ᱨᱟᱹᱥᱤ ᱟᱹᱛᱩ ᱨᱮᱭᱟᱜ ᱪᱮᱛᱟᱱ ᱴᱚᱞᱟ ᱠᱩᱞᱦᱤ ᱢᱩᱪᱟᱹᱫ ᱨᱮ, ᱜᱤᱫᱽᱨᱟ. ᱠᱚ ᱫᱚ ᱠᱚ ᱠᱷᱮᱞ ᱡᱚᱝ ᱠᱟᱱᱟ ᱾ ᱢᱟᱹᱭ ᱡᱚᱵᱟ ᱫᱚ ᱟᱹᱰᱤ ᱠᱩᱥᱤ ᱛᱮ ᱟᱡ ᱨᱤᱱ ᱜᱟᱛᱮ ᱠᱚᱭ ᱞᱟᱹᱭ ᱟᱠᱚ ᱠᱟᱱᱟ ᱪᱮ ᱟᱡ ᱫᱟᱫᱟ ᱚᱲᱟᱜ ᱨᱮ ᱠᱩᱲᱤ ᱜᱤᱫᱽᱨᱟᱹᱭ ᱦᱩᱭ ᱟᱠᱟᱱᱟ, ᱩᱱᱤ ᱧᱮᱞ ᱠᱚ ᱪᱟᱞᱟᱜ ᱠᱟᱱᱟ ᱾ ᱢᱤᱫ ᱜᱟᱛᱮᱭ ᱠᱩᱞᱤ ᱠᱮᱫᱮᱭᱟ, ᱟᱫᱚ ᱡᱚᱵᱟ, ᱩᱱᱤ ᱫᱚ ᱪᱮᱫ ᱟᱢ ᱞᱮᱠᱟ ᱜᱮᱭ ᱦᱮᱸᱫᱮ ᱜᱮᱭᱟ ? ᱟᱨ ᱮ ᱞᱟᱸᱫᱟ ᱜᱚᱫᱟ ᱾ ᱡᱚᱵᱟ ᱱᱚᱶᱟ ᱟᱸᱡᱚᱢ ᱠᱟᱛᱮ ᱟᱹᱰᱤ ᱡᱩᱨᱮ ᱨᱟᱹᱜᱤᱜ-ᱟ, ᱟᱨ ᱠᱟᱹᱦᱤᱸᱥ ᱛᱮ ᱚᱲᱟᱜ ᱮ ᱨᱩᱣᱟᱹᱲ ᱡᱚᱝᱟ ᱾ ᱚᱱᱟ ᱠᱟᱛᱷᱟ ᱛᱮ ᱧᱤᱫᱟᱹ ᱡᱟᱹᱯᱤᱫ ᱠᱚ ᱛᱟᱭ ᱵᱷᱟᱺᱜᱩᱲ ᱮᱱᱟ ᱾ ᱥᱮᱛᱟᱜ ᱥᱤᱢᱨᱟᱜ ᱨᱮ ᱟᱡ ᱟᱭᱳᱭ ᱦᱚᱦᱚ ᱟᱭ ᱠᱟᱱᱟ, “ᱡᱚᱵᱟ ᱵᱮᱨᱮᱫ ᱢᱮ, ᱵᱮᱨᱮᱫ ᱢᱮ ᱥᱮᱛᱟᱜ ᱨᱮ ᱵᱚᱥ ᱜᱟᱹᱰᱤ ᱛᱮ ᱟᱢ ᱫᱟᱫᱟ ᱴᱷᱮᱱ ᱵᱚᱱ ᱪᱟᱞᱟᱜ-ᱟ ᱾
ᱡᱚᱵᱟ ᱫᱚ ᱧᱤᱫᱟᱹ ᱴᱷᱤᱠ ᱛᱮ ᱵᱟᱭ ᱡᱟᱹᱯᱤᱫ ᱞᱮᱫ ᱛᱮ ᱵᱟᱝ ᱵᱮᱨᱮᱫ ᱥᱟᱱᱟᱭᱮ ᱠᱟᱱᱟ ᱾ ᱟᱡ ᱟᱭᱳ, ᱵᱟᱵᱟ, ᱠᱟᱠᱟ, ᱠᱟᱹᱠᱤ, ᱦᱚᱯᱚᱱ ᱟᱭᱳ, ᱦᱟᱛᱚᱢ ᱠᱚ ᱫᱚ ᱡᱚᱛᱚ ᱵᱷᱩᱵᱽᱱᱮᱥᱚᱨ ᱵᱚᱥ ᱜᱟᱹᱰᱤ ᱛᱮ ᱪᱟᱞᱟᱜ ᱞᱟᱹᱜᱤᱫ ᱠᱚ ᱥᱟᱡᱟᱣ ᱥᱟᱯᱲᱟᱣᱜ ᱠᱟᱱᱟ ᱾ ᱡᱚᱵᱟ ᱢᱟᱹᱭ ᱦᱚᱸ ᱟᱡᱟᱜ ᱥᱟᱢᱟᱱ ᱠᱚ ᱵᱟᱠᱥᱟ ᱨᱮᱭ ᱥᱟᱸᱵᱟᱣ ᱤᱫᱤ ᱠᱮᱫ-ᱟ ᱾ ᱡᱚᱵᱟ ᱫᱚ ᱱᱤᱛ ᱦᱚᱸ ᱩᱭᱦᱟᱹᱨᱮᱫ-ᱟᱭ ᱟᱡᱤᱡ ᱜᱟᱛᱮᱭᱟᱜ ᱠᱟᱛᱷᱟ, “ᱪᱮᱫ, ᱩᱱᱤ ᱦᱚᱸ ᱟᱢ ᱞᱮᱠᱟᱭ ᱦᱮᱸᱫᱮ ᱜᱮᱭᱟ ᱾” ᱢᱟᱹᱱ ᱫᱚ ᱛᱟᱭ ᱵᱚᱥ ᱜᱟᱹᱰᱤ ᱨᱮᱭᱟᱜ ᱰᱤᱜᱤᱨ ᱰᱤᱜᱤᱨ ᱫᱷᱩᱲᱤ ᱞᱮᱠᱟ ᱚᱴᱟᱝ ᱨᱟᱠᱟᱵᱚᱜ ᱠᱟᱱᱟ ᱾
ᱤᱱᱟᱹᱜ ᱛᱮᱜᱮ ᱵᱚᱥ ᱫᱚ ᱥᱮᱴᱮᱨ ᱮᱱᱟ ᱵᱷᱩᱵᱽᱱᱮᱥᱚᱨ ᱵᱟᱡᱟᱨ ᱨᱮ ᱾ ᱡᱚᱵᱟ ᱵᱟᱠᱷᱨᱟ ᱫᱚ ᱱᱟᱶᱟ ᱡᱟᱭᱜᱟ, ᱱᱟᱶᱟ ᱦᱚᱲ ᱠᱚ ᱜᱟᱫᱮᱞ ᱨᱮ ᱛᱷᱤᱨ ᱟᱠᱟᱱᱟᱭ ᱾ ᱡᱚᱛᱚ ᱠᱚ ᱠᱚᱭᱚᱜ ᱮ ᱠᱟᱱᱟ ᱟᱨ ᱟᱡ ᱦᱤᱞᱤ ᱠᱚ ᱠᱩᱞᱤ ᱮ ᱠᱟᱱᱟ, “ᱱᱩᱭ ᱫᱚ ᱚᱠᱚᱭ ? ᱥᱚᱱᱟ ᱨᱩᱯᱟᱹ ᱛᱮ ᱥᱟᱡᱟᱣ ᱟᱠᱟᱱᱟᱭ ᱦᱮᱸᱫᱮ ᱜᱮ ᱾” ᱟᱡ ᱦᱤᱞᱤ ᱢᱮᱱᱟᱭ, ᱟᱞᱮᱭᱤᱡ ᱫᱩᱞᱟᱹᱲ ᱢᱟᱹᱭ ᱡᱚᱵᱟ ᱠᱟᱱᱟᱭ ᱾ ᱤᱱᱟᱹᱜ ᱛᱮᱜᱮ ᱢᱤᱫ ᱫᱤᱠᱩ ᱯᱮᱲᱟ ᱡᱚᱵᱟ ᱧᱮᱞ ᱛᱮᱭ ᱢᱮᱱ ᱜᱚᱫᱟ, ᱚᱦᱚ ᱚᱱᱟ ᱛᱮᱜᱮ ᱱᱩᱭ ᱡᱟᱱᱟᱢ ᱵᱤᱴᱤ ᱫᱚ ᱵᱟᱭ ᱥᱟᱯᱷᱟᱦᱟ, ᱟᱡ ᱟᱭᱳ ᱞᱮᱠᱟ ᱫᱚ ᱾ ᱤᱱᱟᱹᱜ ᱛᱮ ᱟᱡ ᱦᱤᱞᱤ ᱫᱚᱭ ᱢᱮᱱ ᱜᱚᱫᱟ, – ᱨᱩᱯ ᱜᱚᱲᱦᱚᱱ, ᱨᱚᱝ ᱪᱮᱦᱨᱟ ᱠᱷᱚᱱ ᱫᱚ ᱟᱹᱠᱤᱞ ᱜᱮᱭᱟᱱ ᱜᱩᱱ ᱜᱮ ᱢᱟᱨᱟᱝ-ᱟ ᱾
ᱤᱱᱟᱹᱜ ᱛᱮᱜᱮ ᱡᱚᱵᱟ ᱞᱮᱠᱟᱱᱤᱡ ᱟᱨ ᱢᱤᱫ ᱫᱤᱠᱩ ᱢᱟᱹᱭ ᱮ ᱦᱮᱡ ᱮᱱᱟ, ᱟᱨ ᱡᱚᱵᱟ ᱟᱡᱟᱜ ᱩᱯᱨᱩᱢ ᱮ ᱠᱩᱞᱤ ᱮ ᱠᱟᱱᱟ ᱳᱰᱤᱭᱟᱹ ᱛᱮ ᱾ ᱡᱚᱵᱟ ᱵᱟᱭ ᱵᱩᱡᱷᱟᱹᱣ ᱞᱮᱱᱟ, ᱟᱨ ᱵᱟᱨ ᱯᱮ ᱫᱷᱟᱣ ᱠᱩᱞᱤ ᱠᱟᱛᱮ ᱨᱮᱦᱚᱸᱭ ᱛᱷᱤᱨ ᱟᱠᱟᱱᱟ ᱾ ᱚᱱᱟ ᱥᱩᱨ ᱨᱮᱜᱮ ᱟᱡ ᱦᱚᱯᱚᱱ ᱟᱭᱳᱭ ᱢᱮᱛᱟᱭ ᱠᱟᱱᱟ, – ᱢᱟᱥᱮ ᱱᱩᱭ ᱞᱮᱠᱟ ᱳᱰᱤᱭᱟᱹ ᱛᱮ ᱢᱮᱱ ᱢᱮ, ᱟᱢ ᱢᱟ ᱵᱟᱢ ᱨᱚᱲ, ᱧᱮᱞᱮ ᱢᱮ ᱱᱩᱭ ᱛᱤᱱᱟᱹᱜ ᱴᱟᱲᱟᱝ ᱴᱟᱲᱟᱝ ᱮ ᱨᱚᱲ ᱠᱟᱱᱟ ᱾
ᱡᱚᱵᱟᱭ ᱢᱮᱱᱟ, ᱵᱟᱝ ᱜᱮ, ᱵᱟᱝ ᱜᱮ, ᱢᱮᱱ ᱠᱟᱛᱮ ᱟᱡ ᱟᱭᱳᱣᱟᱜ ᱟᱧᱪᱟᱨ ᱥᱟᱵ ᱠᱟᱛᱮᱭ ᱩᱠᱩᱭᱮᱱᱟ ᱾ ᱟᱨ ᱢᱤᱫᱴᱟᱹᱝ ᱯᱮᱲᱟᱭ ᱢᱮᱱᱟ, ᱚᱱᱟᱛᱮ ᱤᱧ ᱢᱟ ᱥᱟᱱᱛᱟᱲ ᱛᱮ ᱵᱟᱹᱧ ᱨᱚᱲ ᱟᱠᱚᱣᱟ ᱤᱧ ᱨᱤᱱ ᱜᱤᱽᱫᱨᱟᱹ ᱠᱚ ᱾ ᱟᱫᱚ ᱚᱱᱟ ᱟᱸᱡᱚᱢ ᱠᱟᱛᱮ ᱡᱚᱵᱟ ᱟᱡ ᱫᱟᱫᱟ ᱡᱟᱦᱟᱸᱱᱟᱜ ᱮ ᱢᱮᱱ ᱢᱟᱲᱟᱝ ᱨᱮ, ᱡᱚᱵᱟᱭ ᱢᱮᱱ ᱜᱚᱫᱟ “ᱩᱱᱤ ᱢᱟᱹᱭ ᱢᱮᱛᱟᱭ ᱯᱮ, ᱟᱡ ᱦᱚᱸ ᱤᱧ ᱞᱮᱠᱟ ᱥᱟᱱᱛᱟᱲ ᱛᱮᱭ ᱨᱚᱲ ᱢᱟᱥᱮ, ᱤᱧ ᱦᱚᱸ ᱟᱡ ᱞᱮᱠᱟ ᱳᱰᱤᱭᱟᱹ ᱛᱮᱧ ᱨᱚᱲᱟ ᱾ ᱢᱟ ᱢᱮᱛᱟᱭ ᱯᱮ, ᱨᱚᱲ ᱠᱮᱭᱟᱭ ᱪᱮ ᱵᱟᱝ ᱜᱮ, ᱟᱡ ᱦᱚᱯᱚᱱ ᱟᱭᱳᱭ ᱢᱮᱱ ᱠᱮᱫᱼᱟ, ᱵᱟᱝ ᱜᱮ ᱾
ᱚᱱᱟ ᱥᱩᱨ ᱨᱤᱱ ᱥᱟᱱᱛᱟᱲ ᱯᱮᱲᱟ ᱠᱚ ᱫᱚᱠᱚ ᱛᱷᱟᱭᱚ ᱜᱚᱫᱟ ᱟᱨ ᱫᱤᱠᱩ ᱯᱮᱲᱟ ᱠᱚᱦᱚᱸ ᱠᱚ ᱛᱷᱟᱭᱚ ᱜᱚᱫᱟ ᱾
ᱫᱮᱞᱟ ᱵᱚᱱ ᱵᱮᱨᱮᱫ ᱯᱮ !!!
ᱫᱮᱞᱟ ᱵᱚᱱ ᱵᱮᱸᱜᱮᱫᱽ ᱯᱮ !!!
ᱵᱟᱦᱟ ᱥᱚᱸᱫᱷᱟᱲ ᱞᱮᱠᱟ
ᱯᱟᱹᱨᱥᱤ ᱨᱚᱲ ᱯᱟᱥᱱᱟᱣ ᱯᱮ ᱾
***
