ᱠᱚᱞᱮᱵᱟᱞᱮ ᱠᱷᱚᱱᱮᱢ ᱦᱟᱨᱟᱭᱮᱱ
ᱠᱩᱞᱦᱤ ᱫᱷᱩᱲᱤ ᱨᱮᱢ ᱠᱷᱤᱞᱰᱩ ᱮᱱᱮᱡ
ᱱᱤᱛᱚᱜ ᱮᱢ ᱢᱟᱨᱟᱝ ᱮᱱ
ᱚᱲᱟᱜ ᱮᱨᱟ ᱢᱟᱭᱟ ᱱᱟᱹᱬᱤ ᱛᱮᱢ ᱛᱚᱞ ᱮᱱ ᱾
ᱡᱷᱟᱹᱱᱴᱤ ᱡᱟᱯᱟᱜ ᱡᱷᱚᱨᱡᱷᱩᱨᱤ ᱞᱮᱠᱟ ᱜᱮ
ᱩᱢᱮᱨ ᱪᱟᱞᱟᱣᱮᱱᱟ ᱵᱚᱭᱚᱥ ᱯᱟᱨᱚᱢᱮᱱᱟ
ᱦᱟᱲᱟᱢ ᱨᱩᱯ ᱨᱮᱢ ᱵᱚᱞᱚᱭᱮᱱᱟ
ᱵᱟᱞᱮ ᱥᱟᱜᱮᱱ ᱥᱟᱠᱟᱢ
ᱯᱟᱺᱰᱩ ᱧᱩᱨᱩᱜ ᱞᱮᱠᱟ ᱜᱮ ᱾
ᱦᱚᱲᱮᱢ ᱟᱫ ᱮᱱ
ᱯᱟᱨᱠᱚᱢ ᱯᱮᱨᱮᱡ
ᱛᱟᱞᱟ ᱨᱟᱪᱟᱨᱮᱢ ᱥᱟᱡᱟᱣᱮᱱ
ᱦᱚᱲ ᱠᱚ ᱛᱟᱞᱟᱨᱮ
ᱢᱟᱹᱡᱷᱤ ᱠᱚ ᱥᱟᱢᱟᱝ ᱨᱮ
ᱟᱢ ᱫᱚᱢ ᱚᱰᱚᱠ ᱮᱱ
ᱱᱤᱥᱚᱱ ᱠᱩᱞᱦᱤ ᱛᱟᱞᱟ ᱛᱮ ᱾
ᱦᱚᱲ ᱠᱚ ᱯᱟᱸᱡᱟ ᱟᱠᱟᱫ ᱢᱮ
ᱛᱟᱭᱚᱢ ᱛᱟᱭᱚᱢ ᱛᱮ
ᱫᱚ-ᱵᱟᱹᱴᱤ ᱨᱮᱢ ᱛᱤᱸᱜᱩᱭᱮᱱ
ᱟᱢᱟᱜ ᱥᱟᱡᱟᱣ ᱥᱚᱱᱛᱚᱠ ᱮᱢ ᱠᱚᱭ ᱠᱮᱫᱮ
ᱟᱢ ᱫᱚ ᱡᱩᱨᱤ
ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱ ᱠᱟᱛᱮ
ᱥᱟᱨᱟ ᱨᱮᱢ ᱫᱮᱡ ᱮᱱ ᱾
ᱟᱢᱟᱜ ᱢᱚᱦᱚᱨ ᱢᱚᱦᱰᱟ ᱚᱸᱰᱮ
ᱢᱮᱴᱟᱣ ᱥᱟᱹᱨᱤ ᱮᱱ
ᱡᱮᱢᱚᱱ ᱫᱚ-ᱵᱟᱹᱴᱤ ᱨᱮ
ᱪᱟᱸᱫᱚ ᱫᱚᱭ ᱦᱟᱺᱥᱩᱨ ᱥᱟᱹᱨᱤ ᱮᱱ ᱾
***
