ᱛᱮᱦᱮᱧ ᱫᱚ ᱢᱤᱫ ᱠᱟᱹᱦᱱᱤᱧ ᱞᱟᱹᱭ ᱟᱵᱚᱱᱟ ᱾ ᱠᱟᱹᱦᱱᱤ ᱫᱚ ᱵᱟᱝ ᱚᱥᱚᱞ ᱨᱮ ᱫᱚ ᱢᱤᱫ ᱥᱟᱹᱨᱤ ᱜᱷᱚᱴᱱᱟᱹᱧ ᱞᱟᱹᱭ ᱟᱵᱚᱱᱟ ᱾ ᱪᱟᱞᱟᱣᱮᱱ ᱥᱮᱨᱢᱟ ᱱᱚᱵᱷᱮᱢᱵᱚᱨ ᱨᱮ ᱳᱰᱤᱥᱟ ᱠᱷᱚᱱ ᱚᱦᱢᱮᱫᱟᱵᱟᱫᱽ ᱦᱤᱡᱩᱜ ᱚᱠᱛᱚ ᱤᱧᱟᱜ ᱥᱩᱨ ᱥᱤᱴ ᱨᱮ ᱡᱟᱦᱟᱸᱭ ᱦᱚᱲ ᱠᱚ ᱠᱚ ᱫᱩᱲᱩᱵ ᱞᱮᱱᱟ ᱩᱱᱠᱩᱣᱟᱜ ᱠᱟᱛᱷᱟᱹᱧ ᱞᱟᱹᱭᱟ ᱾
ᱤᱱᱰᱤᱜᱳ ᱯᱷᱟᱭᱤᱴ ᱛᱤᱧ ᱦᱤᱡᱩᱜ ᱠᱟᱱ ᱛᱟᱦᱮᱸᱫ, ᱠᱚᱵᱤᱰ ᱜᱟᱭᱤᱰ ᱞᱟᱹᱭᱤᱱ ᱤᱫᱤ ᱛᱮ ᱢᱟᱥᱠ ᱠᱚ ᱯᱷᱮᱥ ᱥᱤᱞᱰ ᱠᱚ ᱦᱚᱨᱚᱜ ᱠᱟᱛᱮ ᱫᱩᱲᱩᱵ ᱦᱚᱸ ᱟᱹᱰᱤ ᱟᱸᱴ ᱫᱷᱟᱨᱟ ᱜᱮ ᱟᱹᱭᱠᱟᱹᱣᱜᱼᱟ, ᱤᱠᱷᱟᱹᱡ ᱦᱚᱨᱚᱜ ᱢᱟ ᱞᱟᱹᱠᱛᱤ ᱠᱟᱱ ᱜᱮᱭᱟ ᱾ ᱮᱱ ᱦᱚᱸ ᱛᱤᱱᱟᱹᱜ ᱦᱚᱲ ᱢᱮᱱᱟᱜ ᱠᱚᱣᱟ ᱢᱟᱥᱠ ᱵᱟᱠᱚ ᱦᱚᱨᱚᱜᱟ, ᱟᱠᱚ ᱜᱮ ᱡᱚᱛᱚᱣᱟᱜ ᱠᱚ ᱵᱟᱰᱟᱭ ᱞᱮᱠᱟ ᱟᱹᱭᱠᱟᱹᱣᱜᱼᱟ ᱾
ᱤᱧᱟᱜ ᱥᱤᱴ ᱫᱚ ᱯᱷᱞᱟᱭᱤᱴ ᱨᱮᱱᱟᱜ ᱡᱚᱡᱚᱢ ᱯᱟᱥᱴᱟ ᱨᱮ ᱛᱟᱦᱮᱸ ᱠᱟᱱᱟ, ᱣᱤᱝᱜᱽ ᱠᱷᱚᱱ ᱵᱟᱨᱮᱭᱟ ᱥᱤᱴ ᱛᱟᱭᱚᱢ ᱨᱮ ᱾ ᱤᱧ ᱡᱚᱡᱚᱢ ᱯᱟᱦᱴᱟ ᱨᱮ ᱣᱤᱱᱰᱳ ᱥᱩᱨ ᱨᱮ ᱔᱐ ᱥᱮᱨᱢᱟ ᱜᱟᱱ ᱨᱤᱱᱤᱢ ᱯᱟᱥᱮᱱᱡᱚᱨ ᱮ ᱫᱩᱲᱩᱵ ᱞᱮᱱ ᱛᱟᱦᱮᱸᱫ ᱟᱨ ᱞᱮᱸᱜᱟ ᱯᱟᱥᱴᱟ ᱨᱮ ᱫᱚ ᱢᱤᱫ ᱓᱒ᱼ᱓᱕ ᱥᱮᱨᱢᱟ ᱨᱤᱱᱤᱡ ᱦᱚᱲ ᱮ ᱫᱩᱲᱩᱵ ᱞᱮᱱᱟ ᱡᱟᱦᱟᱸᱭ ᱫᱚ ᱦᱚᱲ ᱠᱚ ᱥᱟᱞᱟᱜ ᱨᱚᱯᱚᱲ ᱦᱚᱸ ᱵᱟᱝ ᱪᱮᱫ ᱦᱚᱸ ᱵᱟᱝ, ᱢᱚᱵᱟᱭᱤᱞ ᱜᱮ ᱜᱷᱟᱱᱮᱭ ᱩᱭᱩᱝ ᱩᱭᱩᱝ ᱮᱫ ᱛᱟᱦᱮᱸᱫ ᱾ ᱞᱮᱸᱜᱟ ᱯᱟᱦᱴᱟ ᱥᱟᱢᱟᱝ ᱥᱤᱴ ᱨᱮ ᱢᱤᱫ ᱠᱚᱲᱟ ᱒᱔ᱼ᱒᱕ ᱥᱟᱞᱮ ᱨᱤᱱᱤᱡ ᱮ ᱫᱩᱲᱩᱵ ᱟᱠᱟᱱ ᱛᱟᱦᱮᱸᱫ ᱾ ᱚᱲᱟᱜ ᱠᱷᱚᱱ ᱜᱮ ᱯᱟᱞᱮ ᱯᱷᱳᱱ ᱦᱮᱡ ᱞᱮᱱᱟ, ᱟᱫᱚ ᱱᱩᱭ ᱠᱚᱲᱟ ᱦᱚᱨᱚᱵᱚᱨᱚ ᱯᱷᱳᱱ ᱨᱤᱥᱤᱵᱽ ᱠᱟᱛᱮ ᱟᱹᱲᱤᱥ ᱟᱲᱟᱝ ᱛᱮ ᱢᱮᱱ ᱠᱮᱫ ᱟᱭ, ᱢᱟᱢᱟ ᱠᱤᱛᱱᱮ ᱵᱟᱨ ᱵᱟᱛᱟᱶ, ᱢᱮᱸ ᱵᱮᱴᱷ ᱪᱩᱠᱟ ᱦᱩᱸ, ᱚᱵᱽ ᱯᱷᱳᱱ ᱨᱟᱠᱷᱳ ᱯᱞᱤᱡᱽ! ᱩᱱᱟᱹᱜ ᱡᱩᱨ ᱡᱩᱨ ᱛᱮ ᱜᱟᱨᱡᱟᱣ ᱟᱛᱮ ᱨᱚᱲ ᱠᱮᱫ ᱟᱭ ᱫᱚ, ᱟᱫᱷᱟ ᱯᱷᱞᱟᱭᱤᱴ ᱨᱤᱱ ᱦᱚᱲ ᱟᱡ ᱜᱮ ᱠᱚ ᱠᱚᱭᱚᱜ ᱟᱠᱟᱫ ᱫᱮ ᱛᱟᱦᱮᱸᱫ ᱾ ᱤᱧ ᱞᱮᱸᱜᱟ ᱯᱟᱦᱴᱟ ᱨᱮ ᱫᱩᱲᱩᱵ ᱞᱮᱱ ᱦᱚᱲ ᱯᱷᱞᱟᱭᱤᱴ ᱴᱮᱠ ᱚᱯᱷ ᱢᱟᱬᱟᱝ ᱨᱮ ᱚᱲᱟᱜ ᱜᱮ ᱯᱟᱞᱮᱭ ᱯᱷᱳᱱ ᱞᱮᱫᱼᱟ ᱾ ᱯᱷᱳᱱ ᱛᱮ ᱚᱲᱟᱜ ᱦᱚᱲᱮ ᱞᱟᱹᱭ ᱟᱫ ᱠᱚᱣᱟ ᱯᱷᱞᱟᱭᱤᱴ ᱮ ᱴᱮᱠ ᱚᱯᱷ ᱮᱫᱼᱟ ᱢᱮᱱᱛᱮ ᱟᱨ ᱵᱟᱨ ᱜᱷᱚᱱᱴᱟ ᱞᱟᱹᱜᱤᱫ ᱯᱷᱳᱱ ᱥᱣᱤᱪ ᱚᱯᱷ ᱛᱟᱦᱮᱸᱱᱟ ᱢᱮᱱᱛᱮ ᱾ ᱦᱟᱱᱛᱮ ᱠᱷᱚᱱ ᱯᱟᱞᱮ ᱠᱚ ᱠᱩᱞᱤ ᱠᱮᱫᱮᱭᱟ ᱛᱤᱨᱮᱢ ᱥᱮᱴᱮᱨᱚᱜᱼᱟ ᱾
ᱢᱮᱱᱛᱮ, ᱟᱫᱚᱭ ᱞᱟᱹᱭ ᱠᱮᱫᱼᱟ ᱥᱮᱛᱟᱜ ᱥᱟᱰᱮ ᱤᱨᱟᱹᱞ ᱴᱟᱬᱟᱝ ᱜᱟᱱ ᱱᱷᱟᱜ ᱵᱟᱡᱟᱣ ᱜᱚᱫᱚᱜᱼᱟ ᱾ ᱟᱨ ᱚᱸᱰᱮ ᱠᱷᱚᱱ ᱱᱷᱟᱜ ᱵᱚᱥ ᱥᱟᱵ ᱠᱟᱛᱮ ᱠᱭᱟᱢᱯ ᱥᱮᱱᱚᱜ ᱦᱩᱭᱩᱜᱼᱟ ᱾ ᱚᱦᱢᱚᱫᱟᱵᱟᱫᱽ ᱠᱷᱚᱱ ᱠᱭᱟᱢᱯ ᱥᱮᱴᱮᱨᱚᱜ ᱫᱚ ᱛᱩᱨᱩᱭ ᱮᱭᱟᱭ ᱜᱷᱚᱱᱴᱟ ᱜᱟᱱ ᱱᱷᱟᱜ ᱞᱟᱜᱟᱣ ᱜᱚᱫᱚᱜᱼᱟ ᱾ ᱦᱟᱱᱛᱮ ᱠᱷᱚᱱ ᱪᱮᱫ ᱪᱚᱠᱚ ᱠᱩᱞᱤ ᱠᱮᱫᱮ, ᱴᱟᱴᱠᱟᱭ ᱢᱮᱱ ᱨᱩᱣᱟᱹᱲ ᱜᱚᱫ ᱠᱮᱫᱼᱟ – ᱚᱦᱢᱚᱫᱟᱵᱟᱫᱽ ᱨᱮ ᱫᱚ ᱚᱠᱟᱨᱤᱧ ᱡᱤᱨᱟᱹᱣᱜᱼᱟ, ᱥᱤᱫᱷᱟᱹ ᱠᱭᱟᱢᱯ ᱥᱮᱱ ᱠᱟᱛᱮ ᱩᱛᱟᱹᱨ ᱡᱤᱨᱟᱹᱣ ᱫᱚ ᱱᱷᱟᱜ ᱾ ᱚᱸᱰᱮ ᱦᱚᱸ ᱱᱷᱟᱜ ᱛᱤᱱᱟᱹᱜ ᱫᱤᱱ ᱠᱣᱟᱨᱟᱱᱴᱤᱱ ᱨᱮ ᱠᱚ ᱫᱚᱦᱚᱭᱤᱧᱟ ᱾
ᱵᱟᱹᱵᱩᱭ ᱡᱟᱯᱤᱫ ᱠᱮᱫᱼᱟ? ᱱᱚᱣᱟ ᱠᱩᱠᱞᱤ ᱫᱚᱦᱚ ᱠᱟᱛᱮ ᱱᱟᱥᱮ ᱜᱷᱟᱹᱲᱤᱠ ᱮ ᱛᱷᱤᱨ ᱫᱚᱦᱚᱭᱮᱱᱟ ᱚᱱᱟ ᱛᱟᱭᱚᱢ ᱮ ᱢᱮᱱ ᱠᱮᱫᱼᱟ ᱟᱭᱳᱼᱣᱟᱜ ᱟᱞᱢᱤᱨᱟᱹ ᱪᱮᱛᱟᱱ ᱨᱮ ᱢᱤᱫᱴᱟᱹᱝ ᱵᱚᱠᱥ ᱢᱮᱱᱟᱜᱼᱟ, ᱵᱟᱹᱵᱩᱭ ᱵᱮᱨᱮᱫ ᱞᱮᱱ ᱠᱷᱟᱱ ᱚᱱᱟ ᱱᱷᱟᱜ ᱮᱢᱟᱭ ᱢᱮ ᱾ ᱟᱨ ᱦᱚᱸ, ᱵᱟᱹᱵᱩᱣᱟᱜ ᱛᱩᱠᱭᱟᱹ ᱞᱟᱛᱟᱨ ᱨᱮ ᱢᱤᱫ ᱡᱤᱱᱤᱥ ᱢᱮᱱᱟᱜᱼᱟ, ᱧᱮᱞ ᱢᱮ ᱱᱷᱟᱜ, ᱚᱱᱟ ᱫᱚ ᱟᱢ ᱞᱟᱹᱜᱤᱫ ᱾ ᱟᱨ ᱦᱚᱸᱭ ᱢᱮᱱ ᱛᱟᱨᱟ ᱠᱮᱫᱼᱟ, ᱟᱯᱮ ᱡᱚᱛᱚ ᱚᱲᱟᱜ ᱨᱮ ᱠᱩᱥᱤ ᱨᱟᱹᱥᱠᱟᱹ ᱨᱮᱯᱮ ᱛᱟᱦᱮᱸᱱ ᱠᱷᱟᱱ ᱤᱧ ᱦᱚᱸ ᱠᱩᱥᱤ ᱨᱟᱹᱥᱠᱟᱹ ᱨᱤᱧ ᱛᱟᱦᱮᱸᱱᱟ ᱾ ᱚᱱᱟ ᱛᱟᱭᱚᱢ ᱦᱮᱞᱳ ᱦᱮᱞᱳ ᱢᱮᱱ ᱵᱟᱲᱟ ᱛᱮᱜᱮ ᱯᱷᱳᱱ ᱛᱟᱭ ᱯᱟᱞᱮ ᱠᱟᱴᱟᱣᱮᱱᱟ, ᱪᱮᱫᱟᱜ ᱥᱮ ᱯᱷᱞᱟᱭᱤᱴ ᱤᱱᱟᱹᱜ ᱛᱮ ᱴᱮᱠ ᱚᱯᱷ ᱮ ᱦᱟᱛᱟᱣ ᱦᱩᱭ ᱞᱮᱫ ᱛᱟᱦᱮᱸᱫ ᱾
ᱤᱧ ᱢᱚᱱᱮ ᱢᱚᱱᱮ ᱛᱤᱧ ᱢᱮᱱ ᱮᱫ ᱛᱟᱦᱮᱫ, ᱦᱚᱲ ᱠᱚ ᱮᱱᱛᱮ ᱛᱤᱱᱟᱹᱜ ᱯᱷᱳᱱ ᱛᱮᱠᱚ ᱠᱟᱛᱷᱟ ᱫᱟᱲᱮᱭᱟᱜᱼᱟ ᱼ ᱱᱤᱛ ᱫᱚ ᱦᱚᱨ ᱨᱮ ᱢᱤᱱᱟᱹᱧᱟ, ᱱᱤᱛ ᱫᱚ ᱯᱷᱞᱟᱭᱤᱴ ᱨᱤᱧ ᱫᱮᱡ ᱮᱱᱟ, ᱱᱤᱛ ᱫᱚ ᱥᱤᱴ ᱨᱤᱧ ᱫᱩᱲᱩᱵ ᱮᱱᱟ, ᱥᱩᱨ ᱨᱮ ᱚᱠᱚᱭ ᱠᱚ ᱠᱚ ᱫᱩᱲᱩᱵ ᱟᱠᱟᱱᱟ, ᱚᱠᱟ ᱥᱤᱴ ᱧᱟᱢ ᱟᱠᱟᱱᱟ, ᱥᱟᱭᱤᱰ, ᱢᱤᱰᱤᱞ ᱥᱮ ᱣᱤᱱᱰᱳ ᱯᱟᱥᱴᱟᱹᱹᱹ, ᱥᱤᱴ ᱫᱚ ᱦᱩᱰᱤᱧ ᱜᱮᱭᱟ ᱥᱮ ᱫᱩᱲᱩᱵ ᱜᱟᱱᱚᱜ ᱠᱟᱱ ᱜᱮᱭᱟᱹᱹ ᱛᱤᱱᱟᱹᱜ ᱠᱩᱯᱞᱤ ᱛᱮᱯᱞᱟᱹᱹ !!!
ᱵᱷᱟᱹᱜᱤ ᱠᱟᱛᱷᱟ ᱡᱮ ᱴᱮᱠ ᱚᱯᱷ ᱛᱟᱭᱚᱢ ᱢᱳᱵᱟᱭᱤᱞ ᱨᱮ ᱱᱮᱴᱼ ᱣᱚᱨᱠ ᱵᱟᱝ ᱛᱟᱦᱮᱸᱱ ᱠᱟᱱᱟ, ᱵᱟᱝ ᱠᱷᱟᱱ ᱫᱚ ᱦᱩᱱᱟᱹᱝ ᱯᱷᱞᱟᱭᱤᱴ ᱵᱷᱤᱛᱨᱤ ᱨᱮ ᱠᱚ ᱪᱮᱨᱚ ᱵᱮᱨᱚ ᱪᱟᱵᱟ ᱠᱚᱜᱼᱟ ᱟᱹᱰᱤ ᱦᱚᱲ ᱾ ᱱᱩᱭ ᱦᱚᱲ ᱱᱟᱥᱮ ᱜᱷᱟᱹᱲᱤᱠ ᱛᱷᱤᱨ ᱛᱷᱟᱨ ᱮ ᱛᱟᱦᱮᱸᱭᱮᱱ ᱛᱟᱭᱚᱢ ᱢᱳᱵᱟᱭᱤᱞ ᱯᱷᱞᱟᱭᱤᱴ ᱢᱳᱰ ᱨᱮ ᱫᱚᱦᱚ ᱠᱮᱫ ᱟᱭ ᱟᱨ ᱯᱤᱠᱪᱚᱨ ᱜᱟᱞᱮᱨᱤ ᱥᱮᱱ ᱠᱟᱛᱮ ᱢᱤᱫ ᱦᱚᱯᱚᱱ ᱠᱚᱲᱟ ᱜᱤᱫᱽᱨᱟᱹ ᱦᱟᱜ ᱯᱷᱳᱴᱳ ᱥᱠᱨᱳᱞ ᱟᱯ ᱥᱠᱨᱳᱞ ᱰᱟᱣᱩᱱ, ᱡᱩᱢ ᱤᱱ ᱡᱩᱢ ᱟᱣᱩᱴ ᱠᱟᱛᱮᱭ ᱧᱮᱞ ᱮᱫ ᱛᱟᱦᱮᱸᱫ ᱾ ᱥᱤᱴ ᱥᱟᱭᱤᱡ ᱠᱚ ᱦᱚᱸ ᱟᱹᱰᱤ ᱠᱟᱹᱴᱤᱡ ᱠᱟᱹᱴᱤᱡ ᱛᱟᱦᱮᱸᱱ ᱫᱚ, ᱚᱱᱟ ᱛᱮ ᱟᱡᱟᱜ ᱢᱳᱵᱟᱭᱤᱞ ᱨᱮ ᱡᱟᱦᱟᱸ ᱜᱮ ᱪᱤᱛᱟᱹᱨ ᱠᱚᱭ ᱳᱯᱮᱱ ᱮᱫ ᱛᱟᱦᱮᱸᱫ, ᱡᱚᱛᱚᱧ ᱧᱮᱞ ᱧᱟᱢ ᱮᱫ ᱛᱟᱦᱮᱸᱫ ᱾
ᱱᱟᱥᱮ ᱜᱷᱟᱹᱲᱤᱠ ᱱᱚᱝᱠᱟ ᱜᱮ ᱯᱷᱳᱴᱚᱭ ᱠᱚᱭᱚᱜ ᱵᱟᱲᱟ ᱠᱮᱫ ᱛᱮ ᱢᱳᱵᱟᱭᱤᱞ ᱫᱚ ᱯᱮᱸᱴ ᱯᱚᱠᱮᱴ ᱨᱮ ᱫᱚᱦᱚ ᱠᱮᱫ ᱟᱭ ᱟᱨ ᱥᱤᱴ ᱪᱮᱛᱟᱱ ᱨᱮ ᱢᱮᱱᱟᱜ ᱞᱚᱜᱮᱡᱽ ᱠᱚᱢᱯᱟᱨᱴᱢᱮᱸᱴ ᱡᱷᱤᱡ ᱠᱟᱛᱮ ᱟᱡᱟᱜ ᱵᱮᱜᱽ ᱠᱷᱚᱱ ᱢᱤᱫ ᱯᱚᱠᱮᱴ ᱰᱟᱭᱨᱤ ᱞᱮᱠᱟᱱᱟᱜ ᱮ ᱚᱰᱚᱠ ᱠᱮᱫᱼᱟ ᱾ ᱟᱨ ᱚᱱᱟᱨᱮ ᱪᱮᱫ ᱠᱚᱪᱚ ᱚᱞ ᱮ ᱪᱷᱩᱴᱟᱹᱣ ᱮᱱᱟ ᱾ ᱧᱮᱞ ᱫᱚ ᱧᱮᱞᱚᱜ ᱠᱟᱱ ᱜᱮ ᱛᱟᱦᱮᱸᱫ ᱟᱫᱚ ᱤᱧ ᱜᱮ ᱵᱟᱹᱧ ᱯᱟᱲᱦᱟᱣ ᱞᱮᱫᱼᱟ ᱾ ᱱᱟᱥᱮ ᱚᱠᱛᱚ ᱤᱧ ᱦᱚᱸ ᱣᱤᱱᱰᱳ ᱥᱮᱫ ᱤᱧ ᱠᱚᱭᱚᱜ ᱧᱚᱜ ᱮᱫ ᱛᱟᱦᱮᱸᱫ, ᱟᱨ ᱣᱤᱱᱰᱳ ᱥᱤᱴ ᱨᱮ ᱡᱟᱦᱟᱸᱭ ᱫᱩᱲᱩᱵ ᱞᱮᱱ ᱛᱟᱦᱮᱸᱫ ᱩᱱᱤ ᱫᱚ ᱟᱡ ᱥᱟᱢᱟᱝ ᱥᱤᱴ ᱯᱚᱠᱮᱴ ᱠᱷᱚᱱ ᱵᱩᱠᱞᱮᱴ ᱚᱰᱚᱠ ᱠᱟᱛᱮ ᱯᱷᱩᱰ ᱢᱮᱱᱩ ᱯᱟᱲᱦᱟᱣ ᱨᱮ ᱵᱭᱚᱥᱛᱚᱭ ᱛᱟᱦᱮᱸ ᱠᱟᱱᱟ ᱾ ᱪᱮᱫ ᱞᱮᱠᱟᱱ ᱦᱚᱲ ᱠᱚ, ᱵᱟᱨ ᱜᱷᱚᱱᱴᱟ ᱟᱫᱷᱟ ᱡᱚᱨᱱᱤ ᱨᱮ ᱦᱚᱸ ᱩᱰᱟᱹᱣᱜ ᱜᱟᱹᱰᱤ ᱪᱮᱛᱟᱱ ᱨᱮ ᱩᱱᱟᱹᱜ ᱯᱩᱭᱥᱟᱹ ᱮᱢ ᱠᱟᱛᱮ ᱢᱟᱜᱤ ᱟᱨ ᱥᱩᱡᱤ ᱩᱯᱢᱟᱹ ᱡᱚᱡᱚᱢ ᱥᱟᱱᱟ ᱠᱚᱣᱟ, ᱚᱱᱟ ᱦᱚᱸ ᱞᱚᱞᱚ ᱫᱟᱜ ᱛᱮ ᱯᱷᱩᱞᱟᱹᱣ ᱤᱥᱤᱱᱟᱜ !!!
ᱟᱞᱮ ᱢᱟᱬᱟᱝ ᱥᱤᱴ ᱨᱮ ᱫᱚ ᱵᱟᱨᱭᱟ ᱠᱚᱞᱮᱡᱽ ᱜᱤᱫᱽᱨᱟᱹ ᱞᱮᱠᱟᱱ ᱠᱤᱱ ᱠᱤᱱ ᱫᱩᱲᱩᱵ ᱞᱮᱱᱟ ᱾ ᱣᱤᱱᱰᱳ ᱥᱤᱴ ᱨᱮ ᱫᱩᱲᱩᱵ ᱠᱟᱛᱮ ᱯᱟᱹᱨᱤ ᱯᱟᱹᱨᱤᱭᱟᱛᱮ ᱣᱤᱱᱰᱳ ᱠᱷᱚᱱ ᱯᱷᱳᱴᱚ ᱠᱤᱱ ᱨᱟᱠᱟᱵ ᱮᱫ ᱛᱟᱦᱮᱸᱫ ᱾ ᱱᱚᱝᱠᱟ ᱢᱟ ᱧᱮᱞ ᱛᱮ ᱢᱟ ᱨᱤᱢᱤᱞ ᱟᱹᱰᱤ ᱪᱚᱨᱚᱠ ᱜᱮ ᱧᱮᱞᱚᱜ ᱠᱟᱱ ᱛᱟᱦᱮᱸᱫ ᱾ ᱯᱩᱸᱰ ᱨᱤᱢᱤᱞ ᱨᱮ ᱥᱮᱛᱟᱜ ᱵᱮᱲᱟ ᱨᱮᱱᱟᱜ ᱪᱟᱸᱫᱚ ᱛᱟᱨᱟᱥ ᱵᱟᱡᱟᱣᱜ ᱠᱟᱱ ᱛᱟᱦᱮᱸᱫ, ᱱᱚᱝᱠᱟ ᱧᱮᱞᱚᱜ ᱠᱟᱱ ᱛᱟᱦᱮᱸᱫ ᱥᱟᱹᱨᱤ ᱜᱮ ᱡᱮᱢᱚᱱ ᱚᱠᱚᱭ ᱪᱚ ᱯᱩᱸᱰ ᱨᱤᱢᱤᱞ ᱪᱮᱛᱟᱱ ᱨᱮ ᱥᱳᱱᱟ ᱫᱟᱜ ᱮ ᱤᱨᱪᱤ ᱟᱠᱟᱫᱼᱟ ᱾ ᱚᱠᱟ ᱚᱠᱟ ᱨᱮ ᱯᱚᱲᱚᱭ ᱯᱚᱲᱚᱭ ᱯᱩᱸᱰ ᱟᱨ ᱚᱠᱟ ᱚᱠᱟ ᱨᱮ ᱟᱨᱟᱜ ᱯᱩᱸᱰ ᱨᱤᱢᱤᱞ ᱧᱮᱞ ᱡᱚᱝ ᱛᱮ ᱟᱹᱰᱤ ᱱᱟᱯᱟᱭ ᱧᱮᱞᱚᱜ ᱠᱟᱱ ᱛᱟᱦᱮᱸᱫ ᱾
ᱤᱧ ᱦᱚᱸ ᱯᱷᱳᱴᱚ ᱢᱟ ᱨᱟᱠᱟᱵ ᱥᱟᱱᱟ ᱞᱤᱫᱤᱧ ᱜᱮ ᱛᱟᱦᱮᱸᱫ ᱤᱠᱷᱟᱹᱱ ᱣᱤᱱᱰᱳ ᱥᱤᱴ ᱨᱤᱱᱤᱡ ᱦᱚᱲ ᱱᱟᱥᱮ ᱦᱚᱸ ᱯᱷᱩᱰ ᱢᱮᱱᱩ ᱠᱷᱚᱱ ᱢᱮᱫ ᱜᱮ ᱵᱟᱭ ᱥᱟᱦᱟᱭᱮᱫ ᱛᱟᱦᱮᱸᱫ, ᱟᱫᱚ ᱢᱚᱱᱮ ᱛᱤᱧ ᱢᱮᱱ ᱠᱮᱫᱼᱟ, ᱛᱤᱱᱟᱹᱜ ᱪᱚ ᱯᱟᱞᱮ ᱨᱮᱸᱜᱮᱡ ᱟᱠᱟᱫ ᱫᱮ, ᱵᱟᱹᱧ ᱰᱤᱥᱴᱚᱨᱵᱽ ᱮᱭᱟ ᱾ ᱟᱹᱰᱤ ᱦᱚᱲ ᱡᱷᱩᱨᱠᱟᱹ ᱥᱮᱫ ᱜᱮ ᱠᱚ ᱩᱭᱩᱝ ᱵᱟᱲᱟᱭᱮᱫ ᱛᱟᱦᱮᱸᱫ ᱾ ᱤᱠᱷᱟᱹᱱ ᱤᱧ ᱞᱮᱸᱜᱟ ᱯᱟᱦᱴᱟ ᱨᱮ ᱫᱩᱲᱩᱵ ᱟᱠᱟᱱ ᱦᱚᱲ ᱫᱚ ᱱᱤᱛ ᱦᱚᱸ ᱟᱡᱟᱜ ᱰᱟᱭᱨᱤ ᱨᱮ ᱪᱮᱫ ᱠᱚᱪᱚᱭ ᱚᱞ ᱤᱫᱤᱭᱮᱫ ᱜᱮ ᱛᱟᱦᱮᱸᱫ ᱾ ᱛᱟᱞᱟᱨᱮ ᱛᱟᱞᱟᱨᱮ ᱡᱷᱩᱨᱠᱟᱹ ᱥᱮᱫ ᱮ ᱠᱚᱭᱚᱜ ᱜᱚᱫᱮᱫ ᱛᱟᱦᱮᱸᱫ ᱟᱨ ᱢᱮᱫ ᱡᱟᱹᱯᱤᱫ ᱠᱟᱛᱮ ᱪᱮᱫ ᱠᱚᱪᱚᱭ ᱩᱭᱦᱟᱹᱨ ᱜᱚᱫ ᱮᱫ ᱛᱟᱦᱮᱸᱫ ᱟᱨ ᱵᱟᱨ ᱯᱮ ᱫᱷᱟᱹᱰᱤ ᱰᱟᱭᱨᱤ ᱨᱮᱭ ᱚᱞ ᱜᱚᱫᱮᱫ ᱛᱟᱦᱮᱸᱫ ᱾
ᱱᱤᱝᱠᱟᱹ ᱱᱤᱝᱠᱟᱹ ᱛᱮᱜᱮ ᱚᱠᱛᱚ ᱠᱚ ᱯᱟᱨᱚᱢ ᱤᱫᱤᱭᱮᱱᱟ ᱟᱨ ᱯᱟᱭᱤᱞᱚᱴ ᱠᱮᱵᱤᱱ ᱠᱷᱚᱱ ᱮᱱᱟᱣᱩᱸᱥᱢᱮᱸᱴ ᱦᱮᱡ ᱮᱱᱟ ᱟᱨ ᱟᱫᱷᱟ ᱜᱷᱚᱱᱴᱟᱨᱮ ᱯᱷᱟᱭᱤᱴ ᱚᱦᱢᱚᱫᱟᱵᱟᱫᱽ ᱨᱮ ᱞᱟᱱᱰᱤᱝ ᱟᱭ ᱢᱮᱱᱛᱮ ᱾ ᱥᱮᱛᱟᱜ ᱯᱷᱞᱟᱭᱤᱴ ᱠᱟᱱ ᱛᱟᱦᱮᱸᱫ ᱛᱚ, ᱡᱟᱦᱟᱸᱭ ᱦᱚᱲ ᱠᱚ ᱡᱟᱹᱯᱤᱫ ᱞᱮᱫᱼᱟ, ᱩᱱᱠᱩ ᱠᱚ ᱛᱤᱭᱟᱹᱨ ᱵᱟᱲᱟ ᱠᱟᱛᱮ ᱠᱚ ᱮᱵᱷᱮᱱᱚᱜ ᱠᱟᱱ ᱛᱟᱦᱮᱸᱫ ᱾ ᱵᱟᱹᱭ ᱵᱟᱹᱭ ᱛᱮ ᱱᱟᱥᱮ ᱱᱟᱥᱮ ᱞᱟᱛᱟᱨ ᱨᱮ ᱚᱲᱟᱜ ᱠᱚ, ᱦᱚᱨ ᱠᱚ ᱪᱮᱛᱟᱱ ᱠᱷᱚᱱ ᱧᱮᱞ ᱤᱫᱤᱜ ᱠᱟᱱ ᱛᱟᱦᱮᱸᱫ ᱾ ᱟᱨ ᱑᱐ ᱴᱤᱲᱤᱡ ᱜᱟᱱ ᱨᱮᱜᱮ ᱱᱷᱟᱜ ᱯᱟᱞᱮ ᱞᱟᱱᱰᱤᱝ ᱞᱮᱠᱟ ᱾ ᱟᱨ ᱫᱚᱲᱦᱟ ᱠᱮᱵᱤᱱ ᱠᱷᱚᱱ ᱮᱱᱟᱣᱩᱸᱥᱢᱮᱸᱴ ᱦᱮᱡ ᱮᱱᱟ ᱱᱤᱛ ᱫᱚ ᱢᱳᱵᱟᱭᱤᱞ ᱯᱷᱳᱱ ᱯᱮ ᱵᱮᱵᱷᱟᱨ ᱫᱟᱲᱮᱭᱟᱜᱼᱟ!
ᱤᱱᱟᱹ ᱢᱮᱱ ᱵᱟᱲᱟ ᱛᱮᱜᱮ ᱯᱷᱞᱟᱭᱤᱴ ᱫᱚ ᱮᱭᱟᱨᱯᱳᱨᱴ ᱪᱮᱛᱟᱱ ᱛᱮ ᱥᱮᱴᱮᱨᱮᱱᱟ ᱾ ᱤᱱᱟᱹᱜ ᱛᱮᱜᱮ ᱞᱮᱸᱜᱟ ᱯᱟᱦᱴᱟ ᱨᱮ ᱫᱩᱲᱩᱵ ᱟᱠᱟᱱ ᱦᱚᱲ ᱥᱚᱸᱜᱮ ᱯᱷᱳᱱ ᱚᱰᱚᱠ ᱠᱟᱛᱮ ᱯᱷᱳᱱ ᱮ ᱰᱟᱭᱮᱞ ᱠᱮᱫᱼᱟ ᱚᱲᱟᱜ ᱜᱮ ᱯᱟᱞᱮ ᱾ ᱟᱨ ᱮ ᱢᱮᱱ ᱠᱮᱫᱼᱟ , ᱥᱮᱴᱮᱨᱮᱱᱟᱧ, ᱵᱚᱥ ᱨᱮ ᱫᱩᱲᱩᱵ ᱦᱩᱭ ᱠᱟᱛᱮᱧ ᱯᱷᱳᱱ ᱟᱱᱷᱟᱜ ᱾ ᱵᱚᱥ ᱥᱟᱵ ᱞᱟᱹᱜᱤᱫ ᱔᱕ ᱴᱤᱲᱤᱡ ᱜᱮ ᱢᱮᱱᱟᱜᱼᱟ ᱾ ᱟᱫᱷᱟᱱ ᱦᱚᱲ ᱠᱚ ᱫᱚ ᱪᱮᱛᱟᱱ ᱰᱤᱠᱤ ᱠᱷᱚᱱ ᱵᱮᱜᱽ ᱠᱚ ᱚᱰᱚᱠ ᱠᱟᱛᱮ ᱡᱮ ᱡᱟᱦᱟᱨᱟᱜ ᱥᱤᱴ ᱨᱮ ᱠᱚ ᱫᱩᱲᱩᱵ ᱠᱟᱱ ᱛᱤᱸᱜᱩᱱ ᱠᱟᱱ ᱛᱟᱦᱮᱸᱫ ᱾ ᱤᱧ ᱫᱚ ᱥᱤᱴ ᱵᱮᱞᱴ ᱦᱚᱸ ᱟᱹᱣᱨᱤᱧ ᱚᱪᱚᱜ ᱟᱠᱟᱫ ᱛᱟᱦᱮᱸᱫ ᱟᱨ ᱯᱷᱞᱟᱭᱤᱴ ᱨᱮᱱᱟᱜ ᱚᱰᱚᱠ ᱫᱩᱣᱟᱹᱨ ᱟᱹᱣᱨᱤ ᱡᱷᱤᱡᱩᱜ ᱵᱷᱩᱨ ᱫᱚ ᱥᱤᱴ ᱵᱮᱞᱴ ᱵᱟᱹᱧ ᱚᱪᱚᱜᱽ ᱜᱮᱭᱟ ᱡᱟᱣ ᱦᱚᱸ ᱵᱚᱛᱚᱨ ᱠᱚᱛᱮ ᱾
ᱯᱷᱞᱟᱭᱤᱴ ᱛᱤᱸᱜᱩᱭᱮᱱᱟ ᱟᱨ ᱮᱱᱟᱣᱩᱸᱥᱢᱮᱴ ᱦᱮᱡ ᱮᱱᱟ ᱞᱚᱜᱮᱡᱽ ᱫᱚ ᱵᱮᱞᱴ ᱱᱚᱹ ᱑ ᱨᱮ ᱧᱟᱢᱚᱜᱼᱟ ᱢᱮᱱᱛᱮ ᱾ ᱮᱜᱽᱡᱤᱴ ᱫᱩᱣᱟᱹᱨ ᱡᱷᱤᱡ ᱮᱱ ᱥᱚᱸᱜᱮ ᱦᱚᱲ ᱠᱚ ᱟᱹᱰᱤ ᱦᱚᱨᱚᱵᱚᱨᱚ ᱠᱚ ᱚᱰᱚᱠᱚᱜ ᱠᱟᱱ ᱛᱟᱦᱮᱸᱫ ᱟᱨ ᱡᱚᱡᱚᱢ ᱯᱟᱦᱴᱟ ᱨᱮ ᱣᱤᱱᱰᱳ ᱥᱤᱴ ᱨᱮ ᱫᱩᱲᱩᱵ ᱟᱠᱟᱱ ᱦᱚᱲ ᱦᱚᱸᱭ ᱢᱮᱱ ᱠᱮᱫᱼᱟ ᱮᱠᱥᱠᱭᱩᱡᱽ ᱢᱤ, ᱢᱩᱡᱷᱮ ᱥᱟᱭᱤᱰ ᱫᱮ ᱫᱤᱡᱤᱭᱮ, ᱱᱤᱠᱚᱞᱱᱟ ᱦᱮ ᱾
ᱢᱟᱥᱮ! ᱛᱟᱞᱟ ᱦᱚᱨ ᱨᱮ ᱩᱱᱟᱹᱜ ᱦᱚᱲ ᱠᱚ ᱛᱤᱸᱜᱩ ᱟᱠᱟᱱᱟ, ᱩᱱᱠᱩ ᱟᱹᱣᱨᱤ ᱠᱚ ᱚᱰᱚᱠ ᱪᱟᱵᱟᱜᱼᱟ ᱟᱨ ᱱᱩᱭ ᱦᱚᱲ ᱫᱚ ᱚᱠᱟ ᱥᱮᱫ ᱛᱮ ᱚᱰᱚᱠᱚᱜ ᱥᱟᱱᱟᱭ ᱠᱟᱱᱟ ! ᱟᱫᱩᱧ ᱢᱮᱛᱟᱫ ᱫᱮᱭᱟ, ᱟᱯ ᱱᱮ ᱟᱱᱟᱩᱸᱥᱢᱮᱴ ᱥᱩᱱᱟ ᱱᱚᱦᱤ ᱥᱟᱭᱚᱫᱽ? ᱠᱳᱶᱤᱰ ᱜᱟᱭᱤᱰ ᱞᱟᱭᱤᱱ ᱠᱮ ᱛᱚᱦᱚᱛ ᱥᱟᱢᱱᱮ ᱥᱮ ᱮᱠ ᱮᱠ ᱨᱚᱣ ᱥᱮ ᱯᱟᱥᱮᱱᱜᱮᱨᱥ ᱮᱠ ᱮᱠ ᱠᱚᱨ ᱠᱮ ᱱᱤᱠᱞᱮᱱᱜᱮ! ᱟᱜᱮ ᱥᱮ ᱥᱚᱵᱽ ᱠᱳ ᱱᱤᱠᱚᱞᱱᱮ ᱫᱤᱡᱤᱭᱮ ᱯᱷᱤᱨ ᱢᱮ ᱱᱤᱠᱞᱩᱝᱜᱤ , ᱩᱥᱠᱮ ᱵᱟᱫᱽ ᱟᱯ ᱱᱤᱠᱞᱳᱜᱮ ᱾ ᱢᱮᱨᱮ ᱯᱮᱨ ᱚᱣᱩᱨ ᱥᱟᱢᱱᱮ ᱣᱟᱞᱟ ᱥᱤᱴ ᱠᱮ ᱵᱤᱪ ᱡᱚᱜᱟ ᱦᱤ ᱠᱚᱦᱟᱸ ᱦᱮ ᱡᱳ ᱟᱯ ᱠᱳ ᱵᱟᱦᱟᱨ ᱱᱤᱠᱟᱞᱱᱮ ᱠᱮ ᱞᱤᱭᱮ ᱥᱟᱭᱤᱰ ᱫᱩᱸ!
ᱱᱩᱭ ᱦᱚᱲ ᱥᱟᱞᱟᱜ ᱠᱟᱛᱷᱟ ᱠᱟᱛᱷᱟ ᱛᱮᱜᱮᱧ ᱧᱮᱞ ᱫᱚ ᱞᱮᱸᱜᱟ ᱯᱟᱦᱴᱟ ᱨᱤᱱᱤᱡ ᱦᱚᱲ ᱫᱚ ᱛᱤ ᱨᱮᱪᱚ ᱥᱤᱴ ᱠᱷᱚᱱ ᱵᱮᱨᱮᱫ ᱮᱱ ᱛᱮ ᱜᱮᱴ ᱥᱩᱨ ᱮ ᱥᱮᱴᱮᱨ ᱮᱱ ᱜᱮᱭᱟ ᱾ ᱟᱡᱟᱜ ᱥᱤᱴ ᱤᱧ ᱠᱚᱭᱚᱜᱽ ᱛᱮ ᱫᱚ ᱚᱱᱟ ᱦᱮᱸᱰ ᱰᱟᱭᱨᱤ ᱫᱚ ᱚᱸᱰᱮ ᱜᱮ ᱦᱚᱨᱚᱵᱚᱨᱚ ᱛᱮ ᱵᱟᱹᱜᱤᱭᱟᱫ ᱟᱭ ᱾ ᱥᱤᱴ ᱵᱮᱞᱴ ᱠᱚ ᱚᱪᱚᱜ ᱠᱟᱛᱮ ᱚᱱᱟ ᱰᱟᱭᱨᱤ ᱥᱤᱴ ᱠᱷᱚᱱ ᱥᱟᱵ ᱨᱟᱠᱟᱵ ᱠᱟᱛᱮ ᱤᱧ ᱦᱚᱸ ᱦᱚᱨᱚᱵᱚᱨᱚ ᱛᱟᱞᱟ ᱞᱟᱭᱤᱱ ᱨᱤᱧ ᱵᱚᱞᱚᱭᱮᱱᱟ ᱯᱷᱞᱟᱭᱤᱴ ᱠᱷᱚᱱ ᱚᱰᱚᱠᱚᱜ ᱞᱟᱹᱜᱤᱫ ᱛᱮ ᱾ ᱥᱟᱢᱟᱝ ᱨᱮ ᱢᱤᱫ ᱵᱟᱨ ᱦᱚᱲ ᱪᱮᱫ ᱠᱚ ᱪᱚ ᱠᱚ ᱫᱚᱦᱚ ᱞᱮᱫ ᱪᱮᱛᱟᱱ ᱨᱮ ᱴᱷᱟᱢᱟᱭ ᱴᱷᱩᱠᱟᱹᱭ, ᱛᱟᱹᱦᱩᱸ ᱠᱚ ᱵᱤᱞᱚᱢᱮᱫ ᱛᱟᱦᱮᱸᱫ ᱾ ᱩᱱᱤ ᱦᱚᱲ ᱫᱚ ᱚᱰᱚᱠ ᱪᱟᱞᱟᱣᱮᱱᱟᱭ ᱦᱚᱨᱚᱵᱚᱨᱚ ᱫᱷᱟᱨᱟ ᱜᱮ ᱾ ᱢᱚᱱᱮ ᱢᱚᱱᱮ ᱛᱤᱧ ᱵᱷᱟᱹᱵᱤ ᱠᱮᱫᱼᱟ ᱞᱚᱜᱮᱡᱽ ᱵᱮᱞᱴ ᱴᱷᱮᱱᱤᱧ ᱯᱟᱱᱛᱮ ᱮᱭᱟ ᱾ ᱢᱟᱬᱟᱝ ᱥᱮᱫ ᱤᱧ ᱚᱰᱚᱠ ᱤᱫᱤᱭᱮᱱᱟ ᱦᱚᱨᱚᱵᱚᱨᱚ ᱾ ᱣᱮᱴᱤᱝ ᱮᱨᱤᱭᱟ ᱠᱷᱚᱱ ᱚᱰᱚᱠ ᱠᱟᱛᱮ ᱥᱤᱫᱷᱟᱹ ᱞᱚᱜᱮᱡᱽ ᱵᱮᱞᱴ ᱴᱷᱮᱱ ᱤᱧ ᱥᱮᱴᱮᱨᱮᱱᱟ ᱾ ᱜᱚᱴᱟᱧ ᱠᱚᱭᱚᱜ ᱵᱟᱲᱟ ᱠᱮᱫᱼᱟ, ᱵᱟᱹᱧ ᱧᱮᱞ ᱧᱟᱢ ᱞᱮᱫᱮᱭᱟ ᱾ ᱯᱟᱞᱮ ᱢᱤᱫᱴᱟᱹᱝ ᱵᱮᱜᱽ ᱜᱮ ᱟᱡ ᱥᱟᱶ ᱮ ᱫᱚᱦᱚ ᱞᱮᱫᱼᱟ ᱟᱨ ᱞᱚᱜᱮᱡᱽ ᱠᱚ ᱛᱟᱭ ᱯᱟᱞᱮ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱦᱩᱭ ᱠᱚᱜᱼᱟ ᱵᱚᱥ ᱥᱟᱵ ᱞᱟᱹᱜᱤᱫ ᱟᱹᱰᱤ ᱠᱚᱢ ᱥᱚᱢᱚᱭ ᱛᱟᱦᱮᱸ ᱠᱟᱱ ᱛᱟᱭᱟ ᱟᱡ ᱴᱷᱮᱱ, ᱚᱱᱟ ᱛᱮ ᱥᱤᱫᱷᱟᱹ ᱵᱟᱦᱨᱮ ᱛᱮ ᱚᱰᱚᱠ ᱮᱱᱟᱭ ᱾ ᱞᱚᱜᱮᱡᱽ ᱛᱟᱺᱜᱤ ᱛᱟᱺᱜᱤ ᱚᱱᱟ ᱰᱟᱹᱭᱨᱤ ᱨᱮᱱᱟᱜ ᱢᱩᱪᱟᱹᱫ ᱚᱞ ᱟᱠᱟᱱ ᱥᱟᱠᱟᱢᱤᱧ ᱧᱮᱞ ᱠᱮᱫᱼᱟ, ᱚᱞ ᱟᱠᱟᱱᱟᱼ ᱮᱴᱟᱜ ᱦᱚᱲ ᱨᱤᱱ ᱚᱲᱟᱜ ᱦᱚᱲ ᱠᱚ ᱧᱮᱞ ᱵᱟᱲᱟ ᱛᱮ ᱟᱸᱥ ᱜᱮ ᱟᱹᱭᱠᱟᱹᱣᱜᱼᱟ ᱾ ᱡᱟᱦᱟᱸᱭ ᱨᱤᱱ ᱚᱲᱟᱜ ᱦᱚᱲ ᱠᱚ ᱜᱷᱟᱱᱮ ᱜᱷᱟᱱᱮ ᱠᱚ ᱠᱩᱞᱤ ᱡᱚᱝ ᱠᱟᱱ ᱨᱮᱦᱚᱸ ᱢᱤᱢᱤᱫ ᱦᱚᱲ ᱚᱲᱟᱜ ᱦᱚᱲ ᱠᱚ ᱥᱟᱞᱟᱜ ᱵᱮᱥ ᱛᱮ ᱵᱟᱠᱚ ᱨᱚᱲᱟ ᱾ ᱚᱲᱟᱜ ᱦᱚᱲ ᱠᱚᱣᱟᱜ ᱫᱩᱞᱟᱹᱲ ᱠᱚ ᱮᱨᱮᱲ ᱜᱤᱰᱤ ᱠᱟᱜᱼᱟ, ᱟᱨ ᱤᱧ ᱧᱮᱞᱤᱧ ᱢᱟ, ᱤᱧᱟᱜ ᱢᱚᱱᱮ ᱛᱟᱦᱮᱸᱱ ᱨᱮᱦᱚᱸ ᱤᱧ ᱨᱤᱱ ᱟᱭᱳ ᱵᱟᱵᱟ ᱴᱷᱮᱱ ᱞᱮᱠᱷᱟ ᱞᱮᱠᱷᱟ ᱛᱮ ᱥᱮᱨᱢᱟ ᱨᱮ ᱢᱤᱫ ᱪᱟᱸᱫᱚ ᱜᱤᱧ ᱮᱢ ᱫᱟᱲᱮᱭᱟᱜ ᱠᱟᱱᱟ ᱾ ᱜᱤᱫᱽᱨᱟᱹ ᱛᱤᱧ ᱪᱮᱫ ᱞᱮᱠᱟᱭ ᱦᱟᱨᱟᱜ ᱠᱟᱱᱟ ᱵᱷᱤᱰᱤᱭᱳ ᱨᱮᱜᱤᱧ ᱧᱮᱞᱮ ᱠᱟᱱᱟ ᱾ ᱦᱟᱲᱟᱢ ᱟᱭᱳ ᱵᱟᱵᱟ ᱥᱩᱨ ᱨᱮ ᱛᱟᱦᱮᱸᱱ ᱚᱠᱛᱚ ᱨᱮ ᱯᱷᱳᱱ ᱛᱮᱜᱤᱧ ᱜᱳᱰ ᱡᱚᱦᱟᱨ ᱟᱹᱠᱤᱱ ᱠᱟᱱᱟ ᱾ ᱫᱩᱞᱟᱹᱲ ᱡᱩᱨᱤ ᱛᱤᱧ ᱤᱧᱟᱜ ᱠᱚᱲᱟᱢ ᱨᱮ ᱦᱟᱺᱵᱩᱫ ᱥᱟᱹᱱᱟᱹᱧ ᱠᱟᱱ ᱨᱮᱦᱚᱸ ᱯᱷᱳᱱ ᱨᱮᱜᱮ ᱟᱡᱟᱜ ᱯᱷᱳᱴᱚ ᱧᱮᱞ ᱠᱟᱛᱮ ᱤᱧᱟᱜ ᱯᱷᱳᱴᱚ ᱜᱷᱟᱱᱮ ᱜᱷᱟᱱᱮᱧ ᱵᱷᱮᱡᱟ ᱟᱭ ᱠᱟᱱᱟ ᱾ ᱢᱤᱫ ᱥᱮᱫ ᱨᱮ ᱚᱲᱟᱜ ᱨᱮ ᱢᱮᱱᱟᱜ ᱠᱚᱣᱟ, ᱟᱭᱳ ᱵᱟᱵᱟ, ᱟᱯᱟ ᱵᱟᱨᱮ ᱤᱧᱤᱡ ᱢᱚᱱᱮ ᱜᱷᱟᱨᱚᱸᱡᱽ ᱨᱤᱱᱤᱡ ᱨᱟᱹᱱᱤ ᱟᱨ ᱦᱚᱯᱚᱱ ᱦᱚᱯᱚᱱ ᱜᱤᱫᱽᱨᱟᱹ ᱛᱤᱧ ᱟᱨ ᱢᱤᱫ ᱥᱮᱫ ᱨᱮ ᱢᱮᱱᱟᱜ ᱤᱧᱟᱜ ᱰᱭᱩᱴᱤ, ᱤᱧᱟᱜ ᱨᱮᱥᱯᱚᱱᱥᱤᱵᱤᱞᱤᱴᱤ, ᱫᱮᱥ ᱫᱩᱱᱤᱭᱟᱹ ᱨᱤᱱ ᱦᱚᱲ ᱠᱚ ᱞᱟᱹᱜᱤᱫ ᱥᱮᱵᱟ ᱵᱷᱟᱣ ᱾ ᱱᱚᱶᱟ ᱛᱟᱞᱟ ᱨᱮ ᱪᱮᱛᱟᱱ ᱨᱤᱱ ᱚᱯᱷᱤᱥᱚᱨ ᱠᱚᱣᱟᱜ ᱵᱷᱩᱞ ᱰᱤᱥᱤᱥᱚᱱ ᱟᱨ ᱥᱚᱨᱠᱟᱨᱟᱜ ᱠᱚᱢᱯᱞᱤᱠᱮᱴᱮᱰ ᱥᱤᱥᱴᱚᱢ ᱥᱟᱞᱟᱜ ᱛᱟᱲᱟᱢ ᱟᱹᱰᱤ ᱜᱮ ᱟᱸᱴ ᱵᱩᱡᱷᱟᱹᱣᱜ ᱠᱟᱱᱟ ᱾
ᱮ ᱟᱭᱳ ᱵᱟᱵᱟ ᱟᱨ ᱤᱧᱤᱡ ᱨᱟᱹᱱᱤ, ᱮ ᱦᱚᱯᱚᱱ ᱵᱮᱴᱟ, ᱤᱧᱤᱡ ᱦᱮᱲᱮᱢ ᱞᱟᱹᱰᱩ ᱮ ᱤᱧ ᱨᱤᱱ ᱫᱤᱥᱚᱢ ᱫᱩᱱᱤᱭᱟᱹ ᱨᱤᱱ ᱵᱚᱭᱦᱟ ᱵᱩᱦᱤᱱ ᱠᱚ ᱱᱤᱛ ᱫᱷᱟᱹᱵᱤᱡ ᱛᱤᱸᱜᱩ ᱨᱮᱜᱮ ᱢᱤᱱᱟᱹᱧᱟ ᱠᱷᱩᱱᱴᱤ ᱞᱮᱠᱟ, ᱟᱯᱮᱭᱟᱜ ᱥᱮᱵᱟᱨᱮ, ᱟᱨ ᱫᱟᱨᱟᱭ ᱫᱤᱱ ᱦᱚᱸᱧ ᱛᱟᱦᱮᱸᱱᱟ, ᱤᱠᱷᱟᱹᱱ ᱯᱟᱞᱮ ᱱᱤᱛ ᱫᱚ ᱥᱚᱢᱚᱭ ᱦᱮᱡ ᱥᱮᱴᱮᱨ ᱟᱠᱟᱱᱟ ᱟᱯᱮ ᱦᱚᱸ ᱢᱤᱫ ᱫᱷᱟᱣ ᱧᱮᱞᱤᱧ ᱯᱮ, ᱢᱤᱫ ᱫᱷᱟᱣ ᱦᱚᱦᱚ ᱥᱩᱨ ᱠᱟᱛᱮ ᱠᱩᱞᱤ ᱵᱤᱰᱟᱹᱣᱤᱧ ᱯᱮ, ᱤᱧᱟᱜ ᱚᱱᱛᱚᱨ ᱡᱤᱣᱤ ᱢᱟ ᱡᱩᱞᱩᱜ ᱠᱟᱱᱟ, ᱟᱹᱰᱤᱜᱟᱱ ᱠᱟᱹᱢᱤ ᱦᱚᱨᱟ ᱠᱚ ᱥᱤᱥᱴᱚᱢ ᱨᱮᱱᱟᱜ ᱵᱟᱹᱧ ᱠᱩᱥᱤᱭᱟᱜ ᱠᱟᱱᱟ ᱾ ᱛᱚᱵᱮ ᱤᱧ ᱠᱩᱥᱤ ᱵᱟᱹᱱᱩᱜ ᱤᱧ ᱠᱷᱟᱱ ᱟᱯᱮ ᱪᱮᱫ ᱞᱮᱠᱟ ᱨᱮ ᱠᱩᱥᱤᱧ ᱫᱚᱦᱚ ᱯᱮᱭᱟ?
ᱯᱷᱚᱣᱡᱤ ᱠᱟᱹᱱᱟᱹᱧ, ᱠᱚᱲᱟᱢ ᱠᱮᱴᱮᱡ ᱠᱟᱛᱮ ᱵᱚᱨᱚᱯᱷ ᱨᱤᱧ ᱛᱤᱸᱜᱩᱱᱟ, ᱠᱚᱭᱚᱜ ᱩᱨᱤᱡ ᱠᱟᱛᱮ ᱵᱚᱰᱚᱨ ᱨᱤᱧ ᱰᱭᱩᱴᱤᱭᱟ ᱾ ᱫᱤᱥᱚᱢ ᱞᱟᱹᱜᱤᱫ ᱫᱩᱞᱟᱹᱲ ᱦᱚᱸ ᱢᱮᱱᱟᱜ, ᱢᱚᱱᱮ ᱨᱮ ᱡᱚᱡᱽᱣᱟ ᱦᱚᱸ ᱢᱮᱱᱟᱜ, ᱤᱠᱷᱟᱹᱱ ᱟᱯᱮ ᱦᱚᱸ ᱢᱤᱫ ᱫᱷᱟᱣ ᱥᱩᱨ ᱛᱮ ᱦᱮᱡ ᱠᱟᱛᱮ ᱧᱮᱞᱤᱧ ᱯᱮ, ᱤᱧᱟᱜ ᱠᱚᱲᱟᱢ ᱢᱟ ᱡᱩᱞᱩᱜ ᱠᱟᱱ, ᱥᱤᱥᱴᱚᱢ ᱨᱮᱱᱟᱜ ᱵᱤᱸᱫᱤ ᱜᱟᱜ ᱨᱮᱧ ᱡᱷᱟᱹᱞᱤ ᱟᱠᱟᱱ ᱨᱮ ᱥᱟᱦᱮᱫ ᱠᱚ ᱛᱟᱹᱧ ᱵᱚᱸᱫᱚᱜ ᱠᱟᱱ ᱾
ᱴᱩ ᱵᱤ ᱠᱚᱱᱴᱤᱱᱭᱩᱰ ᱹᱹᱹᱹ
***
