ᱵᱟᱵᱟ ᱵᱟᱹᱠᱷᱳᱞ ᱨᱤᱱᱤᱡ ᱫᱩᱞᱟᱹᱲ ᱢᱤᱨᱩ
ᱥᱟᱺᱜᱤᱧ ᱫᱤᱥᱚᱢ ᱛᱮᱠᱚ ᱵᱟᱹᱱᱤᱡ ᱠᱮᱫ ᱢᱮ
ᱢᱮᱬᱦᱮᱫ ᱥᱟᱠᱚᱢ ᱛᱮᱠᱚ ᱦᱟᱹᱲᱤ ᱠᱮᱫ ᱢᱮ
ᱠᱤᱭᱟᱹ ᱥᱤᱸᱫᱩᱨ ᱛᱮᱠᱚ ᱡᱟᱹᱛᱤ ᱠᱮᱫ ᱢᱮ
ᱠᱩᱶᱟᱹᱨᱤ ᱢᱚᱱ ᱫᱚᱨᱮ ᱵᱚᱫᱚᱞ ᱮᱱᱟ ᱾
ᱴᱩᱴᱩᱨᱤ ᱵᱟᱹᱴᱩᱨᱤ ᱱᱟᱶᱟ ᱵᱟᱹᱦᱩ
ᱵᱚᱫᱚᱞ ᱮᱱᱟ ᱡᱤᱭᱚᱱ ᱱᱟᱶᱟ ᱜᱷᱟᱨᱚᱸᱡᱽ
ᱱᱟᱶᱟ ᱥᱚᱝᱥᱟᱨ ᱨᱮᱭᱟᱜ ᱦᱟᱢᱟᱞ ᱵᱷᱟᱹᱨᱭᱟᱹ
ᱞᱟᱫᱮ ᱮᱱᱟ ᱵᱚᱦᱚᱜ ᱪᱮᱛᱟᱱ ᱨᱮ ᱾
ᱥᱩᱞᱩᱠ ᱜᱷᱟᱨᱚᱸᱡᱽ ᱛᱮᱭᱟᱨ ᱨᱮᱱᱟᱜ
ᱥᱟᱹᱨᱤ ᱠᱩᱠᱢᱩ ᱵᱟᱡᱟᱣ ᱮᱱᱟ ᱚᱱᱛᱚᱨ ᱢᱚᱱᱮᱨᱮ
ᱡᱚᱜ ᱨᱟᱪᱟ ᱤᱥᱤᱱ ᱵᱟᱥᱟᱝ ᱠᱟᱹᱢᱤ
ᱫᱤᱱᱟᱹᱢ ᱥᱮᱛᱟᱜ ᱟᱹᱭᱩᱵ
ᱜᱤᱛᱤᱞ ᱜᱟᱥᱟᱣ ᱢᱟᱡᱟᱣ ᱨᱤᱞᱤᱯᱷᱤᱞᱤ
ᱥᱟᱯᱷᱟ ᱥᱟᱹᱯᱷᱤᱢ ᱫᱚᱦᱚᱭ ᱟᱹᱰᱤ ᱡᱚᱛᱚᱱ ᱾
ᱦᱟᱱᱦᱟᱨ ᱦᱚᱧᱦᱟᱨ ᱵᱟᱦᱚᱧᱦᱟᱨ ᱢᱟᱱᱟᱣ ᱜᱩᱱᱟᱹᱣ
ᱢᱟᱹᱱ ᱢᱟᱱᱚᱛ ᱡᱚᱦᱟᱨ ᱮᱢ ᱪᱟᱞ ᱟᱠᱚ
ᱟᱢᱟᱜ ᱱᱟᱯᱟᱭ ᱨᱚᱲ ᱞᱟᱸᱫᱟ
ᱱᱟᱯᱟᱭ ᱵᱮᱵᱷᱟᱨ ᱛᱮ ᱨᱟᱹᱥᱠᱟᱹ ᱨᱟᱥᱟ
ᱪᱷᱟᱹᱯᱞᱟᱹᱣ ᱨᱟᱠᱟᱵᱟ ᱪᱮᱲᱮᱢ ᱪᱮᱲᱮᱢ ᱾
ᱦᱚᱵᱚᱨ ᱯᱮᱨᱮᱡ ᱥᱚᱱᱟ ᱵᱟᱞᱚᱠ
ᱪᱚᱜ ᱪᱮᱨᱮᱡ ᱛᱮ ᱥᱚᱦᱟᱜᱽ ᱫᱩᱞᱟᱹᱲ ᱛᱮ
ᱥᱚᱱᱮᱨ ᱥᱚᱝᱥᱟᱨ ᱨᱮᱠᱚ ᱦᱟᱨᱟᱵᱩᱨᱩᱜ
ᱥᱩᱠ ᱫᱤᱱ ᱨᱮ ᱟᱢ ᱫᱚ ᱥᱩᱠᱟᱹᱞᱤ
ᱫᱩᱠ ᱫᱤᱱ ᱨᱮ ᱟᱢ ᱫᱚ ᱫᱩᱠᱷᱟᱹᱞᱤ
ᱦᱤᱰᱤᱨ ᱢᱮᱫ ᱫᱟᱜ ᱮᱢ ᱡᱚᱫᱚᱜ
ᱜᱚᱜᱚᱜ ᱟᱧᱪᱟᱨ ᱛᱮ ᱾
ᱟᱢᱟᱜ ᱥᱮᱵᱟ ᱡᱚᱛᱚᱱ ᱛᱮ
ᱟᱢᱟᱜ ᱠᱟᱹᱢᱤ ᱠᱟᱹᱨᱫᱷᱟᱹᱱᱤ ᱛᱮ
ᱡᱚᱨᱚᱜ ᱥᱩᱠᱷ ᱮᱢ ᱥᱮᱯᱮᱧ ᱥᱚᱝᱥᱟᱨ ᱛᱟᱞᱟ,
ᱟᱢ ᱜᱮ ᱚᱲᱟᱜ ᱞᱩᱠᱷᱤ ᱵᱟᱹᱦᱩ ᱠᱩᱲᱤ
ᱜᱮᱡ ᱜᱩᱨᱤᱡ ᱡᱮᱨᱮᱲ ᱯᱚᱛᱟᱣ
ᱡᱷᱟᱠ ᱡᱷᱟᱠ ᱮᱢ ᱥᱟᱯᱷᱟᱭᱟ ᱚᱲᱟᱜ ᱫᱩᱣᱟᱹᱨ ᱾
ᱛᱮᱠᱮ ᱥᱚᱵᱚᱫ ᱯᱷᱟᱨᱪᱟ ᱯᱷᱟᱹᱨᱪᱤ ᱠᱟᱹᱢᱤ
ᱱᱮᱭᱟᱢ ᱱᱮᱢᱟᱪᱟᱨ ᱵᱚᱸᱜᱟ ᱠᱟᱹᱢᱤ
ᱡᱷᱚᱛᱚ ᱟᱢ ᱜᱮᱢ ᱠᱟᱹᱢᱤ,
ᱵᱚᱸᱜᱟ ᱞᱟᱹᱜᱤᱫ ᱪᱚᱰᱚᱨ ᱦᱟᱺᱰᱤ
ᱱᱮᱭᱟᱢ ᱫᱷᱚᱨᱚᱢ ᱠᱟᱛᱮ
ᱟᱢ ᱜᱮᱢ ᱵᱮᱱᱟᱣᱟ ᱟᱹᱰᱤ ᱡᱚᱛᱚᱱ ᱛᱮ ᱾
ᱚᱲᱟᱜ ᱫᱩᱣᱟᱹᱨ ᱨᱮᱱᱟᱜ ᱠᱟᱹᱢᱤ
ᱵᱷᱤᱛᱟᱹᱨ ᱵᱟᱦᱮᱨ ᱨᱮᱱᱟᱜ ᱠᱟᱹᱢᱤ
ᱡᱷᱚᱛᱚ ᱟᱢ ᱜᱮᱢ ᱠᱟᱹᱢᱤ
ᱦᱮᱥᱮᱡ ᱥᱮᱠᱮᱡ ᱮᱢ ᱫᱚᱦᱚᱭ
ᱜᱚᱴᱟ ᱜᱷᱟᱨᱚᱸᱡᱽ ᱾
ᱟᱢᱟᱜ ᱥᱮᱪᱮᱫ ᱫᱟᱲᱮ ᱛᱮ
ᱦᱚᱲᱮᱢ ᱥᱤᱠᱷᱟᱹᱣ ᱯᱟᱲᱦᱟᱣ ᱠᱚᱣᱟ
ᱜᱷᱟᱨᱚᱸᱡᱽ ᱥᱚᱝᱥᱟᱨ ᱥᱮᱪᱮᱫᱚᱜ ᱨᱤᱞᱟᱹᱢᱟᱞᱟ
ᱞᱟᱦᱟᱱᱛᱤ ᱰᱟᱦᱟᱨ ᱨᱮ ᱥᱟᱶᱛᱟ
ᱯᱟᱹᱣᱲᱤ ᱞᱟᱦᱟᱭᱟ ᱾
ᱟᱢ ᱜᱮᱢ ᱡᱮᱨᱮᱫᱟ ᱟᱹᱠᱤᱞ ᱢᱟᱨᱥᱟᱞ ᱵᱟᱹᱛᱤ
ᱰᱤᱜᱽ ᱰᱤᱜᱽ ᱢᱟᱨᱥᱟᱞ ᱟᱦᱞᱟ ᱛᱮ
ᱟᱨᱥᱟᱞ ᱠᱚᱜᱼᱟ ᱥᱚᱝᱥᱟᱨ ᱜᱷᱟᱨᱚᱸᱡᱽ,
ᱥᱟᱭ ᱯᱩᱲᱥᱤᱢ ᱟᱯᱱᱟᱨ ᱠᱚᱣᱟ
ᱜᱷᱟᱨᱚᱸᱡᱽ ᱥᱚᱝᱥᱟᱨ ᱮᱢ ᱟᱯᱱᱟᱨᱟ
ᱯᱮᱲᱟ ᱯᱟᱹᱦᱬᱟᱹᱢ ᱫᱟᱨᱟᱢ ᱠᱚᱣᱟ
ᱟᱢᱟᱜ ᱥᱤᱵᱤᱞ ᱨᱚᱲ ᱛᱮ ᱾
ᱜᱚᱴᱟ ᱜᱷᱟᱨᱚᱸᱡᱽ ᱥᱚᱝᱥᱟᱨ
ᱟᱢ ᱨᱮ ᱴᱮᱦᱟᱰ ᱠᱚᱜᱼᱟ
ᱵᱳᱜᱮ ᱵᱟᱹᱲᱤᱡ ᱠᱩᱥᱤ ᱨᱟᱹᱥᱠᱟᱹ
ᱟᱢ ᱜᱮᱢ ᱵᱟᱹᱱᱤᱡ ᱟᱹᱜᱩᱭ ᱾
ᱵᱟᱹᱲᱤᱡ ᱩᱭᱦᱟᱹᱨ ᱵᱷᱟᱵᱽᱱᱟ
ᱡᱷᱚᱛᱚ ᱮᱛᱚᱢ ᱠᱟᱛᱮ
ᱱᱤᱨᱞᱟᱹ ᱱᱤᱯᱷᱩᱴ ᱥᱩᱞᱩᱠ ᱜᱷᱟᱨᱚᱸᱡᱽ
ᱟᱢᱮᱢ ᱛᱚᱨᱟᱣ ᱨᱟᱠᱟᱵᱟ
ᱟᱢᱟᱜ ᱱᱟᱯᱟᱭ ᱜᱩᱱᱟᱹᱱ ᱛᱮ ᱾
***
