ᱦᱟᱭᱨᱮ ᱱᱚᱶᱟ ᱨᱟᱹᱜᱤ
ᱪᱟᱜ ᱪᱚ ᱦᱤᱡᱩᱜ ᱟᱹᱛᱷᱟᱹᱣᱲᱤ
ᱱᱟᱯᱟᱭ ᱢᱟ ᱪᱮᱫ ᱦᱚᱸ ᱵᱟᱭ ᱱᱟᱯᱟᱭᱟᱭ
ᱵᱟᱹᱲᱤᱡ ᱟᱨ ᱵᱟᱹᱲᱤᱡ ᱤᱫᱤᱭᱟᱭ
ᱵᱮᱱᱟᱣ ᱢᱟ ᱪᱮᱫ ᱦᱚᱸ ᱵᱟᱭ ᱵᱮᱱᱟᱣᱟ
ᱨᱟᱹᱯᱩᱫ ᱟᱨ ᱨᱟᱹᱯᱩᱫ ᱤᱫᱤᱭᱟᱭ !
ᱦᱟᱭᱨᱮ ᱱᱚᱶᱟ ᱨᱟᱹᱜᱤ
ᱪᱟᱜ ᱪᱚ ᱦᱤᱡᱩᱜᱼᱟ ᱟᱹᱛᱷᱟᱹᱣᱲᱤ
ᱞᱟᱡᱟᱣ ᱵᱚᱛᱚᱨ ᱡᱮᱛᱮ ᱪᱟᱵᱟᱭ
ᱥᱤᱵᱤᱞ ᱥᱟᱹᱜᱟᱹᱭ ᱦᱮᱣᱮᱨ ᱜᱚᱫᱟᱭ
ᱵᱚᱭᱚᱥ ᱠᱚᱦᱚᱸ ᱵᱟᱭ ᱴᱷᱤᱠᱟᱹᱭ
ᱥᱟᱹᱜᱟᱹᱭ ᱠᱚᱦᱚᱸ ᱦᱤᱲᱤᱧᱟᱭ ᱾
ᱦᱟᱭᱨᱮ ᱱᱚᱶᱟ ᱨᱟᱹᱜᱤ
ᱪᱟᱜ ᱪᱚ ᱦᱤᱡᱩᱜ ᱟᱹᱛᱷᱟᱹᱣᱲᱤ
ᱫᱩᱠ ᱡᱟᱞᱟ ᱵᱟᱹᱲᱛᱤᱭᱟᱭ
ᱟᱹᱠᱤᱞ ᱜᱚᱣᱟᱨ ᱵᱮᱱᱟᱣ ᱢᱮᱭᱟᱭ
ᱢᱤᱫ ᱥᱟᱶᱛᱮ ᱵᱟᱝ ᱛᱟᱦᱮᱸ ᱠᱟᱛᱮ
ᱮᱠᱞᱟ ᱜᱮ ᱛᱟᱦᱮᱸ ᱚᱪᱚ ᱢᱮᱭᱟᱭ
ᱦᱟᱭᱨᱮ ᱱᱚᱶᱟ ᱨᱟᱹᱜᱤ
ᱪᱟᱜ ᱪᱚ ᱦᱤᱡᱩᱜ ᱟᱹᱛᱷᱟᱹᱣᱲᱤ ᱾
***
