᱘ ᱢᱟᱨᱪ ᱺᱼ
“ ᱫᱷᱟᱹᱨᱛᱤ ᱡᱟᱠᱟᱛ ᱛᱤᱨᱞᱟᱹ ᱡᱮᱜᱮᱛ ᱢᱟᱦᱟᱸ”
ᱡᱭᱚᱴᱥᱱᱟ ᱥᱚᱨᱮᱱᱹ
“ ᱛᱤᱨᱞᱟᱹ ᱡᱮᱜᱮᱛ ᱢᱟᱦᱟᱸ” ᱟᱸᱡᱚᱢ ᱞᱮᱠᱷᱟᱱ ᱜᱮᱢ ᱚᱱᱮ ᱠᱚᱨᱮ ᱚᱠᱟ ᱨᱮᱪᱚ ᱵᱟᱹᱭᱥᱟ,ᱠ ᱵᱚᱸᱜᱟ ᱨᱮᱱᱟᱜ ᱜᱩᱨᱞᱟᱹᱣ ᱦᱚᱭ ᱵᱚᱱᱚᱫᱚᱞ ᱛᱟᱞᱟ ᱦᱤᱥᱤᱫ ᱦᱚᱭ ᱮ ᱦᱮᱞᱠᱟᱣ ᱟᱹᱜᱩ ᱠᱮᱫ ᱞᱮᱠᱟ ᱢᱚᱱᱮᱨᱮ ᱥᱟᱶᱦᱟᱭ ᱥᱮᱴᱮᱨᱟᱜᱼᱟ ᱵᱟᱝ ᱥᱮ !! ᱟᱹᱰᱤ ᱜᱚᱨᱚᱵᱽ ᱟᱛᱮ ᱢᱮᱱ ᱦᱚᱸ ᱥᱟᱱᱟᱭᱟ ᱡᱟᱹᱱᱤᱡ “ᱤᱧ ᱫᱚ ᱛᱤᱨᱞᱟᱹ ᱾”
ᱢᱮᱱᱠᱷᱟᱱ ᱟᱸᱡᱚᱢ ᱡᱚᱝ ᱟᱨ ᱞᱟᱹᱭ ᱡᱚᱝ ᱛᱮ ᱛᱤᱱᱟᱹᱜ ᱜᱟᱱ ᱜᱚᱨᱚᱵᱽ ᱟᱹᱭᱠᱟᱹᱣᱜ ᱠᱟᱱᱟ ᱩᱱᱟᱹᱜ ᱜᱟᱱ ᱫᱚ ᱡᱟᱹᱱᱤᱡ ᱥᱟᱶᱛᱟ ᱵᱟᱹᱠᱷᱩᱞ ᱨᱮ, ᱚᱲᱟᱜ ᱜᱷᱟᱨᱚᱸᱡᱽ ᱨᱮᱫᱚ ᱢᱚᱱ ᱫᱚ ᱵᱟᱹᱱᱩᱜ ᱛᱟᱵᱚᱱᱟ ᱾ ᱫᱤᱥᱚᱢ ᱞᱟᱦᱟ ᱟᱠᱟᱱᱟ, ᱥᱟᱶᱛᱟ ᱞᱟᱦᱟ ᱟᱠᱟᱱ ᱨᱮᱦᱚᱸ ᱱᱤᱛ ᱦᱚᱸ ᱟᱵᱚ ᱫᱚ ᱛᱟᱭᱚᱢ ᱨᱮᱜᱮ ᱾
ᱜᱟᱞᱚᱪᱤᱭᱟᱹ ᱠᱚᱠᱚ ᱢᱮᱱᱟ, “ᱡᱟᱦᱟᱸ ᱥᱟᱶᱛᱟ ᱨᱮᱱ ᱟᱭᱳ ᱦᱚᱲ ᱥᱤᱠᱷᱱᱟᱹᱛ ᱰᱟᱦᱟᱨ ᱛᱮᱠᱚ ᱞᱟᱦᱟ ᱟᱠᱟᱱᱟ, ᱚᱱᱟ ᱥᱟᱶᱛᱟ ᱫᱚ ᱟᱹᱰᱤᱜᱟᱱ ᱞᱟᱦᱟ ᱟᱠᱟᱱᱟ”᱾ ᱥᱟᱹᱨᱤ ᱜᱮ ᱥᱟᱶᱛᱟ ᱦᱟᱨᱟᱵᱩᱨᱩ ᱨᱮ, ᱜᱷᱟᱨᱚᱸᱡᱽ ᱥᱟᱢᱴᱟᱣ ᱨᱮ ᱛᱤᱨᱞᱟᱹ ᱠᱚᱣᱟᱜ ᱮᱱᱮᱢ ᱢᱮᱱᱟᱜ ᱨᱮᱦᱚᱸ ᱟᱭᱳ ᱠᱚᱣᱟᱜ ᱢᱟᱹᱱ ᱫᱚ ᱵᱟᱹᱱᱩᱜᱼᱟ ᱾ ᱥᱮᱪᱮᱫ ᱛᱮ, ᱥᱤᱠᱱᱟᱹᱛ ᱛᱮ ᱱᱤᱛ ᱦᱚᱸ ᱟᱵᱚ ᱥᱟᱶᱛᱟ ᱨᱮᱱ ᱛᱤᱨᱞᱟᱹ ᱠᱚᱫᱚ ᱛᱟᱭᱚᱢ ᱨᱮᱜᱮ ᱾ ᱵᱷᱟᱹᱵᱤᱛ ᱨᱮᱱᱟᱜ ᱠᱟᱛᱷᱟ, ᱥᱟᱶᱛᱟ ᱢᱩᱫᱷᱩᱱ ᱨᱮᱱᱟᱜ ᱥᱤᱢᱟᱹ ᱥᱟᱲᱮᱨᱮ ᱟᱭᱳ ᱦᱚᱲ ᱫᱚ ᱵᱟᱵᱚᱱ ᱥᱮᱞᱮᱫ ᱟᱠᱟᱫ ᱠᱚᱣᱟ ᱾ ᱫᱷᱚᱨᱚᱢ ᱥᱟᱸᱜᱷᱟᱨ ᱨᱮ, ᱵᱤᱪᱟᱹᱨ ᱵᱟᱹᱭᱥᱤ ᱨᱮ, ᱢᱚᱬᱮ ᱦᱚᱲᱟᱜ ᱠᱩᱞᱦᱤ ᱫᱩᱲᱩᱵ ᱨᱮ ᱱᱤᱛ ᱦᱚᱸ ᱟᱭᱳ ᱦᱚᱲ ᱫᱚ ᱮᱛᱠᱟ ᱡᱟᱝ ᱞᱮᱠᱟ ᱵᱚᱱ ᱥᱟᱦᱟ ᱟᱠᱟᱫ ᱠᱚᱣᱟ ᱾
ᱡᱤᱭᱚᱱ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱨᱮ ᱛᱤᱨᱤ ᱯᱩᱨᱩᱥ ᱵᱟᱱᱟ ᱦᱚᱲᱟᱜ ᱜᱮ ᱮᱱᱮᱢ ᱢᱮᱱᱟᱜᱼᱟ ᱾ ᱮᱱ ᱨᱮᱦᱚᱸ ᱚᱠᱟ ᱨᱮᱪᱚ ᱟᱵᱚᱣᱟᱜ ᱛᱟᱲᱟᱢ ᱰᱟᱦᱟᱨ ᱫᱚ ᱪᱷᱟᱸᱫᱟᱜ ᱠᱟᱱ ᱜᱮᱭᱟ ᱾
ᱮᱴᱟᱜ ᱮᱴᱟᱜ ᱥᱟᱶᱛᱟ ᱨᱮᱱ ᱛᱤᱨᱞᱟᱹ ᱞᱮᱠᱟ ᱟᱵᱚ ᱥᱟᱶᱛᱟ ᱨᱮᱱ ᱛᱤᱨᱞᱟᱹ ᱠᱚᱫᱚ ᱱᱤᱛ ᱦᱟᱹᱵᱤᱡ ᱵᱟᱠᱚ ᱞᱟᱦᱟ ᱟᱠᱟᱱᱟ ᱾ ᱥᱮᱪᱮᱫ ᱰᱟᱲᱮ ᱛᱮ ᱱᱤᱛ ᱦᱚᱸ ᱛᱟᱭᱚᱢ ᱨᱮᱜᱮ ᱾ ᱱᱤᱛ ᱦᱚᱸ ᱜᱷᱟᱨᱚᱸᱡᱽ ᱨᱮᱱᱟᱜ ᱮᱯᱮᱨᱦᱮᱸᱰᱮᱡ ᱛᱮ ᱢᱮᱫ ᱫᱟᱜ ᱛᱮ ᱟᱧᱪᱟᱨ ᱫᱚ ᱞᱚᱦᱚᱫᱚᱜ ᱠᱟᱱ ᱜᱮ ᱛᱟᱠᱚᱣᱟ ᱾
ᱢᱮᱱ ᱫᱚ ᱱᱚᱶᱟ, ᱫᱷᱟᱹᱨᱛᱤ ᱨᱮᱱᱟᱜ ᱱᱤᱭᱚᱢ ᱞᱮᱠᱟᱛᱮ, ᱛᱤᱨᱤ ᱯᱩᱨᱩᱥ ᱢᱟ ᱵᱟᱱᱟ ᱦᱚᱲ ᱵᱟᱱᱟ ᱦᱚᱲ ᱞᱟᱹᱜᱤᱫ ᱜᱮ ᱠᱤᱱ ᱡᱟᱱᱟᱢ ᱟᱠᱟᱱᱟ ᱾ ᱚᱱᱟᱛᱮ ᱛᱤᱨᱤ ᱯᱩᱨᱩᱥ ᱫᱚ ᱢᱤᱫᱴᱟᱹᱝ ᱯᱩᱭᱥᱟᱹ ᱨᱮᱱᱟᱜ ᱵᱟᱨᱭᱟ ᱫᱮᱭᱟ ᱞᱮᱠᱟ ᱾ ᱢᱤᱫ ᱫᱷᱟᱨᱮᱢ ᱪᱷᱟᱰᱟᱣ ᱞᱮᱠᱷᱟᱱ ᱯᱩᱭᱥᱟᱹ ᱜᱮ ᱚᱪᱚᱲᱚᱜᱼᱟ ᱾
ᱱᱮᱛᱟᱨ ᱫᱚ ᱱᱚᱶᱟ ᱢᱤᱫ ᱫᱤᱱ ᱨᱮᱱᱟᱜ “ᱛᱤᱨᱞᱟᱹ ᱡᱮᱜᱮᱛ ᱢᱟᱦᱟᱸ” ᱫᱚ ᱵᱟᱝ, ᱛᱤᱨᱞᱟᱹ ᱠᱚ ᱥᱟᱶᱛᱟ ᱨᱮ, ᱜᱷᱟᱨᱚᱸᱡᱽ ᱨᱮ ᱢᱟᱹᱱ ᱠᱚ ᱧᱟᱢ ᱢᱟ ᱾ ᱞᱟᱹᱭ ᱞᱟᱠᱪᱟᱨ ᱨᱮ, ᱥᱟᱶᱛᱟ ᱟᱹᱨᱤᱪᱟᱹᱞᱤ ᱨᱮ ᱩᱱᱠᱩᱣᱟᱜ ᱟᱹᱭᱫᱟᱹᱨ ᱵᱤᱫ ᱞᱟᱹᱜᱤᱫ ᱵᱟᱵᱟ ᱦᱚᱲ ᱜᱮᱞ ᱟᱦᱟ ᱦᱮᱡ ᱦᱩᱭᱩᱜ ᱛᱟᱠᱚᱣᱟ ᱾ᱵᱟᱵᱟ ᱦᱚᱲ ᱠᱚᱣᱟᱜ ᱢᱚᱱᱮ ᱨᱮᱱᱟᱜ ᱴᱟᱹᱴᱤ ᱥᱤᱞᱯᱤᱧ ᱡᱷᱤᱡ ᱠᱟᱛᱮ ᱯᱷᱟᱹᱜᱩᱱ ᱨᱮᱱᱟᱜ ᱥᱟᱹᱜᱩᱱ ᱥᱟᱶᱟᱭ ᱵᱟᱝ ᱦᱮᱡ ᱞᱮᱱᱠᱷᱟᱱ ᱟᱵᱚ ᱥᱟᱶᱛᱟ ᱨᱮ ᱛᱤᱨᱞᱟᱹ ᱠᱚᱣᱟᱜ ᱞᱟᱦᱟᱱᱛᱤ ᱫᱚ ᱵᱟᱝ ᱦᱤᱡᱩᱜᱼᱟ ᱾
ᱜᱷᱟᱨᱚᱸᱡᱽ ᱨᱮ ᱥᱟᱶᱛᱟ ᱨᱮ, ᱫᱤᱥᱚᱢ ᱨᱮ, ᱥᱟᱱᱟᱢ ᱡᱟᱭᱜᱟ ᱨᱮ ᱛᱤᱨᱞᱟᱹ ᱠᱚ ᱢᱟᱹᱱ ᱮᱢᱚᱜ ᱦᱩᱭᱩᱜᱼᱟ ᱾ ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱨᱮ ᱠᱩᱲᱤ ᱜᱤᱫᱽᱨᱟᱹ ᱠᱚ ᱚᱞᱚᱜ ᱯᱟᱲᱦᱟᱣ, ᱵᱷᱟᱹᱜᱤ ᱦᱚᱲ ᱵᱮᱱᱟᱣ ᱥᱟᱶ ᱥᱟᱶᱛᱮ ᱥᱟᱶᱛᱟ ᱨᱤᱱᱤᱡ ᱢᱟᱹᱱᱟᱱ ᱡᱩᱜᱤᱭᱟᱹ ᱷᱤᱥᱟᱹᱵᱽ ᱛᱮᱦᱚᱸ ᱛᱮᱭᱟᱨ ᱨᱮᱱᱟᱜ ᱠᱟᱹᱢᱤᱦᱚᱨᱟ ᱦᱟᱛᱟᱣ ᱦᱩᱭᱩᱜᱼᱟ ᱾ ᱢᱩᱪᱟᱹᱫ ᱨᱮ ᱥᱟᱱᱟᱢ ᱫᱷᱟᱹᱨᱛᱤ ᱡᱟᱠᱟᱛ ᱢᱟᱱᱣᱟ ᱴᱷᱮᱱ ᱞᱟᱹᱭ ᱛᱮᱱᱟᱜ
“ᱛᱤᱨᱞᱟᱹ ᱠᱚᱣᱟᱜ ᱟᱹᱭᱫᱟᱹᱨ ᱞᱟᱹᱜᱤᱫ ᱞᱟᱦᱟᱭ ᱢᱮ ᱟᱢᱟᱜ ᱥᱟᱹᱜᱩᱱ ᱛᱤ
ᱤᱧ ᱫᱚ ᱛᱤᱨᱞᱟᱹ ᱟᱢᱟᱜ ᱜᱷᱟᱨᱚᱸᱡᱽ ᱨᱤᱱᱤᱡ ᱢᱤᱫ ᱠᱷᱩᱱᱴᱤ ᱾”
ᱟᱢᱟᱜ ᱜᱚᱲᱚ ᱥᱚᱯᱚᱦᱚᱫ ᱟᱨ ᱥᱟᱹᱜᱩᱱ ᱫᱩᱞᱟᱹᱲ ᱜᱮ ᱩᱥᱩᱞ ᱵᱩᱨᱩ ᱫᱚᱱ ᱯᱟᱨᱚᱢ ᱨᱮ ᱫᱟᱲᱮᱭ ᱮᱢᱟᱹᱧᱟ, ᱡᱷᱟᱹᱱᱴᱤ ᱡᱟᱹᱱᱩᱢ ᱞᱮᱵᱮᱫ ᱞᱚᱴᱚᱢ ᱠᱟᱛᱮ ᱫᱮᱥ ᱫᱤᱥᱚᱢ ᱨᱮ ᱪᱤᱨ ᱚᱴᱟᱝ ᱨᱮᱱᱟᱜ ᱢᱚᱱᱮ ᱠᱮᱴᱮᱡ ᱥᱟᱹᱜᱩᱱ ᱮ ᱟᱹᱜᱩ ᱟᱹᱧᱟ ᱾
“ᱟᱢᱮᱢ ᱜᱟᱜᱽ ᱟ ᱥᱟᱶᱛᱟ ᱟᱹᱨᱤ
ᱤᱧᱤᱧ ᱫᱤᱯᱤᱞ ᱥᱟᱹᱜᱩᱱ ᱴᱷᱤᱞᱤ
ᱟᱢᱟᱜ ᱤᱧᱟᱜ ᱞᱟᱦᱟᱱᱛᱤ ᱛᱮ
ᱫᱤᱥᱚᱢ ᱞᱟᱦᱟᱜᱼᱟ ᱾”
***
