ᱟᱹᱰᱤ ᱥᱮᱫᱟᱭ ᱨᱮᱭᱟᱝ ᱠᱟᱛᱷᱟ ᱾ ᱩᱱ ᱫᱚ ᱜᱚᱴᱟ ᱯᱟᱲᱟ ᱵᱤᱨ ᱵᱩᱨᱩ ᱛᱮ ᱯᱮᱨᱮᱡ ᱟᱠᱟᱱ ᱛᱟᱦᱮᱸᱫ ᱾ ᱟᱵᱚ ᱨᱤᱱ ᱦᱚᱲ ᱠᱚᱫᱚ ᱵᱤᱨᱵᱩᱨᱩ ᱫᱷᱟᱨᱮ ᱠᱚᱨᱮ ᱚᱲᱟᱜ ᱫᱩᱣᱟᱹᱨ ᱟᱨ ᱟᱹᱛᱩ ᱫᱤᱥᱚᱢ ᱠᱟᱛᱮ ᱠᱚ ᱛᱟᱦᱮᱸ ᱠᱟᱱᱟ ᱾ ᱟᱵᱚᱨᱤᱱ ᱦᱚᱲ ᱠᱚᱣᱟᱜ ᱠᱟᱹᱢᱤ ᱫᱚ ᱪᱟᱥ ᱵᱟᱥ ᱜᱮ ᱛᱟᱸᱦᱮᱸ ᱠᱟᱱᱟ ᱾ ᱪᱟᱹᱥᱤ ᱠᱤᱥᱟᱹᱬ ᱦᱚᱲ ᱨᱤᱱ ᱫᱚ ᱟᱹᱰᱤ ᱰᱷᱮᱨ ᱰᱷᱮᱨ ᱜᱟᱹᱭ ᱠᱟᱰᱟ ᱠᱚ ᱛᱟᱸᱦᱮᱸ ᱠᱟᱱᱟ ᱾ ᱰᱷᱮᱨ ᱜᱟᱹᱭ ᱠᱟᱰᱟ ᱠᱚ ᱛᱟᱦᱮᱸ ᱠᱟᱱᱛᱮ ᱪᱟᱹᱥᱤ ᱠᱤᱥᱟᱹᱬ ᱦᱚᱲ ᱠᱚ ᱜᱩᱛᱤ ᱠᱟᱹᱲᱢᱤ ᱠᱚ ᱫᱚᱦᱚᱭᱮᱫ ᱠᱚ ᱛᱟᱸᱦᱮᱸᱫ ᱾ ᱜᱩᱛᱤ ᱠᱟᱹᱲᱢᱤ ᱠᱚᱫᱚ ᱚᱲᱟᱜ ᱨᱮᱱᱟᱝ ᱠᱟᱹᱢᱤ ᱡᱮᱢᱚᱱ ᱠᱟᱹᱲᱢᱤ ᱠᱚᱫᱚ ᱨᱟᱪᱟ ᱡᱚᱜ, ᱜᱩᱨᱤᱧ ᱜᱤᱰᱤ, ᱥᱟᱦᱟᱱ ᱫᱤᱯᱤᱞ ᱮᱢᱟᱱ ᱠᱚ ᱠᱟᱹᱢᱤ ᱛᱟᱦᱮᱸᱫ ᱾ ᱛᱚᱵᱮ ᱡᱮᱛᱮ ᱜᱩᱛᱤ ᱠᱟᱹᱲᱢᱤ ᱠᱚᱫᱚ ᱜᱟᱹᱭ ᱠᱟᱰᱟ, ᱰᱟᱺᱜᱽᱨᱤ ᱢᱮᱨᱚᱢ ᱜᱩᱯᱤ ᱠᱚ ᱥᱮᱱᱚᱜ ᱛᱟᱸᱦᱮᱸᱫ ᱾ ᱥᱮᱛᱟᱜ ᱵᱮᱲᱟ ᱠᱟᱰᱟ ᱰᱟᱺᱜᱽᱨᱤ, ᱜᱟᱹᱭ ᱢᱮᱨᱚᱢ ᱵᱩᱨᱩ ᱵᱤᱨ ᱠᱚ ᱤᱫᱤ ᱠᱚ ᱛᱟᱦᱮᱸᱫ ᱟᱨ ᱛᱟᱨᱟᱥᱤᱧ ᱚᱠᱛᱚ ᱛᱮ ᱚᱲᱟᱜ ᱠᱚ ᱨᱩᱣᱟᱹᱲ ᱦᱤᱡᱩᱜ ᱛᱟᱦᱮᱸᱫ ᱾
ᱠᱩᱸᱫᱤ ᱢᱮᱱᱛᱮ ᱠᱩᱲᱤ ᱜᱤᱫᱽᱨᱟᱹ ᱵᱟᱹᱰᱩ ᱢᱟᱺᱡᱷᱤ ᱚᱲᱟᱜ ᱨᱮ ᱚᱱᱠᱟ ᱜᱮ ᱠᱟᱹᱲᱢᱤ ᱛᱟᱦᱮᱸ ᱠᱟᱱᱟᱭ ᱾ ᱠᱩᱸᱫᱤ ᱫᱚ ᱟᱹᱰᱤ ᱨᱮᱜᱮᱡ ᱚᱲᱟᱜ ᱨᱮ ᱡᱟᱱᱟᱢ ᱞᱮᱱᱟᱭ ᱾ ᱞᱩᱜᱽᱲᱤ ᱟᱹᱣᱨᱤ ᱥᱟᱵᱽ ᱨᱮᱜᱮ ᱟᱡ ᱟᱭᱳ ᱵᱟᱵᱟ ᱥᱩᱨ ᱥᱟᱺᱜᱤᱧ ᱯᱮᱲᱟ ᱠᱤᱥᱟᱹᱬ ᱠᱷᱚᱱ ᱠᱚ ᱠᱟᱹᱲᱢᱤ ᱞᱮᱫᱮᱭᱟ ᱾ ᱠᱩᱸᱫᱤ ᱫᱚ ᱦᱩᱰᱤᱧ ᱠᱷᱚᱱ ᱜᱮ ᱟᱹᱰᱤ ᱪᱷᱩᱴᱟᱹᱣᱜ ᱠᱩᱲᱤ ᱜᱤᱫᱽᱨᱟᱹᱭ ᱛᱟᱦᱮᱸᱭᱟ ᱾ ᱚᱲᱟᱜ ᱨᱮ ᱡᱚᱜ ᱨᱟᱪᱟ ᱪᱟᱵᱟ ᱠᱟᱛᱮ, ᱤᱥᱤᱱ ᱵᱟᱥᱟᱝ ᱦᱚᱸ ᱪᱟᱵᱟ ᱠᱟᱛᱮ ᱫᱤᱱᱟᱹᱢ ᱰᱟᱺᱜᱽᱨᱤ ᱢᱮᱨᱚᱢ ᱜᱩᱯᱤ ᱪᱟᱞᱟᱜ ᱟᱭ ᱾ ᱵᱟᱹᱰᱩ ᱦᱟᱲᱟᱢ ᱟᱹᱰᱤ ᱢᱟᱨᱟᱝ ᱠᱤᱥᱟᱹᱬ ᱫᱚᱭ ᱵᱟᱝ ᱠᱟᱱᱟ, ᱮᱱ ᱨᱮᱦᱚᱸ ᱟᱹᱰᱤ ᱰᱮᱦᱮᱨ ᱢᱮᱨᱚᱢ ᱰᱟᱺᱜᱽᱨᱤ ᱦᱚᱸ ᱵᱟᱹᱱᱩᱜ ᱠᱚ ᱛᱟᱭᱟ ᱾ ᱮᱱ ᱦᱚᱸ ᱰᱟᱺᱜᱽᱨᱤ ᱢᱮᱨᱚᱢ ᱢᱟ ᱜᱩᱯᱤ ᱜᱮ ᱦᱩᱭᱩᱜᱼᱟ ᱾
ᱵᱟᱹᱰᱩ ᱦᱟᱲᱟᱢ ᱠᱩᱸᱫᱤ ᱢᱟᱹᱭ ᱫᱚ ᱦᱚᱯᱚᱱ ᱮᱨᱟ ᱞᱮᱠᱟ ᱜᱮ ᱫᱚᱦᱚ ᱟᱠᱟᱫᱮᱭᱟ ᱾ ᱛᱤᱥ ᱨᱮᱦᱚᱸ ᱮᱫᱽᱨᱮ ᱟᱲᱟᱝ ᱛᱮ ᱵᱟᱭ ᱢᱮᱛᱟᱭᱟ᱾ ᱠᱩᱸᱫᱤ ᱦᱚᱸ ᱵᱟᱹᱰᱩ ᱦᱟᱲᱟᱢ ᱵᱩᱰᱷᱤ ᱛᱤᱠᱤᱱᱟᱜ ᱠᱟᱛᱷᱟ ᱵᱤᱱ ᱨᱚᱲ ᱛᱮᱜᱮ ᱵᱩᱡᱷᱟᱹᱣ ᱜᱚᱫᱟᱭ ᱾ ᱚᱠᱟ ᱡᱷᱚᱜ ᱚᱠᱟ ᱞᱮᱠᱟ ᱞᱟᱹᱠᱛᱤᱭᱟᱱ ᱚᱱᱟ ᱡᱷᱚᱜ ᱚᱱᱠᱟᱢ ᱠᱟᱹᱢᱤᱭᱟ ᱾
ᱟᱥᱟᱲ ᱵᱚᱸᱜᱟ ᱫᱤᱱ, ᱥᱮᱨᱢᱟ ᱨᱮ ᱦᱮᱸᱫᱮ ᱨᱤᱢᱤᱞ ᱥᱟᱹᱣᱲᱤ ᱛᱮ ᱫᱟᱞᱚᱵ ᱟᱠᱟᱫ ᱞᱮᱠᱟ ᱵᱩᱡᱷᱟᱹᱣᱜᱼᱟ ᱾ ᱛᱟᱞᱟ ᱨᱮ ᱛᱟᱞᱟ ᱨᱮ ᱨᱤᱢᱤᱞ ᱛᱟᱞᱟ ᱠᱷᱚᱱ ᱡᱷᱟᱞᱠᱟᱣᱜᱼᱟ ᱵᱤᱡᱽᱞᱤ ᱵᱤᱞᱤᱫ ᱵᱟᱞᱟᱝ ᱾ ᱫᱟᱜ ᱛᱮ ᱜᱚᱴᱟ ᱯᱟᱲᱟ ᱚᱛ ᱠᱚᱭ ᱞᱚᱦᱚᱫ ᱪᱟᱵᱟ ᱠᱟᱜᱼᱟ ᱾ ᱥᱤᱛᱩᱝ ᱫᱤᱱ ᱚᱛ ᱵᱷᱤᱛᱨᱤ ᱨᱮ ᱩᱠᱩ ᱮᱱ ᱛᱟᱥᱟᱫ ᱠᱚ ᱫᱷᱟᱹᱨᱛᱤ ᱪᱮᱛᱟᱱ ᱠᱚ ᱞᱟᱸᱫᱟ ᱚᱰᱚᱠ ᱠᱚᱜᱼᱟ ᱾ ᱫᱷᱟᱹᱨᱛᱤ ᱥᱟᱱᱟᱢ ᱛᱟᱥᱟᱫ ᱛᱮ ᱦᱟᱹᱨᱤᱭᱟᱹᱲ ᱜᱮ ᱧᱮᱞᱚᱜᱼᱟ ᱾ ᱱᱚᱝᱠᱟ ᱵᱩᱡᱷᱟᱹᱣᱜᱼᱟ ᱡᱮᱢᱚᱱ ᱚᱠᱚᱭ ᱪᱚ ᱦᱟᱹᱨᱤᱭᱟᱹᱲ ᱞᱮᱜᱮᱡ ᱞᱮᱜᱮᱡ ᱨᱮ ᱟᱴᱮᱫ ᱟᱠᱟᱱᱟ ᱾ ᱱᱚᱝᱠᱟᱱ ᱵᱮᱲᱟ ᱨᱮ ᱵᱤᱨ ᱵᱩᱨᱩ ᱠᱚᱨᱮ ᱩᱫ ᱠᱚ ᱯᱩᱴᱠᱟᱹ ᱠᱚ ᱫᱷᱟᱹᱨᱛᱤ ᱫᱷᱩᱲᱤ ᱩᱴᱟᱹ ᱯᱚᱥᱟᱜ ᱠᱟᱛᱮ ᱪᱮᱛᱟᱱ ᱛᱮ ᱦᱚᱲ ᱠᱚ ᱧᱮᱧᱮᱞ ᱠᱚ ᱚᱰᱚᱠᱚᱜ ᱞᱮᱠᱟ ᱵᱩᱡᱷᱟᱹᱣᱜᱼᱟ ᱾ ᱵᱤᱨ ᱵᱩᱨᱩ ᱨᱮ ᱩᱱ ᱚᱠᱛᱚ ᱫᱚ ᱠᱮᱸᱰᱨᱚᱝ ᱠᱚᱦᱚᱸ ᱨᱮᱞ ᱜᱟᱹᱰᱤ ᱞᱮᱠᱟ ᱜᱚᱴᱟ ᱠᱚ ᱫᱟᱹᱲᱟ ᱵᱟᱲᱟᱭᱟ ᱾ ᱢᱤᱢᱤᱫ ᱜᱚᱴᱟᱝ ᱡᱟᱭᱜᱟ ᱠᱚᱨᱮ ᱦᱟᱴ ᱵᱟᱡᱟᱨ ᱜᱟᱫᱮᱞ ᱞᱮᱠᱟ ᱯᱩᱪᱠᱟᱜ ᱯᱩᱪᱠᱟᱜ ᱦᱚᱯᱚᱱ ᱠᱚ ᱡᱟᱨᱣᱟ ᱠᱚᱜᱼᱟ ᱾ ᱥᱟᱹᱜᱟᱹᱣ ᱥᱟᱹᱜᱟᱹᱣ ᱟᱹᱰᱤ ᱢᱚᱡᱽ ᱜᱮ ᱠᱚ ᱧᱮᱞᱚᱜᱼᱟ ᱾
ᱚᱱᱠᱟᱱ ᱚᱠᱛᱚ ᱨᱮ ᱠᱩᱸᱫᱤ ᱢᱟᱹᱭ ᱫᱚ ᱡᱟᱣ ᱞᱮᱠᱟ ᱜᱮ ᱰᱟᱺᱜᱽᱨᱤ ᱢᱮᱨᱚᱢ ᱠᱚ ᱟᱲᱟᱜ ᱠᱟᱛᱮ ᱟᱹᱛᱩ ᱨᱮᱱ ᱜᱚᱸᱴ ᱰᱟᱺᱜᱽᱨᱤ ᱜᱩᱯᱤ ᱥᱮᱱ ᱞᱮᱱᱟᱭ ᱾ ᱚᱱᱟ ᱦᱤᱞᱚᱜ ᱫᱚ ᱫᱟᱜ ᱵᱟᱲᱟ ᱠᱟᱛᱮ ᱜᱮ ᱟᱹᱥᱩᱲ ᱟᱠᱟᱫᱼᱟ ᱾ ᱥᱮᱨᱢᱟ ᱨᱮ ᱯᱚᱲᱚᱭ ᱯᱚᱲᱚᱭ ᱯᱩᱸᱰ ᱨᱟᱦᱞᱟ ᱨᱤᱢᱤᱞ ᱠᱚᱠᱚ ᱮᱱᱮᱡ ᱵᱟᱲᱟᱭ ᱠᱟᱱ ᱛᱟᱸᱦᱮᱸᱫ ᱾ ᱛᱤᱱ ᱛᱤᱱ ᱚᱠᱛᱚ ᱪᱚᱝ ᱟᱠᱚ ᱟᱠᱚ ᱠᱚ ᱛᱩᱠᱩᱡ ᱛᱩᱯᱩᱠᱩᱡ ᱠᱟᱱ ᱛᱟᱦᱮᱸᱫ ᱾ ᱛᱟᱞᱟᱨᱮ ᱛᱟᱞᱟᱨᱮ ᱥᱤᱧ ᱪᱟᱸᱫᱚ ᱨᱤᱢᱤᱞ ᱫᱟᱱᱟᱝ ᱠᱷᱚᱱ ᱱᱟᱥᱮ ᱥᱟᱦᱟ ᱠᱟᱛᱮ ᱩᱠᱩ ᱩᱠᱩᱛᱮ ᱠᱚᱭᱚᱜ ᱠᱟᱱ ᱛᱟᱸᱦᱮᱸᱫ ᱾ ᱱᱚᱝᱠᱟ ᱵᱩᱡᱷᱟᱹᱣᱜ ᱠᱟᱱ ᱛᱟᱸᱦᱮᱸᱫ ᱯᱟᱞᱮᱱᱮ ᱪᱟᱹᱨᱤᱛ ᱠᱟᱱᱟ ᱚᱠᱚᱭ ᱪᱮᱫ ᱠᱚ ᱠᱟᱹᱢᱤ ᱠᱟᱱᱟ ᱾ ᱤᱱᱟᱹ ᱦᱤᱞᱚᱜ ᱫᱚ ᱰᱟᱺᱜᱽᱨᱤ ᱢᱮᱨᱚᱢ ᱟᱹᱰᱤ ᱱᱟᱯᱟᱭ ᱠᱚ ᱟᱹᱛᱤᱧ ᱡᱚᱝ ᱠᱟᱱ ᱛᱟᱸᱦᱮᱸᱫ ᱾ ᱛᱟᱞᱟᱨᱮ ᱡᱷᱤᱯᱤᱨ ᱫᱟᱜ ᱧᱩᱨ ᱜᱚᱫᱚᱜ ᱠᱟᱱ ᱠᱷᱟᱱ ᱢᱮᱨᱚᱢ ᱠᱚᱠᱚ ᱨᱟᱜ ᱦᱚᱢᱚᱨ ᱜᱚᱫᱮᱫ ᱛᱟᱸᱦᱮᱸᱫ ᱟᱨ ᱡᱷᱩᱲ ᱫᱟᱨᱮ ᱥᱮᱱ ᱠᱚ ᱫᱟᱹᱲ ᱜᱚᱫᱮᱫ ᱛᱟᱸᱦᱮᱸᱫ ᱾
ᱡᱟᱣ ᱞᱮᱠᱟ ᱜᱮ ᱤᱱᱟᱹ ᱦᱤᱞᱚᱜ ᱦᱚᱸ ᱜᱟᱹᱲᱫᱩᱢ ᱫᱚ ᱰᱟᱺᱜᱽᱨᱤ ᱜᱩᱯᱤ ᱥᱮᱱ ᱟᱠᱟᱱ ᱛᱟᱸᱦᱮᱸᱫ ᱾ ᱜᱟᱹᱲᱫᱩᱢ ᱦᱚᱸ ᱚᱱᱟ ᱟᱹᱛᱩ ᱨᱮᱜᱮ ᱜᱩᱛᱤ ᱟᱠᱟᱱᱟᱭ ᱾ ᱜᱟᱹᱲᱫᱩᱢ ᱫᱚ ᱟᱹᱰᱤ ᱜᱮ ᱰᱷᱟᱹᱣᱞᱤᱭᱟᱹ ᱦᱟᱭ ᱾ ᱠᱩᱸᱫᱤ ᱥᱟᱨᱟ ᱵᱮᱲᱟᱭ ᱮᱫᱽᱨᱮ ᱟᱹᱪᱩᱨᱟᱭᱟ ᱾ ᱢᱤᱢᱤᱫ ᱫᱷᱟᱣ ᱵᱤᱨ ᱠᱚᱨᱮ ᱠᱷᱟᱹᱞᱤᱛᱮ ᱵᱟᱱᱟᱭ ᱫᱟᱨᱟᱭ ᱠᱟᱱᱟ, ᱡᱷᱩᱲ ᱨᱮ ᱪᱮᱴᱨᱟ ᱧᱮᱞ ᱞᱮᱫᱮᱭᱟᱹᱧ ᱮᱢᱟᱱ ᱛᱮᱭᱟᱜ ᱠᱟᱛᱷᱟ ᱠᱚᱭ ᱮᱲᱮ ᱵᱟᱲᱟᱭᱮᱭᱟ ᱾ ᱱᱚᱶᱟ ᱟᱸᱡᱚᱢ ᱛᱮ ᱠᱩᱸᱫᱤ ᱦᱚᱸᱭ ᱵᱚᱛᱚᱨ ᱞᱮᱱ ᱠᱷᱟᱱ ᱟᱹᱰᱤ ᱠᱩᱥᱤᱭ ᱵᱩᱡᱷᱟᱹᱣᱟ ᱾ ᱠᱩᱸᱫᱤ ᱦᱚᱸ ᱟᱡᱟᱜ ᱰᱤᱸᱜᱚᱨ ᱠᱟᱛᱷᱟ ᱠᱚᱭ ᱵᱟᱰᱟᱭ ᱤᱫᱤ ᱠᱮᱫ ᱛᱮ ᱵᱟᱭ ᱦᱮᱛᱟ ᱦᱟᱫ ᱛᱟᱭᱟ ᱾ ᱮᱴᱟᱜ ᱡᱚᱴᱟᱣ ᱠᱩᱲᱤ ᱠᱚ ᱥᱟᱶ ᱜᱮ ᱛᱟᱸᱦᱮᱸ ᱠᱚᱜᱼᱟᱭ ᱾
ᱤᱱᱟᱹ ᱦᱤᱞᱚᱜ ᱫᱚ ᱰᱟᱹᱦᱤ ᱫᱷᱟᱨᱮ ᱨᱮ ᱜᱟᱹᱭ ᱠᱚ ᱜᱩᱯᱤ ᱠᱟᱱ ᱛᱟᱸᱦᱮᱸᱫ ᱾ ᱰᱟᱹᱦᱤ ᱠᱚᱨᱮ ᱫᱚ ᱜᱚᱴᱟ ᱯᱟᱲᱟ ᱠᱮᱸᱰᱨᱚᱝ ᱠᱚ ᱫᱚᱢᱮᱞ ᱫᱚᱢᱮᱞ ᱠᱚ ᱫᱟᱬᱟᱱ ᱠᱟᱱ ᱛᱟᱸᱦᱮᱸᱫ ᱾ ᱩᱱᱠᱩ ᱦᱚᱸ ᱯᱟᱞᱮᱱ ᱚᱠᱚᱭᱟᱜ ᱟᱪᱟᱨ ᱵᱮᱵᱷᱟᱨ ᱠᱚ ᱪᱟᱹᱞᱩ ᱟᱠᱟᱫ ᱛᱟᱸᱦᱮᱸᱫ ᱾ ᱰᱟᱹᱦᱤ ᱠᱮᱸᱰᱨᱚᱝ ᱫᱚ ᱢᱤᱫ ᱵᱤᱛᱟᱹ ᱜᱟᱱ ᱠᱚ ᱦᱩᱭᱩᱜᱼᱟ ᱾ ᱩᱱᱠᱩᱟᱜ ᱡᱟᱸᱜᱟ ᱫᱚ ᱟᱹᱰᱤ ᱰᱷᱮᱨᱟ ᱚᱦᱚᱢ ᱞᱮᱠᱷᱟ ᱪᱟᱵᱟ ᱠᱮᱭᱟ ᱾ ᱡᱚᱴᱮᱫ ᱞᱮᱠᱷᱟᱱ ᱩᱱᱠᱩ ᱫᱚ ᱵᱟᱠᱚ ᱫᱟᱹᱲᱟ ᱾ ᱜᱮᱞ ᱴᱟᱠᱟ ᱥᱤᱠᱟᱹ ᱞᱮᱠᱟ ᱜᱩᱞᱟᱹᱭ ᱜᱮᱠᱚ ᱯᱤᱴᱤ ᱜᱚᱫᱚᱜᱼᱟ ᱾ ᱡᱟᱸᱦᱟᱸ ᱛᱤᱱᱟᱹᱜ ᱮᱢ ᱫᱟᱞᱮ ᱨᱮᱦᱚᱸ ᱵᱟᱠᱚ ᱫᱟᱹᱲᱟ ᱾ ᱤᱱᱟᱹ ᱦᱤᱞᱚᱜ ᱜᱟᱹᱲᱫᱷᱩᱢ ᱫᱚ ᱚᱱᱠᱟ ᱢᱟᱨᱟᱝ ᱢᱟᱨᱟᱝ ᱛᱟᱭᱟ ᱯᱩᱭᱥᱟᱹ ᱞᱮᱠᱟᱱ ᱠᱮᱸᱰᱨᱚᱝ ᱠᱷᱟᱞᱟᱜ ᱨᱮ ᱫᱚᱦᱚ ᱟᱠᱟᱫ ᱠᱚ ᱛᱟᱦᱮᱸᱫ ᱾ ᱡᱚᱠᱷᱚᱱ ᱠᱩᱸᱫᱤ ᱮᱠᱞᱟ ᱨᱮ ᱦᱟᱵᱚᱲ ᱠᱮᱫᱮᱭᱟᱭ ᱰᱤᱸᱜᱚᱨ ᱛᱮ ᱡᱚᱛᱚ ᱠᱮᱸᱰᱨᱚᱝ ᱵᱚᱦᱚᱜ ᱨᱮ ᱫᱤᱯᱤᱞ ᱟᱫᱮᱭᱟᱭ ᱾ ᱠᱩᱸᱫᱤ ᱩᱱᱠᱩ ᱮᱨᱮᱲ ᱞᱟᱹᱜᱤᱫ ᱥᱟᱯᱲᱟᱣ ᱵᱟᱭ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩ ᱫᱚ ᱵᱚᱦᱚᱜ ᱨᱮ ᱠᱚ ᱫᱤᱯᱤᱞᱮᱱᱟ ᱾ ᱜᱟᱹᱲᱫᱷᱩᱢ ᱟᱫᱚᱭ ᱢᱮᱱ ᱜᱚᱫ ᱠᱮᱫᱟ ᱦᱟᱹᱱᱤ ᱧᱮᱞᱮ ᱯᱮ ᱠᱩᱸᱫᱤ ᱢᱟ ᱠᱮᱸᱰᱨᱚᱝ ᱠᱮᱸᱰᱨᱚᱝ ᱫᱤᱯᱤᱞ ᱟᱠᱟᱣᱱᱟᱭ ᱡᱮᱛᱮ ᱦᱚᱲ ᱢᱤᱫ ᱛᱮᱠᱚ ᱞᱟᱸᱫᱟ ᱜᱚᱫ ᱠᱮᱫᱼᱟ ᱾ ᱠᱩᱸᱫᱤ ᱦᱚᱸ ᱵᱚᱛᱚᱨ ᱛᱮ ᱢᱮᱱ ᱠᱟᱛᱮ ᱵᱚᱦᱚᱜ ᱠᱷᱚᱱ ᱠᱚᱴᱟ ᱧᱩᱨ ᱠᱮᱫ ᱠᱚᱣᱟᱭ ᱾ ᱠᱮᱸᱰᱨᱚᱝ ᱜᱮ ᱥᱮ ᱵᱚᱦᱚᱜ ᱠᱷᱚᱱ ᱮ ᱠᱚᱴᱟ ᱧᱩᱨ ᱠᱚᱫ ᱠᱚᱣᱟᱭ ᱩᱱᱠᱩᱣᱟᱜ ᱡᱟᱸᱜᱟ ᱫᱚ ᱟᱡᱟᱜ ᱵᱚᱦᱚᱜ ᱨᱮ ᱧᱩᱨ ᱫᱚᱦᱚᱭᱮᱱᱟ ᱾
ᱠᱩᱸᱫᱤ ᱫᱚ ᱡᱟᱣ ᱞᱮᱠᱟ ᱜᱮ ᱩᱢ ᱟᱹᱨᱩᱵ ᱠᱟᱛᱮ ᱟᱡᱟᱜ ᱫᱤᱱᱟᱹᱢ ᱠᱟᱹᱢᱤ ᱠᱚᱭ ᱠᱟᱹᱢᱤ ᱠᱮᱫᱼᱟ ᱾ ᱠᱮᱸᱰᱨᱚᱝ ᱤᱫᱤ ᱠᱟᱛᱮ ᱫᱚ ᱟᱨ ᱵᱟᱭ ᱩᱭᱦᱟᱹᱨ ᱵᱷᱟᱵᱽᱱᱟᱜ ᱛᱟᱦᱮᱸᱱ ᱾
ᱠᱩᱸᱰᱤ ᱫᱚ ᱟᱹᱰᱤ ᱪᱚᱨᱚᱠ ᱜᱟᱺᱫᱷᱟᱹᱨᱤ ᱟᱲᱟᱜ ᱞᱮᱠᱟ ᱞᱮᱜᱮᱡ ᱞᱮᱜᱮᱡ ᱮ ᱦᱟᱨᱟ ᱨᱟᱠᱟᱵ ᱞᱮᱱᱟ ᱾ ᱞᱩᱜᱽᱲᱤ ᱥᱟᱵ ᱵᱤᱫᱟᱹᱞ ᱠᱷᱚᱱ ᱜᱮ ᱱᱟᱣᱟ ᱯᱮᱲᱟ ᱠᱚᱠᱚ ᱛᱤᱭᱟᱹᱜ ᱠᱮᱫᱮᱭᱟ ᱾ ᱟᱡ ᱨᱤᱱ ᱡᱟᱱᱟᱢ ᱟᱭᱳ ᱵᱟᱵᱟ ᱫᱚ ᱵᱟᱹᱰᱩ ᱦᱟᱲᱟᱢ ᱴᱷᱮᱱ ᱜᱮ ᱟᱡᱟᱜ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱠᱤᱱ ᱜᱚᱜ ᱵᱷᱟᱹᱨᱤᱭᱟᱹ ᱟᱠᱟᱫ ᱛᱟᱸᱦᱮᱸᱱ ᱾ ᱩᱢᱮᱨ ᱞᱟᱦᱟᱜ ᱥᱟᱶᱛᱮ ᱠᱩᱸᱫᱤ ᱦᱚᱸ ᱵᱚᱦᱚᱜ ᱟᱹᱰᱤ ᱵᱟᱵᱟᱛᱮᱭᱟ ᱾ ᱵᱟᱹᱲᱛᱤ ᱫᱷᱟᱨᱟᱭ ᱦᱤᱞᱟᱹᱣᱜ ᱠᱷᱟᱱ ᱵᱚᱦᱚᱜ ᱱᱟᱯᱟᱭᱮ ᱵᱩᱡᱷᱟᱹᱣᱟ ᱾ ᱚᱲᱟᱜ ᱨᱮ ᱚᱱᱟ ᱛᱮ ᱠᱩᱸᱫᱤ ᱫᱚ ᱰᱷᱤᱝᱠᱤ ᱦᱩᱲᱩᱝ ᱫᱚ ᱟᱹᱰᱤ ᱠᱩᱥᱤ ᱜᱮ ᱠᱩᱥᱤᱭᱟᱜ ᱛᱟᱦᱮᱸᱫ ᱾ ᱥᱤᱢᱨᱟᱜ ᱠᱷᱚᱱ ᱰᱷᱤᱝᱠᱤ ᱦᱩᱲᱩᱝ ᱫᱚ ᱟᱡᱟᱜ ᱠᱟᱹᱢᱤ ᱛᱟᱦᱮᱸ ᱠᱟᱱ ᱛᱟᱸᱦᱮᱸᱫ ᱾
ᱚᱠᱛᱚ ᱨᱮᱱᱟᱜ ᱞᱟᱦᱟ ᱥᱟᱶᱛᱮ ᱠᱩᱸᱫᱤ ᱢᱟᱹᱭ ᱞᱟᱹᱜᱤᱫ ᱡᱟᱶᱟᱭ ᱦᱚᱸᱭ ᱦᱮᱡ ᱮᱱᱟ ᱾ ᱟᱲᱟᱜ ᱥᱟᱠᱟᱢ ᱠᱚ ᱵᱮᱨᱮᱞᱚᱜ ᱠᱟᱱ ᱛᱟᱠᱚ ᱛᱮ ᱠᱩᱸᱫᱤ ᱢᱟᱹᱭ ᱨᱟᱹᱦᱤ ᱪᱟᱹᱣᱰᱟᱹᱞ ᱛᱮ ᱠᱚ ᱤᱫᱤ ᱠᱮᱫᱮᱭᱟ ᱾
ᱜᱮᱞ ᱵᱟᱨ ᱵᱩᱨᱩ ᱯᱟᱨᱚᱢ ᱛᱮ ᱾ ᱡᱟᱶᱟᱭ ᱚᱲᱟᱜ ᱨᱤᱱ ᱫᱚ ᱟᱹᱰᱤ ᱵᱟᱠᱚ ᱠᱤᱥᱟᱹᱬ ᱨᱮᱦᱚᱸ ᱦᱳᱲᱳ ᱪᱟᱣᱞᱮ ᱛᱮ ᱫᱚ ᱵᱟᱠᱚ ᱨᱮᱸᱜᱮᱡᱼᱟ ᱾ ᱥᱮᱨᱢᱟ ᱡᱚᱢ ᱯᱩᱨᱟᱹᱣ ᱠᱟᱛᱮ ᱵᱟᱨ ᱯᱮ ᱵᱟᱺᱫᱤ ᱫᱚᱠᱚ ᱢᱟᱨᱮ ᱛᱟᱸᱦᱮᱸᱫ ᱾ ᱠᱩᱸᱫᱤ ᱢᱟᱹᱭ ᱡᱟᱶᱟᱭ ᱛᱟᱭᱚᱢ ᱫᱤᱱᱟᱹᱢ ᱜᱮ ᱚᱠᱟ ᱞᱮᱠᱟ ᱪᱚᱭ ᱟᱴᱠᱟᱨ ᱛᱟᱸᱦᱮᱸᱫ ᱾ ᱵᱚᱦᱚᱜ ᱵᱷᱤᱛᱨᱤ ᱨᱮ ᱪᱤᱞᱤ ᱠᱚᱪᱚᱝ ᱠᱚ ᱨᱟᱵᱟ ᱨᱩᱵᱩᱭᱮ ᱞᱮᱠᱟᱭ ᱟᱴᱠᱟᱨ ᱛᱟᱸᱦᱮᱸᱫ ᱾ ᱡᱟᱶᱟᱭ ᱚᱲᱟᱜ ᱨᱮ ᱢᱟᱨᱟᱜ ᱵᱷᱮᱠᱚ ᱠᱷᱚᱱ ᱫᱤᱱᱟᱹᱢ ᱦᱳᱲᱳᱭ ᱦᱩᱲᱩᱝᱼᱟ ᱾ ᱫᱤᱱᱟᱹᱢ ᱟᱹᱰᱤ ᱰᱷᱮᱨ ᱰᱷᱮᱨ ᱦᱳᱲᱳᱭ ᱪᱟᱣᱞᱮ ᱨᱮᱦᱚᱸᱭ ᱟᱨ ᱦᱚᱸᱭ ᱦᱩᱲᱩᱝ ᱜᱮᱭᱟ ᱾ ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱦᱳᱲᱳ ᱦᱮᱰᱮᱡ ᱛᱤᱠᱤ ᱠᱟᱛᱮ ᱦᱩᱲᱩᱝ ᱪᱟᱵᱟᱭ ᱞᱮᱠᱟᱱ ᱚᱠᱛᱚ ᱛᱟᱸᱦᱮᱸ ᱠᱟᱱᱟ ᱾ ᱡᱟᱶᱟᱭ ᱚᱲᱟᱜ ᱨᱤᱱ ᱦᱚᱲ ᱠᱚ ᱚᱱᱟ ᱤᱫᱤ ᱛᱮ ᱟᱹᱰᱤ ᱠᱚ ᱮᱫᱽᱨᱮᱜ ᱛᱟᱸᱦᱮᱸᱫ ᱾ ᱡᱟᱶᱟᱭ ᱵᱮᱴᱟ ᱦᱚᱸ ᱠᱩᱸᱫᱤ ᱫᱚ ᱟᱹᱛᱷᱟᱹᱣᱲᱤ ᱦᱳᱲᱳ ᱟᱞᱚᱢ ᱦᱩᱲᱩᱝᱼᱟ ᱢᱮᱱᱛᱮ ᱢᱟᱱᱟ ᱟᱠᱟᱫᱮ ᱛᱟᱸᱦᱮᱸᱫ ᱾ ᱢᱮᱱ ᱠᱷᱟᱱ ᱠᱩᱸᱫᱤ ᱫᱚ ᱚᱠᱚᱭᱟᱜ ᱠᱟᱛᱷᱟ ᱦᱚᱸ ᱵᱟᱭ ᱟᱸᱡᱚᱢ ᱛᱟᱦᱮᱸᱫ ᱾ ᱫᱤᱱᱟᱹᱢ ᱜᱮ ᱚᱱᱠᱟ ᱦᱳᱲᱳᱭ ᱦᱩᱲᱩᱝ ᱛᱟᱸᱦᱮᱸᱫ ᱾ ᱢᱤᱫ ᱫᱤᱱᱟᱜ ᱠᱟᱛᱷᱟ, ᱤᱱᱟᱹ ᱦᱤᱞᱚᱜ ᱫᱚ ᱥᱮᱛᱟᱜ ᱠᱷᱚᱱ ᱦᱳᱲᱳᱭ ᱦᱩᱲᱩᱝ ᱮᱫ ᱛᱟᱸᱦᱮᱸᱫ ᱾ ᱡᱟᱶᱟᱭ ᱵᱮᱴᱟ ᱦᱩᱲᱩᱝ ᱥᱟᱰᱮ ᱟᱸᱡᱚᱢ ᱛᱮ ᱵᱟᱭ ᱡᱟᱹᱯᱤᱫ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ ᱾ ᱢᱚᱱᱮ ᱢᱚᱱᱮ ᱛᱮ ᱟᱹᱰᱤ ᱮᱫᱽᱨᱮ ᱟᱴᱠᱟᱨᱮᱫ ᱛᱟᱦᱮᱸᱫ ᱾ ᱮᱫᱽᱨᱮ ᱵᱟᱭ ᱥᱟᱸᱵᱽᱲᱟᱣ ᱞᱮᱫ ᱛᱮ ᱫᱟᱹᱲ ᱚᱰᱚᱠ ᱮᱱᱟᱭ ᱨᱟᱹᱜᱤ ᱛᱮ ᱪᱚᱴ ᱵᱚᱦᱚᱜ ᱨᱮ ᱨᱟᱪᱟᱜ ᱠᱟᱛᱮ ᱛᱷᱟᱯᱚᱲᱮ ᱫᱤᱲᱦᱟᱹᱣ ᱞᱮᱱᱟ ᱾ ᱮᱱᱠᱷᱟᱱ ᱠᱩᱸᱫᱤ ᱢᱟᱹᱭᱟᱜ ᱩᱵ ᱥᱟᱶ ᱠᱷᱟᱹᱯᱨᱤ ᱫᱚ ᱚᱰᱚᱠ ᱩᱛᱟᱹᱨᱮᱱ ᱛᱟᱭᱟ ᱾ ᱠᱩᱸᱫᱤ ᱢᱟᱹᱭ ᱫᱚ ᱛᱟᱞᱟ ᱨᱟᱪᱟ ᱨᱮ ᱠᱚᱸᱰᱮᱞ ᱜᱚᱫ ᱮᱱᱟᱭ ᱟᱨ ᱵᱚᱦᱚᱜ ᱠᱷᱟᱹᱯᱨᱤ ᱨᱮᱠᱚ ᱧᱮᱞᱮᱭᱟ ᱵᱤᱠᱤᱫ ᱵᱤᱠᱤᱫ ᱠᱮᱸᱰᱨᱚᱝ ᱦᱚᱯᱚᱱ ᱟᱨ ᱮᱸᱜᱟ ᱠᱚ ᱾ ᱠᱩᱸᱫᱤ ᱢᱟᱹᱭ ᱫᱚ ᱚᱸᱰᱮ ᱜᱮ ᱵᱷᱟᱨᱟᱵᱷᱟᱴ ᱮᱱᱟᱭ ᱾
ᱰᱟᱺᱜᱽᱣᱟᱹ ᱵᱮᱲᱟ ᱨᱮ ᱰᱤᱸᱜᱚᱨ ᱛᱮ ᱜᱟᱹᱲᱫᱷᱩᱢ ᱵᱟᱹᱵᱩ ᱵᱚᱦᱚᱜ ᱨᱮ ᱠᱮᱸᱰᱨᱚᱝ ᱮ ᱫᱤᱯᱤᱞ ᱟᱫᱮ ᱛᱟᱸᱦᱮᱸᱫ ᱫᱚ, ᱩᱱ ᱠᱷᱚᱱᱟᱜ ᱜᱮ ᱠᱮᱸᱰᱨᱚᱝ ᱟᱜ ᱡᱟᱸᱜᱟ ᱫᱚ ᱵᱚᱦᱚᱜ ᱨᱮ ᱧᱩᱨ ᱞᱮᱱᱟ ᱾ ᱚᱱᱟ ᱡᱟᱸᱜᱟ ᱠᱚ ᱜᱮ ᱵᱚᱦᱚᱜ ᱵᱷᱤᱛᱨᱤ ᱥᱚᱲᱚ ᱵᱚᱞᱚ ᱠᱟᱛᱮ ᱠᱮᱸᱰᱨᱚᱝ ᱫᱚ ᱵᱚᱦᱚᱜ ᱨᱮᱠᱚ ᱦᱚᱯᱚᱱ ᱞᱮᱱ ᱛᱟᱦᱮᱸᱱ ᱡᱚᱠᱷᱚᱱ ᱠᱩᱸᱫᱤ ᱢᱟᱹᱭ ᱦᱳᱲᱳᱭ ᱦᱩᱲᱩᱝ ᱮᱫ ᱛᱟᱦᱮᱸᱱ, ᱩᱱᱡᱷᱚᱜ ᱵᱚᱦᱚᱜ ᱨᱩᱠᱩᱜ ᱠᱟᱱ ᱛᱟᱦᱮᱸᱱ ᱾ ᱵᱚᱦᱚᱜ ᱨᱩᱠᱩ ᱞᱮᱱ ᱠᱷᱟᱱ ᱠᱟᱸᱰᱨᱚᱝ ᱠᱚᱠᱚ ᱛᱷᱤᱨ ᱠᱚᱜ ᱠᱟᱱ ᱛᱟᱦᱮᱸᱱ ᱾ ᱟᱨ ᱦᱚᱸ ᱠᱩᱸᱫᱤ ᱢᱟᱹᱭ ᱛᱷᱤᱨ ᱞᱮᱱ ᱠᱷᱟᱱ ᱠᱮᱸᱰᱨᱚᱝ ᱠᱚᱠᱚ ᱨᱟᱵᱟᱨᱩᱵᱩᱭᱮ ᱛᱟᱦᱮᱸᱫ᱾ ᱚᱱᱟ ᱛᱮ ᱠᱩᱸᱫᱤ ᱢᱟᱹᱭ ᱫᱚ ᱫᱤᱱᱟᱹᱢ ᱚᱱᱠᱟ ᱦᱳᱲᱳᱭ ᱦᱩᱲᱩᱝ ᱮᱫ ᱛᱟᱦᱮᱸᱫ ᱾
ᱩᱱ ᱠᱷᱚᱱ ᱜᱮ ᱢᱮᱱᱟ ᱠᱚ ᱠᱮᱸᱰᱨᱚᱝ ᱫᱚ ᱱᱮᱛᱟᱨ ᱦᱚᱸ ᱚᱠᱚᱭᱟᱜ ᱵᱚᱦᱚᱜ ᱨᱮ ᱵᱟᱠᱚ ᱫᱤᱯᱤᱞ ᱟᱠᱚᱣᱟ, ᱪᱤ ᱩᱱᱠᱩ ᱥᱟᱶ ᱵᱟᱠᱚ ᱤᱨᱤᱡ ᱪᱤᱠᱤᱡᱚᱜᱼᱟ ᱾
(ᱢᱟᱨᱮ ᱠᱟᱹᱦᱱᱤ ᱠᱷᱚᱱ ᱛᱩᱢᱟᱹᱞ ᱟᱠᱟᱱᱟ)
