ᱪᱚᱨᱚᱠ ᱧᱮᱞᱚᱜ ᱮᱛᱟᱝ ᱟᱧᱪᱟᱨ ᱰᱟᱺᱜᱩᱣᱟᱹ ᱠᱩᱲᱤ ᱛᱟᱨᱮᱱ ᱨᱮ,
ᱚᱴᱟᱝ ᱵᱟᱲᱟᱭ ᱦᱤᱯᱤᱲ ᱦᱤᱯᱤᱲ ᱱᱤᱨ ᱯᱷᱤᱠᱤᱨ ᱢᱚᱱᱮᱨᱮ !
ᱩᱰᱟᱹᱣ ᱵᱟᱲᱟᱭ ᱵᱟᱨᱚᱵᱚᱨᱚᱱ ᱯᱤᱯᱤᱲᱤᱭᱟᱹᱝ ᱢᱚᱱᱮᱨᱮ,
ᱛᱟᱦᱮ’ ᱠᱚᱜᱼᱟᱭ ᱨᱤᱞᱟᱹᱢᱟᱞᱟ ᱟᱭᱳ ᱵᱟᱵᱟ ᱠᱚᱞᱮᱨᱮ !
ᱪᱷᱟᱛᱟ ᱫᱟᱨᱮ ᱴᱷᱟᱶᱼᱮ ᱟᱢᱮᱴ ᱟᱡᱟᱜ ᱢᱚᱱᱮ ᱠᱷᱟᱧᱪᱟᱨᱼᱨᱮ,
ᱜᱷᱮᱸᱴ ᱠᱟᱛᱮ ᱫᱚᱦᱚᱭ ᱟᱭᱳ ᱵᱟᱵᱟ ᱫᱩᱞᱟᱹᱲ ᱟᱧᱪᱟᱨᱼᱨᱮ !
ᱵᱟᱹᱦᱩ ᱠᱩᱲᱤ ᱜᱚᱜᱚᱜ ᱟᱧᱪᱟᱨ ᱢᱟᱥᱮ ᱫᱚᱦᱟᱵᱚᱦᱟ ᱢᱚᱱᱮᱨᱮ,
ᱟᱲᱟᱜᱟᱭ ᱪᱮ ᱨᱮᱵᱮᱫᱟᱭ ᱩᱭᱦᱟᱹᱨᱚᱜᱼᱟᱭ ᱜᱷᱟᱱᱮᱨᱮ !
ᱛᱟᱨᱟᱭ ᱟᱲᱟᱜᱽ ᱛᱟᱨᱟᱭ ᱨᱮᱵᱮᱫᱽ ᱟᱡᱟᱜ ᱞᱤᱠᱤᱫ ᱰᱟᱸᱰᱟ ᱼᱨᱮ,
ᱩᱭᱦᱟᱹᱨ ᱜᱚᱫᱟᱭ ᱡᱟᱱᱟᱢ ᱚᱲᱟᱜ ᱫᱩᱲᱩᱵ ᱠᱟᱛᱮ ᱯᱤᱸᱰᱟᱹᱼᱨᱮ !
ᱜᱷᱮᱸᱴ ᱫᱚᱦᱚ ᱩᱭᱦᱟᱹᱨ ᱢᱟᱥᱮ ᱩᱜᱭᱩᱝ ᱱᱤᱪᱚᱞ ᱵᱮᱲᱟᱼᱨᱮ,
ᱵᱩᱠᱟᱹ ᱛᱚᱯᱟ ᱚᱲᱟᱜ ᱨᱮᱜᱮ ᱱᱤᱛᱚᱜ ᱟᱡ ᱫᱚ ᱢᱟᱥᱮ ᱯᱮᱲᱟᱨᱮ !
ᱟᱭᱳ ᱟᱧᱪᱟᱨ ᱫᱩᱞᱟᱹᱲ ᱟᱧᱪᱟᱨ ᱟ’ᱥᱚᱜ ᱟᱵᱚᱱ ᱡᱚᱛᱚ ᱨᱮ,
ᱜᱩᱸᱜᱩᱫ ᱵᱚᱱᱟᱭ ᱫᱩᱠ ᱥᱩᱠ ᱨᱮ ᱟᱡᱟᱜ ᱫᱩᱞᱟᱹᱲ ᱟᱧᱪᱟᱨ ᱞᱟᱛᱟᱨᱼᱨᱮ !
ᱟᱧᱪᱟᱨ ᱠᱟᱛᱷᱟ ᱩᱭᱦᱟᱹᱨ ᱵᱟᱹᱱᱩᱜ ᱢᱮᱱᱟᱜ ᱛᱟᱭᱟ ᱚᱠᱟᱨᱮ,
ᱜᱷᱟᱨᱚᱸᱡᱽ ᱨᱮᱱᱟᱜ ᱵᱷᱟᱨᱵᱳᱡᱷᱟ ᱡᱚᱛᱚ ᱟᱡᱟᱜ ᱛᱟᱨᱮᱱᱨᱮ !
ᱢᱩᱦᱤᱢ ᱵᱮᱲᱟ ᱢᱮᱫᱼᱫᱟᱜ ᱡᱚᱨᱚᱜ ᱡᱚᱛᱚ ᱦᱚᱲ ᱠᱷᱚᱱ ᱫᱟᱱᱟᱝ ᱨᱮ,
ᱤᱧᱟᱜ ᱫᱩᱠ ᱨᱮ ᱟᱡᱟᱜ ᱟᱧᱪᱟᱨ ᱞᱚᱦᱚᱫᱚᱜᱼᱟ ᱢᱟᱬᱟᱝ ᱨᱮ !
ᱵᱚᱸᱜᱟ ᱟᱭᱳ ᱜᱚᱜᱚᱜ ᱟᱧᱪᱟᱨ ᱵᱮᱫᱷᱟᱣ ᱠᱚᱜ ᱟᱭ ᱦᱚᱲᱢᱚ ᱨᱮ
ᱦᱤᱥᱟᱹᱵᱽ ᱛᱟᱭᱟᱭ ᱫᱷᱚᱨᱚᱢ ᱠᱚᱨᱚᱢ ᱱᱚᱶᱟ ᱢᱟᱹᱱᱢᱤ ᱡᱚᱱᱚᱢ ᱨᱮ !
ᱥᱚᱱᱟᱼᱢᱤᱨᱩ ᱢᱮᱫ ᱫᱟᱜ ᱡᱚᱫ ᱛᱮ ᱜᱚᱜᱚᱜ ᱢᱟᱛᱟᱭ ᱢᱚᱥᱨᱟ ᱠᱚᱜ,
ᱛᱟᱨᱟ ᱠᱚᱬᱛᱮ ᱡᱮᱫ ᱮ ᱡᱚᱫᱚᱜ ᱛᱟᱨᱟ ᱛᱮᱢᱟᱭ ᱜᱚᱜᱚᱜ ᱠᱚᱜ !
ᱞᱩᱴᱩᱯᱩᱸᱰᱩᱜ ᱥᱟᱱᱟᱭ ᱟᱧᱪᱟᱨ ᱜᱚᱲᱚᱢ ᱦᱚᱲᱢᱚ ᱫᱷᱩᱲᱤ ᱨᱮ,
ᱠᱚᱯᱟᱲ ᱞᱤᱠᱷᱚᱱ ᱛᱟᱦᱮ’ᱱ ᱮᱱᱟᱝ ᱱᱚᱶᱟ ᱥᱩᱠ ᱫᱚᱭ ᱡᱟᱹᱲᱤ ᱨᱮ,
ᱢᱚᱱᱮ ᱫᱚᱛᱟᱭ ᱦᱤᱨᱤᱡ ᱯᱟᱹᱥᱤᱨ ᱧᱮᱞᱚᱜ ᱜᱚᱴᱟ ᱪᱮᱛᱟᱱ ᱨᱮ,
ᱯᱟᱱᱛᱮᱜ ᱥᱟᱱᱟᱭ ᱜᱚᱲᱚᱢ ᱠᱚ ᱴᱷᱮᱱ ᱟᱡᱟᱜ ᱵᱤᱫᱟᱹᱭ ᱵᱮᱲᱟᱨᱮ !!
***
