ᱵᱟᱹᱫᱽᱞᱤ ᱵᱟᱦᱨᱮ ᱪᱩᱞᱦᱟᱹ ᱨᱮ ᱥᱮᱸᱜᱮᱞ ᱮ ᱡᱩᱞ ᱞᱟᱹᱜᱤᱫ ᱥᱟᱦᱟᱱ ᱠᱚᱭ ᱦᱚᱵᱚᱨ ᱟᱹᱜᱩᱭᱮᱫᱟ ᱵᱟᱲᱜᱮ ᱥᱮᱫ ᱠᱷᱚᱱ ᱾ ᱢᱚᱱᱮ ᱢᱚᱱᱮ ᱛᱮᱭ ᱩᱭᱦᱟᱹᱨ ᱮᱫᱟ ᱟᱨ ᱦᱚᱸ ᱟᱥᱟᱲ ᱵᱚᱸᱜᱟ ᱞᱟᱹᱜᱤᱫ ᱥᱟᱦᱟᱱ ᱠᱚ ᱡᱩᱜᱟᱹᱲ ᱠᱟᱜ ᱦᱩᱭᱩᱜᱼᱟ ᱾
ᱪᱩᱞᱦᱟᱹ ᱨᱮ ᱠᱟᱨᱟᱠᱩᱴᱟᱹ ᱨᱮ ᱰᱤᱵᱽᱨᱤ ᱥᱩᱱᱩᱢ ᱫᱩᱞ ᱧᱚᱜ ᱠᱟᱛᱮ ᱢᱟᱹᱪᱤᱥ ᱮ ᱪᱷᱚᱨ ᱟᱫᱟ ᱾ ᱫᱟᱠᱟ ᱫᱟᱜ ᱮ ᱵᱟᱥᱟᱝ ᱩᱛᱟᱹᱨ ᱠᱟᱫᱟ ᱾
ᱥᱮᱛᱟᱜ ᱥᱮᱛᱟᱜ ᱵᱟᱭ ᱤᱥᱤᱱ ᱞᱮᱠᱷᱟᱱ ᱜᱤᱫᱽᱨᱟᱹ ᱠᱤᱱ ᱫᱟᱠᱟ ᱠᱤᱱ ᱠᱷᱚᱡᱚᱜᱼᱟ ᱾ ᱡᱟᱦᱟᱸᱱᱟᱜ ᱥᱟᱞᱟᱜ ᱜᱮ ᱮᱢᱟᱠᱤᱱᱟᱭ ᱟᱨ ᱵᱟᱝᱠᱷᱟᱱ ᱞᱚ ᱞᱚ ᱵᱤᱱ ᱫᱟᱜ ᱫᱩᱞ ᱫᱟᱠᱟ ᱦᱚᱸ ᱠᱤᱱ ᱡᱚᱢ ᱜᱮᱭᱟ, ᱵᱟᱪᱷᱟᱣ ᱠᱚᱫᱚ ᱵᱟᱹᱱᱩᱜ ᱛᱟᱹᱠᱤᱱᱟ ᱾
ᱪᱟᱣᱞᱮ ᱜᱩᱢ ᱜᱩᱢ ᱛᱮ ᱠᱷᱳᱫᱮ ᱠᱚ ᱥᱤᱢ ᱥᱮᱫ ᱮ ᱮᱨ ᱠᱟᱫᱟ ᱥᱤᱢ ᱮᱸᱜᱟ ᱦᱚᱸ ᱵᱩᱥᱟᱹᱜ ᱟᱛᱮ ᱪᱩᱨᱩᱭ ᱟᱹᱜᱩ ᱠᱮᱫ ᱠᱚᱣᱟ ᱾
ᱠᱩᱞᱦᱤ ᱥᱮᱫ ᱮ ᱠᱚᱭᱚᱜᱟ ᱫᱚ ᱥᱤᱫᱟᱹᱢ ᱜᱚᱴᱟ ᱠᱩᱞᱦᱤ ᱞᱮᱣᱰᱟ ᱟᱛᱮᱭ ᱦᱤᱡᱩᱜ ᱠᱟᱱᱟ ᱾ ᱥᱮᱛᱟᱜ ᱛᱟᱨᱟ ᱚᱠᱟ ᱠᱷᱚᱱ ᱚᱠᱚᱭ ᱥᱮᱫ ᱠᱷᱚᱱ ᱪᱚ ᱥᱮᱛᱟᱜ ᱨᱮᱭ ᱥᱚᱞᱚᱝ ᱟᱹᱜᱩ ᱠᱮᱫ ᱾ ᱨᱟᱹᱜᱤ ᱜᱮᱢ ᱧᱮᱞᱮᱭᱟ ᱾ ᱚᱲᱟᱜ ᱨᱮᱱᱟᱜ ᱢᱟ ᱪᱮᱫ ᱛᱮᱫ ᱦᱚᱸ ᱵᱟᱭ ᱠᱟᱹᱢᱤᱭᱟ ᱾ ᱱᱚᱛᱮ ᱜᱤᱫᱽᱨᱟᱹ ᱟᱜ ᱢᱟ ᱪᱮᱫ ᱦᱚᱸ ᱱᱤᱛ ᱫᱷᱟᱹᱵᱤᱡ ᱪᱮᱫ ᱦᱚᱸ ᱵᱟᱭ ᱵᱩᱡᱷᱟᱹᱣ ᱞᱮᱫᱟ ᱾
ᱫᱤᱱ ᱜᱮ ᱵᱩᱞ ᱟᱨ ᱵᱩᱞ ᱾ ᱵᱤᱥᱯᱤᱛᱟᱹᱣ ᱜᱮᱢ ᱵᱩᱡᱷᱟᱹᱣ ᱜᱚᱫᱟ ᱾ ᱥᱟᱨ ᱥᱟᱹᱜᱩᱱ ᱵᱟᱯᱞᱟ ᱵᱷᱟᱸᱜᱚᱲ ᱠᱟᱛᱮ ᱪᱮᱫ ᱡᱟᱞᱟ ᱱᱩᱭ ᱵᱟᱨᱚ ᱦᱟᱺᱰᱣᱟᱹ ᱴᱷᱮᱱ ᱫᱚᱧ ᱡᱮᱨᱮᱲ ᱮᱱᱟ ᱾ ᱟᱯᱟ ᱵᱟᱨᱮ ᱟᱭᱳ ᱵᱟᱵᱟ ᱟᱜ ᱠᱟᱛᱷᱟ ᱵᱟᱝ ᱟᱸᱡᱚᱢ ᱠᱟᱛᱮᱧ ᱦᱮᱡ ᱮᱱᱟ ᱾ ᱱᱤᱛ ᱢᱟ ᱚᱸᱰᱮ ᱥᱮᱱ ᱠᱟᱛᱮ ᱡᱤᱣᱤ ᱨᱟᱲᱮᱡ ᱞᱮᱠᱟ ᱦᱚᱸ ᱵᱟᱹᱧ ᱥᱮᱱ ᱫᱟᱱᱮᱭᱟᱜ ᱠᱟᱱᱟ ᱾
ᱥᱮᱛᱟᱜ ᱛᱟᱨᱟ ᱦᱟᱱᱦᱟᱨ ᱟᱭᱳ ᱦᱚᱸ ᱪᱮᱫ ᱠᱚᱪᱚ ᱠᱚᱸᱵᱚᱫ ᱠᱚᱸᱵᱚᱫ ᱮ ᱪᱷᱩᱴᱟᱹᱣ ᱠᱚᱜᱼᱟᱭ ᱾ ᱨᱚᱲ ᱛᱟᱨᱟᱭ ᱜᱮᱭᱟᱭ ᱮᱱᱟᱝ ᱫᱚ ᱵᱟᱯᱞᱟ ᱵᱷᱟᱸᱜᱚᱲ ᱠᱟᱛᱮ ᱢᱩᱱᱜᱟᱹ ᱟᱲᱟᱜ ᱞᱮᱠᱟᱢ ᱨᱮᱰᱮᱫ ᱮᱱᱟ ᱟᱨ ᱱᱤᱛ ᱠᱷᱟᱱ ᱫᱚ ᱪᱮᱫ ᱠᱚᱪᱚ ᱵᱟᱢ ᱠᱩᱥᱤᱜ ᱠᱟᱱ ᱾ ᱵᱟᱹᱫᱽᱞᱤ ᱨᱚᱲ ᱨᱩᱣᱟᱹᱲ ᱥᱟᱱᱟᱭᱮ ᱜᱮᱭᱟ, ᱟᱨ ᱦᱚᱸᱭ ᱩᱭᱦᱟᱹᱨᱟ ᱨᱚᱲ ᱚᱪᱚ ᱱᱚᱜ ᱮ ᱾ ᱡᱚᱛᱚ ᱫᱳᱥ ᱜᱮ ᱤᱧ ᱴᱷᱮᱱ ᱟᱨ ᱱᱟᱥᱮ ᱜᱤᱫᱽᱨᱟᱹ ᱠᱤᱱ ᱦᱟᱨᱟ ᱞᱮᱱ ᱠᱷᱟᱱ ᱯᱟᱞᱮᱱ ᱩᱱᱟᱹᱜ ᱫᱚ ᱵᱟᱹᱧ ᱦᱟᱨᱠᱮᱛᱚᱜᱼᱟ ᱾
ᱢᱤᱫ ᱫᱤᱱ ᱟᱹᱭᱩᱵ ᱛᱟᱨᱟ ᱚᱱᱠᱟ ᱜᱮ ᱵᱩᱞ ᱞᱟᱛᱮᱭ ᱦᱮᱡ ᱮᱱᱟ ᱥᱤᱫᱟᱹᱢ ᱾ ᱫᱟᱠᱟ ᱥᱩᱨ ᱟᱫᱮ ᱠᱷᱟᱱ ᱢᱚᱪᱟ ᱵᱩᱞ ᱥᱟᱵᱟᱜ ᱛᱮ ᱩᱛᱩ ᱦᱚᱸᱭ ᱞᱮᱵᱽᱫᱟ ᱜᱤᱰᱤ ᱠᱟᱫ, ᱫᱟᱫᱟᱞ ᱜᱮᱭ ᱫᱟᱹᱲ ᱟᱹᱜᱩᱭᱮᱫ ᱾ ᱪᱩᱨᱟᱹᱢᱟᱨᱟ ᱜᱤᱫᱽᱨᱟᱹ ᱥᱩᱛᱩᱜ ᱠᱟᱛᱮ ᱥᱩᱨ ᱨᱮ ᱠᱟᱠᱟ ᱦᱚᱧᱦᱟᱨ ᱛᱮᱠᱚ ᱴᱷᱮᱱ ᱠᱚ ᱡᱟᱹᱯᱤᱫ ᱟᱸᱜᱟ ᱠᱮᱫᱼᱟ ᱾ ᱦᱚᱯᱚᱱ ᱠᱟᱹᱞᱤ ᱦᱟᱱᱦᱟᱨ ᱦᱚᱸ ᱱᱟᱯᱟᱭ ᱵᱮᱵᱷᱟᱨ ᱛᱟᱭ ᱵᱟᱹᱫᱽᱞᱤ ᱯᱟᱦᱴᱟ ᱜᱮᱭ ᱠᱟᱛᱷᱟᱭᱟ ᱾ ᱚᱱᱟᱛᱮ ᱟᱭᱳ ᱵᱟᱵᱟ ᱚᱲᱟᱜ ᱵᱟᱭ ᱥᱮᱱ ᱫᱟᱲᱮᱭᱟᱜ ᱨᱮᱦᱚᱸ ᱱᱩᱠᱤᱱ ᱴᱷᱮᱱ ᱜᱮ ᱡᱤᱣᱤ ᱨᱟᱲᱮᱡ ᱩᱥᱟᱹᱫ ᱮ ᱦᱮᱡ ᱜᱚᱫᱚᱜᱼᱟ ᱾ ᱢᱮᱱᱟᱜ ᱨᱮ ᱵᱟᱹᱱᱩᱜ ᱨᱮ ᱡᱟᱦᱟᱸ ᱜᱮ ᱠᱤᱱ ᱮᱢᱟᱭᱟ ᱾
ᱵᱟᱹᱫᱽᱞᱤ ᱩᱭᱦᱟᱹᱨᱟᱭ ᱡᱟᱦᱟᱸᱭ ᱦᱚᱲ ᱰᱟᱹᱜᱽᱣᱟᱹ ᱨᱮ ᱡᱤᱫ ᱵᱮᱲᱟ ᱵᱟᱭ ᱧᱮᱞ ᱞᱮᱠᱷᱟᱱ ᱪᱷᱟᱴᱠᱟ ᱥᱩᱫᱟᱹᱭ ᱞᱚᱥᱚᱫ ᱞᱮᱫᱼᱟ, ᱩᱱᱤ ᱦᱚᱲ ᱜᱮ ᱱᱤᱛ ᱚᱠᱟ ᱞᱮᱠᱟᱭ ᱧᱮᱞᱮ ᱠᱟᱱᱟ ᱾ ᱟᱭᱳ ᱵᱟᱵᱟ ᱟᱜ ᱥᱟᱨ ᱥᱟᱹᱜᱩᱱ ᱵᱟᱯᱞᱟ ᱜᱤᱧ ᱨᱮᱵᱮᱱ ᱞᱮᱱ ᱠᱷᱟᱱ ᱯᱟᱞᱮᱱ ᱥᱩᱠ ᱨᱮᱜᱤᱧ ᱛᱟᱦᱮᱸ ᱠᱚᱜᱼᱟ ᱾ ᱱᱚᱶᱟ ᱠᱚᱦᱚᱸᱭ ᱩᱭᱦᱟᱹᱨ ᱜᱮᱭᱟ ᱾
ᱚᱠᱚᱭ ᱵᱟᱰᱟᱭ ᱱᱩᱭ ᱵᱟᱨᱚ ᱦᱟᱹᱣᱟᱹ ᱠᱚᱲᱟ ᱨᱮ ᱡᱟᱶᱟᱭ ᱠᱟᱛᱮ ᱤᱧᱟᱜ ᱱᱚᱝᱠᱟᱱ ᱫᱚᱥᱟ ᱦᱩᱭᱩᱜ ᱛᱤᱧᱟ ᱢᱮᱱᱛᱮ ᱾ ᱵᱤᱪᱷᱚᱠ ᱛᱮᱭ ᱢᱮᱱᱟ ᱜᱤᱫᱽᱨᱟᱹ ᱥᱩᱛᱩᱜ ᱠᱟᱛᱮ ᱡᱟᱦᱟᱸ ᱥᱮᱫ ᱢᱮᱫ ᱞᱩᱛᱩᱨ ᱥᱮᱱᱚᱜ ᱛᱤᱧᱟᱹ ᱚᱱᱛᱮ ᱜᱤᱧ ᱥᱮᱱ ᱯᱷᱟᱨᱟᱠ ᱠᱚᱜᱼᱟ ᱾ ᱢᱤᱫ ᱵᱮᱱᱟ ᱦᱚᱸ ᱟᱫᱚ ᱱᱩᱭ ᱴᱷᱮᱱ ᱛᱟᱦᱮᱸᱱ ᱵᱟᱝ ᱥᱟᱱᱟᱹᱧ ᱠᱟᱱᱟ ᱾
ᱟᱨ ᱦᱚᱸᱭ ᱩᱭᱦᱟᱹᱨᱟ ᱚᱠᱟ ᱥᱮᱫ ᱦᱚᱸ ᱵᱟᱹᱧ ᱥᱮᱱᱚᱜᱼᱟ, ᱰᱟᱴᱟ ᱜᱮᱨ ᱠᱟᱛᱮ ᱛᱟᱦᱮᱸᱭᱟᱠᱟᱹᱧ ᱛᱟᱦᱮᱸᱱᱟ ᱾ ᱢᱤᱫ ᱫᱤᱱ ᱵᱟᱝ ᱢᱤᱫ ᱫᱤᱱ ᱪᱟᱸᱫᱚ ᱵᱚᱸᱜᱟᱭ ᱠᱚᱭᱚᱜ ᱟᱹᱧ ᱜᱮᱭᱟ ᱾ ᱠᱩᱱᱤ ᱦᱚᱯᱚᱱ ᱡᱟᱱᱟᱢ ᱫᱚ ᱥᱟᱦᱟᱣ ᱫᱟᱲᱮᱭ ᱮᱢ ᱟᱠᱟᱣ ᱫᱤᱧᱟ ᱾ ᱚᱲᱟᱜ ᱠᱷᱚᱱ ᱚᱰᱚᱠ ᱪᱟᱞᱟᱣ ᱠᱟᱛᱮ ᱫᱚ ᱪᱮᱫ ᱦᱚᱸ ᱵᱟᱝ ᱦᱩᱭᱩᱜᱼᱟ ᱾ ᱱᱚᱶᱟ ᱠᱚᱜᱮᱭ ᱩᱭᱦᱟᱹᱨ ᱵᱟᱲᱟᱭᱟ ᱟᱨ ᱟᱯᱟ ᱵᱟᱨᱮ ᱠᱚᱣᱟᱜ ᱠᱟᱛᱷᱟᱭ ᱫᱤᱥᱟᱹᱭᱟ ᱾ ᱱᱚᱛᱮ ᱵᱚᱭᱦᱟ ᱠᱚ ᱦᱚᱸ ᱱᱤᱛ ᱫᱚ ᱚᱠᱟ ᱞᱮᱞᱟ ᱨᱮ ᱤᱧᱟᱜ ᱫᱩᱠ ᱥᱟᱨᱠᱮᱛ ᱤᱧ ᱞᱟᱹᱭ ᱟᱠᱚᱣᱟ ᱾ ᱟᱠᱚᱣᱟᱜ ᱠᱟᱛᱷᱟᱹᱧ ᱟᱸᱡᱚᱢ ᱞᱮᱠᱷᱟᱱ ᱱᱚᱸᱰᱮ ᱠᱷᱚᱱ ᱜᱤᱫᱽᱨᱟᱹ ᱥᱩᱛᱩᱜ ᱠᱟᱛᱮᱧ ᱥᱮᱱ ᱠᱚᱜ ᱨᱮᱦᱚᱸ ᱟᱠᱚᱣᱟᱜ ᱥᱮᱛᱟ ᱞᱟᱛᱟᱨ ᱨᱤᱧ ᱛᱟᱦᱮᱸ ᱫᱟᱲᱮ ᱠᱮᱭᱟ ᱾
ᱟᱹᱠᱷᱤᱨ ᱵᱟᱝ ᱩᱭᱦᱟᱹᱨ ᱠᱟᱛᱮ ᱪᱮᱫ ᱦᱮᱞ ᱛᱮᱪᱚᱧ ᱫᱷᱟᱸᱫᱟ ᱞᱮᱱ ᱚᱠᱚᱭ ᱵᱟᱰᱟᱭ?
ᱜᱤᱫᱽᱨᱟᱹ ᱟᱜ ᱢᱮᱫᱦᱟ ᱧᱮᱞ ᱠᱟᱛᱮ ᱥᱟᱦᱟᱣ ᱤᱫᱤ ᱦᱩᱭ ᱟᱹᱧᱟ ᱾ ᱛᱤᱱᱟᱹᱜ ᱫᱤᱱ ᱪᱚ ᱱᱚᱝᱠᱟ ᱦᱟᱨᱠᱮᱛ ᱥᱟᱦᱟᱣ ᱦᱩᱭᱩᱜ ᱛᱤᱧᱟ !!
***
