ᱛᱟᱦᱮᱸᱭᱟ ᱯᱩᱥ ᱵᱚᱸᱜᱟ
ᱥᱤᱸᱜᱤ ᱢᱟᱦᱟᱸ ᱠᱩᱱᱟᱹᱢᱤ
ᱵᱚᱛᱚᱨ ᱜᱮ ᱦᱟᱦᱟᱲᱟ ᱜᱮ
ᱦᱮᱡ ᱮᱱᱟᱢ ᱥᱩᱱᱟᱹᱢᱤ ᱾
ᱵᱟᱝ ᱫᱚ ᱥᱮᱨᱢᱟ ᱠᱷᱚᱱᱮᱢ
ᱫᱚᱱ ᱟᱬᱜᱚ ᱮᱱ
ᱵᱟᱝ ᱫᱚ ᱫᱷᱟᱹᱨᱛᱤ ᱠᱚᱞᱮ
ᱯᱚᱥᱟᱜ ᱟᱛᱮᱢ ᱚᱰᱚᱠᱮᱱ ᱾
ᱥᱚᱫᱚᱨᱮᱱ ᱦᱚᱲ ᱠᱚ ᱥᱟᱢᱟᱝ ᱟᱢᱟᱜ
ᱨᱩᱯ ᱥᱩᱭᱟᱹ ᱫᱟᱹᱱᱢᱤ
ᱤᱫᱤ ᱠᱮᱫ ᱠᱚᱣᱟᱢ ᱛᱤᱱᱟᱹᱜ ᱡᱤᱣᱤ
ᱡᱩᱱᱛᱩ ᱡᱟᱱᱣᱟ ᱢᱟᱹᱱᱢᱤ ᱾
ᱵᱟᱝ ᱞᱮ ᱟᱸᱡᱚᱢ ᱞᱮᱫ ᱛᱟᱦᱮᱸᱫ
ᱫᱚᱨᱭᱟ ᱦᱚᱸ ᱫᱟᱥᱟᱣᱜ
ᱱᱩᱱᱟᱹᱜ ᱵᱤᱯᱚᱫᱽ ᱪᱮᱫ ᱞᱮᱠᱟᱨᱮ
ᱡᱤᱣᱤᱫ ᱡᱤᱵᱚᱱ ᱨᱮ ᱥᱟᱦᱟᱣᱜ ᱾
ᱟᱸᱜᱮᱱ ᱮᱱᱟ ᱠᱚ ᱛᱤᱱᱟᱹᱜ ᱦᱚᱲ
ᱜᱤᱫᱟᱹᱨ, ᱯᱤᱫᱟᱹᱨ ᱠᱚᱲᱟ ᱠᱩᱲᱤ
ᱟᱹᱛᱩ ᱴᱚᱞᱟ ᱵᱟᱡᱟᱨ ᱜᱚᱴᱟ
ᱯᱮᱨᱮᱡ ᱮᱱᱟ ᱫᱷᱩᱲᱤ ᱾
ᱛᱤᱱᱟᱹᱜ ᱪᱮᱫ ᱩᱰᱩᱡ ᱰᱩᱵᱩᱡ
ᱩᱱᱩᱢ ᱞᱚᱴᱚᱢ ᱟᱸᱜᱮᱱ ᱮᱱ
ᱪᱟᱞᱟᱜ ᱟᱠᱚ ᱟᱯᱚᱥ ᱦᱚᱲ ᱯᱟᱱᱛᱮ
ᱰᱚᱭᱢᱟ ᱰᱩᱭᱢᱤ ᱚᱠᱟ ᱥᱮᱱ ᱾
ᱪᱷᱤᱢ ᱪᱷᱤᱛᱤᱨ ᱥᱟᱹᱲᱤᱢ
ᱨᱟᱹᱯᱩᱫ ᱟᱠᱟᱱ ᱚᱲᱟᱜ
ᱵᱟᱭ ᱟᱸᱡᱮᱫᱚᱜ ᱢᱮᱫ ᱫᱟᱜ
ᱢᱮᱫ ᱠᱷᱚᱱᱟᱜ ᱦᱚᱲᱟᱜ ᱾
ᱵᱟᱢ ᱵᱟᱪᱷᱟᱣ ᱞᱮᱫ ᱫᱚ
ᱨᱮᱸᱜᱮᱡ ᱚᱨᱮᱡ ᱠᱤᱥᱟᱹᱬ
ᱤᱫᱤ ᱠᱮᱫ ᱠᱚᱣᱟᱢ ᱡᱚᱛᱚ
ᱵᱩᱜᱤ ᱵᱟᱹᱲᱤᱡ ᱪᱤᱫᱟᱹᱬ ᱾
ᱦᱟᱥᱟ ᱫᱷᱩᱲᱤ ᱨᱮ ᱢᱟᱹᱬᱤ
ᱢᱮᱴᱟᱣᱮᱱ ᱛᱤᱱᱟᱹᱜ ᱰᱮᱨᱟ
ᱵᱟᱠᱚ ᱧᱟᱯᱟᱢ ᱞᱮᱱ ᱚᱠᱚᱭ ᱫᱚ
ᱴᱩᱣᱟᱹᱨ ᱨᱟᱺᱰᱤ ᱮᱨᱟ ᱾
ᱫᱷᱟᱶᱬᱟ ᱫᱷᱟᱹᱶᱬᱤ ᱯᱟᱱᱛᱮ
ᱚᱰᱚᱠ ᱮᱱ ᱠᱚ ᱦᱚᱲ ᱢᱟ
ᱦᱟᱹᱯᱤᱫ ᱦᱚᱲᱟᱜ ᱤᱠᱷᱟᱹᱱ
ᱵᱟᱝ ᱟᱸᱡᱚᱢᱚᱜ ᱜᱚᱝ ᱢᱟ ᱾
ᱫᱚᱨᱭᱟ ᱫᱟᱜ ᱪᱷᱤᱞᱠᱟᱹᱣ
ᱫᱤᱥᱟᱹ ᱵᱟᱭ ᱦᱤᱡᱩᱜ
ᱱᱩᱱᱟᱹᱜ ᱦᱚᱲ ᱫᱚᱨᱭᱟ ᱫᱟᱜ
ᱵᱟᱹᱞᱤ ᱨᱮᱠᱚ ᱪᱷᱟᱱ ᱜᱩᱡᱩᱜ ᱾
ᱦᱚᱲᱟᱜ ᱡᱤᱣᱤᱫ ᱡᱤᱵᱚᱱ
ᱛᱤᱱᱟᱹᱜ ᱦᱚᱸ ᱵᱟᱭ ᱠᱮᱴᱮᱡ
ᱚᱴᱟᱝ ᱜᱤᱰᱤᱜ ᱫᱮᱢᱚᱱ
ᱦᱳᱲᱳ ᱠᱷᱚᱱ ᱯᱮᱴᱮᱡ ᱾
ᱵᱟᱵᱚᱱ ᱯᱩᱨᱩᱱ ᱠᱮ ᱠᱷᱤᱛᱤ
ᱡᱟᱦᱟᱸ ᱛᱤᱱᱟᱹᱜ ᱵᱚᱱ ᱥᱚᱝ
ᱡᱟᱦᱟᱸ ᱛᱤᱱᱟᱹᱜ ᱜᱮ ᱦᱩᱭᱩᱜ ᱱᱚᱶᱟ
ᱜᱚᱲᱚ ᱥᱚᱯᱚᱦᱚᱫ ᱜᱚᱱᱚᱝ ᱾
ᱧᱮᱞ ᱠᱮᱫ ᱟᱵᱚ ᱥᱩᱱᱟᱹᱢᱤ
ᱟᱡᱟᱜ ᱨᱩᱯ ᱪᱷᱟᱱ
ᱡᱚᱢ ᱨᱟᱡᱟ ᱦᱩᱫᱩᱲ ᱨᱟᱡᱟ ᱫᱟᱹᱱᱢᱤ
ᱱᱩᱠᱩ ᱠᱷᱚᱱ ᱦᱚᱸ ᱵᱚᱛᱚᱨᱟᱱ ᱾
