ᱢᱮᱱᱟᱜ ᱢᱮᱭᱟ ᱥᱤᱧᱚᱛ ᱫᱤᱥᱚᱢ ᱨᱮ
ᱠᱷᱮᱨᱣᱟᱲ ᱦᱚᱯᱚᱱ ᱟᱹᱰᱤ ᱥᱟᱸᱜᱮᱨᱮ
ᱥᱩᱞᱩᱠ ᱜᱷᱟᱨᱚᱸᱡᱽ ᱱᱟᱯᱟᱭ ᱞᱟᱹᱜᱤᱫ
ᱛᱚᱞ ᱟᱱ ᱛᱟᱦᱮᱸᱫ ᱟᱹᱱᱼᱟᱹᱨᱤ
ᱥᱟᱶᱛᱟ ᱫᱷᱚᱨᱚᱢ, ᱟᱹᱨᱤᱼᱪᱟᱹᱨᱤ
ᱞᱟᱭ ᱞᱟᱠᱪᱟᱨ ᱱᱮᱢᱟᱪᱟᱨ ᱵᱟᱹᱭᱥᱤ ᱾
ᱡᱩᱜᱽ ᱯᱷᱮᱨᱟᱣ ᱥᱟᱶ ᱥᱟᱶᱛᱮ
ᱟᱫ ᱤᱫᱤᱭᱮᱫᱟᱢ ᱵᱟᱹᱭ ᱵᱟᱹᱭ ᱛᱮ
ᱞᱚᱼᱵᱤᱨ ᱨᱮᱭᱟᱜ ᱵᱤᱪᱟᱹᱨ ᱵᱟᱹᱭᱥᱤ
ᱦᱤᱨᱠᱟᱹᱜ ᱠᱟᱱᱟᱢ ᱥᱟᱶᱛᱟ ᱟᱹᱨᱥᱤ
ᱢᱮᱢᱮᱱ ᱠᱟᱱᱟᱢ ᱟᱢ ᱫᱚ ᱫᱤᱠᱩ ᱦᱚᱯᱚᱱ ᱵᱟᱹᱭᱨᱤ
ᱥᱮᱞᱮᱫᱚᱜ ᱠᱟᱱᱟᱢ ᱮᱱ ᱦᱚᱸ ᱠᱳᱴ ᱠᱟᱪᱷᱟᱨᱤ ᱾
ᱢᱟᱹᱱᱢᱤ ᱨᱩᱯᱤ ᱵᱚᱸᱜᱟ ᱵᱳᱨᱳ ᱠᱚᱣᱟᱜ
ᱠᱟᱛᱷᱟ ᱵᱟᱝ ᱮᱢ ᱢᱟᱱᱟᱣ ᱵᱟᱛᱟᱣ ᱮᱫᱟ
ᱢᱟᱨᱟᱝ ᱵᱚᱸᱜᱟ ᱟᱹᱭᱩᱨ ᱥᱩᱜᱛᱩᱜᱤᱡ
ᱢᱟᱨᱟᱝ ᱵᱳᱨᱳ ᱫᱚ ᱢᱟᱹᱱᱢᱤ ᱵᱟᱧᱪᱟᱣᱤᱡ ᱾
ᱥᱚᱨᱚᱜᱽ ᱯᱩᱨᱤ ᱨᱮᱭᱟᱜ ᱪᱟᱹᱶᱨᱤᱭᱟᱹ
ᱵᱚᱸᱜᱟ ᱵᱳᱨᱳ ᱠᱚᱣᱟᱜ ᱵᱤᱪᱟᱹᱨᱤᱭᱟᱹ
ᱛᱚᱱᱚᱞ ᱟᱠᱟᱫ ᱢᱮᱭᱟ ᱠᱚ
ᱵᱟᱧᱪᱟᱣ ᱰᱟᱦᱟᱨ ᱞᱟᱹᱜᱤᱫ ᱾
ᱥᱮᱨᱣᱟ ᱠᱤᱱ ᱛᱚᱞ ᱞᱮᱫ ᱨᱮᱫᱚ
ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱰᱷᱤ,
ᱩᱱᱠᱤᱱᱟᱜ ᱵᱮᱱᱟᱣ ᱟᱹᱨᱤ
ᱞᱚᱴᱚᱢ ᱮᱫᱼᱟᱢ ᱟᱹᱜᱤᱞ ᱛᱷᱩᱛᱤ ᱾
ᱵᱮᱨᱮᱫ ᱞᱮᱫᱼᱟ ᱠᱚ ᱛᱤᱱᱟᱹᱜ ᱯᱷᱟᱨᱱᱟ ᱾
ᱠᱷᱮᱨᱣᱟᱞ ᱵᱤᱨᱟᱹᱫᱟᱹᱞᱤ ᱟᱹᱜᱤᱞ ᱦᱟᱯᱲᱟᱢ
ᱢᱮᱱᱟᱜ ᱠᱚᱣᱟ ᱢᱟᱹᱡᱷᱤ, ᱢᱟᱯᱟᱧᱡᱤ, ᱯᱟᱨᱜᱟᱱᱟ
ᱫᱤᱥᱟᱹᱭ ᱢᱮ ᱟᱢ ᱫᱚ ᱟᱹᱫᱤᱢ ᱟᱹᱱᱼᱟᱹᱨᱤ
ᱵᱮᱨᱮᱫ ᱞᱮᱫᱼᱟ ᱠᱚ ᱛᱤᱱᱟᱹᱜ ᱯᱷᱟᱨᱱᱟ ᱾
***
ᱟᱨᱦᱚᱸ ᱞᱟᱦᱟ ᱥᱮᱱ ᱢᱟᱬᱟᱝ ᱪᱟᱞᱟᱜ ᱢᱮ᱾