ᱫᱷᱟᱹᱨᱛᱤ ᱨᱮ ᱢᱮᱱᱟᱜ ᱵᱟᱦᱟ
ᱛᱤᱱᱟᱹᱜ ᱛᱤᱱᱟᱹᱜ ᱨᱩᱯᱟᱱ ᱵᱟᱦᱟ
ᱥᱟᱲ ᱟᱠᱟᱱ ᱯᱷᱩᱴᱟᱹᱣ ᱵᱟᱦᱟ
ᱰᱷᱟᱞ ᱟᱠᱟᱱ ᱰᱷᱟᱞᱠᱟ ᱵᱟᱦᱟ
ᱤᱠᱷᱟᱹᱱ ᱟᱢ ᱫᱚ ᱵᱚᱸᱜᱟ ᱵᱟᱦᱟ
ᱠᱟᱱᱟᱢ ᱥᱟᱨᱡᱚᱢ ᱵᱟᱦᱟ ᱾
ᱰᱟᱹᱨ ᱯᱮᱨᱮᱡ ᱞᱮᱜᱮᱡ ᱵᱟᱦᱟ
ᱟᱨᱟᱜ ᱯᱩᱸᱰ ᱡᱮᱸᱜᱮᱫ ᱵᱟᱦᱟ
ᱥᱚᱛᱮ ᱢᱚᱦᱠᱟᱣᱜ ᱥᱚᱸᱫᱷᱟᱬ ᱵᱟᱦᱟ
ᱦᱚᱭ ᱛᱮ ᱦᱮᱞᱠᱟᱣᱜ ᱯᱷᱩᱴᱟᱹᱣ ᱵᱟᱦᱟ
ᱤᱠᱷᱟᱹᱱ ᱟᱢ ᱫᱚ ᱞᱟᱯᱷᱟᱝ ᱰᱟᱹᱨ ᱨᱮ
ᱠᱟᱱᱟᱢ ᱥᱟᱨᱡᱚᱢ ᱵᱟᱦᱟ ᱾
ᱵᱟᱝ ᱫᱚ ᱨᱩᱠᱩ ᱛᱮᱢ ᱧᱩᱨᱩᱜ
ᱵᱟᱝ ᱫᱚ ᱜᱚᱫ ᱛᱮᱢ ᱜᱚᱫᱚᱜ
ᱜᱩᱛᱩ ᱢᱮᱨᱮ ᱜᱟᱞᱟᱝ ᱢᱮᱨᱮ
ᱢᱟᱞᱟ ᱵᱟᱝ ᱜᱮᱢ ᱜᱟᱱᱚᱜ
ᱤᱠᱷᱟᱹᱱ ᱟᱢ ᱫᱚ ᱥᱟᱨᱡᱚᱢ ᱵᱟᱦᱟ
ᱛᱷᱚᱯᱮ ᱰᱟᱹᱨ ᱨᱮᱢ ᱥᱟᱡᱚᱜ
ᱥᱩᱫ ᱨᱮ ᱨᱮᱵᱮᱫ ᱢᱮᱨᱮ
ᱥᱩᱫ ᱫᱚᱢ ᱥᱚᱵᱷᱟᱭ
ᱵᱟᱦᱟ ᱫᱟᱞᱟᱭ ᱫᱟᱞᱟᱭ ᱾
ᱟᱢ ᱫᱚ ᱥᱟᱨᱡᱚᱢ ᱵᱟᱦᱟ
ᱥᱮᱨᱢᱟ ᱨᱮ ᱢᱤᱫ ᱫᱷᱟᱣᱮᱢ ᱵᱟᱦᱟᱜ
ᱯᱷᱟᱹᱜᱩᱱ ᱵᱚᱸᱜᱟ
ᱟᱢ ᱜᱮᱢ ᱥᱟᱹᱜᱩᱱ ᱠᱟᱜ-ᱟ
ᱛᱷᱚᱯᱮ ᱵᱟᱦᱟ
ᱰᱟᱹᱨᱮᱢ ᱞᱤᱰᱩᱨ ᱠᱟᱜ-ᱟ
ᱥᱚᱸᱫᱷᱟᱬ ᱵᱟᱦᱟ
ᱥᱚᱛᱮᱢ ᱢᱚᱦᱠᱟᱣ ᱠᱟᱜ-ᱟ
ᱟᱢ ᱫᱚ ᱥᱟᱨᱡᱚᱢ ᱵᱟᱦᱟ
ᱠᱷᱮᱨᱣᱟᱲ ᱥᱟᱶᱛᱟ
ᱜᱚᱴᱟᱢ ᱥᱟᱹᱜᱩᱱ ᱠᱟᱜ-ᱟ ᱾
***
