ᱦᱟᱭᱨᱮ ᱪᱟᱸᱫᱳ ! ᱨᱟᱹᱯᱩᱫ ᱢᱚᱞᱚᱝ ᱤᱧᱟᱜ,
ᱥᱟᱫᱮᱨ ᱱᱚᱣᱟ ᱢᱟᱹᱱᱢᱤ ᱡᱚᱱᱚᱢ
ᱪᱮᱫᱟᱢ ᱮᱢᱟᱫᱤᱧᱟ ?
ᱡᱟᱱᱟᱢ ᱫᱟᱛᱟ ᱛᱳᱣᱟ ᱫᱟᱨᱮ,
ᱫᱩᱠᱷ ᱥᱩᱠᱷ ᱨᱮ ᱛᱤᱸᱜᱩ ᱞᱟᱜᱟᱱ
ᱵᱟᱹᱱᱩᱜ ᱛᱤᱧᱟ ᱫᱟᱲᱮ ᱾
ᱟᱹᱛᱩ ᱴᱚᱞᱟ ᱯᱮᱲᱟ ᱯᱮᱲᱦᱟᱹ
ᱫᱩᱠᱷ ᱢᱩᱦᱤᱢ ᱠᱚᱨᱮ,
ᱮᱢ ᱥᱚᱦᱚᱫ ᱞᱮᱠᱟᱱ ᱫᱟᱲᱮ
ᱵᱟᱹᱱᱩᱜ ᱛᱤᱧᱟ ᱛᱤᱨᱮ ᱾
ᱪᱟᱹᱠᱨᱤ ᱨᱮᱱᱟᱜ ᱟᱸᱥ ᱛᱮ
ᱢᱟᱪᱮᱫᱚᱜ ᱤᱧ ᱢᱮᱱᱛᱮ,
ᱠᱩᱠᱢᱩ ᱛᱤᱧ ᱫᱚ ᱨᱚᱪᱚᱫ ᱮᱱᱟ
ᱨᱟᱡᱽ ᱟᱹᱨᱤ ᱠᱷᱮᱞᱳᱸᱰ ᱛᱮ ᱾
ᱨᱟᱹᱦᱤ ᱪᱟᱹᱣᱰᱟᱹᱞ ᱵᱤᱫᱟᱹᱭ ᱤᱧ ᱠᱚ
ᱥᱟᱺᱜᱤᱧ ᱫᱤᱥᱚᱢ ᱛᱮ,
ᱫᱤᱱᱟᱹᱢ ᱦᱤᱞᱚᱜ ᱱᱟᱦᱟᱪᱟᱨ ᱤᱧ
ᱪᱟᱹᱠᱨᱤ ᱤᱧᱟᱜ ᱵᱟᱝ ᱛᱮ ᱾
ᱵᱚᱭᱦᱟ ᱢᱤᱥᱤ ᱥᱚᱱᱮᱨ ᱜᱷᱟᱨᱚᱸᱡᱽ
ᱛᱚᱯᱚᱞ ᱵᱟᱹᱜᱤ ᱠᱟᱛᱮ,
ᱦᱤᱥᱠᱟᱹ ᱦᱩᱞᱟᱹᱝ ᱡᱩᱸᱰᱤ ᱮᱧᱟ
ᱛᱤᱨᱮ ᱠᱟᱹᱣᱰᱤ ᱤᱧᱟᱜ ᱵᱟᱝ ᱛᱮ ᱾
ᱡᱩᱨᱤ ᱛᱤᱧᱟᱜ ᱥᱚᱱᱮᱨ ᱥᱟᱹᱜᱟᱹᱭ
ᱛᱚᱱᱚᱞ ᱵᱟᱹᱜᱤ ᱠᱟᱛᱮ,
ᱟᱹᱠᱤᱱᱟᱜ ᱛᱟᱲᱟᱢ ᱰᱟᱦᱟᱨ ᱨᱮᱜᱮ
ᱡᱟᱸᱜᱮᱧ ᱛᱤᱸᱜᱩ ᱮᱱᱛᱮ ᱾
ᱦᱟᱱᱦᱟᱨ ᱦᱚᱸᱧᱦᱟᱨ ᱚᱲᱟᱜ
ᱟᱯᱱᱟᱨ ᱢᱚᱱᱮ ᱠᱟᱛᱮ,
ᱚᱲᱟᱜ ᱠᱷᱚᱱ ᱠᱚ ᱵᱟᱦᱮᱨ ᱠᱤᱫᱤᱧ
ᱦᱮᱢ ᱦᱚᱵᱚᱨ ᱵᱟᱝ ᱛᱮ ᱾
ᱠᱩᱥᱤ ᱨᱟᱹᱥᱠᱟᱹ ᱢᱚᱱᱮ
ᱥᱟᱱᱟᱢ ᱥᱟᱦᱟ ᱠᱟᱛᱮ,
ᱨᱟᱹᱥᱠᱟᱹ ᱢᱚᱱᱮᱢ ᱨᱚᱪᱚᱫ ᱠᱮᱫᱼᱟ
ᱟᱫᱷᱟ ᱫᱤᱱ ᱛᱮ ᱾
ᱦᱟᱭᱨᱮ ᱪᱟᱸᱫᱳ !
ᱨᱟᱹᱯᱩᱫ ᱢᱚᱞᱚᱝ ᱤᱧᱟᱜ,
ᱥᱟᱫᱮᱨ ᱱᱚᱶᱟ ᱢᱟᱹᱱᱢᱤ ᱡᱚᱱᱚᱢ
ᱪᱮᱫᱟᱢ ᱮᱢᱟᱫᱤᱧᱟ ?
***
