ᱢᱤᱫ ᱠᱚᱣᱟᱴᱚᱨ ᱚᱲᱟᱜ ᱨᱮ ᱢᱤᱫ ᱯᱤᱱᱴᱩ ᱧᱩᱛᱩᱢ ᱟᱹᱱᱤᱡ ᱜᱤᱫᱽᱨᱟᱹ ᱟᱡᱟᱜ ᱵᱤᱪᱷᱱᱟᱹ ᱨᱮ ᱯᱩᱛᱷᱤ ᱠᱚ ᱚᱰᱚᱠ ᱠᱟᱛᱮᱫ ᱯᱟᱲᱦᱟᱣ ᱮ ᱫᱩᱲᱩᱵ ᱟᱠᱟᱱᱟ ᱾
ᱯᱤᱱᱴᱩ ᱟᱡ ᱵᱟᱵᱟ ᱩᱢᱮᱥ ᱟᱡᱟᱜ ᱠᱚᱢᱯᱟᱹᱱᱤ ᱠᱷᱚᱱ ᱨᱩᱣᱟᱹᱲ ᱠᱟᱛᱮ, ᱥᱮᱴᱮᱨ ᱛᱚᱨᱟ ᱰᱚᱨᱚᱭᱤᱝ ᱨᱩᱢ (ᱫᱩᱲᱩᱵ ᱚᱲᱟᱜ) ᱨᱮ ᱫᱚᱛᱚ (ᱡᱟᱢᱟ) ᱨᱮᱱᱟᱜ ᱵᱚᱴᱚᱱ ᱠᱚ ᱚᱪᱚᱜ ᱠᱟᱛᱮ ᱥᱚᱯᱷᱟ ᱨᱮᱜᱮᱭ ᱫᱩᱲᱩᱵᱼᱟ᱾ᱩᱱᱤ ᱜᱤᱫᱽᱨᱟᱹ ᱟᱡ ᱵᱟᱵᱟᱦᱟᱜ ᱦᱤᱡᱩᱜ ᱥᱟᱰᱮ ᱟᱸᱡᱚᱢ ᱠᱟᱛᱮ ᱟᱡᱟᱜ ᱠᱷᱟᱛᱟᱼᱯᱩᱛᱷᱤ ᱠᱚ ᱥᱟᱵ ᱠᱟᱛᱮ ᱟᱡ ᱵᱟᱵᱟ ᱴᱷᱮᱱ ᱮ ᱦᱤᱡᱩᱜᱼᱟ ᱾ ᱯᱤᱱᱴᱩ ᱦᱤᱡᱩᱜ ᱞᱟᱦᱟ ᱨᱮᱜᱮ ᱟᱡᱟᱜ ᱫᱚᱛᱚ ᱯᱟᱹᱠᱤᱴ ᱠᱷᱚᱱ ᱥᱢᱟᱨᱴ ᱯᱷᱚᱱ ᱚᱰᱚᱠ ᱠᱟᱛᱮ ᱡᱟᱢᱟ ᱫᱚ ᱢᱤᱫ ᱥᱚᱯᱷᱟ ᱨᱮ ᱞᱮᱣᱫᱟ ᱠᱟᱫ ᱟᱭ ᱾ ᱛᱟᱭᱚᱢ ᱱᱟᱯᱟᱭ ᱥᱟᱹᱦᱤᱸᱧ ᱦᱩᱰᱤᱧ ᱧᱚᱜ ᱫᱩᱲᱩᱵ ᱢᱟᱹᱪᱤ ᱨᱮ ᱟᱡᱟᱜ ᱡᱟᱸᱜᱟ ᱛᱤᱭᱟᱹᱨ ᱠᱟᱛᱮᱫ ᱮ ᱫᱩᱲᱩᱵ ᱛᱮ ᱚᱱᱟ ᱯᱷᱚᱱ ᱨᱮ ᱜᱮᱢ ᱮᱱᱮᱡ ᱮ ᱮᱦᱚᱵᱟ ᱾
ᱯᱤᱱᱴᱩ ᱫᱚ ᱼ ᱵᱟᱵᱟ ᱵᱟᱵᱟ, ᱢᱮᱱ ᱟᱛᱮ ᱟᱡ ᱥᱩᱨᱛᱮ ᱫᱟᱹᱲ ᱦᱤᱡᱩᱜ ᱟᱭ, ᱟᱨ ᱟᱡ ᱵᱟᱵᱟ ᱟᱜ ᱡᱟᱸᱜᱟ ᱨᱮ ᱥᱟᱵ ᱨᱩᱠᱩ ᱠᱟᱛᱮᱭ ᱢᱮᱛᱟᱭᱟ, ᱼ ᱵᱟᱵᱟ ᱱᱚᱣᱟ ᱦᱚᱢ ᱣᱚᱨᱠ ᱞᱟᱹᱭᱟᱹᱧ ᱢᱮᱥᱮ ᱾
ᱩᱱ ᱨᱮ ᱩᱢᱮᱥ ᱟᱡᱤᱡ ᱜᱤᱫᱽᱨᱟᱹ ᱥᱮᱫ ᱵᱟᱝ ᱠᱚᱭᱚᱜ ᱠᱟᱛᱮ ᱜᱮ ᱢᱮᱱᱟᱭ, ᱼ ᱵᱮᱴᱟ ᱦᱟᱯᱮ ᱛᱟᱭᱚᱢ ᱛᱤᱧ ᱚᱞ ᱟᱢᱟ ᱱᱟᱦᱟᱜ ᱾ᱚᱱᱟ ᱯᱷᱚᱱ ᱨᱮᱜᱮ ᱟᱨᱦᱚᱸ ᱜᱮᱢ ᱮᱱᱮᱡ ᱮ ᱪᱷᱩᱴᱟᱹᱣᱚᱜᱼᱟ ᱾ ᱯᱤᱱᱴᱩ, ᱟᱡ ᱵᱟᱵᱟ ᱪᱮᱛᱟᱱ ᱞᱟᱛᱟᱨ ᱮ ᱠᱚᱭᱚᱜ ᱮᱭᱟ, ᱪᱮᱫ ᱦᱚᱸ ᱵᱟᱭ ᱢᱮᱱᱟ ᱾ ᱛᱟᱭᱚᱢ ᱵᱟᱹᱭᱼᱵᱟᱹᱭ ᱛᱮ ᱡᱟᱫᱽᱜᱚᱫᱼᱡᱟᱫᱽᱜᱚᱫ ᱟᱛᱮ ᱟᱡᱟᱜ ᱵᱤᱪᱷᱱᱟᱹ ᱛᱮᱜᱮᱭ ᱥᱮᱱ ᱨᱩᱣᱟᱹᱲᱚᱜᱼᱟ ᱾ ᱯᱤᱱᱴᱩ ᱟᱡᱟᱜ ᱨᱩᱢ ᱛᱮ ᱦᱮᱡ ᱮᱱ ᱛᱟᱭᱚᱢ ᱠᱷᱟᱛᱟ ᱠᱚ ᱫᱚᱦᱚ ᱜᱤᱰᱤ ᱠᱟᱜᱼᱟᱭ, ᱟᱨ ᱵᱤᱪᱷᱱᱟᱹ ᱨᱮᱱᱟᱜ ᱢᱤᱫ ᱠᱚᱬ ᱨᱮ, ᱟᱡ ᱫᱚᱭ ᱫᱩᱲᱩᱵᱼᱟ ᱾ ᱥᱟᱢᱟᱝ ᱫᱩᱣᱟᱹᱨ ᱥᱮᱫ ᱮ ᱠᱚᱭᱚᱜᱟ᱾ᱵᱷᱤᱛ ᱜᱷᱩᱲᱤ ᱨᱮ ᱢᱚᱬᱮ ᱥᱟᱰᱮ ᱠᱟᱛᱮ ᱜᱮᱞ ᱴᱤᱲᱤᱡ ᱦᱩᱭ ᱜᱚᱫ ᱟᱠᱟᱱᱟ ᱾
ᱯᱤᱱᱴᱩ ᱟᱭᱳ ᱢᱩᱱᱤᱭᱟᱜ ᱥᱠᱩᱴᱤ ᱨᱮᱱᱟᱜ ᱦᱚᱨᱮᱱ ᱥᱟᱰᱮ ᱟᱸᱡᱚᱢᱚᱜᱼᱟ ᱾ ᱯᱤᱱᱴᱩ ᱟᱭᱳ ᱫᱚ ᱢᱤᱫ ᱚᱞᱚᱜ ᱟᱥᱲᱟ ᱨᱤᱱᱤᱡ ᱢᱟᱪᱮᱛᱟᱹᱱᱤ ᱠᱟᱱᱟᱭ ᱾ ᱫᱤᱱᱟᱹᱢ ᱜᱮ ᱢᱚᱬᱮ ᱥᱟᱰᱮ ᱛᱟᱭᱚᱢ ᱜᱮ ᱦᱤᱡᱩᱜ ᱟᱭ ᱾ ᱥᱠᱩᱴᱤ ᱛᱟᱭ ᱠᱩᱣᱟᱹᱴᱚᱨ ᱪᱷᱟᱹᱯᱨᱤ ᱨᱮ ᱛᱤᱸᱜᱩ ᱠᱟᱛᱮ ᱫᱩᱲᱩᱵ ᱨᱩᱢ ᱛᱮᱭ ᱦᱮᱡ ᱮᱱᱟ ᱾ ᱢᱩᱱᱤ ᱢᱤᱫ ᱡᱮᱠᱷᱟ ᱟᱡ ᱡᱟᱶᱟᱭ ᱥᱮᱫ ᱠᱚᱭᱚᱜ ᱧᱚᱜ ᱠᱟᱛᱮ ᱠᱩᱞᱤ ᱮᱭᱟᱭ, ᱼ ᱛᱤᱱ ᱨᱮᱢ ᱦᱮᱡ ᱮᱱᱟ ᱜᱚ? ᱫᱟᱜ ᱠᱚᱢ ᱧᱩ ᱠᱮᱫᱼᱟ ? ᱯᱤᱱᱴᱩ ᱵᱟᱵᱟ ᱪᱮᱫ ᱦᱚᱸ ᱛᱮᱞᱟ ᱵᱟᱝ ᱮ ᱮᱢᱟ ᱾ ᱟᱡᱟᱜ ᱜᱮᱢ ᱨᱮᱜᱮ ᱵᱷᱩᱞᱟᱹᱣ ᱠᱚᱜᱼᱟᱭ ᱾ ᱯᱤᱱᱴᱩ ᱟᱭᱳ ᱦᱚᱸ ᱟᱡᱟᱜ ᱜᱚᱜ ᱵᱮᱜᱽ ᱛᱟᱨᱮᱱ ᱠᱷᱚᱱ ᱚᱰᱚᱠ ᱠᱟᱛᱮ ᱢᱤᱫ ᱠᱚᱬ ᱨᱮ ᱢᱮᱱᱟᱜ ᱴᱮᱵᱩᱞ ᱨᱮ ᱫᱚᱦᱚ ᱠᱮᱫᱼᱟᱭ ᱾ ᱫᱚᱦᱚ ᱞᱟᱦᱟ ᱨᱮᱜᱮ ᱵᱮᱜᱽ ᱠᱷᱚᱱ ᱢᱚᱵᱟᱭᱤᱞ ᱮ ᱚᱰᱚᱠ ᱞᱮᱫᱼᱟ ᱾ ᱵᱮᱜᱽ ᱫᱚᱦᱚ ᱠᱮᱫ ᱛᱟᱭᱚᱢ ᱯᱷᱤᱨᱤᱡᱽ ᱠᱷᱚᱱ ᱨᱮᱭᱟᱲ ᱫᱟᱜ ᱵᱩᱛᱩᱞ ᱚᱰᱚᱠ ᱠᱮᱫ ᱛᱮ ᱵᱟᱨ ᱰᱷᱚᱠ ᱮ ᱧᱩ ᱞᱮᱫᱼᱟ ᱚᱱᱟ ᱛᱟᱠ ᱨᱮᱜᱮ ᱢᱩᱱᱤᱭᱟᱜ ᱢᱚᱵᱟᱭᱤᱞ ᱨᱮ ᱢᱮᱥᱮᱡᱽ ᱦᱮᱡ ᱮᱱ ᱨᱮᱱᱟᱜ ᱴᱚᱱ ᱥᱟᱰᱮᱭᱮᱱᱟ ᱾ ᱟᱫᱚ ᱦᱚᱨᱚ ᱵᱚᱨᱚ ᱢᱚᱵᱟᱹᱭᱤᱞ ᱮ ᱨᱟᱠᱟᱵ ᱠᱮᱫ ᱛᱮ ᱟᱡ ᱦᱚᱸ ᱚᱱᱟ ᱨᱮᱜᱮ ᱞᱟᱴᱷᱟ ᱩᱨᱤᱡ ᱮᱱᱟᱭ ᱚᱠᱚᱭ ᱥᱟᱶ ᱪᱚ ᱣᱟᱴᱥᱼᱟᱯ ᱨᱮ ᱪᱮᱴᱤᱝ (ᱢᱮᱥᱮᱡᱽ ᱛᱮ ᱨᱚᱯᱚᱲ) ᱮ ᱮᱦᱚᱵ ᱠᱮᱫᱼᱟ ᱾
ᱢᱤᱫ ᱠᱚᱬ ᱨᱮ ᱢᱩᱱᱤ ᱢᱤᱫ ᱠᱚᱬ ᱨᱮ ᱩᱢᱮᱥ ᱢᱚᱵᱟᱭᱤᱞ ᱨᱮ ᱪᱷᱩᱴᱟᱹᱣ ᱟᱠᱟᱱᱟᱠᱤᱱ ᱜᱤᱫᱽᱨᱟᱹ ᱯᱤᱱᱴᱩ ᱠᱟᱹᱴᱤᱡ ᱜᱷᱟᱹᱲᱤᱠ ᱯᱚᱨᱮ ᱵᱮᱨᱮᱫ ᱟᱭ ᱜᱷᱩᱲᱤ ᱨᱮ ᱛᱩᱨᱩᱭ ᱥᱟᱰᱮ ᱠᱟᱛᱮ ᱛᱟᱞᱟ ᱦᱩᱭ ᱜᱚᱫ ᱟᱠᱟᱱᱟ ᱾ ᱯᱤᱱᱴᱩ ᱢᱮᱫ ᱤᱫᱠᱤᱛᱼᱤᱫᱠᱤᱛ ᱛᱮ ᱪᱩᱰᱩ ᱛᱮ ᱥᱮᱱ ᱮᱱᱟᱭ, ᱚᱱᱟ ᱯᱚᱨᱮ ᱛᱤ ᱡᱟᱸᱜᱟ ᱠᱚ ᱟᱹᱨᱩᱵ ᱠᱟᱛᱮ ᱮ ᱚᱰᱚᱠ ᱮᱱᱟ ᱾ ᱢᱩᱱᱤ ᱟᱡᱤᱡ ᱠᱟᱹᱲᱢᱤ ᱦᱚᱦᱚ ᱠᱟᱛᱮ ᱢᱮᱛᱟᱭ ᱠᱟᱱᱟ ᱾ ᱼ ᱥᱤᱞᱟ ᱞᱚᱜᱚᱱ ᱠᱟᱹᱴᱤᱡ ᱪᱟ ᱵᱮᱱᱟᱣ ᱠᱟᱛᱮ ᱟᱹᱜᱩᱭ ᱢᱮ, ᱟᱨ ᱵᱮᱨᱮᱰ ᱴᱚᱥᱴ ᱟᱭ ᱢᱮ ᱵᱟᱹᱵᱩ, ᱵᱮᱨᱮᱫ ᱠᱟᱛᱮ ᱮᱢᱟᱭ ᱢᱮ ᱾
ᱯᱤᱱᱴᱩ ᱩᱱ ᱚᱠᱛᱚ ᱜᱮ ᱚᱱᱟ ᱨᱩᱢ ᱨᱮ ᱥᱮᱱᱚᱜ ᱟᱭ ᱵᱟᱹᱵᱩ ᱵᱮᱨᱮᱫ ᱮᱱᱟᱢ ᱫᱮᱞᱟ ᱫᱩᱲᱩᱵ ᱢᱮ ᱟᱢ ᱠᱟᱹᱠᱤ ᱵᱨᱮᱰ ᱴᱚᱥᱴ ᱮ ᱟᱹᱜᱩᱭ ᱞᱟᱹᱜᱤᱫ ᱾ ᱯᱤᱱᱴᱩ ᱪᱮᱫ ᱦᱚᱸ ᱵᱟᱭ ᱢᱮᱱᱟ ᱾ ᱢᱮᱱᱠᱷᱟᱱ ᱟᱡ ᱟᱭᱳ ᱟᱨ ᱵᱟᱵᱟ ᱛᱤᱠᱤᱱ ᱮ ᱠᱚᱭᱚᱜ ᱠᱤᱱᱟ, ᱵᱟᱱᱟ ᱦᱚᱲ ᱱᱤᱛᱚᱜ ᱦᱚᱸ ᱢᱚᱵᱟᱭᱤᱞ ᱨᱮᱜᱮ ᱵᱤᱡᱤ ᱢᱮᱱᱟᱜ ᱠᱤᱱᱟ ᱾ ᱥᱤᱞᱟᱹ ᱴᱚᱥᱴ ᱟᱹᱜᱩ ᱠᱟᱛᱮ ᱴᱮᱵᱩᱞ ᱨᱮ ᱫᱚᱦᱚ ᱠᱮᱫᱼᱟᱭ ᱾ ᱯᱤᱱᱴᱩ ᱫᱚ ᱚᱱᱟᱭ ᱡᱚᱢᱟ ᱟᱨ ᱟᱭᱳ ᱵᱟᱵᱟ ᱫᱚ ᱪᱟ ᱠᱤᱱ ᱧᱩᱭᱟ ᱾ ᱯᱤᱱᱴᱩ ᱚᱱᱟ ᱨᱩᱢ ᱠᱷᱚᱱ ᱮ ᱚᱰᱚᱠᱚᱜᱼᱟ ᱾ ᱯᱤᱱᱴᱩ ᱟᱡᱟᱜ ᱨᱩᱢ ᱨᱮ ᱦᱮᱡ ᱠᱟᱛᱮ ᱟᱨ ᱦᱚᱸ ᱠᱷᱟᱛᱟ ᱠᱚᱭ ᱩᱞᱴᱟᱹᱣ ᱵᱟᱲᱟᱭᱟ, ᱛᱟᱭᱚᱢ ᱠᱷᱟᱛᱟ ᱠᱚ ᱥᱟᱵ ᱠᱟᱛᱮ ᱟᱡ ᱟᱭᱳ ᱴᱷᱮᱱ ᱮ ᱦᱤᱡᱩᱜᱼᱟ ᱾ ᱦᱮᱡ ᱥᱩᱨ ᱠᱟᱛᱮᱭᱼᱢᱮᱛᱟᱭᱟ, ᱼ ᱭᱳᱼᱭᱳ ᱢᱟᱥᱮ ᱱᱚᱣᱟ ᱦᱚᱢ ᱣᱟᱨᱠ ᱚᱞᱟᱹᱧ ᱢᱮ ᱾
ᱢᱩᱱᱤ ᱟᱡ ᱥᱮᱫ ᱢᱤᱫ ᱫᱷᱟᱣ ᱠᱚᱭᱚᱜ ᱠᱟᱛᱮ ᱟᱨ ᱦᱚᱸ ᱟᱡᱟᱜ ᱢᱚᱵᱟᱭᱤᱞ ᱨᱮᱜᱮᱭ ᱵᱤᱡᱤᱜᱼᱟ ᱾ ᱢᱚᱵᱟᱭᱤᱞ ᱨᱮᱜᱮ ᱴᱟᱭᱤᱯ ᱥᱟᱶᱛᱮᱭ ᱢᱮᱱᱟ, ᱼ ᱵᱮᱴᱟ ᱟᱢ ᱛᱮ ᱚᱞ ᱢᱮᱥᱮ ᱛᱟᱭᱚᱢ ᱛᱮ ᱱᱟᱦᱟᱜ ᱤᱧ ᱚᱞ ᱥᱩᱫᱷᱟᱹᱨ ᱟᱢᱟ ᱾ ᱯᱤᱱᱴᱩ ᱟᱡ ᱟᱭᱳ ᱪᱮᱛᱟᱱ ᱞᱟᱛᱟᱨ ᱮ ᱠᱚᱭᱚᱜ ᱮᱛᱮ, ᱟᱹᱪᱩᱨᱚᱜ ᱛᱮ, ᱵᱚᱦᱚᱜ ᱛᱤᱨᱩᱵ ᱠᱟᱛᱮ ᱟᱨᱦᱚᱸ ᱟᱡᱟᱜ ᱨᱩᱢ ᱛᱮᱭ ᱪᱟᱞᱟᱣ ᱮᱱᱟ ᱾ ᱨᱩᱣᱟᱹᱲ ᱠᱟᱛᱮ ᱠᱷᱟᱛᱟ ᱨᱮ ᱚᱞ ᱮ ᱪᱷᱩᱴᱟᱹᱣ ᱮᱱᱟ ᱾ ᱵᱷᱤᱛ ᱜᱷᱩᱲᱤ ᱨᱮ ᱟᱨᱮ ᱴᱟᱲᱟᱝ ᱦᱩᱭ ᱮᱱ ᱨᱮᱱᱟᱜ ᱥᱟᱰᱮ ᱟᱸᱡᱚᱢᱚᱜᱼᱟ ᱾ ᱱᱚᱛᱮ ᱚᱱᱟ ᱛᱟᱠ ᱨᱮᱜᱮ ᱫᱟᱠᱟ ᱚᱲᱟᱜ ᱨᱮ ᱜᱤᱱᱟᱹ ᱧᱩᱨᱩᱜ ᱨᱮᱱᱟᱜ ᱥᱟᱰᱮ ᱟᱸᱡᱚᱢᱚᱜᱼᱟ ᱾ ᱢᱩᱱᱤ ᱢᱮᱱᱟᱭ, ᱼ ᱪᱮᱫ ᱠᱚᱢ ᱧᱩᱨ ᱮᱫᱼᱟ, ᱪᱮᱫ ᱦᱚᱸ ᱱᱟᱯᱟᱭ ᱛᱮ ᱵᱟᱝ ᱮᱢ ᱠᱟᱹᱢᱤ ᱫᱟᱲᱮᱭᱟᱜᱼᱟ ᱾ ᱫᱟᱠᱟ ᱚᱲᱟᱜ ᱠᱷᱚᱱ ᱜᱮ ᱨᱚᱲ ᱟᱸᱡᱚᱢᱚᱜᱼᱟ, ᱼ ᱫᱟᱹᱭ ᱫᱟᱠᱟ ᱡᱚᱢ ᱟᱹᱨᱩᱵᱚᱜ ᱯᱮ, ᱡᱚᱛᱚᱣᱟᱜ ᱤᱧ ᱤᱥᱤᱱ ᱠᱮᱫᱼᱟ ᱾ ᱥᱤᱞᱟᱦᱟᱜ ᱦᱚᱦᱚ ᱟᱸᱡᱚᱢ ᱠᱟᱛᱮ ᱢᱩᱱᱤ ᱦᱚᱨᱚᱵᱚᱨᱚ ᱢᱚᱵᱟᱭᱤᱞ ᱫᱚᱦᱚ ᱠᱟᱛᱮ ᱜᱤᱛᱤᱡ ᱚᱲᱟᱜ ᱡᱟᱦᱟᱸ ᱨᱮ ᱯᱤᱱᱴᱩ ᱵᱮᱴᱟ ᱢᱮᱱᱟᱭᱟ, ᱚᱸᱰᱮ ᱪᱟᱞᱟᱣᱜ ᱟᱭ᱾ ᱧᱮᱞᱮᱭᱟᱭ ᱵᱮᱴᱟᱭ ᱡᱟᱹᱯᱤᱫ ᱟᱠᱟᱫᱼᱟ ᱾ ᱟᱫᱚᱭ ᱨᱩᱣᱟᱹᱲᱟ᱾ᱢᱩᱱᱤ ᱟᱨ ᱩᱢᱮᱥ ᱦᱟᱲᱟᱢ ᱵᱩᱰᱷᱤ ᱫᱟᱠᱟ ᱡᱚᱢ ᱠᱤᱱ ᱫᱩᱲᱩᱵᱼᱟ᱾ ᱩᱱ ᱨᱮ ᱩᱢᱮᱥ ᱮ ᱢᱮᱱᱟ, ᱼ ᱵᱮᱴᱟ ᱫᱚᱭ ᱡᱟᱹᱯᱤᱫ ᱠᱮᱫᱼᱟ? ᱼ ᱦᱚᱭ ᱾ ᱼᱪᱮᱫ ᱦᱚᱢ ᱣᱚᱨᱠ ᱮ ᱢᱮᱱᱮᱫ ᱛᱟᱦᱮᱸᱫ ᱫᱚ? ᱼ ᱚᱱᱟ ᱫᱚ ᱱᱤᱛᱚᱜ ᱤᱧ ᱚᱞ ᱟᱭᱟ ᱾ ᱢᱩᱱᱤ ᱫᱟᱠᱟ ᱡᱚᱢ ᱦᱩᱭ ᱠᱟᱛᱮ ᱛᱤ ᱟᱹᱨᱩᱵᱚᱜ ᱛᱮ ᱜᱤᱛᱤᱡ ᱚᱲᱟᱜ ᱛᱮ ᱵᱚᱞᱚᱱᱟ ᱾ ᱩᱢᱮᱥ ᱫᱚ ᱟᱨᱦᱚᱸ ᱢᱚᱵᱟᱭᱤᱞ ᱨᱮᱜᱮ ᱪᱷᱩᱴᱟᱹᱣᱜ ᱟᱭ᱾
ᱢᱩᱱᱤ ᱯᱤᱱᱴᱩ ᱵᱮᱴᱟᱭ ᱥᱚᱡᱷᱮ ᱵᱟᱲᱟ ᱧᱚᱜ ᱠᱟᱛᱮᱫ ᱮ ᱩᱭᱩ ᱠᱟᱭᱟ ᱾ ᱥᱟᱱᱟᱢ ᱦᱟᱱᱛᱮ ᱱᱟᱛᱮ ᱢᱮᱱᱟᱜ ᱯᱚᱛᱚᱵ ᱠᱚᱭ ᱥᱟᱢᱴᱟᱣ ᱛᱮ ᱟᱡᱟᱜ ᱵᱮᱜᱽ ᱨᱮᱭ ᱥᱟᱸᱵᱟᱣ ᱛᱟᱭᱟ ᱾ ᱚᱱᱟ ᱛᱟᱭᱚᱢ ᱚᱱᱟ ᱦᱚᱢ ᱣᱚᱨᱠ ᱠᱷᱟᱛᱟ ᱛᱟᱭ ᱚᱰᱚᱠ ᱠᱟᱛᱮ ᱧᱮᱞᱟᱭ ᱫᱚ ᱢᱩᱱᱤᱣᱟᱜ ᱢᱮᱫᱼᱫᱟᱜ ᱦᱤᱰᱤᱨ ᱦᱤᱰᱤᱨ ᱡᱚᱨᱚᱜ ᱛᱟᱭᱟ ᱾ ᱠᱷᱟᱛᱟ ᱥᱟᱵ ᱠᱟᱛᱮ ᱜᱮ ᱫᱩᱲᱩᱵ ᱚᱲᱟᱜ ᱛᱮ ᱦᱤᱡᱩᱜ ᱟᱭ ᱡᱟᱦᱟᱸ ᱨᱮ ᱩᱢᱮᱥ ᱱᱤᱛ ᱦᱚᱸ ᱢᱚᱵᱟᱭᱤᱞ ᱨᱮ ᱜᱮᱢ ᱮᱱᱮᱡ ᱮ ᱪᱷᱩᱴᱟᱹᱣ ᱟᱠᱟᱱ ᱜᱮᱭᱟ ᱾ ᱩᱢᱮᱥ ᱥᱮᱫ ᱠᱚᱭᱚᱜ ᱞᱮᱫ ᱥᱟᱶᱛᱮ ᱨᱟᱜ ᱵᱟᱝ ᱮ ᱥᱟᱸᱵᱽᱲᱟᱣ ᱞᱮᱫᱛᱮ ᱠᱩᱥᱩᱫᱼᱠᱩᱥᱩᱫ ᱮ ᱨᱟᱜᱟ᱾ᱢᱩᱱᱤᱭᱟᱜ ᱠᱩᱥᱩᱫ ᱠᱩᱥᱩᱫ ᱨᱟᱜ ᱟᱸᱡᱚᱢ ᱠᱟᱛᱮ ᱩᱢᱮᱥ ᱮ ᱠᱩᱞᱤ ᱮᱭᱟ, ᱼ ᱪᱮᱫᱟᱜ ᱮᱢ ᱨᱟᱜᱮᱫᱼᱟ?
ᱼ ᱵᱮᱴᱟᱦᱟᱜ ᱦᱚᱢ ᱣᱚᱨᱠ ᱧᱮᱞ ᱠᱟᱛᱮ ᱾ ᱼ ᱪᱮᱫ ᱪᱤᱠᱟᱭᱮᱱᱟ? ᱼ ᱵᱮᱴᱟᱭ ᱚᱞ ᱟᱠᱟᱫᱼᱟ, ᱚᱱᱟ ᱯᱟᱲᱦᱟᱣ ᱠᱟᱛᱮ ᱜᱮ ᱢᱮᱫ ᱫᱟᱜ ᱡᱚᱨᱚ ᱮᱱ ᱛᱤᱧᱟ ᱜᱚ ᱾ ᱼᱪᱮᱫ ᱮ ᱚᱞ ᱟᱠᱟᱫᱼᱟ?
ᱢᱩᱱᱤ ᱯᱟᱲᱦᱟᱣ ᱟᱭ, ᱼ “ᱪᱮᱫᱟᱜ ᱤᱧ ᱢᱚᱵᱟᱭᱤᱞ ᱯᱷᱚᱱ ᱨᱮ ᱵᱟᱝ ᱤᱧ ᱡᱟᱱᱟᱢ ᱞᱮᱱᱟ ᱾ ᱢᱚᱵᱟᱭᱤᱞ ᱯᱷᱚᱱ ᱦᱩᱱᱟᱹᱝ ᱤᱧ ᱛᱟᱦᱮᱸᱱ ᱠᱷᱟᱱ ᱟᱭᱳ ᱤᱧᱟᱜ ᱨᱟᱜ ᱟᱸᱡᱚᱢ ᱛᱚᱨᱟ ᱟᱡᱟᱜ ᱠᱚᱞᱮ ᱨᱮ ᱫᱚᱦᱚ ᱠᱟᱛᱮ ᱫᱩᱞᱟᱹᱲ ᱠᱤᱧᱟᱭ, ᱥᱟᱨᱟ ᱜᱷᱟᱹᱲᱤ ᱢᱚᱵᱟᱭᱤᱞ ᱞᱮᱠᱟ ᱥᱟᱶ ᱨᱮ ᱫᱚᱦᱚ ᱠᱤᱧᱟᱭ᱾ᱵᱮᱞᱮᱸᱥ ᱪᱟᱵᱟᱭᱮᱱ ᱛᱚᱨᱟ ᱨᱤᱪᱟᱨᱡᱽ ᱞᱮᱠᱟ, ᱟᱡ ᱜᱮ ᱦᱩᱱᱟᱹᱝ ᱡᱚᱢᱟᱜ ᱠᱚᱭ ᱟᱡᱚᱣᱟᱹᱧᱟ ᱾ ᱵᱟᱵᱟ ᱦᱚᱸ ᱠᱟᱹᱢᱤ ᱞᱟᱸᱜᱟ ᱠᱷᱚᱱ ᱦᱮᱡ ᱛᱚᱨᱟ ᱢᱚᱵᱟᱭᱤᱞ ᱨᱮ ᱜᱮᱢ ᱮ ᱮᱱᱮᱡ ᱞᱮᱠᱟ, ᱤᱧ ᱥᱟᱶ ᱦᱩᱱᱟᱹᱝ ᱮ ᱠᱷᱤᱞᱰᱩᱣᱟ ᱾ ᱛᱤᱱᱟᱹᱜ ᱨᱟᱹᱥᱠᱟᱹ ᱟᱡᱟᱜ ᱠᱚᱞᱮᱨᱮ ᱫᱚᱦᱚ ᱠᱟᱛᱮ ᱦᱩᱱᱟᱹᱝ ᱞᱚᱠᱷᱟ ᱞᱚᱠᱷᱟ ᱮᱱᱮᱡᱼᱟ ᱾ ᱩᱢᱮᱥ ᱵᱤᱱ ᱢᱮᱫ ᱨᱤᱯᱤᱫ ᱛᱮ ᱢᱩᱱᱤ ᱥᱮᱫ ᱜᱮ ᱠᱚᱭᱚᱜ ᱦᱟᱹᱯᱤ ᱠᱟᱭᱟᱭ᱾ ᱢᱩᱱᱤᱟᱜ ᱢᱮᱫ ᱫᱟᱜ ᱫᱚ ᱞᱮᱛᱟᱲ ᱡᱚᱨᱚᱣᱟᱠᱟ ᱢᱮᱱᱟᱜ ᱜᱮᱭᱟ ᱾ ᱯᱟᱲᱦᱟᱣ ᱢᱩᱪᱟᱹᱫ ᱥᱟᱶᱛᱮ ᱵᱟᱱᱟ ᱦᱚᱲ ᱢᱮᱫ ᱢᱮᱫ ᱠᱤᱱ ᱧᱮᱯᱮᱞ ᱮᱱ ᱥᱟᱶᱛᱮ ᱢᱚᱵᱟᱭᱤᱞ ᱠᱚ ᱥᱚᱯᱷᱟ ᱨᱮ ᱪᱟᱯᱟᱫ ᱜᱤᱰᱤ ᱠᱟᱛᱮ ᱜᱤᱛᱤᱡ ᱚᱲᱟᱜ ᱠᱤᱱ ᱪᱟᱞᱟᱣᱚᱜ ᱛᱮ ᱵᱟᱱᱟ ᱦᱚᱲ ᱯᱤᱱᱴᱩ ᱟᱜ ᱵᱟᱱᱟᱨ ᱯᱟᱦᱴᱟ ᱠᱤᱱ ᱜᱤᱛᱤᱡ ᱛᱮ ᱠᱤᱱ ᱫᱩᱞᱟᱹᱲ ᱮᱭᱟ…ᱹ ᱢᱩᱱᱤ ᱫᱚᱭ ᱪᱚᱜ ᱟᱭᱟ ᱢᱚᱞᱚᱝ ᱠᱚᱨᱮ ᱟᱨ ᱩᱢᱮᱥ ᱫᱚ ᱟᱡᱟᱜ ᱵᱚᱦᱚᱜ ᱨᱮ ᱛᱤᱭ ᱫᱚᱦᱚᱭ ᱛᱟᱭᱟ ᱟᱨ ᱠᱤᱱ ᱫᱩᱞᱟᱹᱲ ᱮᱭᱟ ᱾ ᱟᱭᱳᱼᱵᱟᱵᱟ ᱤᱱᱟᱹ ᱦᱤᱞᱚᱜ ᱠᱷᱚᱱ ᱞᱟᱹᱠᱛᱤ ᱨᱮᱜᱮ ᱮᱥᱢᱟᱴ ᱯᱷᱚᱱ ᱠᱤᱱ ᱵᱮᱵᱷᱟᱨᱟ ᱜᱤᱫᱽᱨᱟᱹ ᱪᱮᱛᱟᱱ ᱪᱤᱱᱛᱟᱹᱼᱵᱷᱟᱵᱽᱱᱟ ᱜᱚᱨᱚᱡᱽ ᱫᱩᱞᱟᱹᱲ ᱥᱟᱣᱛᱮ ᱫᱷᱮᱭᱟᱱ ᱵᱟᱹᱲᱛᱤ ᱠᱤᱱ ᱫᱚᱦᱚᱭᱟ ᱾
***
