᱛᱷᱤᱨ ᱮᱱᱟ ᱾ ᱥᱩᱨᱟᱹᱭ ᱦᱟᱲᱟᱢ ᱟᱨ ᱵᱩᱰᱷᱤ ᱮᱱᱮ ᱜᱮ ᱠᱤᱱ ᱡᱟᱹᱯᱤᱫ ᱟᱠᱟᱫ ᱛᱟᱦᱮᱸᱫ ᱾ ᱦᱟᱥᱟ ᱠᱟᱸᱛ ᱵᱩᱥᱩᱵ ᱛᱮ ᱫᱟᱞᱚᱵ ᱚᱲᱟᱜ ᱠᱩᱰᱟᱹᱢ ᱯᱟᱦᱴᱟ ᱥᱮᱫ ᱨᱟᱴ ᱨᱟᱴ ᱥᱟᱰᱮ ᱠᱟᱱᱟ ᱾ ᱵᱟᱹᱭ ᱵᱟᱹᱭ ᱛᱮ ᱥᱟᱰᱮ ᱦᱚᱸ ᱵᱟᱹᱲᱛᱤ ᱤᱫᱤ ᱮᱱᱟ ᱾ ᱥᱟᱰᱮ ᱟᱸᱡᱚᱢ ᱠᱟᱛᱮ ᱥᱩᱨᱟᱹᱭ ᱵᱩᱰᱷᱤ ᱫᱚ ᱦᱟᱲᱟᱢ ᱛᱟᱭ ᱮ ᱦᱚᱦᱚ ᱟᱫᱮᱭᱟ ᱾ ᱵᱮᱨᱮᱫ ᱠᱟᱛᱮ ᱵᱩᱰᱷᱤ ᱫᱚ ᱰᱤᱵᱽᱨᱤ ᱢᱟᱨᱥᱟᱞ ᱡᱮᱨᱮᱫ ᱠᱟᱛᱮ ᱠᱤᱱ ᱠᱚᱭᱚᱜ ᱟᱹᱪᱩᱨᱟ ᱾ ᱥᱟᱹᱲᱤᱢ ᱚᱲᱟᱜ ᱪᱟᱞ ᱢᱟ ᱫᱚᱞᱚᱵ ᱫᱚᱞᱚᱵ ᱞᱟᱲᱟᱣᱜ ᱠᱟᱱᱟ ᱾ ᱵᱟᱹᱭ ᱵᱟᱹᱭ ᱛᱮ ᱠᱩᱰᱟᱹᱢ ᱥᱮᱱ ᱠᱷᱚᱱ ᱠᱷᱟᱹᱨᱟᱹᱭ ᱥᱮᱫ ᱜᱮ ᱠᱚᱸᱡᱮ ᱞᱤᱰᱩᱨ ᱪᱟᱞᱟᱜ ᱠᱟᱱᱟ ᱾ ᱵᱚᱛᱚᱨ ᱥᱟᱛᱞᱟᱜ ᱛᱷᱟᱨᱛᱷᱟᱨᱟᱣ ᱟᱛᱮ ᱚᱛᱟ ᱛᱟᱵᱮᱨ ᱠᱟᱛᱮ ᱥᱤᱞᱯᱤᱧ ᱠᱚ ᱴᱷᱮᱞᱟᱣ ᱥᱟᱦᱟ ᱠᱟᱛᱮ ᱥᱚᱦᱚᱨ ᱚᱰᱚᱠ ᱮᱱᱟ ᱠᱤᱱ ᱚᱲᱟᱜ ᱵᱷᱤᱛᱤᱨ ᱠᱷᱚᱱ ᱾ ᱵᱟᱦᱨᱮ ᱚᱰᱚᱠ ᱠᱟᱛᱮ ᱫᱚᱢᱮ ᱜᱟᱨᱡᱟᱣ ᱟᱛᱮ ᱠᱤᱱ ᱟᱸᱫᱚᱲ ᱪᱟᱵᱟ ᱠᱮᱫᱼᱟ ᱾ ᱮᱱᱠᱷᱟᱱ ᱩᱱᱠᱤᱱᱟᱜ ᱦᱩᱨᱤ ᱵᱤᱠᱚᱞ ᱦᱚᱦᱚ ᱟᱸᱡᱚᱢ ᱠᱟᱛᱮ ᱥᱩᱨ ᱥᱩᱯᱩᱨ ᱚᱲᱟᱜ ᱠᱚ ᱨᱤᱱ ᱦᱚᱲ ᱫᱚ ᱴᱚᱨᱪ ᱢᱟᱨᱥᱟᱞ ᱟᱛᱮ ᱥᱩᱨᱟᱹᱭ ᱦᱟᱲᱟᱢ ᱚᱲᱟᱜ ᱥᱮᱫ ᱠᱚ ᱪᱟᱞᱟᱣ ᱤᱫᱤ ᱮᱱᱟ ᱾ ᱧᱮᱞᱮᱭᱟ ᱫᱚ ᱠᱚ ᱢᱤᱫᱴᱟᱹᱝ ᱦᱟᱹᱛᱤ ᱠᱩᱰᱟᱹᱢ ᱥᱮᱫ ᱠᱷᱚᱱ ᱚᱲᱟᱜ ᱪᱟᱞ ᱫᱚᱭ ᱴᱷᱮᱞᱟᱣ ᱥᱟᱦᱟ ᱟᱠᱟᱫᱼᱟ ᱾ ᱦᱟᱥᱟ ᱠᱟᱸᱛ ᱚᱲᱟᱜ ᱵᱷᱤᱛᱨᱤ ᱵᱚᱥᱛᱟ ᱦᱳᱲᱳ ᱡᱚᱡᱚᱢ ᱮ ᱪᱷᱩᱴᱟᱹᱣ ᱟᱠᱟᱱᱟ ᱾
ᱟᱹᱛᱩ ᱥᱟᱱᱟᱢ ᱦᱚᱲ ᱦᱩᱨᱤ ᱠᱟᱛᱮ ᱦᱚᱸ ᱵᱟᱝ ᱜᱮᱭ ᱥᱟᱦᱟᱜ ᱠᱟᱱᱟ ᱾ ᱮᱱᱠᱷᱟᱱ ᱠᱚᱲᱟ ᱠᱚ ᱡᱷᱟᱹᱞ ᱢᱟᱫ ᱰᱟᱝ ᱨᱮ ᱚᱲᱮᱡ ᱜᱮᱸᱫᱽᱨᱟᱜ ᱛᱚᱞ ᱠᱟᱛᱮ ᱠᱮᱨᱟᱥᱤᱱ ᱢᱚᱵᱮᱞ ᱥᱩᱱᱩᱢ ᱫᱩᱞ ᱞᱚᱦᱚᱫ ᱠᱟᱛᱮ ᱢᱚᱥᱟᱞ ᱡᱩᱞ ᱠᱟᱛᱮ ᱠᱚ ᱞᱟᱜᱟ ᱥᱟᱦᱟ ᱠᱮᱫᱮᱭᱟ ᱾ ᱪᱟᱞᱟᱜ ᱚᱠᱛᱚ ᱵᱟᱨᱭᱟ ᱦᱳᱲᱳ ᱵᱚᱥᱛᱟ ᱫᱚ ᱫᱮᱭᱟ ᱨᱮ ᱞᱟᱫᱮ ᱠᱟᱛᱮ ᱵᱤᱨ ᱥᱮᱫ ᱜᱮ ᱵᱟᱹᱭ ᱵᱟᱹᱭ ᱛᱮᱭ ᱛᱟᱲᱟᱢ ᱤᱫᱤ ᱠᱮᱫᱼᱟ ᱾ ᱟᱹᱛᱩ ᱦᱚᱲ ᱠᱚᱦᱚᱸ ᱛᱟᱭᱚᱢ ᱛᱟᱭᱚᱢ ᱛᱮᱠᱚ ᱯᱟᱸᱡᱟ ᱤᱫᱤ ᱠᱮᱫᱮᱭᱟ ᱾ ᱦᱟᱹᱛᱤ ᱫᱚ ᱵᱤᱨ ᱥᱮᱫ ᱮ ᱵᱚᱞᱚ ᱮᱱᱟ ᱮᱱᱠᱷᱟᱱ ᱟᱹᱛᱩ ᱦᱚᱲ ᱦᱚᱸᱠᱚ ᱨᱩᱣᱟᱹᱲ ᱦᱮᱡ ᱮᱱᱟ ᱾ ᱟᱨ ᱩᱱᱤ ᱥᱟᱸᱰ ᱫᱚ ᱚᱱᱟ ᱟᱹᱛᱩ ᱠᱷᱚᱱ ᱚᱠᱟ ᱥᱮᱫ ᱡᱮᱭ ᱪᱟᱞᱟᱣ ᱮᱱᱟ ᱚᱠᱚᱭ ᱦᱚᱸ ᱵᱟᱠᱚ ᱯᱟᱸᱡᱟ ᱧᱟᱢ ᱫᱟᱲᱮᱭᱟ ᱫᱮᱭᱟ ᱾
ᱟᱹᱛᱩ ᱦᱚᱲ ᱯᱷᱚᱨᱮᱥᱴ ᱵᱟᱞᱟ ᱠᱚ ᱵᱟᱰᱟᱭ ᱚᱪᱚ ᱠᱮᱫ ᱠᱚᱣᱟ ᱯᱷᱚᱨᱮᱥᱴ ᱨᱤᱱ ᱦᱚᱲ ᱦᱮᱡ ᱠᱟᱛᱮ ᱟᱹᱛᱩ ᱨᱤᱱ ᱠᱚ ᱠᱷᱤᱛᱤ ᱟᱠᱟᱱ ᱦᱚᱲ ᱠᱚᱫᱚ ᱥᱚᱨᱠᱟᱨ ᱴᱷᱮᱱ ᱠᱷᱚᱱ ᱠᱷᱤᱛᱤ ᱯᱩᱨᱩᱱ ᱠᱚ ᱧᱟᱢ ᱠᱮᱫᱼᱟ ᱾
