ᱪᱟᱸᱫᱚᱭ ᱦᱟᱹᱥᱩᱨᱮᱱ, ᱟᱹᱭᱩᱵ ᱡᱚᱦᱚᱱ ᱮᱱ,
ᱩᱢᱩᱞ ᱛᱮ ᱜᱚᱴᱟ, ᱧᱩᱛᱟᱹᱛ ᱜᱮ ᱧᱮᱞ ᱮᱱ ᱾
ᱢᱟᱨᱥᱟᱞ ᱠᱟᱵᱚᱱ ᱫᱤᱱᱚᱢᱟᱱ, ᱥᱤᱧ ᱪᱟᱸᱫᱚ ᱜᱮ,
ᱡᱤᱨᱟᱹᱣ ᱡᱚᱝ ᱮ ᱟᱡ ᱦᱚᱸ, ᱞᱟᱸᱜᱟᱜ ᱛᱮ ᱾
ᱨᱟᱦᱞᱟᱼᱨᱤᱢᱤᱞ ᱪᱚᱴ ᱠᱷᱚᱱᱟᱝ,ᱚᱱᱟᱛᱮ !
ᱠᱚᱧᱮ ᱥᱮᱫ ᱮ ᱟᱬᱜᱚ ᱡᱚᱝ ᱵᱟᱹᱭᱼᱵᱟᱹᱭ ᱛᱮ ᱾
ᱥᱤᱧ ᱪᱟᱸᱫᱚ ᱡᱷᱤᱨᱤᱼᱦᱤᱨᱤ ᱟᱫᱚᱭ ᱦᱟᱹᱥᱩᱨᱚᱜ,
ᱩᱱᱤ ᱯᱟᱨᱚᱢ ᱠᱟᱛᱮᱫ ᱟᱫᱚ, ᱧᱩᱛ ᱛᱚᱦᱮᱱᱚᱜ ᱾
ᱨᱩᱣᱟᱹᱲ ᱦᱤᱡᱩᱜ ᱠᱚ ᱪᱮᱬᱮᱼᱪᱤᱯᱨᱩ ᱛᱩᱠᱟᱹᱼᱵᱟᱥᱟ ᱛᱮ,
ᱜᱚᱥᱚᱢᱚᱥᱚᱜ ᱵᱩᱥᱟᱹᱲ ᱵᱟᱦᱟ ᱟᱹᱭᱩᱵ ᱥᱟᱶᱛᱮ ᱾
ᱧᱩᱛ ᱥᱟᱲᱟᱼᱥᱟᱹᱛᱤᱧ ᱟᱹᱛᱩ ᱴᱚᱞᱟ ᱨᱮ,
ᱚᱲᱟᱜ ᱫᱩᱣᱟᱹᱨ ᱢᱟᱨᱥᱟᱞ ᱠᱚᱜ ᱱᱟᱥᱮ ᱫᱷᱟᱨᱟ ᱜᱮ ᱾
ᱰᱤᱵᱽᱨᱤᱼᱦᱟᱹᱨᱠᱤᱱ ᱵᱟᱹᱛᱤ ᱢᱤᱫ ᱠᱚᱬ ᱥᱮᱫ ᱨᱮ,
ᱧᱩᱬᱩᱼᱧᱩᱬᱩ ᱡᱩᱞᱩᱜ ᱚᱱᱟ, ᱱᱤᱪᱚᱞ ᱨᱮ ᱾
ᱥᱮᱸᱜᱮᱞ ᱵᱟᱦᱟ ᱡᱩᱞᱩᱜ, ᱪᱩᱞᱦᱟᱹ ᱵᱷᱤᱛᱟᱹᱨ ᱨᱮ,
ᱫᱟᱠᱟ ᱠᱷᱟᱫᱽᱼᱠᱷᱟᱫᱽ ᱦᱮᱰᱮᱡᱚᱜ ᱴᱩᱠᱩᱡ ᱵᱷᱤᱛᱟᱹᱨ ᱨᱮ ᱾
ᱠᱩᱫᱩᱢᱼᱠᱟᱹᱦᱱᱤ ᱠᱚ ᱟᱛᱮᱱ ᱠᱟᱜ ᱜᱤᱫᱟᱹᱨᱼᱯᱤᱫᱟᱹᱨ ᱠᱚ,
ᱢᱮᱱᱟᱜ ᱠᱚ ᱜᱚᱲᱚᱢ ᱟᱭᱳᱼᱵᱟᱵᱟ ᱞᱟᱹᱜᱼᱞᱟᱹᱭ ᱠᱚ ᱾
ᱠᱮᱨᱮᱠᱮᱛᱮ ᱠᱚ ᱜᱤᱛᱤᱡ ᱠᱚᱜ ᱟᱴᱮᱫ ᱪᱮᱛᱟᱱ ᱨᱮ,
ᱞᱟᱹᱭᱼᱞᱟᱹᱯᱟᱹᱭ ᱛᱚᱸᱜᱮ ᱠᱚᱜ ᱱᱟᱯᱟᱭᱼᱱᱟᱯᱟᱭ ᱜᱮ ᱾
ᱢᱩᱞᱩᱜ ᱪᱟᱸᱫᱚᱭ ᱧᱮᱞᱚᱜ ᱥᱮᱨᱢᱟ ᱪᱮᱛᱟᱱ ᱨᱮ,
ᱤᱯᱤᱞᱼᱮᱸᱜᱮᱞ ᱮᱢᱟᱱ ᱠᱚ ᱛᱟᱦᱮᱸ ᱠᱚᱜ ᱥᱟᱶᱛᱮ ᱜᱮ ᱾
ᱫᱷᱟᱹᱨᱛᱤ ᱯᱚᱴᱚᱢ ᱫᱟᱯᱟᱞ ᱮᱱ, ᱦᱮᱸᱫᱮ ᱩᱢᱩᱞ ᱛᱮ,
ᱠᱟᱲᱟᱝᱼᱠᱟᱲᱟᱝ ᱧᱮᱞ ᱮᱱ, ᱧᱩᱛᱼᱧᱤᱸᱫᱟᱹ ᱛᱮ ᱾
ᱟᱹᱛᱩ ᱴᱚᱞᱟ ᱨᱮᱭᱟᱜ, ᱧᱩᱛᱼᱧᱤᱸᱫᱟᱹ ᱜᱚᱴᱟ,
ᱯᱚᱞᱚᱢ ᱤᱫᱤᱜ ᱱᱚᱝᱠᱟ, ᱱᱤᱡᱷᱩᱢ ᱛᱟᱞᱟ ᱾
***
