ᱟᱵᱚ ᱡᱟᱦᱟᱸᱱᱟᱜ ᱜᱮᱵᱚ ᱠᱟᱹᱢᱤᱭᱟ, ᱟᱹᱰᱤ ᱜᱟᱱ ᱠᱟᱹᱢᱤ ᱜᱮ ᱮᱠᱞᱟ ᱥᱩᱢᱩᱝ ᱛᱮ ᱩᱛᱟᱹᱨ ᱦᱚᱸᱵᱚ ᱠᱟᱹᱢᱤ ᱜᱮᱭᱟ ᱾ ᱟᱨ ᱦᱚᱸ ᱡᱤᱭᱚᱱ ᱨᱮ ᱚᱱᱠᱟ ᱟᱹᱰᱤ ᱜᱟᱱ ᱠᱟᱹᱢᱤ ᱜᱮ ᱢᱮᱱᱟᱜ-ᱟ, ᱡᱟᱦᱟᱸ ᱠᱚ ᱠᱟᱹᱢᱤ ᱞᱟᱹᱜᱤᱫ ᱫᱚ ᱟᱵᱚ ᱜᱚᱲᱚ ᱵᱚ ᱠᱷᱚᱡᱚᱜ-ᱟ ᱾
ᱛᱤᱱ ᱡᱚᱦᱚᱜ ᱟᱢ ᱡᱟᱦᱟᱸᱱᱟᱜ ᱠᱟᱹᱢᱤ ᱨᱮᱢ ᱟᱬᱜᱚ ᱟᱠᱟᱱᱟ ᱥᱮ ᱠᱟᱹᱢᱤᱢ ᱥᱟᱵ ᱟᱠᱟᱫ-ᱟ ᱥᱮᱢ ᱮᱛᱚᱦᱚᱵ ᱟᱠᱟᱫ-ᱟ, ᱚᱱᱟ ᱠᱟᱹᱢᱤ ᱠᱚ ᱢᱟᱹᱫᱽ ᱨᱮ ᱢᱤ-ᱢᱤᱫᱴᱟᱹᱝ ᱠᱟᱹᱢᱤ ᱫᱚ ᱟᱢ ᱜᱮᱢ ᱮᱛᱚᱦᱚᱵ ᱟᱠᱟᱫ-ᱟ ᱾ ᱚᱱᱟ ᱨᱮᱱᱟᱜ ᱞᱮᱠᱷᱟ ᱡᱚᱠᱷᱟ ᱮᱴᱟᱜ ᱦᱚᱲ ᱫᱚ ᱵᱟᱠᱚ ᱵᱟᱰᱟᱭᱟ ᱾ ᱚᱱᱟ ᱠᱟᱹᱢᱤ ᱤᱫᱤ ᱠᱟᱛᱮ ᱫᱚ ᱟᱢ ᱜᱮᱢ ᱩᱭᱦᱟᱹᱨ ᱟᱠᱟᱫ-ᱟ ᱾ ᱚᱱᱟ ᱠᱟᱹᱢᱤ ᱚᱠᱟ ᱞᱮᱠᱟ ᱠᱟᱹᱢᱤᱜ-ᱟ, ᱚᱠᱟ ᱞᱮᱠᱟ ᱠᱟᱹᱢᱤ ᱞᱮᱠᱷᱟᱱ ᱞᱟᱯᱷᱟᱝ ᱴᱷᱟᱶ ᱨᱮ, ᱡᱚᱥ ᱴᱷᱟᱶ ᱨᱮ ᱥᱮ ᱟᱢ ᱡᱟᱦᱟᱸ ᱫᱷᱟᱹᱵᱤᱡ ᱚᱱᱟ ᱤᱫᱤ ᱥᱮᱴᱮᱨ ᱨᱮᱱᱟᱜ ᱮᱢ ᱩᱭᱦᱟᱹᱨ ᱟᱠᱟᱫ-ᱟ ᱾ ᱚᱱᱟ ᱠᱟᱹᱢᱤ ᱜᱮᱞᱮ ᱵᱤᱞᱤ ᱚᱪᱚᱭ ᱫᱚ ᱟᱢᱟᱜ ᱡᱤᱭᱚᱱ ᱨᱮᱱᱟᱜ ᱢᱤᱫ ᱢᱟᱦᱟᱱ ᱠᱩᱠᱢᱩ ᱥᱮ ᱟᱺᱜᱤᱵᱷᱟᱨ ᱞᱮᱠᱟᱢ ᱟᱯᱱᱟᱨ ᱟᱠᱟᱫᱼᱟ ᱾ ᱚᱱᱟ ᱠᱩᱠᱢᱩ ᱞᱟᱹᱜᱤᱫ ᱫᱚ ᱟᱢ ᱚᱱᱛᱚᱨ ᱜᱟᱹᱦᱤᱸᱨ ᱨᱮ ᱢᱤᱫ ᱵᱟᱹᱠᱷᱩᱞ ᱮᱢ ᱵᱮᱱᱟᱣ ᱟᱠᱟᱫ-ᱟ ᱾ ᱱᱚᱣᱟ ᱠᱟᱹᱢᱤ ᱫᱚ ᱱᱚᱝᱠᱟ ᱠᱟᱹᱢᱤ ᱞᱮᱠᱷᱟᱱ ᱱᱟᱯᱟᱭᱚᱜ-ᱟ, ᱥᱚᱨᱮᱥᱚᱜ-ᱟ ᱟᱨ ᱱᱚᱣᱟ ᱨᱮᱭᱟᱜ ᱫᱟᱢᱟᱱ ᱚᱨᱥᱚᱝ ᱥᱟᱶᱛᱟ ᱨᱮ ᱱᱟᱥᱮ ᱧᱩᱨᱩᱜ-ᱟ ᱾ ᱱᱚᱣᱟ ᱞᱟᱹᱜᱤᱫ ᱛᱮ ᱟᱢ ᱠᱩᱠᱢᱩᱢ ᱥᱟᱡᱟᱣ ᱟᱠᱟᱫ-ᱟ ᱟᱨ ᱚᱱᱟ ᱯᱩᱨᱟᱹᱣ ᱞᱟᱹᱜᱤᱫ ᱛᱮ ᱥᱤᱧ ᱧᱤᱫᱟᱹᱢ ᱠᱩᱨᱩᱢᱩᱴᱩᱭᱮᱫ-ᱟ ᱾
ᱢᱤᱫ ᱦᱚᱲᱟᱜ ᱠᱩᱠᱢᱩ ᱫᱚ ᱵᱟᱨ ᱞᱮᱠᱟᱱᱟᱜ ᱦᱩᱭ ᱫᱟᱲᱮᱭᱟᱜ-ᱟ ᱾ ᱢᱤᱫ ᱫᱚ ᱱᱤᱡᱚᱨ ᱞᱟᱹᱜᱤᱫ, ᱥᱩᱢᱩᱝ ᱱᱤᱡᱚᱨ ᱜᱷᱟᱨᱚᱸᱡᱽ ᱞᱟᱹᱜᱤᱫ ᱾ ᱟᱨ ᱢᱤᱫ ᱫᱚ ᱱᱤᱡᱚᱨᱟᱜ ᱥᱟᱶᱛᱟ ᱞᱟᱹᱜᱤᱫ ᱟᱨ ᱥᱟᱶᱛᱟ ᱨᱤᱱ ᱦᱚᱲ ᱠᱚ ᱞᱟᱹᱜᱤᱫ ᱾
ᱢᱤᱫ ᱦᱚᱲ ᱟᱡ ᱥᱩᱢᱩᱝ ᱞᱟᱹᱜᱤᱫ ᱥᱮ ᱜᱷᱟᱨᱚᱸᱡᱽ ᱥᱩᱢᱩᱝ ᱞᱟᱹᱜᱤᱫ ᱠᱩᱠᱢᱩ ᱯᱩᱨᱟᱹᱣ ᱨᱮ ᱦᱚᱲᱟᱜ ᱜᱚᱲᱚᱭ ᱠᱷᱚᱡᱚᱜ ᱜᱮᱭᱟ, ᱤᱠᱷᱟᱹᱱ ᱚᱱᱟ ᱞᱟᱹᱜᱤᱫ ᱫᱚ ᱚᱠᱚᱭ ᱦᱚᱸ ᱯᱚᱞᱟ ᱛᱮᱫᱚ ᱵᱟᱭ ᱠᱟᱹᱢᱤ ᱚᱪᱚ ᱠᱚᱣᱟ ᱾ ᱚᱱᱟ ᱟᱡ ᱥᱩᱢᱩᱝ ᱟᱜ ᱠᱩᱠᱢᱩ ᱯᱩᱨᱟᱹᱣ ᱞᱟᱹᱜᱤᱫ ᱛᱮ ᱮᱴᱟᱜ ᱦᱚᱲ ᱮ ᱜᱚᱲᱚ ᱚᱪᱚ ᱠᱚᱨᱮ ᱩᱱᱠᱩ ᱫᱚ ᱚᱱᱟ ᱠᱟᱹᱢᱤ ᱜᱚᱲᱚ ᱞᱟᱹᱜᱤᱫ ᱠᱩᱲᱟᱹᱭ ᱮ ᱮᱢ ᱟᱠᱚ ᱠᱟᱱᱟ ᱾
ᱟᱨ ᱢᱤᱫ ᱠᱟᱹᱢᱤ ᱫᱚ ᱦᱩᱭᱩᱜ ᱠᱟᱱᱟ ᱥᱟᱶᱛᱟ ᱞᱟᱹᱜᱤᱫ ᱾ ᱥᱟᱶᱛᱟ ᱞᱟᱹᱜᱤᱫ ᱛᱤᱱᱟᱹᱝ ᱜᱟᱱ ᱠᱟᱹᱢᱤ ᱫᱚ ᱡᱩᱢᱤᱫᱽ ᱠᱟᱛᱮ ᱠᱟᱹᱢᱤ ᱞᱮ ᱮᱱᱟᱝ ᱚᱱᱟ ᱨᱮᱱᱟᱜ ᱚᱨᱡᱚ ᱧᱟᱢᱚᱜ-ᱟ ᱾ ᱱᱚᱝᱠᱟᱱ ᱵᱮᱲᱟ ᱨᱮ ᱟᱢ, ᱟᱢ ᱨᱤᱱ ᱦᱚᱲ ᱠᱚ ᱴᱷᱮᱱ ᱜᱚᱲᱚᱢ ᱠᱷᱚᱡᱚᱜ-ᱟ ᱾ ᱱᱚᱣᱟ ᱠᱟᱹᱢᱤ ᱞᱟᱹᱜᱤᱫ ᱦᱚᱲ ᱥᱟᱶᱮᱢ ᱧᱟᱯᱟᱢᱟ ᱾ ᱩᱱᱠᱩ ᱥᱟᱶᱮᱢ ᱨᱚᱯᱚᱲᱟ ᱾ ᱟᱢᱟᱜ ᱠᱩᱠᱢᱩ ᱠᱟᱛᱷᱟᱢ ᱞᱟᱹᱭ ᱟᱠᱚᱣᱟ, ᱠᱟᱹᱢᱤ ᱨᱮᱱᱟᱜ ᱦᱚᱨᱟᱢ ᱞᱟᱹᱭ ᱟᱠᱚᱣᱟ, ᱚᱱᱟ ᱠᱟᱹᱢᱤ ᱦᱚᱛᱮᱛᱮ ᱥᱟᱶᱛᱟ ᱨᱮᱭᱟᱜ ᱵᱷᱟᱹᱞᱟᱹᱭ, ᱚᱠᱟ ᱫᱷᱟᱹᱵᱤᱡ ᱚᱱᱟ ᱠᱟᱹᱢᱤ ᱤᱫᱤ ᱥᱟᱱᱟᱢ ᱠᱟᱱᱟ, ᱚᱱᱟ ᱥᱟᱱᱟᱢ ᱠᱟᱹᱢᱤ ᱟᱨ ᱠᱟᱹᱢᱤ ᱨᱮᱱᱟᱜ ᱛᱚᱦᱚᱨ ᱩᱱᱤ ᱦᱚᱲᱮᱢ ᱞᱟᱹᱭ ᱟᱭᱟ, ᱡᱟᱦᱟᱸᱭ ᱴᱷᱮᱱ ᱠᱷᱚᱱ ᱟᱢ ᱜᱚᱲᱚᱢ ᱠᱷᱚᱡᱽ ᱠᱟᱱᱟ ᱾ ᱟᱢ ᱟᱢᱟᱜ ᱠᱩᱠᱢᱩ ᱨᱮᱱᱟᱜ ᱫᱚᱞᱟᱱ ᱟᱢᱟᱜ ᱚᱱᱛᱚᱨ ᱢᱟᱴ ᱨᱮ ᱡᱟᱦᱟᱸ ᱞᱮᱠᱟᱢ ᱜᱚᱲᱦᱚᱱ ᱟᱠᱟᱫ-ᱟ, ᱩᱱᱟᱹᱜ ᱫᱷᱟᱹᱵᱤᱡ ᱫᱚ ᱩᱱᱤ ᱦᱚᱲ ᱚᱦᱚ ᱜᱮᱢ ᱟᱫᱮᱨ ᱫᱟᱲᱮ ᱠᱮᱭᱟ᱾ ᱩᱱᱤ ᱦᱚᱲ ᱟᱢᱟᱜ ᱞᱟᱹᱭ ᱛᱮ ᱡᱟᱦᱟᱸ ᱛᱤᱱᱟᱹᱜ ᱮ ᱵᱩᱡᱷᱟᱹᱣ ᱮᱱᱟ, ᱚᱱᱟᱨᱮ ᱦᱩᱭ ᱫᱟᱲᱮᱭᱟᱜ-ᱟ, ᱟᱢᱟᱜ ᱠᱩᱠᱢᱩ ᱨᱮᱱᱟᱜ ᱜᱟᱹᱦᱤᱸᱨ ᱮ ᱵᱩᱡᱽ ᱧᱟᱢ ᱠᱟᱜ ᱠᱷᱟᱹᱛᱤᱨ ᱟᱢ ᱠᱟᱹᱢᱤᱭ ᱜᱚᱲᱚ ᱟᱢᱟ, ᱢᱤᱫ ᱫᱚ ᱟᱡᱟᱜ ᱦᱚᱸ ᱟᱢ ᱞᱮᱠᱟ ᱜᱮ ᱩᱭᱦᱟᱹᱨ ᱥᱮ ᱠᱩᱠᱢᱩ ᱛᱟᱭ ᱚᱱᱟ ᱠᱷᱟᱹᱛᱤᱨ ᱦᱚᱸ ᱟᱢᱟᱜ ᱠᱟᱹᱢᱤ ᱨᱮ ᱜᱚᱲᱚᱭ ᱮᱢᱟ ᱟᱨ ᱢᱤᱫ ᱫᱚ ᱟᱢᱟᱜ ᱠᱟᱹᱢᱤ ᱨᱮᱱᱟᱜ ᱨᱩᱯ ᱨᱚᱝ ᱩᱱᱟᱹᱜ ᱜᱟᱹᱦᱤᱸᱨ ᱛᱮ ᱵᱟᱭ ᱵᱩᱡᱷᱟᱹᱣ ᱠᱟᱜ ᱨᱮᱦᱚᱸ ᱟᱢᱟᱜ ᱠᱟᱛᱷᱟ ᱫᱚᱦᱚᱭ ᱞᱟᱹᱜᱤᱫ ᱟᱢ ᱠᱟᱹᱢᱤᱭ ᱜᱚᱲᱚ ᱟᱢᱟ ᱾
ᱠᱟᱹᱢᱤᱭ ᱜᱚᱲᱚ ᱟᱫ ᱢᱮᱭᱟ, ᱠᱟᱹᱢᱤ ᱛᱟᱢ ᱟᱹᱰᱤ ᱱᱟᱯᱟᱭ ᱛᱮ ᱞᱟᱦᱟ ᱮᱱᱟ ᱾ ᱤᱠᱷᱟᱹᱱ ᱱᱚᱝᱠᱟᱱ ᱚᱠᱛᱚ ᱦᱚᱸ ᱢᱤᱫ ᱫᱤᱱ ᱥᱮᱴᱮᱨ ᱦᱩᱭ ᱫᱟᱲᱮᱭᱟᱜ-ᱟ ᱾ ᱩᱱᱤ ᱜᱚᱜᱽᱲᱚᱭᱤᱡ ᱟᱢᱟᱜ ᱠᱟᱹᱢᱤ ᱵᱟᱹᱜᱤ ᱠᱟᱛᱮ ᱦᱚᱸᱭ ᱥᱮᱱ ᱫᱟᱲᱮᱭᱟᱫ-ᱟ ᱾ ᱱᱚᱣᱟ ᱠᱷᱟᱹᱛᱤᱨ ᱟᱢ ᱜᱚᱜᱽᱲᱚᱭᱤᱡ ᱮᱢ ᱟᱫᱮᱭᱟ ᱟᱨ ᱢᱚᱱᱮ ᱛᱟᱢ ᱢᱚᱠᱚᱧᱚᱜ-ᱟ ᱾ ᱤᱠᱷᱟᱹᱱ ᱩᱱᱤ ᱟᱹᱲᱤᱥ ᱟᱭ ᱨᱮᱱᱟᱜ ᱞᱟᱹᱠᱛᱤ ᱫᱚ ᱵᱟᱝ ᱠᱟᱱᱟ ᱾ ᱟᱢ ᱡᱮᱠᱷᱚᱱ ᱟᱢᱟᱜ ᱥᱟᱶᱛᱟ ᱵᱷᱟᱹᱞᱟᱹᱭ ᱨᱮᱱᱟᱜ ᱩᱱᱟᱹᱜ ᱱᱟᱯᱟᱭ ᱠᱟᱹᱢᱤ, ᱩᱱᱟᱹᱜ ᱢᱟᱨᱟᱝ ᱟᱺᱜᱤᱵᱷᱟᱨ ᱮᱢ ᱜᱚᱜ ᱟᱠᱟᱫ-ᱟ, ᱵᱤᱱ ᱠᱩᱲᱟᱹᱭ ᱛᱮᱢ ᱠᱟᱹᱢᱤ ᱠᱟᱱᱟ, ᱦᱚᱲᱟᱜ ᱨᱚᱲ ᱥᱤᱬᱤᱡ ᱮᱢ ᱥᱟᱦᱟᱣ ᱟᱠᱟᱫ-ᱟ, ᱥᱟᱶᱛᱟ ᱞᱟᱹᱜᱤᱫ ᱮᱢ ᱟᱞᱟᱭ ᱟᱠᱟᱱᱟ, ᱡᱤᱭᱚᱱ ᱨᱮᱱᱟᱜ ᱱᱚᱣᱟ ᱥᱟᱹᱨᱤᱭᱟᱹᱛ ᱥᱟᱶ ᱦᱚᱸ ᱵᱷᱟᱹᱜᱤ ᱞᱮᱠᱟ ᱩᱯᱨᱩᱢᱚᱜ ᱞᱟᱹᱠᱛᱤ ᱟᱢᱟ ᱾
ᱼᱼ “ᱢᱟᱹᱱᱢᱤ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮᱭ ᱡᱟᱱᱟᱢᱚᱜ-ᱟ ᱟᱯᱟᱱ ᱟᱹᱯᱤᱱ ᱟᱭᱳ ᱵᱟᱵᱟ ᱟᱜ ᱠᱩᱠᱷᱤ ᱠᱚᱞᱮ ᱦᱚᱨ ᱰᱟᱦᱟᱨ ᱟᱯᱱᱟᱨ ᱠᱟᱛᱮ ᱾ ᱟᱯᱟᱱ ᱟᱹᱯᱤᱱ ᱞᱮᱠᱟᱱ ᱞᱮᱠᱟᱱ ᱟᱺᱜᱤᱵᱷᱟᱨ ᱟᱹᱜᱩ ᱠᱟᱛᱮ ᱾ ᱟᱨ ᱟᱠᱚᱣᱟᱜ ᱚᱱᱟ ᱟᱺᱜᱤᱵᱷᱟᱨ ᱯᱩᱨᱟᱹᱣ ᱞᱟᱹᱜᱤᱫ ᱛᱮ ᱢᱤ-ᱢᱤᱴᱟᱹᱝ ᱴᱷᱟᱹᱣᱠᱟᱹ ᱚᱠᱛᱚ ᱛᱟᱦᱮᱸᱱᱟ ᱾ ᱛᱤᱱᱟᱹᱝ ᱜᱟᱱ ᱦᱚᱲᱟᱜ ᱩᱭᱦᱟᱹᱨ ᱟᱨ ᱟᱺᱜᱤᱵᱷᱟᱨ ᱫᱚ ᱢᱤᱫ ᱫᱷᱟᱨᱟ ᱦᱚᱸ ᱛᱟᱦᱮᱸᱱᱟ ᱾ ᱱᱚᱝᱠᱟᱱ ᱦᱚᱲ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮᱠᱚ ᱧᱟᱯᱟᱢ ᱠᱷᱟᱱ ᱩᱱᱠᱩ ᱫᱚ ᱟᱹᱰᱤ ᱥᱟᱺᱜᱤᱧ ᱫᱷᱟᱹᱵᱤᱡ ᱢᱤᱫ ᱛᱮᱠᱚ ᱠᱟᱹᱢᱤᱭᱟ ᱾ ᱟᱨ ᱡᱩᱫᱤ ᱡᱟᱦᱟᱸᱭ ᱟᱢ ᱥᱟᱶ ᱠᱟᱹᱢᱤ ᱠᱟᱹᱢᱤ ᱟᱛᱨᱟ ᱨᱮᱭ ᱵᱟᱹᱜᱤᱭᱟᱫ ᱢᱮᱭᱟ, ᱩᱭᱦᱟᱹᱨ ᱠᱟᱜ ᱢᱮ ᱩᱱᱤᱭᱟᱜ ᱛᱟᱲᱟᱢ ᱰᱟᱦᱟᱨ ᱫᱚ ᱱᱤᱱᱟᱹᱝ ᱫᱷᱟᱹᱵᱤᱡ ᱜᱮ ᱟᱢ ᱥᱟᱶ ᱛᱟᱦᱮᱸ ᱠᱟᱱᱟ ᱾ ᱛᱮᱦᱮᱧ ᱟᱡᱟᱜ ᱦᱚᱨ ᱵᱷᱮᱜᱟᱨ ᱟᱠᱟᱱᱟ, ᱯᱟᱞᱮ ᱪᱚ ᱟᱡᱟᱜ ᱟᱨ ᱦᱚᱸ ᱪᱮᱫ ᱟᱺᱜᱤᱵᱷᱟᱨ ᱯᱩᱨᱟᱹᱣ ᱨᱮᱭᱟᱜ ᱚᱠᱛᱚ ᱥᱮᱴᱮᱨ ᱟᱠᱟᱱᱟ ᱾
ᱚᱱᱟᱛᱮ ᱟᱢᱟᱜ ᱠᱟᱹᱢᱤᱨᱮ ᱩᱱᱤ ᱛᱚᱞ ᱫᱚᱦᱚᱭᱮ ᱦᱩᱸᱭᱟᱹ ᱟᱞᱚᱢ ᱨᱤᱠᱟᱹᱭᱟ ᱾ ᱟᱢᱟᱜ ᱟᱺᱜᱤᱵᱷᱟᱨ ᱯᱩᱨᱟᱹᱣ ᱨᱮᱜᱮ ᱞᱮᱛᱟᱲ ᱮ ᱜᱚᱲᱚ ᱟᱢᱟ, ᱱᱚᱣᱟ ᱦᱚᱸ ᱟᱸᱥ ᱟᱞᱚᱢ ᱫᱚᱦᱚᱭᱟ ᱾ ᱯᱟᱞᱮ ᱪᱚ ᱟᱡᱟᱜ ᱟᱨ ᱪᱮᱫ ᱪᱚ ᱟᱺᱜᱤᱵᱷᱟᱨ ᱢᱮᱱᱟᱜ, ᱡᱟᱦᱟᱸ ᱫᱚ ᱟᱡ ᱥᱩᱢᱩᱝ ᱛᱮ ᱥᱮ ᱟᱨ ᱦᱚᱸ ᱚᱠᱚᱭᱟᱜ ᱜᱚᱲᱚ ᱦᱟᱛᱟᱣ ᱠᱟᱛᱮ ᱚᱱᱟ ᱯᱩᱨᱟᱹᱣ ᱦᱩᱭ ᱟᱭᱟ ᱾
ᱛᱮᱦᱮᱧ ᱟᱢᱟᱜ ᱠᱟᱹᱢᱤ ᱠᱷᱚᱱ ᱟᱢᱤᱡ ᱜᱚᱜᱽᱲᱚᱭᱤᱡ ᱮ ᱥᱟᱦᱟ ᱟᱠᱟᱱ ᱠᱷᱟᱹᱛᱤᱨ ᱩᱱᱤ ᱟᱢ ᱟᱞᱚᱢ ᱟᱹᱲᱤᱥ ᱟᱭᱟ ᱾ ᱵᱚᱨᱚᱢ ᱥᱟᱨᱦᱟᱣᱮᱢ ᱾ ᱟᱢ ᱟᱡ ᱴᱷᱮᱱ ᱜᱚᱲᱚᱢ ᱠᱷᱚᱡᱽ ᱞᱮᱫ-ᱟ, ᱩᱱᱤ ᱟᱢᱮ ᱜᱚᱲᱚᱣᱟᱫ ᱢᱮᱭᱟ ᱾ ᱟᱢᱟᱜ ᱞᱟᱹᱭ ᱞᱮᱠᱟᱛᱮ, ᱟᱢᱟᱜ ᱟᱹᱭᱩᱨ ᱞᱮᱠᱟᱛᱮ, ᱩᱱᱤ ᱟᱢᱮ ᱯᱟᱸᱡᱟ ᱠᱮᱫ ᱢᱮᱭᱟ ᱟᱨᱮ ᱠᱟᱹᱢᱤ ᱜᱚᱲᱚᱣᱟᱫ ᱢᱮᱭᱟ ᱾ ᱟᱡᱟᱜ ᱜᱚᱲᱚ ᱠᱷᱟᱹᱛᱤᱨ ᱛᱮᱦᱮᱧ ᱟᱢᱟᱜ ᱩᱭᱦᱟᱹᱨ, ᱟᱢᱟᱜ ᱠᱩᱠᱢᱩ, ᱟᱢᱟᱜ ᱠᱩᱨᱩᱢᱩᱴᱩ, ᱱᱚᱝᱠᱟ ᱡᱚ ᱵᱟᱦᱟ ᱟᱠᱟᱱᱟ ᱾ ᱯᱟᱞᱮ ᱪᱚ ᱟᱡᱟᱜ ᱜᱚᱲᱚ ᱫᱚ ᱟᱢ ᱞᱟᱹᱜᱤᱫ ᱱᱤᱱᱟᱹᱝ ᱫᱷᱟᱹᱵᱤᱡ ᱜᱮ ᱠᱚᱯᱟᱲ ᱨᱮ ᱚᱞ ᱛᱟᱦᱮᱸ ᱠᱟᱱ, ᱚᱠᱚᱭ ᱵᱟᱰᱟᱭ ᱾ ᱚᱱᱠᱟ ᱜᱮ ᱯᱟᱞᱮ ᱪᱚ ᱱᱚᱣᱟ ᱦᱚᱸ ᱦᱩᱭ ᱫᱟᱲᱮᱭᱟᱜ-ᱟ, ᱯᱟᱞᱮ ᱪᱚ ᱟᱨ ᱦᱚᱸ ᱛᱟᱭᱚᱢ ᱫᱟᱨᱟᱢ ᱟᱡᱟᱜ ᱟᱢᱟᱜ ᱛᱟᱲᱟᱢ ᱰᱟᱦᱟᱨ ᱚᱠᱟ ᱨᱮᱪᱚ ᱧᱟᱯᱟᱢ ᱨᱮᱱᱟᱜ ᱴᱷᱟᱹᱣᱠᱟᱹ ᱢᱮᱱᱟᱜ ᱾ ᱩᱱ ᱡᱚᱦᱚᱜ ᱟᱨ ᱦᱚᱸ ᱟᱢ ᱡᱟᱦᱟᱸ ᱛᱤᱱᱟᱹᱜ ᱵᱟᱨᱚᱱ ᱠᱟᱛᱮ ᱨᱮᱦᱚᱸ ᱟᱢ ᱚᱱᱟ ᱧᱟᱯᱟᱢ, ᱚᱱᱟ ᱴᱚᱴᱷᱟ, ᱚᱱᱟ ᱠᱟᱹᱢᱤ ᱢᱤᱫ ᱛᱮ ᱠᱟᱹᱢᱤ ᱵᱟᱝ ᱜᱮᱢ ᱵᱟᱨᱚᱱ ᱫᱟᱲᱮᱭᱟᱜ-ᱟ ᱾ ᱥᱟᱶᱨᱮ ᱠᱟᱹᱢᱤ ᱛᱮᱜᱮ ᱦᱩᱭ ᱟᱢᱟ ᱾ ᱱᱚᱣᱟ ᱠᱚᱫᱚ ᱥᱤᱨᱡᱚᱱ ᱨᱤᱱᱤᱡ ᱥᱤᱨᱡᱚᱱᱤᱭᱟᱹ ᱦᱚᱛᱮᱛᱮ ᱚᱞᱼᱛᱚᱞ ᱟᱠᱟᱱ ᱠᱷᱮᱞᱚᱸᱰ ᱯᱩᱛᱷᱤ ᱨᱤᱱᱤᱡ ᱠᱷᱮᱞᱚᱸᱰᱤᱭᱟᱹ ᱟᱜ ᱠᱷᱮᱞᱚᱸᱰ ᱾ ᱡᱟᱦᱟᱸ ᱠᱚ ᱫᱟᱵᱚᱱ ᱫᱚᱦᱚᱭ ᱞᱟᱹᱜᱤᱫ ᱟᱢᱟᱜ ᱛᱤ ᱨᱮᱭᱟᱜ ᱠᱟᱹᱢᱤ ᱥᱮ ᱫᱟᱲᱮ ᱫᱚ ᱵᱟᱝ ᱠᱟᱱᱟ ᱾
ᱡᱚᱛᱚ ᱦᱚᱲ ᱜᱮ ᱟᱯᱟᱱ ᱟᱹᱯᱤᱱ ᱟᱺᱜᱤᱵᱷᱟᱨ ᱦᱚᱨ ᱨᱮ ᱢᱟᱬᱟᱝ ᱛᱮ ᱞᱟᱦᱟ ᱟᱠᱟ ᱜᱮᱵᱚ ᱛᱟᱦᱮᱸᱱᱟ ᱾ ᱚᱠᱟ ᱡᱚᱦᱚᱜ ᱫᱚ ᱛᱤᱱ ᱜᱷᱟᱹᱲᱤᱠ ᱞᱟᱹᱜᱤᱫ ᱪᱚ ᱛᱟᱲᱟᱢ ᱰᱟᱦᱟᱨ ᱢᱤᱫᱩᱜ ᱛᱟᱵᱚᱱᱟ ᱾ ᱩᱱ ᱵᱷᱩᱨ ᱥᱟᱶ ᱨᱮᱵᱚ ᱠᱟᱹᱢᱤᱭᱟ ᱾ ᱟᱨ ᱦᱚᱸ ᱚᱠᱟ ᱡᱚᱦᱚᱜ ᱫᱚ ᱚᱱᱠᱟᱱ ᱚᱠᱛᱚ, ᱚᱱᱠᱟᱱ ᱴᱚᱴᱷᱟ ᱥᱮᱴᱮᱨᱚᱜ-ᱟ, ᱡᱟᱦᱟᱸ ᱠᱷᱚᱱ ᱟᱵᱚ ᱵᱟᱯᱟᱜᱚᱜ ᱦᱩᱭ ᱟᱵᱚᱱᱟ ᱾ ᱟᱨ ᱦᱚᱸ ᱟᱵᱚᱣᱟᱜ ᱟᱯᱟᱱ ᱟᱹᱯᱤᱱ ᱟᱺᱜᱤᱵᱷᱟᱨ ᱦᱚᱨ ᱨᱮ ᱱᱟᱶᱟ ᱱᱟᱶᱟ ᱜᱟᱛᱮ, ᱱᱟᱶᱟ ᱱᱟᱶᱟ ᱜᱚᱜᱽᱲᱚ ᱠᱚᱵᱚ ᱧᱟᱢ ᱤᱫᱤ ᱠᱚᱣᱟ, ᱩᱱᱠᱩᱣᱟᱜ ᱢᱤᱫ ᱰᱚᱸᱰᱮᱠ ᱜᱚᱲᱚ ᱦᱚᱛᱮᱛᱮ ᱟᱵᱚᱣᱟᱜ ᱠᱟᱹᱢᱤᱦᱚᱨᱟ ᱛᱚᱨᱟᱣ ᱟᱠᱟᱜᱮ ᱛᱟᱦᱮᱸᱱᱟ ᱾
ᱢᱤ-ᱢᱤᱫ ᱫᱷᱟᱣ ᱫᱚ ᱟᱺᱜᱤᱵᱷᱟᱨ ᱦᱚᱨ ᱨᱮ ᱱᱚᱝᱠᱟᱱ ᱚᱠᱛᱚ ᱦᱚᱸ ᱥᱟᱢᱟᱝ ᱦᱩᱭ ᱟᱢᱟ, ᱡᱟᱦᱟᱸ ᱨᱮᱫᱚ ᱟᱢ ᱥᱩᱢᱩᱝ ᱟᱢᱟᱜ ᱟᱺᱜᱤᱵᱷᱟᱨ ᱦᱚᱨᱦᱚ ᱦᱩᱭ ᱟᱢᱟ, ᱟᱢ ᱥᱩᱢᱩᱝ ᱟᱢᱟᱜ ᱠᱟᱹᱢᱤ ᱠᱩᱨᱩᱢᱩᱴᱩ ᱦᱩᱭ ᱟᱢᱟ ᱾ ᱛᱚᱵᱮ ᱮᱱᱟᱝ ᱞᱟᱦᱟᱜ ᱦᱚᱨ ᱨᱮ ᱟᱢ ᱟᱨ ᱦᱚᱸ ᱥᱚᱨᱮᱥ, ᱟᱨ ᱦᱚᱸ ᱠᱷᱟᱹᱴᱟᱹᱲᱤ ᱜᱚᱜᱽᱲᱚ ᱦᱚᱲᱮᱢ ᱧᱟᱢ ᱤᱫᱤ ᱠᱚᱣᱟ ᱾
ᱡᱟᱦᱟᱸᱭ ᱡᱟᱦᱟᱸ ᱛᱤᱱ ᱜᱷᱟᱹᱲᱤᱠ ᱟᱢᱟᱜ ᱠᱟᱹᱢᱤ ᱨᱮᱭ ᱜᱚᱲᱚ ᱟᱢ ᱠᱟᱱᱟ, ᱤᱱᱟᱹ ᱨᱮᱜᱮ ᱟᱢ ᱫᱚ ᱠᱩᱥᱤ ᱠᱚᱜ ᱢᱮ ᱾ ᱤᱱᱟᱹ ᱛᱟᱭᱚᱢ ᱚᱱᱟ ᱠᱟᱹᱢᱤ ᱛᱚᱨᱟᱣ ᱞᱟᱹᱜᱤᱫ ᱫᱚ ᱟᱨ ᱦᱚᱸ ᱥᱚᱨᱮᱥ ᱦᱚᱲ ᱜᱮ ᱪᱟᱸᱫᱚ ᱵᱚᱸᱜᱟᱭ ᱡᱚᱜᱟᱲ ᱡᱩᱛ ᱟᱠᱟᱫ ᱠᱚᱣᱟ ᱢᱮᱱᱛᱮ ᱟᱢ ᱩᱭᱦᱟᱹᱨ ᱢᱮ ᱾ ᱪᱮᱫᱟᱜ ᱥᱮ ᱡᱚᱛᱚ ᱠᱟᱹᱢᱤ, ᱡᱚᱛᱚ ᱵᱮᱲᱟ, ᱡᱚᱛᱚ ᱦᱚᱲᱟᱜ ᱛᱤ ᱨᱮᱭᱟᱜ ᱠᱟᱛᱷᱟ ᱵᱟᱝ ᱠᱟᱱᱟ ᱾ ᱡᱟᱦᱟᱸ ᱛᱤᱱ ᱵᱷᱩᱨ ᱜᱮᱭ ᱜᱚᱲᱚᱣᱟᱫ ᱢᱮᱭᱟ, ᱚᱱᱟ ᱫᱚ ᱦᱩᱭ ᱠᱚᱜ-ᱟ ᱟᱡᱟᱜ ᱦᱚᱸ ᱟᱺᱜᱤᱵᱷᱟᱨ ᱛᱟᱦᱮᱸ ᱞᱮᱱ ᱟᱨᱵᱟᱝ ᱫᱚ ᱟᱢᱟᱜ ᱟᱺᱜᱤᱵᱷᱟᱨ ᱜᱚᱲᱚᱣᱟᱢ ᱞᱟᱹᱜᱤᱫ ᱟᱡᱟᱜ ᱟᱺᱜᱤᱵᱷᱟᱨ ᱠᱷᱚᱱ ᱥᱟᱦᱟᱨᱮᱭ ᱛᱟᱦᱮᱸ ᱞᱮᱱ ᱾ ᱯᱟᱞᱮ ᱪᱚ ᱟᱢ ᱜᱮ ᱟᱢᱟᱜ ᱠᱟᱹᱢᱤᱨᱮ ᱜᱷᱩᱲ ᱵᱷᱤᱲ ᱠᱟᱛᱮ ᱟᱡᱟᱜ ᱟᱺᱜᱤᱵᱷᱟᱨ ᱠᱷᱚᱱᱮᱢ ᱥᱟᱦᱟ ᱞᱮᱫᱮ ᱾ ᱱᱚᱝᱠᱟᱱ ᱯᱟᱯ ᱨᱤᱱᱤᱡ ᱵᱷᱟᱹᱜᱤᱫᱟᱨ ᱪᱟᱜ ᱮᱢ ᱦᱩᱭᱩᱜ-ᱟ ᱾ ᱵᱚᱨᱚᱢ ᱩᱭᱦᱟᱹᱨ ᱜᱮᱞᱟ ᱟᱭ ᱢᱮ,
ᱜᱟᱛᱮ !!! ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱟᱢᱟᱜ ᱡᱟᱱᱟᱢᱚᱜ ᱨᱮᱱᱟᱜ ᱢᱮᱱᱮᱛ, ᱟᱢᱟᱜ ᱡᱤᱭᱚᱱ ᱨᱮᱱᱟᱜ ᱟᱺᱜᱤᱵᱷᱟᱨ ᱠᱷᱚᱱ ᱵᱟᱢ ᱥᱟᱦᱟ ᱟᱠᱟᱱᱟ ᱛᱚ ᱾ ᱩᱨᱩᱢ ᱞᱟᱹᱜᱤᱫ ᱨᱤᱠᱟᱹᱭ ᱢᱮ ᱟᱢᱟᱜ ᱡᱤᱭᱚᱱ ᱨᱮᱱᱟᱜ ᱥᱟᱹᱨᱤᱭᱟᱹᱛ !!! ᱪᱮᱫ ᱟᱢ, ᱟᱢᱟᱜ ᱦᱚᱨ ᱨᱮᱜᱮ ᱢᱮᱱᱟᱢᱟ ᱛᱚ !!!
ᱥᱟᱱᱟᱢ ᱦᱚᱲ ᱞᱮᱠᱟᱱ ᱞᱮᱠᱟᱱ ᱟᱺᱜᱤᱵᱷᱟᱨ ᱟᱹᱜᱩ ᱠᱟᱛᱮ ᱵᱚ ᱦᱤᱡᱩᱜ-ᱟ ᱾ ᱥᱟᱱᱟᱢ ᱦᱚᱲᱟᱜ ᱢᱚᱱᱮᱨᱮ ᱵᱷᱮᱜᱟᱨ ᱵᱷᱮᱜᱟᱨ, ᱞᱮᱠᱟᱱ ᱞᱮᱠᱟᱱ ᱩᱭᱦᱟᱹᱨ ᱛᱟᱣᱟᱜ ᱛᱟᱨᱠᱚᱜ-ᱟ ᱥᱟᱶᱛᱟ ᱞᱟᱹᱜᱤᱫ, ᱫᱮᱥ ᱫᱤᱥᱚᱢ ᱞᱟᱹᱜᱤᱫ ᱾ ᱚᱱᱟ ᱞᱮᱠᱟᱛᱮ ᱵᱷᱮᱜᱟᱨ ᱵᱷᱮᱜᱟᱨ ᱵᱚ ᱠᱟᱹᱢᱤ ᱞᱮ ᱮᱱᱟᱹᱝ ᱜᱮ ᱜᱷᱟᱨᱚᱸᱡᱽ ᱨᱮ, ᱥᱟᱶᱛᱟ ᱨᱮ, ᱫᱮᱥ ᱫᱤᱥᱚᱢ ᱨᱮ ᱥᱟᱱᱟᱢ ᱞᱮᱠᱟᱱ ᱠᱟᱹᱢᱤ ᱦᱩᱭ ᱤᱫᱤᱜ-ᱟ, ᱥᱟᱱᱟᱢ ᱞᱮᱠᱟᱱ ᱟᱱᱟᱴ ᱯᱮᱨᱮᱡ ᱯᱩᱨᱩᱱᱚᱜ-ᱟ ᱟᱨ ᱥᱟᱱᱟᱢ ᱞᱮᱠᱟᱱ ᱮᱴᱠᱮᱴᱚᱬᱮ ᱥᱚᱞᱦᱮ ᱤᱫᱤᱜ-ᱟ ᱾
ᱱᱚᱣᱟ ᱜᱮ ᱟᱺᱜᱤᱵᱷᱟᱨ ᱨᱮᱭᱟᱜ ᱨᱩᱯ ᱨᱚᱝ ᱟᱨ ᱱᱚᱣᱟ ᱜᱮ ᱢᱟᱱᱣᱟ ᱡᱤᱭᱚᱱ ᱨᱮᱱᱟᱜ ᱥᱟᱹᱨᱤᱭᱟᱹᱛ ᱾ ᱢᱤᱫ ᱦᱚᱲ ᱟᱢᱟᱜ ᱠᱟᱹᱢᱤ ᱨᱮ ᱡᱟᱦᱟᱸ ᱛᱤᱱ ᱵᱷᱩᱨ ᱟᱢᱟᱜ ᱠᱟᱛᱷᱟ ᱞᱮᱠᱟᱛᱮ ᱟᱢᱟᱜ ᱟᱹᱭᱩᱨ ᱞᱮᱠᱟᱛᱮ ᱟᱢ ᱮ ᱜᱚᱲᱚ ᱟᱫ ᱢᱮᱭᱟ, ᱚᱱᱟ ᱜᱮ ᱡᱚᱛᱚ ᱠᱷᱚᱱ ᱢᱟᱨᱟᱝ ᱟᱨ ᱢᱟᱦᱟᱱ ᱠᱟᱹᱢᱤ ᱫᱚ ᱾ ᱡᱩᱫᱤ ᱡᱟᱦᱟᱸ ᱛᱤᱥᱚᱜ ᱵᱟᱝ ᱚᱠᱛᱚ ᱠᱟᱛᱮ ᱤᱱᱟᱹᱜ ᱜᱮᱭ ᱜᱚᱲᱚ ᱫᱟᱲᱮᱭᱟᱢ ᱠᱟᱱᱟ, ᱤᱱᱟᱹᱜ ᱫᱷᱟᱹᱵᱤᱡ ᱜᱮ ᱩᱱᱤ ᱟᱢ ᱜᱚᱲᱚᱣᱟᱢ ᱨᱮᱱᱟᱜ ᱫᱚ ᱚᱠᱛᱚ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱩᱱᱤ ᱥᱟᱦᱟ ᱠᱟᱛᱮ ᱨᱮᱦᱚᱸ ᱩᱱᱤ ᱫᱚ ᱟᱞᱚᱢ ᱟᱹᱲᱤᱥ ᱟᱭᱟ ᱾ ᱫᱟᱲᱮᱭᱟᱜ ᱠᱷᱟᱱ ᱫᱚᱢ ᱚᱠᱛᱚ ᱚᱠᱛᱚ ᱨᱮ ᱥᱟᱨᱦᱟᱣ ᱠᱟᱭ ᱢᱮ ᱟᱨ ᱵᱟᱢ ᱫᱟᱲᱮᱭᱟᱜ ᱠᱷᱟᱱ ᱫᱚ ᱟᱢᱟᱜ ᱠᱟᱹᱢᱤ ᱨᱮ ᱞᱟᱦᱟ ᱪᱟᱞᱟᱜ ᱢᱮ ᱾ ᱱᱚᱣᱟ ᱫᱚ ᱛᱤᱥ ᱦᱚᱸ ᱟᱸᱥ ᱟᱞᱚᱢ ᱫᱚᱦᱚᱭᱟ ᱡᱮ, ᱢᱤᱫ ᱦᱚᱲ ᱢᱤᱫ ᱜᱷᱟᱹᱲᱤᱠ ᱮ ᱜᱚᱲᱚᱣᱟᱫ ᱢᱮᱛᱮ ᱫᱤᱱ ᱥᱟᱨᱟ ᱜᱮ ᱟᱢᱟᱜ ᱠᱟᱛᱷᱟ ᱞᱮᱠᱟᱛᱮ ᱟᱢ ᱟᱹᱭᱩᱨ ᱥᱟᱶᱛᱮ ᱜᱚᱲᱚ ᱟᱠᱟᱭ ᱛᱟᱦᱮᱸᱱᱟ ᱾ ᱟᱡᱟᱜ ᱦᱚᱸ ᱟᱡᱟᱜ ᱩᱭᱦᱟᱹᱨ ᱞᱮᱠᱟᱛᱮ ᱠᱟᱹᱢᱤ ᱨᱮᱭᱟᱜ ᱟᱺᱜᱤᱵᱷᱟᱨ ᱢᱮᱱᱟᱜ-ᱟ, ᱚᱱᱟ ᱠᱟᱹᱢᱤ ᱞᱟᱹᱜᱤᱫ ᱯᱩᱨᱟᱹ ᱚᱠᱛᱚ ᱦᱚᱸ ᱩᱱᱤᱭ ᱞᱟᱹᱠᱛᱤᱜ-ᱟ ᱾ ᱚᱱᱟᱛᱮ, ᱥᱚᱦᱚᱫᱤᱭᱟᱹ ᱫᱚ ᱥᱟᱨᱥᱟᱣ ᱜᱮ ᱥᱚᱨᱮᱥᱼᱟ ᱾
***
