᱑᱘᱕᱕ ᱥᱟᱹᱦᱤᱛ ᱨᱮ ᱢᱤᱫ ᱦᱩᱞ ᱦᱩᱭ ᱞᱮᱱᱟ ᱾ ᱚᱱᱟ ᱫᱚ ᱢᱤᱫᱴᱟᱹᱝ ᱚᱱᱠᱟᱱ ᱦᱩᱞ ᱛᱟᱦᱮᱸ ᱠᱟᱱᱟ, ᱡᱟᱦᱟᱸ ᱨᱮᱫᱚ ᱦᱩᱞ ᱦᱟᱹᱛᱭᱟᱹᱨ ᱥᱮ ᱦᱩᱞ ᱥᱟᱯᱟᱵ ᱞᱮᱠᱟᱛᱮ ᱦᱚᱲᱢᱚ ᱠᱷᱚᱱ ᱢᱟᱭᱟᱢ ᱮ ᱞᱤᱸᱜᱤ ᱚᱪᱚᱭ ᱫᱷᱟᱨ ᱞᱟᱥᱮᱨ ᱦᱟᱹᱛᱭᱟᱹᱨ ᱛᱟᱦᱮᱸ ᱠᱟᱱᱟ ᱾
ᱤᱝᱨᱮᱡᱽ ᱥᱚᱨᱠᱟᱨ ᱜᱚᱵᱚᱞ ᱨᱮ ᱛᱤᱱ ᱡᱚᱦᱚᱜ ᱥᱤᱧᱚᱛ ᱫᱤᱥᱚᱢ ᱛᱟᱦᱮᱸ ᱠᱟᱱᱟ, ᱤᱝᱨᱮᱡᱽ ᱠᱚ ᱦᱚᱛᱮᱛᱮ, ᱥᱟᱹᱣ ᱢᱟᱦᱟᱡᱚᱱ ᱠᱚ ᱦᱚᱛᱮᱛᱮ ᱟᱨ ᱡᱚᱢᱤᱫᱟᱨ ᱠᱚ ᱦᱚᱛᱮᱛᱮ ᱟᱵᱚ ᱥᱟᱱᱛᱟᱲ, ᱠᱷᱮᱨᱣᱟᱲ ᱥᱮ ᱟᱹᱫᱤᱵᱟᱹᱥᱤ ᱪᱮᱛᱟᱱ ᱟᱹᱰᱤ ᱜᱮ ᱱᱟᱦᱟᱪᱟᱨ ᱦᱩᱭ ᱞᱮᱱ ᱛᱟᱦᱮᱸᱫ ᱾ ᱟᱵᱚ ᱟᱹᱫᱤᱢ ᱠᱚ ᱪᱮᱛᱟᱱ ᱨᱮ ᱫᱤᱥᱚᱢ ᱡᱟᱠᱟᱛ ᱨᱮᱜᱮ ᱱᱚᱝᱠᱟ ᱠᱚᱪᱚᱞᱚᱸᱰ, ᱱᱟᱦᱟᱪᱟᱨ ᱟᱹᱰᱤ ᱞᱮᱠᱟᱛᱮ ᱦᱩᱭᱩᱜ ᱠᱟᱱ ᱛᱟᱦᱮᱸᱫ ᱾ ᱜᱚᱴᱟᱯᱟᱲᱟ ᱨᱤᱱ ᱜᱮ ᱵᱮᱵᱚᱥ, ᱱᱟᱪᱟᱨ, ᱞᱤᱪᱟᱹᱲ ᱩᱭᱦᱟᱹᱨ ᱛᱮ ᱜᱟᱥᱮᱨ ᱞᱚᱴᱚᱢ ᱚᱪᱚ ᱠᱟᱛᱮ ᱚᱱᱟ ᱱᱟᱦᱟᱪᱟᱨ ᱠᱚᱨᱮ ᱠᱷᱚᱱ ᱫᱩᱜ ᱵᱟᱧᱪᱟᱣᱜ ᱦᱚᱨ ᱰᱟᱦᱟᱨ ᱫᱚᱠᱚ ᱦᱤᱲᱤᱧ ᱩᱛᱟᱹᱨ ᱟᱠᱟᱫ ᱛᱟᱦᱮᱸᱫ ᱾ ᱱᱚᱝᱠᱟᱱ ᱵᱮᱵᱷᱟᱨ ᱠᱚ ᱧᱟᱢ ᱠᱟᱛᱮ ᱥᱟᱱᱟᱢ ᱦᱚᱲᱟᱜ ᱦᱚᱲᱢᱚ ᱨᱮᱱᱟᱜ ᱢᱟᱭᱟᱢ ᱜᱮ ᱵᱟᱝ ᱥᱟᱦᱟᱣ ᱫᱟᱲᱮ ᱛᱮ ᱦᱮᱰᱮᱡ ᱨᱟᱠᱟᱵᱚᱜ ᱠᱟᱱ ᱛᱟᱦᱮᱸᱫ ᱾
ᱤᱠᱷᱟᱹᱱ ᱱᱚᱝᱠᱟᱱ ᱫᱟᱹᱱᱢᱤ ᱫᱟᱲᱮ ᱡᱟᱸᱜᱮ ᱫᱟᱨᱟᱢ ᱞᱟᱹᱜᱤᱫ ᱛᱮᱫᱚ ᱢᱚᱱᱮ ᱡᱤᱣᱤ ᱦᱚᱲᱢᱚ ᱟᱞᱟᱭ ᱠᱟᱛᱮ ᱢᱮᱬᱦᱮᱫ ᱠᱷᱩᱱᱴᱤ ᱞᱮᱠᱟ ᱠᱚ ᱛᱤᱸᱜᱩ ᱞᱮᱱᱟ, ᱥᱤᱧᱚᱛ ᱫᱤᱥᱚᱢ ᱨᱮᱱᱟᱜ ᱵᱤᱦᱟᱨ ᱯᱚᱱᱚᱛ ᱵᱷᱟᱜᱚᱞᱯᱩᱨ ᱦᱚᱱᱚᱛ ᱵᱷᱚᱜᱽᱱᱟᱰᱤ ᱟᱹᱛᱩ ᱨᱤᱱ ᱥᱟᱱᱛᱟᱲ ᱵᱤᱨ ᱵᱟᱱᱴᱟ ᱠᱚ ᱾
ᱩᱱᱠᱩ ᱫᱚᱠᱚ ᱦᱩᱭᱩᱜ ᱠᱟᱱᱟ, ᱪᱩᱱᱩ ᱢᱩᱨᱢᱩ ᱦᱚᱯᱚᱱ ᱥᱤᱫᱩ, ᱠᱟᱹᱱᱦᱩ, ᱪᱟᱸᱫᱽ, ᱵᱷᱟᱭᱨᱚ ᱟᱨ ᱟᱠᱚ ᱨᱤᱱ ᱵᱟᱨ ᱢᱤᱥᱨᱟ ᱯᱷᱩᱞᱚ ᱟᱨ ᱡᱷᱟᱱᱚ ᱾ ᱱᱩᱠᱩ ᱠᱚᱣᱟᱜ ᱟᱹᱜᱩᱣᱟᱹᱱ ᱟᱹᱭᱩᱨ ᱛᱮ ᱤᱝᱨᱮᱡᱽ, ᱥᱟᱹᱣ ᱢᱟᱦᱟᱡᱚᱱ ᱟᱨ ᱡᱚᱢᱤᱫᱟᱨ ᱠᱚ ᱵᱤᱨᱩᱫᱷ ᱨᱮ ᱦᱩᱞ ᱠᱚ ᱮᱛᱚᱦᱚᱵ ᱞᱮᱫ-ᱟ ᱾ ᱚᱱᱟ ᱛᱩᱯᱩᱫ ᱨᱮᱱᱟᱜ ᱦᱟᱹᱛᱭᱟᱹᱨ ᱫᱚ ᱛᱟᱦᱮᱸ ᱠᱟᱱᱟ, ᱡᱷᱟᱠ ᱡᱷᱟᱠ ᱡᱷᱟᱞᱠᱟᱣᱜ ᱠᱟᱱ ᱪᱩᱸᱭᱦᱩᱨ ᱞᱟᱥᱮᱨ ᱦᱟᱹᱛᱭᱟᱹᱨ ᱟᱜ, ᱥᱟᱨ, ᱠᱷᱟᱱᱰᱟ, ᱠᱟᱹᱯᱤ, ᱰᱷᱟᱞ, ᱛᱟᱨᱣᱟᱲᱮ, ᱴᱟᱸᱜᱟ, ᱴᱮᱸᱜᱚᱡ, ᱵᱩᱰᱤᱭᱟᱹ, ᱵᱷᱩᱥᱟᱹ ᱮᱢᱟᱱ ᱾ ᱟᱨ ᱵᱟᱹᱭᱨᱤ ᱯᱟᱦᱴᱟ ᱫᱚ ᱛᱟᱦᱮᱸ ᱠᱟᱱᱟ ᱵᱟᱺᱫᱩᱠ ᱵᱟᱹᱨᱩᱫᱽ ᱥᱮᱸᱜᱮᱞ ᱴᱩᱴᱤ ᱜᱩᱞᱤ ᱾ ᱢᱤᱫ ᱯᱟᱦᱴᱟ ᱠᱷᱚᱱ ᱥᱟᱺᱜᱤᱧ ᱫᱟᱱᱟᱝ ᱠᱷᱚᱱ ᱥᱮᱸᱜᱮᱞ ᱵᱟᱺᱫᱩᱠ ᱜᱩᱞᱤ ᱛᱮᱭ ᱴᱩᱴᱤ ᱢᱮ ᱠᱷᱟᱱ, ᱫᱚᱥᱟᱨ ᱯᱟᱦᱴᱟ ᱫᱚ ᱫᱩᱜ ᱵᱟᱧᱪᱟᱣᱜ ᱨᱤᱠᱟᱹ ᱨᱮ ᱥᱚᱨ ᱥᱚᱨ ᱡᱷᱟᱞᱠᱟᱣᱜ ᱠᱟᱱ ᱞᱟᱥᱮᱨ ᱥᱟᱨ ᱛᱮᱨᱟᱝ ᱢᱮ ᱾ ᱪᱤᱠᱟᱹ ᱵᱟᱢ ᱛᱮᱨᱟᱝ-ᱟ !!! ᱥᱮᱵᱮᱫ, ᱞᱮᱵᱮᱫ, ᱡᱮᱸᱵᱮᱫ ᱫᱚ ᱛᱤᱱᱟᱹᱜ ᱫᱤᱱᱮᱢ ᱥᱟᱦᱟᱣᱟ ᱾ ᱵᱟᱧᱪᱟᱣᱜ ᱞᱟᱹᱰᱷᱟᱹᱭ ᱨᱮ ᱡᱤᱣᱤ ᱜᱮ ᱪᱮᱫᱟᱜ ᱵᱟᱝ ᱪᱟᱞᱟᱣ ᱚᱪᱚᱱᱚᱜ ᱾
ᱟᱯᱱᱟᱨᱟᱜ ᱦᱚᱠ, ᱟᱹᱭᱫᱟᱹᱨ, ᱢᱟᱹᱱ, ᱫᱷᱚᱱ ᱵᱟᱧᱪᱟᱣ ᱞᱟᱹᱜᱤᱫ ᱫᱚ ᱦᱟᱨᱟᱣᱜ ᱢᱮ ᱤᱠᱷᱟᱹᱱ ᱛᱤᱥ ᱦᱚᱸ ᱵᱟᱹᱭᱨᱤ ᱥᱟᱢᱟᱝ ᱨᱮ ᱟᱞᱚᱢ ᱛᱤᱨᱩᱵᱚᱜ-ᱟ ᱾ ᱡᱤᱭᱤ ᱱᱟᱥᱟᱣ ᱢᱮ ᱤᱠᱷᱟᱹᱱ ᱵᱟᱹᱭᱨᱤ ᱟᱜ ᱵᱟᱹᱲᱤᱡ ᱥᱟᱦᱟᱣ ᱨᱮ ᱡᱤᱭᱚᱱ ᱵᱮᱨᱛᱷᱟ ᱟᱞᱚᱢ ᱵᱟᱦᱟᱣᱟ ᱾ ᱢᱟᱹᱱᱢᱤ ᱡᱤᱭᱚᱱ ᱨᱮ ᱢᱟᱹᱱ ᱠᱷᱟᱱᱮᱠ ᱵᱟᱹᱱᱩᱜ ᱟᱱ ᱛᱟᱢᱟ, ᱦᱟᱹᱱ ᱨᱮᱱᱟᱜ ᱛᱮᱞᱟ ᱫᱚ ᱨᱩᱣᱟᱹᱲ ᱢᱮ ᱵᱟᱲᱮ ᱾
ᱱᱚᱝᱠᱟ ᱟᱵᱚ ᱨᱤᱱ ᱵᱤᱨ ᱵᱟᱱᱴᱟ ᱠᱚ ᱵᱟᱹᱭᱨᱤ ᱥᱟᱶ ᱠᱚ ᱦᱩᱞ ᱞᱮᱫ-ᱟ ᱩᱱᱠᱩ ᱥᱟᱢᱟᱝ ᱨᱮ ᱞᱮᱛᱟᱲ ᱞᱮᱛᱟᱲ ᱵᱟᱝ ᱛᱤᱨᱩᱵ ᱛᱟᱦᱮᱸ ᱠᱟᱛᱮ, ᱵᱟᱝ ᱥᱮᱵᱮᱫ ᱚᱪᱚ ᱠᱟᱛᱮ ᱾ ᱛᱮᱦᱮᱧ ᱩᱱᱠᱩ ᱵᱤᱨ ᱠᱚᱣᱟᱜ ᱡᱤᱭᱚᱱ ᱟᱞᱟᱭ ᱮᱱᱮᱢ ᱟᱵᱚᱣᱟᱜ ᱵᱚᱦᱚᱜ ᱛᱤᱨᱩᱵ ᱠᱷᱚᱱ ᱮ ᱛᱩᱞᱟ ᱾
ᱟᱵᱚ ᱨᱤᱱ ᱵᱚᱸᱜᱟ ᱵᱟᱨᱟᱠ ᱦᱩᱞᱜᱟᱹᱨᱤᱭᱟᱹ ᱠᱚᱣᱟᱜ ᱦᱩᱞᱥᱟᱹᱭ ᱮᱱᱮᱢ ᱱᱟᱜᱟᱢ ᱠᱷᱚᱱ ᱛᱮᱦᱮᱧ ᱟᱵᱚ ᱪᱮᱫ ᱵᱚ ᱟᱸᱜᱚᱪ ᱡᱚᱝ-ᱟ, ᱚᱠᱟ ᱥᱮᱫ ᱵᱚ ᱢᱚᱦᱰᱟᱜ-ᱟ, ᱚᱠᱟ ᱥᱮᱦᱮᱫ ᱯᱟᱹᱣᱲᱤ ᱵᱚ ᱞᱟᱦᱟᱭᱟ !!! ᱛᱮᱦᱮᱧ ᱦᱚᱸ ᱟᱵᱚ ᱵᱚ ᱦᱩᱞᱟᱹ, ᱛᱮᱦᱮᱧ ᱡᱩᱜᱽ ᱨᱮ, ᱟᱵᱚᱣᱟᱜ ᱛᱤ ᱨᱮ ᱥᱚᱵᱷᱟᱜ ᱞᱮᱠᱟᱱ ᱦᱟᱹᱛᱭᱟᱹᱨ ᱦᱟᱵᱟᱜ ᱠᱟᱛᱮ ᱾ ᱟᱨ ᱚᱱᱟ ᱦᱟᱹᱛᱭᱟᱹᱨ ᱫᱚ ᱚᱱᱠᱟᱱ ᱞᱟᱥᱮᱨᱟᱜ, ᱚᱱᱠᱟᱱ ᱫᱷᱟᱨᱟᱜ ᱦᱩᱭᱩᱜ ᱞᱟᱹᱠᱛᱤ, ᱡᱟᱦᱟᱸ ᱛᱮ ᱞᱟᱹᱰᱷᱟᱹᱭ ᱠᱟᱛᱮ ᱦᱚᱠ ᱧᱟᱢᱚᱜ ᱠᱷᱟᱱ ᱟᱵᱚᱣᱟᱜ ᱫᱩᱱᱤᱭᱟᱹᱭ ᱫᱚᱲᱦᱚᱭᱟ ᱾ ᱟᱵᱚᱣᱟᱜ ᱩᱯᱨᱩᱢ ᱮ ᱩᱨᱤᱡᱟ ᱾ ᱛᱤᱥ ᱦᱚᱸ ᱢᱟᱹᱱᱢᱤ ᱦᱚᱲᱢᱚ ᱨᱮᱭᱟᱜ ᱢᱟᱭᱟᱢ ᱵᱟᱝ ᱞᱤᱸᱜᱤ ᱚᱪᱚ ᱠᱟᱛᱮ ᱟᱵᱚ ᱢᱟᱹᱱ ᱢᱟᱱᱚᱛ ᱮ ᱛᱷᱟᱯᱚᱱ ᱟᱵᱚᱱᱟ ᱾ ᱚᱱᱠᱟᱱ ᱫᱚᱲᱦᱚ ᱞᱟᱥᱮᱨ ᱡᱷᱟᱠ-ᱡᱷᱟᱠ ᱡᱷᱟᱞᱠᱟᱣᱜ ᱦᱟᱹᱛᱭᱟᱹᱨ ᱦᱩᱭᱩᱜ ᱞᱟᱹᱠᱛᱤ ᱠᱟᱱᱟ ᱾ ᱡᱟᱦᱟᱸ ᱫᱚ ᱪᱮᱫ ᱫᱟᱲᱮ ᱛᱮᱦᱚᱸ ᱛᱤᱥ ᱦᱚᱸ ᱵᱟᱝ ᱜᱮᱭ ᱞᱤᱣᱤᱫ, ᱞᱟᱹᱵᱽᱲᱩᱡ, ᱨᱟᱹᱯᱩᱫ ᱠᱮᱭᱟ ᱾
ᱛᱮᱦᱮᱧ ᱟᱵᱚᱣᱟᱜ ᱥᱟᱶᱛᱟ ᱨᱤᱱ ᱡᱩᱣᱟᱹᱱ ᱠᱚ ᱵᱤᱨ ᱵᱟᱱᱴᱟ ᱠᱚᱣᱟᱜ ᱱᱟᱜᱟᱢ ᱠᱷᱚᱱ ᱥᱮᱪᱮᱫ ᱠᱟᱛᱮ ᱟᱜᱟᱢ ᱵᱤᱨ ᱠᱚᱣᱟᱜ ᱱᱟᱜᱟᱢ ᱥᱟᱦᱴᱟ ᱞᱟᱹᱜᱤᱫ ᱥᱟᱯᱲᱟᱣᱜ ᱦᱩᱭ ᱟᱠᱚᱣᱟ ᱾ ᱢᱟᱨᱟᱝ ᱠᱷᱚᱱ ᱢᱟᱨᱟᱝ, ᱞᱟᱹᱴᱩ ᱠᱷᱚᱱ ᱞᱟᱹᱴᱩ ᱛᱩᱯᱩᱫ ᱴᱟᱺᱰᱤ ᱨᱮ ᱦᱩᱞ ᱦᱟᱹᱛᱭᱟᱹᱨ ᱠᱚ ᱛᱩᱞ ᱫᱟᱲᱮᱭᱟᱜ ᱢᱟ, ᱚᱱᱟ ᱞᱟᱹᱜᱤᱫ ᱥᱮᱪᱮᱫ ᱟᱥᱲᱟ ᱟᱠᱷᱲᱟ ᱨᱮ ᱦᱟᱛᱟᱝ ᱫᱟᱲᱮ ᱞᱟᱥᱮᱨ ᱦᱩᱭ ᱟᱠᱚᱣᱟ ᱾
ᱛᱮᱦᱮᱧᱟᱜ ᱚᱱᱟ ᱦᱩᱞ ᱦᱟᱹᱛᱭᱟᱹᱨ ᱫᱚ ᱟᱨ ᱪᱮᱫ ᱦᱚᱸ ᱵᱟᱝ ᱠᱟᱱᱟ, ᱢᱤᱫ ᱵᱤᱛᱟᱹ ᱢᱤᱫ ᱛᱩᱱᱩᱢ ᱦᱮᱸᱫᱮ, ᱞᱤᱞ ᱨᱚᱝ ᱠᱟᱹᱲᱤ ᱛᱮ ᱯᱮᱨᱮᱡ ᱥᱟᱨᱮᱲ ᱟᱠᱟᱱ ᱡᱚᱛᱚ ᱠᱷᱚᱱ ᱫᱟᱢᱟᱱ, ᱞᱟᱥᱮᱨᱟᱱ, ᱫᱚᱲᱦᱚᱣᱟᱱ ᱯᱩᱸᱰ ᱢᱟᱴ ᱛᱩᱯᱩᱫ ᱴᱟᱺᱰᱤ ᱨᱮ ᱵᱟᱹᱭᱨᱤ ᱵᱤᱨᱩᱫᱷ, ᱟᱯᱱᱟᱨᱟᱜ ᱦᱚᱠ ᱟᱹᱭᱫᱟᱹᱨ ᱛᱷᱟᱯᱚᱱ ᱢᱤᱫ ᱦᱩᱞ ᱦᱟᱹᱛᱭᱟᱹᱨ ᱫᱚ ‘ᱱᱚᱱᱚᱞ’ ᱜᱮ ᱠᱟᱱᱟ ᱾
***
