ᱛᱮᱦᱮᱧ ᱯᱮ ᱥᱮᱨᱢᱟ ᱜᱟᱱ ᱯᱟᱨᱚᱢ ᱮᱱᱟ ᱾ ᱴᱮᱢᱯᱟ ᱫᱚ ᱟᱭᱤᱡ ᱮᱨᱟ ᱟᱛᱮᱫ ᱱᱟᱯᱟᱭ ᱜᱮᱭ ᱥᱚᱝᱥᱟᱨ ᱮᱫᱟ ᱾ ᱴᱮᱢᱯᱟ ᱥᱟᱶ ᱥᱳᱦᱟᱜᱤ ᱟᱜ ᱫᱩᱞᱟᱹᱲ ᱟᱛᱳ ᱨᱮᱱ ᱥᱟᱱᱟᱢ ᱦᱚᱲ ᱜᱮᱠᱚ ᱵᱟᱰᱟᱭ ᱛᱟᱸᱦᱮᱫ ᱾ ᱟᱡᱟᱜ ᱵᱟᱯᱞᱟ ᱛᱟᱭᱚᱢ ᱥᱳᱦᱟᱜᱤ ᱛᱤᱱᱟᱹᱜ ᱠᱚᱥᱴᱚᱭ ᱧᱟᱢ ᱞᱮᱫᱟ ᱾ ᱩᱱᱟᱹᱜ ᱠᱟᱛᱮᱭ ᱢᱮᱛᱟ ᱫᱮᱭᱟ ᱟᱞᱚᱢ ᱵᱟᱯᱞᱟᱜᱼᱟ ᱾ ᱚᱲᱟᱜ ᱦᱚᱲ ᱵᱟᱝ ᱢᱮᱛᱟ ᱠᱚᱢ ᱾ ᱢᱮᱱᱠᱷᱟᱱ ᱴᱮᱢᱯᱟ ᱫᱚ ᱠᱤᱥᱟᱹᱬ ᱚᱲᱟᱜ ᱟᱨ ᱪᱚᱨᱚᱠ ᱠᱩᱲᱤ ᱞᱚᱵᱽ ᱛᱮ ᱵᱟᱯᱞᱟᱜ ᱮ ᱨᱮᱵᱮᱱ ᱮᱱᱟ ᱾ ᱩᱱ ᱫᱚ ᱥᱳᱦᱟᱜᱤ ᱟᱜ ᱚᱞᱚᱜ ᱡᱤᱭᱚᱱ ᱟᱹᱣᱨᱤ ᱢᱩᱪᱟᱹᱫᱚᱜ ᱠᱷᱟᱹᱛᱤᱨ ᱪᱮᱫ ᱦᱚᱸ ᱵᱟᱭ ᱪᱤᱠᱟᱹ ᱫᱟᱲᱮ ᱠᱟᱣᱫᱟ ᱾ᱴᱮᱢᱯᱟᱭ ᱢᱮᱛᱟᱫᱮ ᱛᱟᱸᱦᱮᱫ ᱡᱮ ᱠᱤᱪᱷᱩ ᱫᱤᱱ ᱛᱟᱺᱜᱤ ᱢᱮ ᱫᱩᱞᱟᱹᱲ ᱡᱚᱠᱷᱚᱱ ᱤᱧ ᱫᱩᱞᱟᱹᱲ ᱟᱠᱟᱫ ᱢᱮᱭᱟ ᱛᱚᱵᱮ ᱫᱩᱧ ᱵᱟᱯᱞᱟ ᱢᱮᱜᱮᱭᱟ ᱾ ᱢᱮᱱᱠᱷᱟᱱ ᱚᱱᱠᱟᱱ ᱦᱟᱞᱚᱛ ᱧᱮᱞ ᱠᱟᱛᱮᱫ ᱴᱮᱢᱯᱟ ᱫᱚ ᱥᱳᱦᱟᱜᱤ ᱵᱟᱹᱜᱤ ᱠᱟᱛᱮᱫ ᱪᱚᱨᱚᱠ ᱠᱩᱲᱤ ᱜᱮᱭ ᱵᱟᱯᱞᱟ ᱩᱛᱟᱹᱨ ᱠᱮᱫᱮᱭᱟ ᱾ ᱪᱮᱫᱟᱜ ᱥᱮ ᱥᱳᱦᱟᱜᱤ ᱫᱚ ᱵᱟᱭ ᱪᱚᱨᱚᱠᱟ ᱾
ᱢᱮᱱᱠᱷᱟᱱ ᱪᱚᱨᱚᱠ ᱠᱩᱲᱤ ᱵᱟᱯᱞᱟ ᱠᱟᱛᱮ ᱨᱮᱦᱚᱸ ᱴᱮᱢᱯᱟ ᱫᱚ ᱡᱟᱹᱥᱛᱤ ᱫᱤᱱ ᱥᱩᱞᱩᱠ ᱛᱮ ᱵᱟᱭ ᱥᱚᱝᱥᱟᱨ ᱫᱟᱲᱮ ᱠᱟᱣᱫᱟ ᱾
ᱟᱹᱰᱤ ᱫᱤᱱ ᱛᱟᱭᱚᱢ ᱛᱮᱦᱮᱧ ᱥᱮᱛᱟᱜ ᱨᱮ ᱜᱮ ᱨᱚᱝ ᱱᱟᱢᱵᱟᱨ ᱛᱮ ᱯᱷᱳᱱ ᱦᱮᱡ ᱮᱱᱟ ᱾ ᱯᱷᱳᱱ ᱦᱟᱱᱟ ᱥᱟᱦᱟ ᱠᱷᱚᱱ ᱟᱸᱡᱚᱢ ᱮᱱᱟ “ᱤᱧ ᱫᱚ ᱟᱨ ᱦᱚᱸ ᱟᱢᱟᱜ ᱡᱤᱭᱚᱱ ᱨᱤᱧ ᱨᱩᱣᱟᱹᱲ ᱪᱟᱞᱟᱜᱼᱟ ᱫᱟᱭᱟ ᱠᱟᱛᱮ ᱟᱞᱚᱢ ᱵᱟᱝ ᱤᱧᱟ ᱟᱯᱱᱟᱨ ᱤᱧ ᱢᱮ” ᱾ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮᱫ ᱥᱳᱦᱟᱜᱤ ᱵᱩᱡᱽ ᱛᱤᱭᱚᱜ ᱠᱮᱫᱟᱭ ᱯᱷᱳᱱ ᱫᱚ ᱴᱮᱢᱯᱟ ᱜᱮᱭ ᱯᱷᱳᱱ ᱞᱮᱫᱟ ᱢᱮᱱᱛᱮᱫ ᱾
***
