ᱢᱤᱫᱴᱟᱹᱝ ᱠᱩᱲᱤ ᱜᱤᱫᱽᱨᱟᱹ ᱵᱟᱯᱞᱟ ᱛᱟᱭᱚᱢ ᱫᱚ ᱩᱱᱤ ᱫᱚ ᱵᱟᱹᱦᱩ ᱠᱩᱲᱤᱭ ᱦᱩᱭᱩᱜᱼᱟ ᱾ ᱡᱟᱸᱦᱟ ᱜᱷᱟᱨᱚᱸᱡᱽ ᱨᱮᱭ ᱵᱚᱞᱚᱱᱟ, ᱚᱱᱟ ᱜᱷᱟᱨᱚᱸᱡᱽ ᱨᱮᱱᱟᱜ ᱵᱚᱸᱜᱟ ᱵᱳᱨᱳ ᱠᱟᱹᱢᱤ ᱦᱚᱨᱟ ᱠᱷᱚᱱ ᱮᱦᱚᱵ ᱠᱟᱛᱮ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱠᱟᱹᱥᱱᱤ ᱜᱮ ᱵᱟᱹᱦᱩ ᱠᱩᱲᱤ ᱠᱚᱨᱟᱣ ᱦᱩᱭᱩᱜ ᱛᱟᱭᱟ ᱾ ᱠᱩᱲᱤ ᱜᱤᱫᱽᱨᱟᱹ ᱡᱟᱶᱟᱭ ᱛᱟᱭᱚᱢ ᱫᱚ ᱡᱟᱶᱟᱭ ᱚᱲᱟᱜ ᱜᱮ ᱦᱩᱭ ᱮᱱ ᱛᱟᱭᱟ ᱟᱭᱟᱜ ᱚᱲᱟᱜ ᱾ ᱚᱱᱟᱛᱮ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱵᱷᱟᱹᱜᱤ ᱵᱟᱹᱲᱤᱡ ᱥᱟᱱᱟᱢ ᱧᱮᱞ ᱨᱮᱱᱟᱜ ᱟᱸᱹᱜᱤᱵᱷᱟᱨ ᱫᱚ ᱛᱟᱸᱦᱮᱱ ᱛᱟᱭᱟ ᱾ ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱫᱚ ᱡᱟᱶᱟᱭ ᱠᱚᱲᱟ ᱥᱮ ᱵᱟᱹᱦᱩ ᱠᱩᱲᱤ ᱮᱠᱞᱟ ᱥᱩᱢᱩᱝ ᱛᱮᱫᱚ ᱵᱟᱝ ᱪᱟᱞᱟᱜᱼᱟ ᱾ ᱡᱟᱶᱟᱭ ᱠᱚᱲᱟ ᱟᱨ ᱵᱟᱹᱦᱩ ᱠᱩᱲᱤ ᱵᱟᱱᱟ ᱦᱚᱲ ᱟᱜ ᱜᱮ ᱥᱚᱢᱟᱱ ᱟᱺᱜᱤᱵᱷᱟᱨ ᱫᱚ ᱛᱟᱸᱦᱮᱱ ᱛᱟᱹᱠᱤᱱᱟ ᱾ ᱵᱟᱹᱦᱩ ᱠᱩᱲᱤ ᱫᱚᱵᱚᱱ ᱢᱮᱛᱟ ᱠᱚᱣᱟ ᱜᱷᱟᱨᱚᱸᱡᱽ ᱨᱤᱱᱤᱡ ᱨᱟᱹᱱᱤ ᱾
ᱢᱤᱫᱴᱟᱹᱝ ᱱᱟᱯᱟᱭ ᱜᱷᱟᱨᱚᱸᱡᱽ ᱛᱮᱭᱟᱨ ᱞᱟᱹᱜᱤᱫ ᱛᱮ ᱵᱟᱹᱦᱩ ᱠᱩᱲᱤᱭᱟᱜ ᱟᱹᱰᱤ ᱟᱭᱢᱟ ᱮᱱᱮᱢ ᱛᱟᱸᱦᱮᱱᱟ ᱾ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤ ᱜᱮᱭ ᱛᱮᱭᱟᱨ ᱨᱟᱠᱟᱵ ᱫᱟᱲᱮᱭᱟᱜᱼᱟ ᱢᱤᱫᱴᱟᱹᱝ ᱥᱩᱞᱩᱠ ᱜᱷᱟᱨᱚᱸᱡᱽ ᱫᱚ ᱾ ᱵᱟᱹᱦᱩ ᱠᱩᱲᱤ ᱵᱮᱜᱚᱨ ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱫᱚ ᱵᱟᱝ ᱥᱟᱹᱠᱷᱤ ᱥᱚᱵᱷᱟᱜᱼᱟ ᱾ ᱵᱟᱯᱞᱟ ᱛᱟᱭᱚᱢ ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱨᱮ ᱡᱚᱠᱷᱚᱱ ᱮ ᱦᱤᱡᱩᱜ ᱠᱟᱱᱟ ᱩᱱ ᱫᱚ ᱚᱱᱟ ᱥᱚᱝᱥᱟᱨ ᱪᱟᱞᱟᱣ ᱥᱮ ᱜᱷᱟᱨᱚᱸᱡᱽ ᱪᱟᱪᱞᱟᱣ ᱞᱟᱹᱜᱤᱫ ᱵᱟᱹᱦᱩ ᱠᱩᱲᱤᱭᱟᱜ ᱟᱸᱹᱜᱤᱵᱷᱟᱨ ᱛᱟᱸᱦᱮᱱ ᱛᱟᱭᱟ ᱾ ᱚᱲᱟᱜ ᱨᱮᱱᱟᱜ ᱡᱚᱜ ᱜᱤᱰᱤ, ᱤᱥᱤᱱ ᱵᱟᱥᱟᱝ ᱥᱟᱶᱛᱮ ᱥᱚᱝᱥᱟᱨ ᱨᱮᱱᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱜᱮ ᱠᱚᱨᱟᱣ ᱦᱳᱭᱳᱜ ᱛᱟᱭᱟ ᱾ ᱜᱤᱫᱽᱨᱟᱹ ᱠᱚ ᱵᱟᱜᱟᱣ ᱟᱨ ᱩᱱᱠᱩ ᱟᱜ ᱵᱷᱟᱹᱜᱤ ᱵᱟᱹᱲᱤᱡ ᱧᱮᱞ ᱾ ᱜᱷᱟᱨᱚᱸᱡᱽ ᱨᱮᱱᱟᱜ ᱠᱟᱹᱢᱤ ᱫᱚ ᱡᱟᱶᱟᱭ ᱠᱚᱲᱟ ᱥᱩᱢᱩᱝ ᱫᱚ ᱵᱟᱭ ᱠᱟᱹᱢᱤᱭᱟ ᱵᱟᱹᱦᱩ ᱠᱩᱲᱤ ᱦᱚᱸᱭ ᱠᱟᱹᱢᱤ ᱜᱚᱲᱚ ᱟᱭᱟ ᱾ ᱵᱟᱹᱦᱩ ᱠᱩᱲᱤ ᱫᱚ ᱥᱟᱱᱟᱢ ᱞᱮᱠᱟᱱ ᱠᱟᱹᱢᱤ ᱨᱮ ᱟᱡ ᱡᱟᱶᱟᱭ ᱜᱚᱲᱚᱭ ᱮᱢᱟᱭᱟ ᱾ ᱟᱡ ᱡᱟᱶᱟᱭ ᱟᱜ ᱥᱩᱠ ᱫᱩᱠ ᱧᱮᱞ ᱨᱮᱱᱟᱜ ᱫᱟᱭᱵᱷᱟᱨ ᱞᱟᱫᱮ ᱛᱟᱸᱦᱮᱱᱟ ᱾ ᱡᱟᱶᱟᱭ ᱥᱩᱢᱩᱝ ᱫᱚ ᱵᱟᱝ ᱡᱟᱶᱟᱭ ᱚᱲᱟᱜ ᱨᱮᱱ ᱟᱨ ᱡᱟᱸᱦᱟᱭ ᱠᱚᱠᱚ ᱛᱟᱸᱦᱮᱱᱟ ᱩᱱᱠᱩ ᱱᱟᱯᱟᱭ ᱛᱮ ᱫᱚᱦᱚ ᱨᱮᱱᱟᱜ ᱦᱚᱸ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱛᱟᱸᱦᱮᱱ ᱛᱟᱭᱟ ᱾
ᱦᱟᱱᱦᱟᱨ, ᱦᱚᱧᱦᱟᱨ ᱨᱩᱣᱟᱹ ᱦᱟᱹᱥᱩ ᱨᱮ ᱡᱚᱜᱟᱣ ᱡᱚᱛᱚᱱ ᱠᱤᱱ ᱦᱩᱭᱩᱜ ᱛᱟᱭᱟ ᱾ ᱵᱟᱦᱟ, ᱥᱚᱦᱨᱟᱭ ᱵᱚᱸᱜᱟ ᱵᱳᱨᱳ ᱨᱮ ᱦᱤᱡᱩᱜ ᱟᱠᱚ ᱱᱮᱶᱛᱟ ᱯᱮᱲᱟ ᱠᱚ ᱥᱟᱱᱟᱢ ᱯᱮᱲᱟ ᱜᱮ ᱨᱟᱹᱥᱠᱟᱹ ᱥᱟᱶ ᱠᱟᱛᱮᱫ ᱟᱛᱟᱝ ᱫᱟᱨᱟᱢ ᱦᱩᱭᱩᱜ ᱛᱟᱭᱟ ᱾ ᱜᱷᱟᱨᱚᱸᱡᱽ ᱨᱮ ᱦᱩᱰᱤᱧ ᱦᱩᱰᱤᱧ ᱟᱭᱢᱟ ᱞᱮᱠᱟᱱ ᱮᱯᱮᱨ ᱦᱮᱸᱰᱮᱡ ᱠᱟᱹᱭᱡᱟᱹ ᱠᱷᱟᱹᱯᱟᱹᱨᱤ ᱦᱩᱭᱩᱜᱼᱟ ᱾ ᱚᱱᱟ ᱠᱚ ᱵᱟᱹᱦᱩ ᱠᱩᱲᱤ ᱫᱚ ᱥᱟᱱᱟᱢᱟᱜ ᱥᱟᱦᱟ ᱠᱟᱛᱮᱫ ᱜᱷᱟᱨᱚᱸᱡᱽ ᱨᱮᱱᱟᱜ ᱠᱟᱹᱢᱤ ᱨᱮ ᱞᱟᱦᱟᱜ ᱦᱩᱭᱩᱜ ᱛᱟᱭᱟ ᱾
ᱟᱵᱚ ᱥᱟᱱᱛᱟᱲ ᱥᱚᱢᱟᱡᱽ ᱨᱮ ᱧᱮᱞ ᱟᱠᱟᱱᱟ, ᱟᱵᱚ ᱨᱮᱱ ᱵᱟᱹᱦᱩ ᱠᱩᱲᱤ ᱠᱚᱫᱚ ᱚᱲᱟᱜ ᱨᱮ ᱫᱩᱲᱩᱵ ᱫᱩᱲᱩᱵ ᱫᱚ ᱵᱟᱝ ᱠᱚ ᱡᱚᱢ ᱮᱫᱼᱟ ᱾ ᱜᱷᱟᱨᱚᱸᱡᱽ ᱨᱮᱱᱟᱜ ᱥᱟᱱᱟᱢ ᱠᱟᱹᱢᱤ ᱨᱮ ᱡᱚᱯᱲᱟᱣ ᱫᱚ ᱢᱮᱱᱟᱜ ᱠᱚ ᱜᱮᱭᱟ ᱾ ᱠᱷᱮᱛ ᱵᱟᱹᱫᱽ ᱠᱚᱨᱮ ᱠᱟᱹᱢᱤ ᱨᱮᱦᱚᱸ ᱵᱟᱹᱦᱩ ᱠᱚᱲᱤ ᱦᱚᱸᱭ ᱠᱟᱹᱢᱤ ᱠᱟᱱᱟ ᱾ ᱥᱟᱹᱨᱫᱤ ᱥᱤᱛᱩᱝ, ᱫᱟᱜ ᱡᱟᱹᱯᱩᱫ ᱥᱟᱱᱟᱢ ᱞᱮᱠᱟᱱ ᱚᱠᱛᱚ ᱨᱮ ᱟᱡ ᱡᱟᱶᱟᱭ ᱥᱟᱞᱟᱜ ᱮ ᱠᱷᱟᱴᱟᱣᱜᱼᱟ ᱾ ᱡᱟᱛᱮ ᱥᱚᱝᱥᱟᱨ ᱨᱮᱱᱟᱜ ᱟᱱᱟᱴ ᱠᱚ ᱥᱟᱦᱟᱜ ᱢᱟ ᱾ ᱥᱚᱝᱥᱟᱨ ᱨᱮᱱᱟᱜ ᱟᱱᱟᱴ ᱠᱚ ᱥᱮᱴᱮᱨ ᱞᱮᱱᱠᱷᱟᱱ ᱵᱟᱹᱦᱩ ᱠᱩᱲᱤ ᱦᱚᱸ ᱚᱱᱟ ᱟᱱᱟᱴ ᱥᱚᱞᱦᱮ ᱨᱮᱱᱟᱜ ᱮ ᱨᱤᱠᱟᱹᱭᱟ ᱾ ᱡᱟᱶᱟᱭ ᱚᱲᱟᱜ ᱱᱟᱯᱟᱭ ᱛᱮ ᱪᱟᱪᱞᱟᱣ ᱞᱟᱹᱜᱤᱫ ᱵᱟᱹᱦᱩ ᱠᱩᱲᱤ ᱫᱚ ᱡᱟᱸᱣᱟᱭ ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱠᱚᱨᱟᱣ ᱦᱩᱭᱩᱜ ᱛᱟᱭᱟ ᱾ ᱡᱟᱶᱟᱭ ᱚᱲᱟᱜ ᱱᱟᱯᱟᱭ ᱛᱮ ᱫᱚᱦᱚ ᱞᱟᱹᱜᱤᱫ ᱥᱮ ᱢᱤᱫᱴᱟᱹᱝ ᱱᱟᱯᱟᱭ ᱜᱷᱟᱨᱚᱸᱡᱽ ᱛᱮᱭᱟᱨ ᱫᱚ ᱢᱤᱫ ᱵᱟᱹᱦᱩ ᱠᱩᱲᱤ ᱜᱮᱭ ᱫᱟᱲᱮᱭᱟᱜᱼᱟ ᱾
***
