ᱢᱤᱫ ᱫᱤᱱ ᱟᱞᱮ ᱟᱹᱛᱩ ᱨᱤᱱᱤᱡ ᱛᱮᱧᱟᱝ ᱮ ᱦᱮᱡ ᱟᱠᱟᱱᱟ ᱟᱞᱮ ᱚᱲᱟᱜ ᱛᱮ ᱾ ᱟᱞᱮᱭᱟᱜ ᱩᱞ ᱫᱟᱨᱮ ᱥᱮᱱ ᱠᱚᱭᱚᱜ ᱠᱟᱛᱮ ᱤᱧᱤᱧ ᱢᱮᱱ ᱠᱮᱫᱼᱟ, ᱛᱮᱧᱟᱝ ! ᱟᱞᱮᱭᱟᱜ ᱩᱞ ᱫᱟᱨᱮ ᱨᱮ ᱟᱹᱰᱤ ᱢᱟᱨᱟᱝ ᱛᱮᱨᱚᱢ ᱠᱚ ᱪᱷᱟᱛᱟ ᱟᱠᱟᱫᱼᱟ ᱾ ᱛᱮᱧᱟᱝ ᱟᱹᱰᱤ ᱨᱟᱹᱥᱠᱟᱹ ᱠᱟᱛᱮᱭ ᱞᱟᱹᱭ ᱠᱮᱫᱼᱟ, ᱤᱧᱤᱧ ᱛᱤᱭᱩᱜ ᱟᱢᱟ ᱾ ᱤᱧᱤᱧ ᱞᱟᱹᱭ ᱠᱮᱫᱼᱟ, ᱥᱟᱹᱨᱤ ᱥᱮ ᱛᱮᱧᱟᱝ !
ᱛᱮᱧᱟᱝ ᱮ ᱞᱟᱹᱭ ᱠᱮᱫᱼᱟ, ᱟᱨᱮ ᱦᱚᱭ, ᱤᱧ ᱛᱤᱭᱩᱜ ᱤᱧ ᱵᱟᱰᱟᱭ ᱜᱮᱭᱟ ᱾ ᱤᱧᱤᱧ ᱞᱟᱹᱭ ᱠᱮᱫᱼᱟ ᱴᱷᱤᱠ ᱜᱮᱭᱟ, ᱡᱩᱫᱤ ᱛᱮᱨᱚᱢ ᱮᱢ ᱛᱤᱭᱩᱜ ᱠᱚᱣᱟ, ᱮᱱᱠᱷᱟᱱ ᱤᱧ ᱢᱤᱫ ᱨᱟᱱ ᱤᱧ ᱵᱟᱰᱟᱭᱟ ᱾ ᱟᱢ ᱡᱩᱫᱤᱢ ᱛᱤᱭᱩᱜ ᱠᱚᱣᱟ ᱮᱱᱠᱷᱟᱱ ᱚᱱᱟ ᱨᱟᱱ ᱫᱚ ᱟᱢᱟᱜ ᱦᱚᱲᱢᱚ ᱨᱮ ᱫᱚᱦᱚ ᱦᱩᱭ ᱟᱢᱟ ᱾ ᱛᱮᱧᱟᱝ ᱮ ᱞᱟᱹᱭ ᱠᱮᱫᱼᱟ, ᱴᱷᱤᱠ ᱜᱮᱭᱟ ᱾ ᱢᱮᱱᱠᱷᱟᱱ ᱢᱤᱫ ᱵᱩᱛᱩᱞ ᱯᱟᱹᱣᱨᱟᱹ ᱮᱢ ᱦᱩᱭᱩᱜ ᱛᱟᱢᱟ ᱾ ᱤᱧᱤᱧ ᱢᱮᱱ ᱠᱮᱫᱼᱟ, ᱯᱟᱹᱣᱨᱟᱹ ᱡᱩᱫᱤᱢ ᱧᱩᱭᱟ, ᱮᱱᱠᱷᱟᱱ ᱤᱧᱟᱜ ᱨᱟᱱ ᱵᱟᱭ ᱠᱟᱹᱢᱤᱭᱟ ᱾ ᱛᱮᱧᱟᱝ ᱤᱧᱟᱜ ᱠᱟᱛᱷᱟ ᱜᱮ ᱵᱟᱭ ᱟᱸᱡᱚᱢ ᱞᱮᱫᱼᱟ ᱾ ᱛᱮᱧᱟᱝ ᱮ ᱢᱮᱱ ᱠᱮᱫᱼᱟ, ᱤᱧ ᱯᱟᱹᱣᱨᱟᱹ ᱵᱚᱸᱜᱟ ᱠᱟᱛᱮ ᱫᱟᱨᱮᱧ ᱫᱮᱡᱚᱜᱼᱟ ᱾ ᱤᱧᱤᱧ ᱢᱚᱱᱮ ᱠᱚᱫᱼᱟ, ᱦᱩᱭ ᱠᱚᱜᱼᱟ ᱛᱮᱧᱟᱝ ᱨᱤᱱ ᱵᱚᱸᱜᱟ ᱠᱚ ᱢᱮᱱᱟᱜ ᱠᱚᱣᱟ ᱾ ᱤᱧᱤᱧ ᱨᱮᱵᱮᱱ ᱮᱱᱟ ᱾ ᱛᱮᱧᱟᱝ ᱤᱧ ᱢᱮᱛᱟ ᱟᱫᱮᱭᱟ, ᱴᱷᱤᱠ ᱜᱮᱭᱟ ᱛᱮᱧᱟᱝ ᱾
ᱯᱟᱹᱣᱨᱟᱹᱧ ᱟᱹᱜᱩ ᱟᱫᱮᱭᱟ ᱾ ᱟᱡ ᱯᱟᱹᱣᱨᱟᱹᱭ ᱵᱚᱸᱜᱟ ᱠᱮᱫᱼᱟ ᱟᱨ ᱮ ᱧᱩ ᱠᱮᱫᱼᱟ ᱾ ᱤᱧᱤᱧ ᱢᱮᱱ ᱠᱮᱫᱼᱟ, ᱛᱮᱧᱟᱝ, ᱤᱧᱟᱜ ᱨᱟᱱ ᱫᱚ ᱵᱟᱭ ᱠᱟᱹᱢᱤᱭᱟ ᱟᱫᱚ ᱾ ᱛᱮᱧᱟᱝ ᱮ ᱢᱮᱱ ᱠᱮᱫᱼᱟ, ᱟᱨᱮ ! ᱤᱧ ᱵᱚᱸᱜᱟ ᱠᱮᱫ ᱟᱹᱧ ᱛᱚ !!
ᱡᱤᱱᱥ ᱯᱮᱸᱴ, ᱦᱮᱞᱢᱮᱴ, ᱵᱩᱴ ᱡᱩᱛᱟᱹᱧ ᱦᱚᱨᱚᱜ ᱚᱪᱚ ᱠᱮᱫᱮᱭᱟ ᱾ ᱨᱟᱱ ᱦᱚᱸᱧ ᱮᱢᱟ ᱫᱮᱭᱟ ᱾ ᱵᱟᱹᱞᱴᱤ ᱟᱨ ᱫᱟᱛᱨᱚᱢ ᱦᱚᱸ ᱥᱟᱶᱨᱮ ᱮᱢ ᱦᱩᱭ ᱮᱱᱟ ᱾ ᱫᱟᱨᱮ ᱨᱮ ᱡᱚᱦᱟᱨ ᱠᱟᱛᱮᱭ ᱫᱮᱡ ᱮᱱᱟ ᱾ ᱛᱮᱨᱚᱢ ᱪᱷᱟᱛᱟ ᱥᱩᱨ ᱮ ᱥᱮᱴᱮᱨ ᱠᱮᱫᱼᱟ ᱾ ᱵᱟᱹᱭ ᱵᱟᱹᱭ ᱛᱮᱭ ᱜᱮᱫᱮᱫ ᱛᱟᱦᱮᱸᱫ ᱾ ᱩᱱᱠᱩ ᱛᱮᱨᱚᱢ ᱫᱚ ᱛᱮᱧᱟᱝ ᱪᱮᱛᱟᱱ ᱨᱮᱠᱚ ᱩᱰᱟᱹᱣ ᱟᱹᱪᱩᱨ ᱮᱱᱟ ᱾ ᱦᱚᱲᱢᱚ ᱠᱚᱨᱮ ᱠᱚ ᱴᱩᱸᱰᱟᱹᱝ ᱮᱱᱟ ᱾ ᱯᱮᱸᱴ ᱵᱷᱤᱛᱨᱤ ᱠᱚ ᱵᱚᱞᱚᱭᱮᱱᱟ ᱾ ᱦᱮᱞᱢᱮᱴ ᱵᱷᱤᱛᱨᱤ ᱠᱚᱨᱮ ᱦᱚᱸ ᱠᱚ ᱵᱚᱞᱚᱭᱮᱱ ᱛᱮ ᱟᱹᱰᱤ ᱠᱚ ᱜᱮᱨ ᱠᱮᱫᱮᱭᱟ ᱾ ᱛᱮᱧᱟᱝ ᱵᱟᱹᱞᱴᱤ ᱠᱚ ᱪᱟᱯᱟᱫ ᱜᱤᱰᱤ ᱠᱟᱛᱮ ᱫᱟᱨᱮ ᱠᱷᱚᱱ ᱮ ᱟᱬᱜᱚ ᱦᱮᱡ ᱮᱱᱟ ᱾ ᱛᱮᱨᱚᱢ ᱢᱟ ᱟᱡᱟᱜ ᱦᱚᱲᱢᱚ ᱜᱚᱴᱟ ᱠᱚ ᱜᱮᱨᱮ ᱠᱟᱱᱟ ᱾ ᱟᱬᱜᱚ ᱠᱟᱛᱮ ᱫᱚᱢᱮᱭ ᱫᱟᱹᱲ ᱠᱮᱫᱼᱟ ᱾ ᱛᱮᱨᱚᱢ ᱦᱚᱸᱠᱚ ᱞᱟᱜᱟ ᱠᱮᱫᱮᱭᱟ ᱾ ᱟᱹᱰᱤ ᱫᱩᱠ ᱜᱮᱭ ᱦᱚᱦᱚ ᱠᱮᱫᱼᱟ ᱵᱟᱧᱪᱟᱣ ᱤᱧ ᱯᱮ ᱾ ᱪᱮᱫ ᱤᱧ ᱪᱤᱠᱟᱹᱭᱟ ᱪᱮᱫ ᱦᱚᱸ ᱵᱟᱹᱧ ᱵᱷᱟᱹᱵᱤ ᱫᱟᱲᱮᱭᱟᱜ ᱠᱟᱱᱟ ᱾
ᱤᱧ ᱦᱚᱸ ᱨᱟᱜ ᱜᱮ ᱥᱟᱱᱟᱧ ᱠᱟᱱᱟ ᱾ ᱢᱤᱫᱴᱟᱹᱝ ᱵᱩᱥᱩᱵ ᱟᱨ ᱥᱮᱸᱜᱮᱞ ᱤᱫᱤ ᱠᱟᱛᱮ ᱤᱧ ᱦᱚᱸ ᱫᱟᱹᱲ ᱠᱮᱫ ᱟᱹᱧ ᱛᱮᱧᱟᱝ ᱥᱮᱱ ᱾
ᱛᱮᱧᱟᱝ ᱮ ᱜᱷᱚᱞᱴᱟᱣ ᱮᱱᱟ, ᱮᱱ ᱦᱚᱸ ᱛᱮᱨᱚᱢ ᱫᱚ ᱟᱡ ᱪᱮᱛᱟᱱ ᱨᱮᱠᱚ ᱢᱟᱰᱨᱟᱣ ᱟᱹᱪᱩᱨᱚᱜ ᱠᱟᱱ ᱜᱮᱭᱟ ᱾ ᱵᱩᱥᱩᱵ ᱵᱤᱸᱰᱟᱹᱨᱮ ᱥᱮᱸᱜᱮᱞ ᱫᱷᱚᱨᱟᱣ ᱠᱟᱛᱮ ᱟᱡ ᱥᱩᱨ ᱨᱮ ᱦᱩᱨᱞᱟᱹ ᱟᱹᱪᱩᱨ ᱦᱩᱭ ᱮᱱᱟ ᱾ ᱛᱮᱨᱚᱢ ᱠᱚ ᱥᱟᱦᱟ ᱮᱱᱟ ᱾ ᱛᱮᱧᱟᱝ ᱟᱜ ᱦᱚᱲᱢᱚ ᱠᱚᱨᱮ ᱥᱩᱸᱜᱟᱹ ᱠᱚ ᱯᱟᱹᱴᱤ ᱟᱠᱟᱫᱮᱭᱟ ᱾ ᱟᱹᱰᱤ ᱜᱮ ᱡᱚᱞᱟᱣ ᱮ ᱵᱩᱡᱷᱟᱹᱣᱮᱫᱼᱟ ᱾ ᱦᱚᱲᱢᱚ ᱠᱚ ᱯᱷᱩᱞᱟᱹᱣ ᱪᱟᱵᱟ ᱮᱱ ᱛᱟᱭᱟ ᱾ ᱚᱱᱟ ᱥᱩᱸᱜᱟᱹ ᱠᱚ ᱡᱚᱛᱚ ᱚᱰᱚᱠ ᱦᱩᱭ ᱮᱱᱟ ᱾ ᱛᱮᱨᱚᱢ ᱛᱩᱲ ᱫᱚ ᱵᱤᱥ ᱜᱮᱭᱟ, ᱨᱩᱣᱟᱹ ᱠᱚ ᱧᱟᱢ ᱠᱮᱫᱮᱭᱟ ᱾
ᱰᱟᱠᱛᱚᱨ ᱠᱚ ᱟᱹᱜᱩ ᱦᱩᱭ ᱮᱱᱟ ᱾ ᱵᱟᱹᱭ ᱵᱟᱹᱭ ᱛᱮᱭ ᱵᱩᱜᱤᱭᱮᱱᱟ ᱾ ᱛᱮᱨᱚᱢ ᱛᱤᱭᱩᱜ ᱵᱟᱝ ᱜᱟᱱ ᱞᱮᱱᱟ, ᱛᱮᱨᱚᱢ ᱡᱚᱛᱚ ᱫᱟᱨᱮ ᱠᱚ ᱨᱩᱣᱟᱹᱲ ᱮᱱᱟ ᱾
***
Ayoarang adi napay gharong kana . Ayoarang gharong re abo joto hod ge nana hunar mone katha bon Al sodor dareyah aa..adi khushi linj bujhao aa noaa gharong re seled kate .sanam ko ge adi ayam manot johar 🙏 🙏r dular💗💗🙏🙏
Ayma sarhao linj chal kegh aa alinj Ontar kacha kon khon R hon napay napay kahni ko agu abona bin mente alinja gahir aans