ᱟᱭᱳ ᱜᱳ ᱟᱹᱵᱤᱱ ᱜᱮ ᱟᱭᱳ ᱦᱟᱱᱦᱟᱨ ᱟᱭᱳ ᱜᱳ !
ᱵᱟᱹᱵᱤᱱ ᱡᱟᱱᱟᱢ ᱞᱤᱫᱤᱧ ᱨᱮᱦᱚᱸ ᱫᱩᱞᱟᱹᱲ ᱛᱷᱩᱢ ᱵᱤᱱ ᱪᱟᱞ ᱟᱹᱫᱤᱧᱟ ᱵᱟᱹᱵᱤᱱ ᱛᱤ ᱥᱟᱵ ᱞᱤᱫᱤᱧ ᱨᱮᱦᱚᱸ ᱦᱚᱨ ᱰᱟᱦᱟᱨ ᱵᱤᱱ ᱩᱫᱩᱜ ᱟᱹᱫᱤᱧᱟ ᱵᱷᱩᱞ ᱨᱮᱦᱚᱸ ᱞᱤᱧ ᱪᱮᱸᱜᱷᱟ ᱪᱮᱴᱠᱟᱨ ᱠᱤᱫᱤᱧᱟ ᱵᱟᱹᱲᱤᱡ ᱨᱮᱦᱚᱸ ᱞᱤᱧ ᱵᱩᱡᱷᱟᱹᱣ ᱵᱟᱛᱞᱟᱣ ᱠᱤᱫᱤᱧᱟ ᱿
ᱟᱭᱳ ᱜᱳ ᱟᱹᱵᱤᱱ ᱜᱮ ᱫᱩᱞᱟᱹᱲ ᱦᱟᱱᱦᱟᱨ ᱟᱭᱳ ᱜᱳ !
ᱵᱩᱜᱤ ᱵᱟᱹᱲᱤᱡ ᱢᱚᱱᱮ ᱠᱟᱛᱷᱟ ᱵᱤᱱ ᱞᱟᱹᱭ ᱥᱚᱫᱚᱨ ᱟᱹᱫᱤᱧᱟ ᱚᱲᱟᱜ ᱫᱩᱣᱟᱹᱨ ᱜᱷᱟᱨᱚᱸᱡᱽ ᱥᱟᱢᱴᱟᱣ ᱥᱟᱸᱵᱽᱲᱟᱣ ᱵᱤᱱ ᱞᱟᱹᱭ ᱟᱹᱫᱤᱧᱟ ᱟᱹᱰᱤᱜᱟᱱ ᱞᱤᱧ ᱧᱮᱞ ᱪᱮᱫ ᱠᱮᱫᱼᱟ ᱟᱹᱵᱤᱱ ᱴᱷᱮᱱ ᱠᱷᱚᱱ ᱟᱹᱰᱤ ᱞᱮᱠᱟ ᱞᱤᱧ ᱵᱟᱰᱟᱭ ᱧᱟᱢ ᱠᱮᱫᱼᱟ ᱟᱹᱵᱤᱱ ᱴᱷᱮᱱ ᱠᱷᱚᱱ ᱿
ᱟᱭᱳ ᱜᱳ ᱟᱹᱵᱤᱱ ᱜᱮ ᱫᱩᱞᱟᱹᱲ ᱦᱟᱱᱦᱟᱨ ᱟᱭᱳ ᱜᱳ !
ᱢᱚᱱᱮ ᱠᱮᱴᱮᱡ ᱠᱟᱛᱮ ᱦᱚᱯᱚᱱ ᱢᱮ ᱵᱤᱱ ᱪᱟᱞ ᱮᱢᱟᱫ ᱫᱤᱧᱟ ᱨᱟᱹᱥᱠᱟᱹ ᱨᱚᱢᱚᱡᱽ ᱛᱮ ᱜᱷᱟᱨᱚᱸᱡᱽ ᱚᱲᱟᱜ ᱨᱤᱱᱤᱡ ᱠᱤᱢᱤᱱ ᱵᱤᱱ ᱵᱮᱱᱟᱣ ᱠᱤᱫᱤᱧᱟ ᱢᱟᱹᱱ ᱵᱤᱱ ᱮᱢᱟᱫ ᱫᱤᱱᱟ ᱥᱚᱱᱢᱟᱱ ᱵᱤᱱ ᱮᱢᱟᱫ ᱫᱤᱧᱟ ᱫᱩᱞᱟᱹᱲ ᱵᱤᱱ ᱥᱟᱨᱥᱟᱣ ᱠᱮᱫᱼᱟ ᱟᱭᱳ ᱟᱧᱪᱟᱨ ᱨᱮ ᱵᱤᱱ ᱩᱢᱩᱞ ᱫᱚᱦᱚ ᱠᱤᱫᱤᱧᱟ ᱿
ᱟᱭᱳ ᱜᱳ ᱟᱹᱵᱤᱱ ᱜᱮ ᱫᱩᱞᱟᱹᱲ ᱦᱟᱱᱦᱟᱨ ᱟᱭᱳ ᱜᱳ !
ᱪᱟᱸᱫᱚ ᱡᱚᱲᱟᱣ ᱥᱟᱹᱜᱩᱱ ᱥᱤᱠᱲᱤ ᱵᱟᱹᱱᱤᱡ ᱠᱟᱛᱮ ᱵᱤᱱ ᱟᱹᱜᱩ ᱠᱤᱫᱤᱧᱟ ᱥᱟᱹᱜᱩᱱ ᱞᱚᱴᱟ ᱫᱟᱜ ᱛᱮ ᱟᱭᱳ ᱡᱟᱸᱜᱟ ᱵᱤᱱ ᱟᱹᱨᱩᱵ ᱠᱤᱫᱤᱧᱟ ᱛᱳᱣᱟ ᱛᱟᱵᱮᱱ ᱟᱡᱚ ᱠᱟᱛᱮ ᱚᱲᱟᱜ ᱵᱤᱱ ᱟᱫᱮᱨ ᱠᱤᱫᱤᱧᱟ ᱮᱯᱮᱨᱦᱮᱸᱰᱮ ᱫᱩᱠ ᱦᱟᱨᱠᱮᱛ ᱥᱟᱱᱟᱢ ᱠᱚ ᱥᱟᱦᱟ ᱠᱟᱛᱮ ᱫᱩᱞᱟᱹᱲ ᱛᱮᱵᱤᱱ ᱟᱹᱭᱩᱨ ᱥᱩᱛᱩᱜ ᱵᱩᱡᱷᱟᱹᱣ ᱵᱟᱛᱞᱟᱣ ᱟᱹᱫᱤᱧᱟ ᱿
ᱟᱭᱳ ᱜᱳ ᱟᱹᱵᱤᱱ ᱜᱮ ᱫᱩᱞᱟᱹᱲ ᱦᱟᱱᱦᱟᱨ ᱟᱭᱳ ᱜᱳ !
About the author
ᱢᱟᱹᱱᱤᱡ ᱨᱟᱹᱭᱢᱚᱛᱤ ᱦᱮᱸᱵᱽᱨᱚᱢ
ᱢᱟᱹᱱᱤᱡ ᱨᱟᱹᱭᱢᱚᱛᱤ ᱦᱮᱸᱵᱽᱨᱚᱢ ᱫᱚ ᱢᱤᱫ ᱚᱱᱚᱬᱦᱤᱭᱟᱹ ᱠᱟᱱᱟᱭ ᱾ ᱟᱡ ᱫᱚ ᱚᱱᱚᱞᱤᱭᱟᱹ ᱥᱟᱶ ᱥᱟᱶ ᱛᱮ ᱢᱤᱫ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱦᱚᱸ ᱠᱟᱱᱟᱭ ᱾ ᱟᱡᱟᱜ ᱟᱹᱛᱩ ᱫᱤᱥᱚᱢ ᱫᱚ ᱢᱩᱥᱟᱹᱵᱩᱱᱤ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮ ᱾
View all posts