ᱨᱮᱸᱜᱮᱡ ᱵᱟᱹᱱᱩᱜ ᱵᱚᱱ ᱫᱤᱥᱚᱢ ᱨᱮ
ᱠᱤᱥᱟᱹᱬ ᱫᱟᱲᱮ ᱛᱮᱵᱚᱱ ᱯᱮᱨᱮᱡ ᱟᱠᱟᱱ ᱾
ᱡᱷᱟᱨᱱᱟ ᱫᱟᱜ ᱞᱮᱠᱟ ᱠᱟᱹᱣᱰᱤ
ᱡᱷᱟᱨ ᱡᱷᱟᱨᱚᱜ ᱵᱟᱝ ᱪᱚ ᱧᱩᱨᱩᱜ ᱾
ᱫᱤᱥᱚᱢ ᱟᱠᱟᱞ ᱵᱟᱠᱟᱞ ᱛᱮ
ᱪᱷᱤᱱᱚᱠ ᱪᱷᱤᱛᱚᱨ ᱛᱮ,
ᱨᱮᱸᱜᱮᱡ ᱛᱮᱛᱟᱝ ᱛᱮ ᱫᱩᱣᱟᱹᱨ ᱫᱩᱣᱟᱹᱨ
ᱜᱤᱫᱟᱹᱨ ᱯᱤᱫᱟᱹᱨ ᱠᱚᱭ ᱠᱟᱛᱮ ᱠᱚ ᱢᱚᱡᱮᱫ ᱠᱟᱱ ᱾
ᱥᱚᱱᱟ ᱜᱮᱞᱮ ᱜᱮᱢᱮᱨ ᱠᱟᱛᱮ
ᱜᱮᱢᱮᱨ ᱡᱚᱝ ᱟᱠᱚ ᱾
ᱚᱠᱚᱭ ᱥᱚᱠᱚᱡ ᱛᱮ ᱚᱠᱛᱚ ᱚᱠᱛᱚ ᱾
ᱡᱤᱭᱤ ᱠᱚ ᱯᱟᱨᱚᱢ ᱾
ᱵᱤᱨ ᱵᱩᱨᱩ ᱡᱷᱟᱹᱱᱴᱤ ᱡᱟᱹᱱᱩᱢ
ᱫᱷᱤᱨᱤ ᱪᱮᱴᱮᱨ ᱠᱟᱸᱠᱚᱨ ᱾
ᱦᱚᱲᱢᱚ ᱨᱮᱱᱟᱜ ᱫᱟᱲᱮ ᱩᱫᱽᱜᱟᱹᱨ ᱫᱟᱜ ᱡᱚᱨᱚᱜ,
ᱡᱟᱸᱜᱟ ᱨᱮᱱᱟᱜ ᱡᱤᱞ ᱠᱟᱹᱴᱩᱵ ᱦᱮᱲ ᱮᱱ ᱛᱟᱢ ᱾
ᱵᱤᱨ ᱞᱟᱛᱮ ᱛᱤ ᱦᱚᱸ ᱯᱷᱚᱠᱟ ᱮᱱ ᱛᱟᱢ
ᱵᱤᱨ ᱵᱩᱨᱩ ᱪᱤᱠᱟᱹᱬ ᱛᱮ ᱾
ᱵᱟᱠᱡᱩᱞᱩᱝ ᱞᱮᱠᱟ ᱢᱮᱫ ᱠᱚ ᱡᱩᱞ ᱮᱱ ᱛᱟᱠᱚ
ᱪᱤᱠᱟᱹᱬ ᱪᱚᱨᱚᱠ ᱵᱩᱨᱩ ᱧᱮᱞ ᱛᱮ ᱾
ᱥᱚᱱᱟ ᱜᱮᱞᱮ ᱧᱮᱞ ᱛᱮ ᱞᱟᱞᱥᱟ ᱮᱱᱟ ᱠᱚ
ᱠᱤᱥᱟᱹᱬ ᱪᱟᱹᱥᱤ ᱠᱚ ᱨᱮᱸᱜᱮᱡ ᱠᱮᱫ ᱠᱚ ᱾
ᱥᱟᱱᱛᱟᱲ ᱫᱟᱲᱮ ᱪᱮᱛᱟᱱ ᱠᱚ
ᱞᱟᱯᱷᱟᱝ ᱮᱱ ᱠᱚ ᱾
ᱟᱢ ᱜᱮ ᱢᱟᱨᱟᱝ ᱥᱟᱱᱛᱟᱲ
ᱟᱢ ᱜᱮ ᱢᱟᱨᱟᱝ ᱪᱟᱹᱥᱤ ᱾
ᱟᱢ ᱜᱮᱢ ᱥᱤᱨᱡᱚᱱ ᱞᱮᱫᱟ ᱥᱚᱱᱟ ᱯᱚᱦᱟ
ᱟᱢᱟᱜ ᱫᱟᱲᱮ ᱞᱮᱠᱟ ᱚᱠᱚᱭᱟᱜ ᱫᱟᱲᱮ ᱵᱟᱹᱱᱩᱜ ᱛᱟᱠᱚ ᱾
ᱫᱤᱥᱚᱢ ᱨᱮᱜᱮᱸᱡ ᱴᱩᱣᱟᱹᱨ
ᱡᱚ ᱡᱚᱢ ᱞᱟᱹᱜᱤᱫ ᱟᱢ ᱜᱮᱢ ᱠᱷᱟᱴᱟᱣᱜ ᱾
ᱟᱢ ᱫᱚ ᱟᱹᱰᱤᱢ ᱥᱚᱨᱮᱥ ᱜᱮᱭᱟ
ᱟᱢᱟᱜ ᱫᱩᱞᱟᱹᱲ ᱥᱟᱱᱟᱢ ᱠᱚᱴᱷᱮᱱ ᱯᱟᱥᱱᱟᱣᱜ ᱜᱮᱭᱟ ᱾
***
