ᱡᱟᱦᱮᱨ ᱟᱭᱳ ᱟᱨ ᱢᱟᱨᱟᱝ ᱵᱳᱨᱳ ᱛᱤᱠᱤᱱᱟᱜ ᱛᱷᱩᱢ ᱛᱮᱜᱮ ᱢᱤᱫᱴᱟᱹᱝ ᱠᱩᱲᱤ ᱦᱚᱯᱚᱱᱟᱜ ᱵᱟᱯᱞᱟ ᱫᱚ ᱴᱷᱟᱹᱣᱠᱟᱹᱜᱼᱟ ᱾ ᱵᱤᱴᱤ ᱫᱚ ᱟᱭᱳ ᱵᱟᱵᱟᱦᱟᱜ ᱚᱲᱟᱜ ᱫᱩᱣᱟᱹᱨ ᱵᱟᱹᱜᱤ ᱠᱟᱛᱮ ᱱᱤᱡᱮ ᱡᱟᱶᱟᱭ ᱚᱲᱟᱜ ᱛᱮ ᱵᱤᱫᱟᱹᱭ ᱪᱟᱞᱟᱜ ᱟᱭ ᱾ ᱟᱭᱳ ᱵᱟᱵᱟ ᱛᱤᱠᱤᱱᱟᱜ ᱢᱮᱫ ᱫᱟᱜ ᱡᱚᱨᱚᱜ ᱨᱮᱦᱚᱸ ᱟᱹᱠᱤᱱᱟᱜ ᱚᱱᱛᱚᱨ ᱢᱚᱱᱮᱨᱮ ᱨᱟᱹᱥᱠᱟᱹ ᱛᱟᱦᱮᱸᱱᱟ ᱡᱮ ᱵᱤᱴᱤ ᱫᱚ ᱟᱡᱟᱜ ᱚᱲᱟᱜ ᱫᱩᱣᱟᱹᱨ ᱮ ᱧᱟᱢ ᱠᱮᱫᱼᱟ ᱾ ᱢᱤᱫᱴᱟᱹᱝ ᱠᱩᱲᱤ ᱦᱚᱯᱚᱱ ᱡᱚᱠᱷᱚᱱ ᱟᱡᱟᱜ ᱡᱟᱶᱟᱭ ᱚᱲᱟᱜ ᱛᱮ ᱵᱤᱫᱟᱹᱭ ᱪᱟᱞᱟᱜ ᱟᱭ ᱩᱱᱤ ᱫᱚ ᱚᱱᱟ ᱚᱲᱟᱜ ᱨᱤᱱᱤᱡ ᱢᱤᱫᱴᱟᱹᱝ ᱱᱟᱶᱟ ᱥᱚᱦᱮᱫ ᱮ ᱦᱩᱭᱩᱜᱼᱟ ᱾ ᱟᱡ ᱫᱚ ᱟᱡᱟᱜ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱡᱚᱛᱚᱣᱟᱜ ᱟᱯᱱᱟᱨ ᱠᱟᱛᱮ ᱛᱟᱦᱮᱸ ᱦᱩᱭ ᱟᱭᱟ ᱾ ᱩᱱ ᱠᱷᱚᱱ ᱜᱮ ᱟᱡ ᱪᱮᱛᱟᱱ ᱟᱹᱰᱤ ᱢᱟᱨᱟᱝ ᱫᱟᱭᱛᱚᱭ ᱧᱟᱢᱟ ᱾ ᱡᱚᱛᱚ ᱦᱚᱲ ᱱᱟᱭ ᱛᱮ ᱱᱟᱯᱟᱭ ᱛᱮᱠᱚ ᱛᱟᱦᱮᱸᱱ ᱢᱟ ᱚᱱᱟ ᱜᱮ ᱟᱡᱟᱜ ᱩᱭᱦᱟᱹᱨ ᱛᱟᱦᱮᱸᱱᱟ ᱾ ᱯᱟᱨᱟᱵᱽ ᱯᱩᱱᱟᱹᱭ ᱠᱚᱨᱮ ᱚᱲᱟᱜ ᱫᱩᱣᱟᱹᱨ ᱥᱟᱯᱷᱟ ᱥᱟᱹᱯᱷᱤ ᱥᱮ ᱡᱮᱨᱮᱲ ᱯᱚᱛᱟᱣ ᱜᱮᱡ ᱜᱩᱨᱤᱡ ᱞᱩᱜᱽᱲᱤ ᱠᱚ ᱛᱤᱠᱤ ᱥᱚᱵᱚᱫ, ᱦᱳᱲᱳ ᱦᱮᱰᱮᱡ ᱛᱤᱠᱤ ᱛᱟᱥᱮ ᱨᱚᱦᱚᱲ ᱠᱟᱛᱮ ᱪᱟᱣᱞᱮ ᱵᱮᱱᱟᱣ, ᱵᱚᱸᱜᱟ ᱵᱳᱨᱳ ᱠᱚᱨᱮᱱᱟᱜ ᱥᱟᱯᱲᱟᱣ, ᱵᱚᱸᱜᱟ ᱯᱷᱩᱲᱩᱜ ᱵᱮᱱᱟᱣ, ᱵᱚᱸᱜᱟ ᱦᱟᱺᱰᱤ ᱵᱮᱱᱟᱣ ᱡᱚᱛᱚᱣᱟᱜ ᱜᱮ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤᱭᱟᱜ ᱫᱟᱹᱭᱛᱚ ᱫᱚ ᱾
ᱱᱤᱡᱮ ᱡᱟᱶᱟᱭ ᱥᱟᱶ ᱛᱤᱸᱜᱩ ᱠᱮᱴᱮᱡ ᱠᱟᱛᱮ ᱱᱤᱡᱮ ᱜᱷᱟᱨᱚᱸᱡᱽ ᱧᱮᱞ ᱥᱟᱸᱵᱽᱲᱟᱣ ᱜᱮ ᱟᱹᱰᱤ ᱢᱟᱨᱟᱝ ᱡᱤᱢᱟᱹ ᱠᱟᱱᱟ ᱾ ᱥᱩᱞᱩᱠ ᱥᱟᱹᱜᱟᱹᱭ ᱡᱟᱭᱡᱩᱜᱽ ᱜᱮ ᱛᱚᱯᱚᱞ ᱛᱟᱦᱮᱸᱱ ᱢᱟ ᱚᱱᱟᱜᱮ ᱪᱮᱥᱴᱟ ᱛᱟᱦᱮᱸ ᱞᱟᱹᱠᱛᱤᱜ ᱠᱟᱱᱟ ᱾ ᱛᱤᱨᱞᱟᱹ ᱦᱚᱯᱚᱱ ᱫᱚ ᱢᱤᱫᱴᱟᱹᱝ ᱧᱩᱛᱟᱹᱛ ᱚᱲᱟᱜ ᱨᱮ ᱢᱟᱨᱥᱟᱞ ᱮ ᱟᱹᱜᱩᱭᱟ ᱾ ᱯᱮᱲᱟ ᱯᱟᱹᱦᱬᱟᱹ ᱠᱚ ᱞᱚᱴᱟ ᱫᱟᱜ ᱥᱮᱯᱮᱧ ᱠᱟᱛᱮ ᱜᱚᱰ ᱡᱚᱦᱟᱨ ᱠᱟᱛᱮ ᱟᱡ ᱜᱮᱭ ᱫᱟᱨᱟᱢ ᱠᱚᱣᱟ ᱾ ᱟᱡᱟᱜ ᱟᱪᱟᱨ ᱵᱮᱵᱷᱟᱨ ᱛᱮᱜᱮ ᱥᱟᱱᱟᱢ ᱦᱚᱲ ᱠᱚᱣᱟᱜ ᱛᱷᱩᱢ ᱥᱟᱨᱦᱟᱣ ᱮ ᱧᱟᱢᱟ ᱾ ᱢᱮᱱᱠᱷᱟᱱ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤᱭᱟᱜ ᱫᱟᱹᱭᱛᱚ ᱱᱤᱭᱟᱹ ᱜᱮ ᱛᱟᱦᱮᱸᱱ ᱢᱟ ᱡᱮ ᱚᱲᱟᱜ ᱨᱮᱱᱟᱜ ᱥᱩᱞᱩᱠ ᱥᱟᱹᱜᱟᱹᱭ ᱟᱞᱚ ᱵᱷᱮᱜᱮᱫᱚᱜ ᱢᱟ ᱾ ᱛᱤᱱᱟᱹᱝ ᱜᱟᱱ ᱮᱴᱠᱮᱴᱚᱬᱮ ᱦᱩᱭᱩᱜᱼᱟ ᱢᱮᱱᱠᱷᱟᱱ ᱚᱱᱟ ᱠᱚ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱞᱟᱦᱟ ᱥᱮᱫᱟᱜ ᱵᱮᱥ ᱦᱩᱭᱩᱜ ᱢᱟ ᱚᱱᱟ ᱜᱮ ᱢᱤᱫ ᱠᱩᱲᱤ ᱦᱚᱯᱚᱱ ᱫᱚ ᱞᱮᱛᱟᱲ ᱮ ᱩᱭᱦᱟᱹᱨᱟ ᱾
ᱡᱟᱶᱟᱭ ᱚᱲᱟᱜ ᱨᱮ ᱡᱚᱛᱚ ᱫᱤᱱ ᱫᱚ ᱥᱚᱢᱟᱱ ᱵᱟᱝ ᱛᱟᱦᱮᱸᱱᱟ ᱾ ᱪᱮᱫ ᱠᱚᱪᱚ ᱱᱷᱟᱜ ᱚᱱᱠᱟ ᱜᱮ ᱨᱩᱣᱟᱹᱜ ᱦᱟᱹᱥᱩ ᱦᱚᱸ ᱦᱩᱭᱩᱜ ᱜᱮᱭᱟ ᱾ ᱥᱮ ᱛᱟᱞᱟ ᱛᱟᱞᱟ ᱨᱮ ᱴᱟᱠᱟ ᱠᱟᱹᱣᱰᱤ ᱨᱮᱱᱟᱜ ᱚᱵᱷᱟᱵᱽ ᱦᱚᱸ ᱦᱩᱭ ᱜᱚᱫᱚᱜ ᱜᱮᱭᱟ ᱾ ᱟᱫᱚ ᱵᱟᱹᱦᱩ ᱠᱩᱲᱤᱭᱟᱜ ᱡᱤᱢᱟᱹ ᱛᱟᱦᱮᱸᱱᱟ ᱡᱮ ᱪᱮᱫ ᱞᱮᱠᱟᱨᱮ ᱡᱚᱛᱚᱣᱟᱜ ᱵᱮᱥᱚᱜ ᱢᱟ ᱾ ᱫᱚᱨᱠᱟᱨ ᱯᱟᱲᱟᱣ ᱞᱮᱱᱠᱷᱟᱱ ᱱᱤᱡᱮ ᱚᱲᱟᱜ ᱫᱩᱣᱟᱹᱨ ᱞᱟᱹᱜᱤᱫ ᱵᱟᱦᱨᱮ ᱠᱟᱹᱢᱤ ᱦᱚᱸ ᱪᱟᱞᱟᱣ ᱦᱩᱭ ᱟᱭᱟ ᱾ ᱟᱹᱰᱤ ᱜᱚᱨᱚᱵᱽ ᱨᱮᱱᱟᱜ ᱠᱟᱛᱷᱟ ᱠᱟᱱᱟ ᱢᱤᱫᱴᱟᱹᱝ ᱛᱤᱨᱞᱟᱹ ᱦᱚᱯᱚᱱ ᱞᱟᱹᱜᱤᱫ ᱡᱮ ᱵᱟᱯᱞᱟ ᱠᱟᱛᱮ ᱟᱡ ᱡᱟᱶᱟᱭ ᱚᱲᱟᱜ ᱮ ᱪᱟᱞᱟᱜ ᱟᱭ ᱾ ᱥᱟᱹᱨᱤ ᱜᱮ ᱢᱟᱨᱟᱝ ᱵᱳᱨᱳ ᱟᱨ ᱡᱟᱦᱮᱨ ᱟᱭᱳᱣᱟᱜ ᱟᱹᱰᱤ ᱢᱟᱨᱟᱝ ᱛᱷᱩᱢ ᱛᱟᱦᱮᱸᱱᱟ ᱾ ᱱᱚᱶᱟ ᱦᱚᱸ ᱥᱟᱹᱨᱤ ᱠᱟᱛᱷᱟ ᱠᱟᱱᱟ ᱡᱮ ᱡᱚᱛᱚ ᱦᱚᱲᱟᱜ ᱢᱚᱞᱚᱝ ᱞᱤᱠᱷᱚᱱ ᱨᱮ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱥᱩᱠ ᱫᱚ ᱵᱟᱝ ᱛᱟᱦᱮᱸᱱᱟ ᱾
***
