ᱥᱟᱢᱟᱞᱟ ᱦᱮᱸᱵᱽᱨᱚᱢ
ᱦᱩᱨᱩᱢ ᱰᱤᱜᱤᱨ ᱡᱩᱞ ᱨᱟᱠᱟᱵ ᱞᱮᱱᱟ
ᱦᱩᱞᱥᱟᱹᱭ ᱥᱮᱸᱜᱮᱞ ᱫᱚ ᱵᱟᱝ ᱜᱮ ᱤᱬᱤᱡᱚᱜ ᱠᱟᱱᱟ
ᱞᱟᱜᱟᱣ ᱞᱮᱫᱟ ᱠᱚ ᱩᱱᱠᱩ ᱯᱩᱸᱰ ᱦᱟᱨᱛᱟ ᱤᱝᱨᱮᱡᱽ ᱵᱟᱹᱭᱨᱤ
ᱵᱷᱟᱨᱚᱛ ᱫᱤᱥᱚᱢ ᱛᱟᱨᱟ ᱨᱮ ᱟᱠᱚᱣᱟᱜ ᱟᱹᱭᱫᱟᱹᱨ ᱠᱚ ᱡᱟᱹᱨᱤ ᱿
ᱞᱚᱵᱽ ᱞᱟᱞᱚᱪ ᱮᱲᱮ ᱵᱷᱩᱬᱩᱡ ᱦᱚᱲ ᱠᱚ ᱨᱤᱡᱷᱟᱹᱣ ᱠᱮ ᱠᱚ
ᱮᱲᱮ ᱵᱷᱩᱬᱩᱡ ᱦᱚᱲᱟᱜ ᱠᱟᱛᱷᱟ ᱛᱮᱫᱚ ᱨᱮᱵᱮᱱ ᱵᱟᱹᱱᱩᱜ ᱠᱚ
ᱟᱵᱚ ᱠᱷᱮᱨᱣᱟᱲ ᱠᱚᱫᱚ ᱢᱩᱨᱩᱠ ᱱᱟᱪᱟᱨ ᱨᱮᱦᱚᱸ
ᱩᱱᱠᱩᱣᱟᱜ ᱠᱟᱛᱷᱟ ᱫᱚ ᱵᱟᱝ ᱠᱚ ᱟᱸᱡᱚᱢᱟ ᱛᱤᱥ ᱦᱚᱸ ᱿
ᱥᱟᱱᱛᱟᱲ ᱠᱚ ᱪᱮᱛᱟᱱ ᱨᱚᱰᱚᱡ ᱠᱚᱪᱞᱚᱱ ᱫᱤᱱ ᱠᱮ ᱫᱤᱱ ᱵᱟᱹᱲᱛᱤᱭᱮᱱᱟ
ᱚᱱᱟ ᱧᱮᱞ ᱛᱮ ᱥᱤᱫᱩ ᱠᱟᱹᱱᱦᱩ ᱛᱷᱤᱨ ᱫᱚ ᱵᱟᱹᱠᱤᱱ ᱛᱟᱦᱮᱸ ᱞᱮᱱᱟ
ᱥᱟᱨᱡᱚᱢ ᱜᱤᱨᱟᱹ ᱛᱮ ᱫᱤᱥᱚᱢ ᱦᱚᱲ ᱠᱤᱱ ᱡᱟᱣᱨᱟ ᱠᱮ ᱠᱚ
ᱵᱷᱚᱜᱽᱱᱟᱹᱰᱤ ᱰᱟᱹᱦᱤᱨᱮ ᱥᱟᱭ ᱥᱟᱭ ᱦᱚᱲ ᱡᱟᱣᱨᱟᱭᱮᱱᱟ ᱠᱚ ᱿
ᱩᱱ ᱦᱤᱞᱚᱜ ᱫᱚ ᱛᱟᱦᱮᱸ ᱠᱟᱱᱟ ᱯᱮ ᱜᱮᱞ ᱡᱩᱱ
ᱥᱤᱫᱩ ᱠᱟᱹᱱᱦᱩ ᱪᱟᱸᱫᱽ ᱵᱷᱟᱭᱨᱚ ᱦᱩᱞᱥᱟᱹᱭ ᱠᱚ ᱢᱮᱱ
ᱟᱜ ᱥᱟᱨ ᱠᱟᱹᱯᱤ ᱛᱟᱨᱣᱟᱲᱮ ᱥᱟᱡᱟᱣ ᱠᱮᱫᱟ ᱠᱚ
ᱤᱝᱨᱮᱡᱽ ᱵᱟᱹᱭᱨᱤ ᱞᱟᱜᱟ ᱞᱟᱹᱜᱤᱫ ᱥᱟᱯᱲᱟᱣ ᱮᱱᱟ ᱠᱚ ᱿
ᱦᱩᱞᱥᱟᱹᱭ ᱟᱲᱟᱝ ᱜᱚᱴᱟ ᱨᱟᱹᱣᱨᱟᱹᱣ ᱮᱱ
ᱵᱟᱹᱭᱨᱤ ᱫᱚᱵᱚᱱ ᱞᱟᱜᱟ ᱠᱚᱣᱟ ᱟᱵᱚᱱᱟᱜ ᱫᱤᱥᱚᱢ ᱠᱷᱚᱱ
ᱨᱟᱹᱜᱤ ᱨᱟᱸᱜᱟᱣ ᱛᱟᱯᱟᱢ ᱛᱩᱯᱩᱫ ᱡᱤᱣᱤ ᱱᱟᱥᱟᱣ ᱮᱱᱟ
ᱵᱷᱟᱨᱚᱛ ᱫᱤᱥᱚᱢ ᱢᱟᱭᱟᱢ ᱛᱮ ᱜᱟᱵᱟᱣ ᱮᱱᱟ
ᱜᱟᱰᱟ ᱫᱟᱜ ᱞᱮᱠᱟ ᱥᱤᱧ ᱧᱤᱫᱟᱹ ᱢᱟᱭᱟᱢ ᱞᱤᱸᱜᱤ ᱮᱱ
ᱦᱩᱞᱥᱟᱹᱭ ᱥᱮᱸᱜᱮᱞ ᱫᱚ ᱵᱟᱹᱭ ᱵᱟᱹᱭᱛᱮ ᱦᱟᱹᱥᱩᱨᱮᱱ ᱾
***
